1, 2. Апостол Павелдиҥ 1 Тимофейге 6:20-деги сӧстӧриле болзо, Тимофейге не берилген?

КӦП сабада бис баалу немегисти кичеезин деп, улуска берип јадыс. Темдектезе, бис акчабысты банка салып, бу акча кайдӧӧн дӧ јылыйбас ла јакшы коруда болор деп иженер аргалу. Бис баалу немегисти та кемге де кичеезин деп берип турган болзоос, ого бӱдӱп турганысты кӧргӱзедис.

² 1 Тимофейге 6:20 кычырыгар. Апостол Павел Тимофейге баалу неме, ол эмезе, Кудайдыҥ амадузы керегинде чике билгир ле «Сӱӱнчилӱ Јар јарлаачыныҥ кереги» берилген деп эске алындырган (2 Тим. 4:2, 5). Павел Тимофейди ого берилгенди кичеезин деп кычырган. А биске Иегова кандый баалу неме берген? Биске оны нениҥ учун баалаар керек?

3, 4. Нениҥ учун Агару Бичиктеги чындыктар сӱреен баалу?

³ Иегова бойыныҥ Сӧзинеҥ, Агару Бичиктеҥ, биске чындыктардыҥ чике билгирин сыйлаган. Бу баалу чындыктар, не дезе, бу чындыктар бисти Кудайдыҥ најылары болорго ӱредет ле канайып чыннаҥ ла ырысту болорын кӧргӱзет. Бис Агару Бичиктеги чындыктарга бӱдӱп турзаас, тӧгӱн ӱредӱлердиҥ кулы болбозыс ла Кудайдыҥ кӧрӧр кӱӱни јок немени этпезис (1 Кор. 6:9—11).

⁴ Кудайдыҥ Сӧзиндеги чындыктарды база не баалу эдет? Иегова чындыктарды јӱк ле јобош, «чыннаҥ ла ӱргӱлји  јӱрӱм аларга турган улуска» (ЈТ) ачат (Ап. ижи 13:48). Андый улус бӱдӱмјилӱ ле керсӱ кул неге ӱредип турганыла јӧпсинет (Матф. 11:25; 24:45). Бис бу чындыктарды бойыс оҥдоп болбозыс. Бу чындыктардаҥ баалу не де јок (Укаа 3:13, 15).

5. Иегова биске база нени берген?

⁵ Иегова биске ӧскӧ дӧ баалу неме берген: ол биске улусты бойы керегинде чындыкка ӱретсин деп јакару берген (Матф. 24:14). Бистиҥ куучындап турган јарыс сӱреен баалу. Нениҥ учун дезе улуска Иегованыҥ билезине кожуларга болужат ла ӱргӱлји јӱрӱм алар арга берет (1 Тим. 4:16). Бистиҥ кажыбыстыҥ ла јарлаар иште туружып турганыс, кӧп пӧ эмезе ас па, эҥ јаан учурлу туружып јадыбыс (1 Тим. 2:3, 4). «Кудайга [«Кудайла», ЈТ] кожо иштеп јӱргенибис» — јаан кӱндӱ болуп јат (1 Кор. 3:9).

6. Кудайла кожо иштейтен арганы баалабай барган кезик христиандарла не болгон?

⁶ Тимофейдиҥ кӱндеринде кезик христиандар Кудайла кожо иштейтен арганы баалабай барган. Анайып, Димас бу телекейди сӱӱй береле, кожо јарлап јӱрген Павелди таштап ийген (2 Тим. 4:10). Фигелл ле Ермоген олорды Павел ле чилеп истежер деп коркый береле, јарлабай барган болор (1 Тим. 1:19, 20; 2 Тим. 2:16—18). Именей, Александр ла Филит јана баскандарга бӱдӱп, чындыкты артыргызып салгандар. Олордыҥ ончозыныҥ качан да кӧгӱзи тыҥ болгон, је кийнинде олорго не берилгенин баалабай барган болор.

7. Сатана кандый эп-аргаларга тузаланат?

⁷ Бисти Иегованыҥ берип салганын баалабай барзын деп, Сатана нени эдет? Бу оныҥ тузаланып турган кезик эп-аргалары. Темдектезе, телевидение, интернет, кинолор, газеттер, журналдар ла бичиктер ажыра Сатана чындыкты артыргызарга кӱӱнзеткедий кӱӱн-санааны ла кылык-јаҥды таркадып јат. Анайда ок ол бистерди јарлабазын деп, јажыт балдардыҥ јамандаганы ла истежӱлер ажыра коркыдарга албаданат. Бого коштой Сатана бисти чындыктаҥ туура апарарга, јана баскандардыҥ «тӧгӱн билгирин» уксын деп умзанат (1 Тим. 6:20, 21).

8. Дэниелдиҥ теми слерди неге ӱредет?

⁸ Бис ајарыҥкай болбозоос, чындыкты араайынаҥ баалабай барардаҥ айабазыс. Видеоойындарга кирип калган Дэниел * деп карындаштыҥ темин кӧрӱп ийектер. Ол куучындайт: «Мен видеоойындарды 10 јаш киреде ойноп баштагам, озо баштап ондо јаман ла неме јок болгон. Је оноҥ мен  араайынаҥ базыныш ла кӧрмӧстӧрлӧ колбулу ойындар ойноп баштагам». Учы-тӱбинде Дэниел видеоойындарда кӱнинде 15 частаҥ ӧй ӧткӱрип туратан. Ол оноҥ ары куучындайт: «Бу ойындарды ойноп, ого кӧп ӧй берип турганым Иеговала најылыгымды бузат деп, тӱҥей ле оҥдоп туратам. Је мениҥ јӱрегим катуланып калган, оныҥ учун мен кандый да библиялык принциптер буспай јадым деп бойымды токунадатам». Соот-јыргалдардаҥ улам бис Иегованыҥ берген баалу сыйларын баалабай, олорды јылыйтып салардаҥ айабазыс.

9. Павел 1 Тимофейге 1:18, 19-ла болзо, Тимофейди неге кӱӱнзеткен?

⁹ 1 Тимофейге 1:18, 19 кычырыгар. Павел Тимофейди «јакшы јуучыл чылап тартышсын» деп кӱӱнзеткен. Бу тегин тартыжу эмес, а кӧгӱс тартыжу болот, бис бу тартыжуда база туружып јадыс. Бис нениҥ учун јуучылдарга тӱҥей? Биске кандый кылык-јаҥдарга ӱренер керек? Павелдиҥ теминеҥ кандый беш ӱредӱ аларысты кӧрӱп ийектер. Бу ӱредӱлер биске берилгенди чеберлеп аларга болужар.

10. Кудайга нениҥ учун чындык болор керек?

¹⁰ Кудайга чындыгарды тыҥыдыгар. Јакшы јуучыл чындык болгоныла аҥыланат. Ол сӱӱп турган улузын эмезе нени баалап турганын корулаарга, бастыра ийде-кӱчин берип јуулажат. Павел Тимофейди Кудайга чындыгын тыҥытсын деп кӱӱнзеткен (1 Тим. 4:7). Бистиҥ Кудайга сӱӱжис ле чындыгыс канча ла кире тыҥ болзо, оныҥ бергенин чеберлеп аларга, бистиҥ кӱӱнис ончо ло кире тыҥ болор (1 Тим. 4:8—10; 6:6).

11. Дисциплина биске нениҥ учун керектӱ?

¹¹ Бойоорды дисциплинага ӱредигер. Јуучылга јуу-согушка јаантайын белен болорго, эди-канын јакшы тазыктырып турар керек. Тимофей ич-кӧгӱзин јакшы тазыктырган, нениҥ учун дезе ол Павелдиҥ јӧбиле, јастыра кӱӱниле тартышкан, Кудайга јарайтан кылык-јаҥын тыҥыткан ла ака-эјелерле куучындашкан (2 Тим. 2:22). Ого бу ончо керектерди эдерге, бойын дисциплинага ӱредер керек болгон. Биске де кинчектӱ кӱӱнисле тартыжып, јеҥӱ аларга дисциплина керек (Рим. 7:21—25). Анайда ок дисциплина јебрен кижинеҥ мойноп, јаҥы кижини алынарга, ол эмезе, бойысты оноҥ ло ары солыырга керектӱ болот (Еф. 4:22, 24). Темдектезе, бис сӱреен тыҥ арып каладыс, оныҥ учун јуунныҥ туштажузына барарга јеҥил эмес болот, је бу учуралда биске база дисциплина болужар (Евр. 10:24, 25).

12. Агару Бичикти оноҥ јакшы тузаланарга, биске не болужар?

¹² Јуулыжатан јепселле јакшы тузаланарга, јуучылга јаантайын таскадынар керек. Анайып ла биске Кудайдыҥ Сӧзиле јакшы тузаланарга ӱренер керек (2 Тим. 2:15). Бого биске јуунныҥ туштажулары болужар. Је бис улусты библиялык чындык чыннаҥ ла баалу деп бӱдӱмјилеерге турган болзоос, бисте Агару Бичикти таҥынаҥ ӱренетен программа болор керек. Кудайдыҥ Сӧзи бистиҥ бӱдӱмјибисти тыҥыдар аргалу. А бого биске Агару Бичикти јӱк ле кычырар керек эмес. Библиялык чындыктарды чын оҥдоорго ло олорды јартап билерге, кычырганысты шӱӱп сананар керек ле бистиҥ бичиктердиҥ болужыла шиҥжӱ ӧткӱрер керек (1 Тим. 4:13—15). Ол тушта бис Кудайдыҥ Сӧзин тузаланып, улусты ӱредер аргалу. Оныҥ учун Агару Бичиктеги ӱлгерди кижиге јӱк ле кычырып берер керек эмес, је кижини анда не керегинде айдылганын ла оны канайып тузаланарын оҥдоп алзын  деп, болужар керек. Агару Бичикти таҥынаҥ шиҥдеп турзаас, бис јакшы ӱредӱчилер болуп каларыс (2 Тим. 3:16, 17).

13. Еврейлерге 5:14-лӧ болзо, биске нениҥ учун ӧткӱн болор керек?

¹³ Ӧткӱн болугар. Јуучылга јеткерди озолондыра билип, оноҥ кыйыжарга албаданар керек. Биске де јеткерлӱ айалгаларды озолондыра кӧрӧргӧ ӱренип, андый айалгаларга кирбес керек (Укаа 22:3; Еврейлерге 5:14 кычырыгар). Темдектезе, биске амырашты ла соот-јыргалды ойгор талдаар керек. Телешоуларда ла кинолордо кӧп сабада балыр керектер кӧргӱзилет. Мындый керектер Кудайды јамандайт ла улуска каршу јетирет. Оныҥ учун бис Кудайыска сӱӱжисти араайынаҥ уйадаткадый соот-јыргалдардаҥ тууралайдыс (Еф. 5:5, 6).

14. Ӧткӱн болоры Дэниелге канайып болушкан?

¹⁴ Бу јӧрмӧлдӧ айдылган Дэниел деп карындаш базыныш ла кӧрмӧстӧрлӧ колбулу ойындардыҥ каршузын оҥдоп баштаган. Watchtower Library деген электронный библиотеканыҥ болужыла ол бу темага материал таап, оны шиҥдеген. Бу ого кандый камаанын јетирген? Ол Иеговала колбуларын ӱреп турган видеоойындарды ойнобой барган. Анайда ок онлайн ойындардаҥ чыгып, кожо ойногон улусла ончо колбуларын токтодып салган. Дэниел куучындайт: «Видеоойындар ойноордыҥ ордына јуундагы најыларымла куучындажып, тышкары ару кейде болуп туратам». Эмди ол пионер ле аксагал болуп иштейт.

15. Јана баскандардыҥ тӧгӱниниҥ каршузы кандый?

¹⁵ Биске Тимофейдеҥ тем алып, јана баскандардыҥ каршулу јетирӱлерин билип турар керек (1 Тим. 4:1, 7; 2 Тим. 2:16). Темдектезе, олор бистиҥ ака-эјелер керегинде тӧгӱн јайардаҥ ла Иегованыҥ организациязына бистиҥ бӱдӱмјибисти алаҥзыдардаҥ айабас. Јана баскандардыҥ јетирӱлери бистиҥ бӱдӱмјибисти уйададар болор. Биске бу јетирӱлердеҥ кыйыжып турар керек. Мындый јетирӱлерди «санаазы кемжик, чындыкты јектеген улус» таркадат. Олор бистерди сӧс блаажып, бой-бойысла урушсын деп амадайт. Олор бисти олордыҥ тӧгӱнине кирип, акаларга бӱтпей барзын деп кӱӱнзейт (1 Тим. 6:4, 5).

16. Биске недеҥ тууралаар керек?

 ¹⁶ Эҥ учурлу ишти ундыбагар. «Христос Иисустыҥ јакшы јуучылы чылап», Тимофейге ајаруны бу телекейдиҥ акча-јӧӧжӧзине ле ӧскӧ амадуларына эмес, агару ишке эдер керек болгон (2 Тим. 2:3, 4). Биске де ајаруны акча-јӧӧжӧгӧ этпес керек. «Јӧӧжӧгӧ тартылатаны» бистиҥ Иеговага сӱӱжисти, оныҥ Сӧзине быйанысты ла улуска чындыкты куучындайтан кӱӱнисти туй базып койордоҥ айабас (Матф. 13:22). Биске тегин јӱрӱм јӱрер керек ле бойыстыҥ ийде-кӱчисти ле ӧйисти «элдеҥ озо [Кудайдыҥ] Каандыгын бедире[ерине]» берер керек (Матф. 6:22—25, 33).

17, 18. Иеговала најылыгысты кичееп аларга, биске нени эдер керек?

¹⁷ Керектӱ алтамдарды капшай эдерге белен болыгар. Јуучылга табару болгодый болзо, ого кандый алтамдар эдерин озодоҥ сананып койор керек. Иегованыҥ биске берип салганын чеберлеп аларга турган болзоос, јеткер болорго турганын кӧрӱп, керектӱ алтамдарды бис тӱрген эдерис. Мында биске не болужар? Нени эдетениниҥ чокум планы.

¹⁸ Тем кӧрӱп ийектер. Учар алдында самолеттыҥ пассажирлерине авария тушта нени эдерин јартап, јуугындагы чыгатан јерлерди кӧргӱзип берип јат. Нениҥ учун? Авария болзо, самолеттоҥ капшай чыга берерге. Анайып ла биске кинодо, телеберилтеде, интернетте бистиҥ кӧзиске балыр ла коркышту калју немелер кӧрӱнип келзе эмезе јана баскандардыҥ материалдары чыгып келзе, мынаҥ канайып «чыгарын» озодоҥ сананып койор керек. Бис бого белен болзоос, Иеговала најылыгысты корулаарга ла оныҥ кӧзинде ару артарга, керектӱ алтамдарды капшай эдип ийерис (Сар. 101:3; 1 Тим. 4:12).

19. Иегованыҥ биске бергенин баалап турзаас, кандый алкыштар аларыс?

¹⁹ Иегованыҥ биске бергенин — библиялык баалу чындыктарды ла бу чындыктарга улусты ӱредетен јакаруны — баалаар керек. Ол тушта бисте ару уйат болор, учурлу јӱрӱм јӱрерис ле улусты Кудайла таныштырып турганыстаҥ улам јӱрегисте сӱӱнчи болор. Иегова биске кыйалта јогынаҥ болужар. Оныҥ учун бис оныҥ бергенин чеберлеп аларыс (1 Тим. 6:12, 19).