1, 2. а) Укаа сӧстӧр 16:31-ле болзо, јажы јаанап калган ака-эјелерге бис канайып баштанар учурлу? б) Бу јӧрмӧлдӧ кандый сурактардыҥ карууларын билип аларыс?

 АМЕРИКАНЫҤ Арканзас деп штадыныҥ национальный парктарыныҥ бирӱзине келип турган улус алмаз таап алар аргалу. Бу баалу таштардыҥ кезиги јердиҥ ле ӱстинде јадат. Је олорды улус кӧрӱп те турза, арчып јазабаганынаҥ улам олордыҥ алдында чыннаҥ ла баалу эрјине јаткан деп керексибей, јанынаҥ ӧдӧ берет.

² Јажы јаанап калган Кудайдыҥ чындык ишчилери андый алмазтарга тӱҥей. Олор чыннаҥ ла баалу! Кудайдыҥ Сӧзинде олордыҥ буурыл чачы јараш ӧрӱмелле тӱҥдештирилет. (Укаа сӧстӧр 16:31 кычырыгар; 20:29.) Кезикте бис олорго ајару этпей, олорды баалабай каладыс. Је олордыҥ јаражын кӧрӧргӧ ӱренип алзаас, кандый да байлыктаҥ баалу эрјинени таап аларыс. Айдарда, ӱч сурак кӧрӱп ийектер: 1) Иегова јажы јаанап калган ишчилерин нениҥ учун баалап јат? 2) Бойыныҥ организациязында Иегова олорго кандый иш берген? 3) Олор ченемелиле ӱлешсин деп, биске нени эдер керек?

3. Иегова јажы јаанап калган чындык ишчилерин нениҥ учун баалап јат? (Сарын 92:12—15).

³ Иегова јажы јаанап калган чындык ишчилерин баалап јат. Ол олорды сӱреен јакшы билер ле олорды јакшы кылык-јаҥдары учун баалап јат. Бастыра јӱрӱмине ого чындык иштеген јажы јаанап калгандар бойыныҥ ченемелиле јииттерле ӱлежип турза, Иеговага јарап јат (Иов 12:12; Укаа 1:1—4). Анайда ок Иегова олорды турумкайы учун баалайт (Мал. 3:16). Бу ака-эјелердиҥ јӱрӱми јеҥил эмес те болгон болзо, олордыҥ бӱдӱмјизин не де уйадатпаган. Олор ижемјизин јылыйтпаган. Эмди олор келер  ӧйгӧ оноҥ тыҥ иженет. Иегова олорды база нениҥ учун сӱӱп турган дезе, олор карып та калган болзо, оныҥ ады керегинде оноҥ ло ары куучындагылайт. (Сарын 92:12—15 кычырыгар.)

4. Бистиҥ јажы јаанап калган ака-эјелеристи не токунадар аргалу?

⁴ Јажы јаанап калган кару ака-эјелер, эткен ончо ижеерди Иегова бир де ундыбай јат деп алаҥзыбагар! (Евр. 6:10). Слердиҥ јарлаар ишке сӱӱжигер теҥеридеги Адагарды сӱӱндирип јат. Јӱрӱмеерде коркышту кӱч ченелтелер де болгон болзо, слер ончозын ӧдӱп чыкканаар. Бу бастыра јылдардыҥ туркунына библиялык чындык нормаларла јӱрӱп, јуунда јаан учурлу иш бӱдӱрип, јииттерди ӱреткенигер. Слер Кудайдыҥ организациязыла теҥ-тай барарга албаданып, ӧйин толо берип тургандарга болужып јадыгар. Иегова слерди бек бӱдӱмјигер учун баалап, ого «чындык улусты артыргыспас» деп, сӧзин берет (Сар. 37:28). Ол слерге мындый сӧстӧрлӧ баштанат: «Буурайып та калзаар, мен слерге болужарым» (Иса. 46:4). Оныҥ учун Кудайдыҥ организациязында слердиҥ эдип турган ижигер калас деп, бир де сананбагар!

5. Јажы јаанап калган ака-эјелерге нени ундыбас керек?

⁵ Јажы јаанап калган ака-эјелер Иегованыҥ организациязында кӧпти эдер аргалу. Олордыҥ ийде-кӱчи алдындагызына кӧрӧ ас, је ченемели јаан. Иеговада олорго башка-башка јакылталар бар. Бу чын ла андый деп, алдындагы ла эмдиги ӧйдиҥ ишчилериниҥ темдеринеҥ кӧрӱнип јат.

6, 7. Чындыгы учун кайралдаткан јажы јаанап калган ишчилердиҥ темдерин куучындап беригер.

⁶ Агару Бичикте јажы јаанап та калган болзо, Иегованыҥ јакылталарын оноҥ ло ары бӱдӱрген чындык ишчилер керегинде айдылат. Темдектезе, Иегова Моисейди Израиль албатыныҥ башчызы ла бойыныҥ судурчызы эдип кӧстӧӧрдӧ, ого 80 јаш кире болгон. Иегова Даниилди бойыныҥ адынаҥ јарлазын  деген тушта, ол 90 јаштаҥ ажа берген. Кудай апостол Иоаннды Ачылта деп бичикти бичидерде, ого база 90 јаш кире болгон.

⁷ Кудайдыҥ кезик чындык ишчилери керегинде ас айдылып јат. Агару Бичик кычырып турган улус олорды ајарбай да калардаҥ айабас. Је Иегова олорды чындыгы учун ајару јок ло кайрал јок артыргыспаган. Темдектезе, Агару Бичикте «акту, ак санаалу» Симеон керегинде јӱк бир катап айдылат. Је Иегова оны јакшы билген. Оныҥ учун ого кичинек Иисусты кӧрӧргӧ, анайда ок Иисус ла оныҥ энези керегинде судур айдар аҥылу арга берген (Лука 2:22, 25—35). База бир тем — тул артып калган 84 јашту судурчы Анна. Ол ӧргӧӧни бир де артыргыспай јӱрген. Бӱгӱнги сӧстӧрлӧ айтса, ол јуунныҥ туштажуларын бир де божотпогон. Иегова Аннаны кайрал јок артыргыспады. Ол кичинек Иисусты база кӧргӧн. Иегова Симеон ло Аннаны баалаган деп, алаҥзыбай јадыс (Лука 2:36—38).

8, 9. Ака-эјелерге тул арткан эјелер кандый тем болор аргалу?

⁸ Бӱгӱнги кӱнде јажы јаанап калган ака-эјелер јииттерге сӱреен јакшы тем кӧргӱзип јат. Лоис Дидур эјениҥ темин кӧрӱп ийектер. 21 јаштуда ол Канадада специальный пионердиҥ ижин баштаган. Оноҥ ол ӧбӧӧни Джонло кожо кӧп јылдардыҥ туркунына јорыкчы ишчиниҥ ижинде болгон. Оныҥ кийнинде олор 20 јылдаҥ ажыра Канаданыҥ Бет-Элинде иштеген. Лоис эјеге 58 јаш болордо, олорды Джонло кожо Украинадӧӧн кӧчсин деп сурагандар. Олор мыны канайып алынган? Јажы јаанап калган улуска ӧскӧ ороондӧӧн кӧчӧргӧ јеҥил эмес. Је олор бого сӱӱнип јӧпсинерде, Джонды јербойыныҥ филиалыныҥ комитедине кӧстӧгӧн. Је 7 јылдаҥ Джон божоп калган, а Лоис эје Украинаныҥ филиалында оноҥ ло ары иштеерге сананып алган. Эмди ого 81 јаш. Ол алдындагы ла чылап, Иеговага кӧпти эдип јат ла Бет-Элдиҥ ончо билези оны сӱреен тыҥ сӱӱп јат.

⁹ Лоис ошкош эјелер ӧбӧӧни тирӱ болгон тушта чылап, кӧскӧ тыҥ илинбей јат. Је бу, олор баалу алмазтар болбой барган деп кӧргӱспей јат. Иегова олорго кӧп јылдардыҥ туркунына ӧбӧӧндӧрине болужып, алдындагызы ла чылап, ого чындык болгонына сӱреен быйанду болот (1 Тим. 5:3). Анайда ок бу эјелер јииттерге чыннаҥ ла болуш болор аргалу.

10. Тони ака бистерге кандый тем болот?

¹⁰ Јажы јаанап калганынаҥ улам айылдарынаҥ чыгып болбой турган ла болуш керексинип турган ака-эјелерди бис база сӱреен баалап јадыс. США-да каргандардыҥ туразында јадып турган Тони аканыҥ темин кӧрӱп ийектер. Ол  1942 јылдыҥ куран айында 20 јаштуда сууга чӧҥӱрилген. Оноҥ јаан удабай, оны политикага киришпегенинеҥ улам эки јарым јылга тӱрмелеп салган. Тони ла оныҥ ӱйи Хильда кызын ла уулын чындыкта чыдаткан. Ол кӧп јылдардыҥ туркунына ӱч јуунда председательствующий надзиратель (эмдиги ӧйлӧ болзо, аксагалдардыҥ јӧбиниҥ координаторы) болгон. Анайда ок бойыныҥ теократиялык аймагында курултайдыҥ кӧрӧӧчизи болгон. Бого коштой тӱрмелердиҥ бирӱзинде ол јуунныҥ туштажуларын ла ондо отурган улусла Агару Бичикле ӱредӱлер ӧткӱрген. Эмди Тониге 98 јаш, је ол амыраар деп сананбай јат. Иеговага оноҥ ло ары ийде-кӱчи јеткенче иштеп, јуунла кожо јаантайын иштеерге албаданат.

11. Болуш керек болуп турган јажы јаанап калган ака-эјелерди тооп турганысты бис канайып кӧргӱзерис?

¹¹ Болуш керек болуп турган ака-эјелерди тооп турганысты бис канайып кӧргӱзерис? Аксагалдар олорго јарлаар иште туружарга, јуунныҥ туштажуларын божотпоско ло јуунныҥ программазын угарга болужар аргалу. А бистиҥ кажыбыста ла олордыҥ айылына барып келер ол эмезе видеосвязьла куучындажар арга бар. Је биске анчада ла бойыныҥ јууныныҥ јеринде јатпай турган ака-эјелерге, темдектезе, Керечи эмес тӧрӧӧндӧринде эмезе каргандардыҥ туразында јадып тургандарга ајару эдер керек. Оноҥ ӧскӧ олор ундылып калардаҥ айабас. Јажы јаанап калган кезик ака-эјелер бойлоры керегинде куучындаарга эбијоксынып јат. Оныҥ учун олордоҥ алдында Иеговага канайып иштегенин сурап турзаас, бойыска јаан туза аларыс.

12. Јуундагы јажы јаанап калган ака-эјелерле јууктада таныжып турзаар, нени билип аларыгар?

¹² Бойыстыҥ јууныстагы јажы јаанап калган ака-эјелерле јууктада таныжып турзаас, олордыҥ бек бӱдӱмјизин кайкаар болорыс. Темдектезе, Харриетт эје 1920 јылдарда сууга чӧҥӱрилген. Оноҥ Нью-Джерси деп штатта (США), канча јылдардыҥ туркунына бойыныҥ јуунында иштеген. Кийнинде ол бойыныҥ кызыныҥ айлына јадарга кӧчӧ берген. Јаҥы јуундагы ака-эјелер Харриетт эјеле јууктада таныжып, ол чыннаҥ ла баалу эрјине деп, оҥдогылап ийген. Олорды анчада ла Харриетт эјениҥ сууга чӧҥӱрилген кийнинде болгон учуралдары кайкаткан. Ол кажы ла катап јарлап барган сайын тиш арчып турган щётканы алып туратан, нениҥ учун дезе оны кандый ла ӧйдӧ отургызып салардаҥ айабас деп билген. 1933 јылда оны эки катап бир неделеге тӱрмеге отургыскан. Бу ӧйдиҥ туркунына оныҥ Керечи эмес ӧбӧӧни ого болужып, ӱч балазын кичееген. Айдарда, биске Харриетт эје ошкош ака-эјелерди баалаар керек!

13. Иегованыҥ организациязында јажы јаанап калган ака-эјелер баалу деп, недеҥ кӧрӱнет?

¹³ Иегова христиан јуунда јажы јаанап калган ака-эјелерге јаан учурлу иш берген. Иегова бойыныҥ организациязына, анайда ок олордыҥ кажызына ла алкыжын берип турган деп, олор бастыра јӱрӱмине кӧргӧн. Олор јастырган да болзо, је бойыныҥ јастыраларынаҥ ӱренген. Оныҥ учун јажы јаанап калган ака-эјелерди ойгор улус деп кӧрӱп, олордоҥ ӱренигер (Укаа 18:4). Андый ака-эјелерле јууктада таныжып турзагар, бӱдӱмјигер тыҥыыр ла кӧп немеге ӱренип алараар.

14. Јаҥды такыганы 32:7 јииттерди неге кӱӱнзедет?

¹⁴ Јажы јаанап калган ака-эјелерге бойоор јууктап куучындажыгар. (Јаҥды такыганы 32:7 кычырыгар.) Олордыҥ кӧзи уйадап, базыды уурланып, куучыны да араай болуп калган болзо, олор эмди де кӧпти эдерге кӱӱнзеп јат. Анайда ок олор Иегованыҥ алдында јакшы ат-јолду (Эккл. 7:1). Олорды Иегова нениҥ учун баалап турганын ундыбагар ла оноҥ ло ары тооп јӱрӱгер. Елисейдий кӱӱн-санаалу болугар. Ол Илья судурчыныҥ калганчы кӱндерине јетире кожо болгон. Ого Елисей: «Сени артыргыспазым» — деп, ӱч катап айткан (2 Каан. 2:2, 4, 6).

15. Јажы јаанап калган ака-эјелерге кандый сурактар берерге јараар?

¹⁵ Јажы јаанап калган ака-эјелерге тоомјылу ла јалакай баштанып, олорды јӱрӱми керегинде куучындап берзин деп сурагар (Укаа 1:5; 20:5; 1 Тим. 5:1, 2). Темдектезе, олорго мындый сурактар берерге јараар: «Чындыкты таап алганаар деп канайып бӱдӱмјиленгенеер? Слерди Иеговага кандый учуралдар јууктаткан? Эмезе слерге Иеговага канча јылдардыҥ туркунына сӱӱнчилӱ иштеерге не болужып јат?» (1 Тим. 6:6—8). Оноҥ олорды лаптап угугар.

16. Јажы јаанап калгандар ла јииттер бой-бойыла куучындажып турза, кандый туза болот?

¹⁶ Јажы јаанап калгандар ла јииттер бой-бойыла куучындажып турза, јаан туза болуп јат (Рим. 1:12). Јииттер Иегова чындык ишчилерин бир де артыргыспай, кичееп турган деп будӱмјиленет. А јажы јаанап калгандар олорды сӱӱп ле баалап турган деп сезет. Анайда ок јажы јаанап калгандарга Иегова кандый алкыштар бергенин куучындаарга сӱреен јарап јат.

17. Кудайга чындык јажы јаанаган ака-эјелер јылдаҥ јылга јаранат деп нениҥ учун айдарга јараар?

¹⁷ Јаш јаанаган сайын тыш бӱдӱмис там ла ӱрелип јат, је Иеговага чындык артып турган улус јылдаҥ јылга јаранып јат (1 Фес. 1:2, 3). Нениҥ учун мынайып айдарга јараар? Нениҥ учун дезе олор бастыра јӱрӱмине Кудайдыҥ агару тынына солынарга ла јакшы кылык-јаҥдарга ӱренерге арга берген. Андый ака-эјелерле јууктада таныжып, олорды тооп, олордоҥ ӱренип турзаас, олор чыннаҥ ла баалу эрјинелер деп, кӧрӱп ийерис.

18. Келер јӧрмӧлдӧ нени кӧрӧрис?

¹⁸ Јажы јаанап калгандар ла јииттер бой-бойын баалап турза, јуунныҥ кӧгӱзи бек болор. Келер јӧрмӧлдӧ олор јииттерди баалап турганын канайып кӧргӱзер аргалу деген суракты кӧрӧрис.