1. Јажы јаанап калган ака-эјелер кандый амаду тургузар аргалу?

 ИЕГОВАГА јажы јаанап калган ака-эјелер алдындагызына кӧрӧ, кӧпти эдип болбой турганынаҥ улам санааркап јат. Јаш јаанаган сайын мындый санааркаштар там ла тыҥып јат. Олордыҥ мынайып санааркаары јолду. Нениҥ учун дезе јылдар ӧдӱп, ийде-кӱчи там ла астайт. Је андый да болзо, олор ойгор ло ченемелдӱ. Оныҥ учун олор јииттерге бойыныҥ нени эдер аргалузын кӧрӱп, јуунда јаҥы молјулар аларга болужар аргалу. Кӧп јылдардыҥ туркунына аксагал болуп иштеген ака мынайып куучындайт: «Јаш јаанаган сайын ийде-кӱчиҥ немеге јетпей турганын оҥдоп јадыҥ, је карын јуунда молјулар алатан бӱдӱмјилӱ карындаштар бары кандый јакшы».

2. Бу јӧрмӧлдӧ нени шӱӱжерис?

² Ӧткӧн јӧрмӧлдӧ јажы јаанап калган ака-эјелер ле јииттер најылашканынаҥ кандый туза алып турганын кӧргӧнис. А бу јӧрмӧлдӧ јобош болоры, бойыныҥ кемин билери ле быйанду ла кысканбас болоры јажы јаанап калган ака-эјелерге јииттерле кожо иштеерге канайып болужарын ла мынаҥ бастыра јуунга кандый туза болорын шӱӱжерис.

3. Филиппыдагыларга 2:3, 4 аайынча болзо, јобош болоры недеҥ кӧрӱнет ле биске нениҥ учун јобош болор керек?

³ Јажы јаанап калган ака-эјелер јииттерге болужарга кӱӱнзеп турган болзо, олорго јобош болор керек. Јобош болоры — ӧскӧ улусты бойынаҥ бийик деп кӧрӧри.  (Филиппыдагыларга 2:3, 4 кычырыгар.) Кӧп учуралдарда кандый бир јакылтаны бӱдӱрерге тузалу ла библиялык принциптерге келижип турган бир канча эп-аргалар бар. Јажы јаанап калгандарга мыны оҥдоп, ӱренгени аайынча алдындагы чылап этпеске, јобош болоры болужар (Эккл. 7:10). Бис олорды ченемелдӱ деп алаҥзыбай јадыс. Је андый да болзо, јажы јаанап калган ака-эјелер бу телекейдиҥ айалгазы тӱрген солынып јат ла јаҥы эп-аргаларга ӱренер керек деп, оҥдоп јат (1 Кор. 7:31).

4. Левиттердиҥ ле аймак кӧрӧӧчилердиҥ нези тӱҥей?

⁴ Анайда ок јобош болоры јажы јаанап калган ака-эјелерге јиит тужында чылап кӧпти эдип болбос деп, оҥдоорго болужат. Темдектезе, аймак кӧрӧӧчилерди алактар. Олор 70 јашка јетсе, бу ижин артыргызарга келижип јат. Је бу јеҥил эмес болор. Нениҥ учун дезе олор кӧп ака-эјелерди кичееп, бу ишке бастыра бойын берип, эмди де, алдындагызы ла чылап, бу ишти бӱдӱрерге кӱӱнзейдилер. Је андый да болзо, олор бу ишке ийде-кӱчи кӧп карындаштар керек деп, оҥдогылап јат. Мынызыла олор јебрен Израильде 50 јашка јетире агару байканда иштеген левиттерге тӱҥей. Бу ишчилердиҥ сӱӱнчизи кандый бир јакылта бӱдӱреринеҥ камаанду болбогон. Олор башка-башка јакылталар бӱдӱрип, јиит левиттерге болушканынаҥ  сӱӱнчи алган (Тоол. 8:25, 26). Анайып ла аймак кӧрӧӧчи болгон акалар. Олор алдындагы ла чылап бир канча јуундарды эмес, јӱк ле иштеп турган јуунын кичееп тыҥыдат.

5. Дэн ле Кэтиниҥ теми слерди неге ӱредет?

⁵ 23 јылдыҥ туркунына аймак кӧрӧӧчи болуп иштеген Дэн деп аканыҥ темин кӧрӱп ийектер. Ого 70 јаш толордо, оны ла ӱйин Кэтини специальный пионердиҥ ижине кӧстӧгӧн. Бу јаҥы айалгаларга олор ӱренген бе? Дэнниҥ айтканыла, ондо эмди бош ӧй чек јок. Ол бойыныҥ молјузынаҥ ӧскӧ карындаштарга болушчы ишчилер болорго болушкан. Јарчыларды улусту јерлерде ле тӱрмелерде јарлаарга ӱреткен. Јажы јаанап калган кару ака-эјелер, слер ӧйӧӧрди толо берип, иштеп турганаар ба, јок по слерде улуска болужатан кӧп аргалар бар. Оныҥ учун солынып турган айалгаларга эптежигер, јаҥы амадулар тургузыгар ла ајаруны нени эдип болбозыгарга эмес, је нени эдип билереерге эдигер.

6. Бойыныҥ кемин билип турары нениҥ учун ойгор болот? Тем куучындап беригер.

⁶ Бойыныҥ кемин оҥдоп турган кижи нени эдип ийерин, нени эдип болбозын оҥдоп јат (Укаа 11:2). Ол бойыныҥ кемин оҥдоп турганынаҥ улам чын кӧрӱмдӱ болуп, бойынаҥ ӧткӱре кӧпти сакыбай јат. Бу ого оноҥ ло ары сӱӱнчилӱ ле албаданып иштеерге болужат. Андый кижини кайыр тӧҥди ӧрӧ чыгып јаткан водительге тӱҥейлеерге јараар. Машинаныҥ двигатели токтой бербезин деп, водитель машинаны араай баратан скоростько тургузып јат. Эмди машина араай барар, је ол токтобос. Анайып ла бойыныҥ кемин оҥдоп турган кижи Иеговага ижи токтоп калбазын деп, сӱрлеп айтса, скоростьты араайладып јат (Флп. 4:5).

7. Верзеллийдиҥ бойыныҥ кемин билери недеҥ кӧрӱнген?

⁷ Верзеллийдиҥ темин эске алып ийектер. Верзеллийге 80 јаш болордо, Давид каан оны бойыныҥ туразына келип иштезин деп сураган. Је ол бойыныҥ кемин билип јӧпсинбеген. Нениҥ учун дезе оныҥ јажы јаанап, ийде-кӱчи уйадап калган болгон. Оныҥ ордына ол Давидле кожо јиит Кимгамды барзын деп сураган (2 Сам. 19:35—37). Верзеллий ле чилеп, јажы јаанап калган акалар карындаштарга Иеговага иштейтен арганы сӱӱнип берет.

8. Давид каан бойыныҥ кемин билер деп, ӧргӧӧ тударында канай кӧрӱнген?

⁸ Анайда ок бойыныҥ кемин јакшы билер кижи Давид каан болгон. Ол Иеговага ӧргӧӧ тударга амадаган. Је бу ӧргӧӧни јиит Соломон тудар деп, Иегованыҥ чыгарган јӧбиле ол јӧпсинип, оны тударына јаан болужын јетирген (1 Лет. 17:4; 22:5). Соломон јиит ле ченемел јок, оныҥ учун бу ишти ол бойы башкарза артык болор деп сананбаган (1 Лет. 29:1). Нениҥ учун дезе бу иштиҥ једими кижиниҥ јажынаҥ ла ченемелинеҥ эмес, Иегованыҥ алкыжынаҥ камаанду деп, Давид сӱреен јакшы оҥдогон. Бӱгӱнги кӱнде јажы јаанап калган христиандар Давид ле чилеп, јакылталар солынып та турза, Иеговага оноҥ ло ары албаданып иштеп јат. Олордыҥ эдетен ижин Иегованыҥ алкыжыла јииттер де эдип салар деп, олор алаҥзыбай јат.

9. Комитеттиҥ филиалындагы бир ака бойыныҥ кемин билер кижи деп канайып кӧргӱскен?

 ⁹ Бӱгӱнги кӱнде, бойыныҥ кемин билер кижи деп, Сигэо аканы айдарга јараар. 1976 јылда, ого 30 јаш болордо, оны филиалдыҥ комитединде иштеерге кӧстӧгӧн. 2004 јылда ол филиалдыҥ комитединиҥ координаторы болуп калган. Оноҥ јажы јаанаганынаҥ улам бу ишти апарарга ого кӱч болуп турганын оҥдоп ийген. Ол Иеговага мӱргӱп, санааркаштарын куучындаган кийнинде, координатордыҥ ижин јиит ака эткен болзо, јакшы болор деп сананган. Сигэо ака ижин артыргызып та салган болзо, филиалдыҥ комитедине оноҥ ло ары јаан болужын јетирет. Верзеллий, Давид каан ла Сигэо аканыҥ темдеринеҥ јобош ло бойыныҥ кемин билер кижи јииттердиҥ ченемел јогына эмес, је олордыҥ нени эдип билер аргазына ајару эдет деп кӧрӱнет. Андый кижи јииттерле маргышпай, олорды Кудайга кожо иштеп турган улус деп кӧрӧт (Укаа 20:29).

10. Јииттерге јажы јаанап калган ака-эјелердиҥ кӧрӱми кандый?

¹⁰ Јажы јаанап калган ака-эјелер јииттерди Иегованыҥ сыйы деп кӧрӧт. Олордыҥ ийде-кӱчи там ла астап јат, оныҥ учун олор јииттерге јуунда ла јарлаар иште бойына молјулар аларга белен болуп турганы учун быйанду болот.

11. Јажы јаанап калгандар јииттердиҥ болужын алып турза, туза болуп турган деп Руфь 4:13—16 канайып кӧргӱзет?

¹¹ Агару Бичикте Ноеминьниҥ учуралы јажы јаанап калган ака-эјелерди  јииттерге быйанду болорго кӱӱнзедет. Баштап тарый Ноеминь ӧбӧӧни јок артып калган Руфьти тӧрӧл јерине јанзын деп јайнаган. Је Руфь кайын энезин јаҥыскан артыргыспай, оныла кожо Вифлеемдӧӧн барып јат. Ноеминь дезе бого тыҥ сӱӱнип, Руфьтиҥ болужын алган (Руфь 1:7, 8, 18). Бу олордыҥ экилезине јаан алкыш болгон! (Руфь 4:13—16 кычырыгар.) Јобош болоры јажы јаанап калган ака-эјелерди Ноеминьнеҥ тем аларга кӱӱнзедер.

12. Апостол Павел кемдерге ле не учун быйанду болгон?

¹² Апостол Павел ака-эјелердиҥ болужы учун база быйанду болгон. Темдектезе, ол Филиппыдагы јуунга ого акча-манатла болушканы учун быйанын айдат (Флп. 4:16). Анайда ок ол Тимофейдиҥ болужын тыҥ баалаган (Флп. 2:19—22). Бого коштой оны каруулга алып, Римдӧӧн апарып јадарда, оныҥ кӱӱн-санаазын кӧдӱрип келген ака-эјелер учун Кудайга быйанын ол база айткан (Ап. ижи 28:15). Павел бойы јарлаарга ла јуундарды тыҥыдарга канча муҥ километр јерлер ӧткӧн. Је ол бир де бийиркенбей, ака-эјелердиҥ болужын алган.

13. Јажы јаанап калгандар јииттер учун быйанын канайып кӧргӱзер аргалу?

¹³ Јажы јаанап калган ака-эјелерде јииттерге болужы учун быйанын кӧргӱзетен аргалар кӧп. Олор слерди баратан јереерге јетирип саларга турза эмезе магазиннеҥ керектӱ немени садып экелерге турган болзо ол эмезе айылыгардыҥ ижин эдип ийерге турза, олордыҥ болужын аларга јӧпсинигер. Мындый болушты Иегованыҥ сӱӱжи деп кӧрӱгер. Слер јуук најылар болуп калар аргалу. Оныҥ учун јииттерге Иеговага јууктаарга болужып туругар. Анайда ок јуунныҥ керектерин ле јарлаар иште олордыҥ албаданып иштеп турганын кӧрӱп, сӱӱнип турганыгарды айдыгар. Олорло кожо болуп, јӱрӱмеерде болгон учуралдарды куучындап туругар. Анайып, слер јуунга јууктадып алган јииттер учун Иеговага быйаныгарды кӧргӱзереер (Иоанн 6:44; Кол. 3:15; 1 Фес. 5:18).

14. Давидтиҥ кысканбас болгоны недеҥ кӧрӱнген?

¹⁴ Давид каанныҥ теминеҥ јажы јаанап калгандар база бир учурлу кылык-јаҥга ӱренер аргалу — кысканбас болорына. Ӧргӧӧ тудулган кийнинде, Соломон уулыныҥ ады чыгатан да болзо, ӧргӧӧ тударына Давид сӱреен јаан берӱ эткен (1 Лет. 22:11—16; 29:3, 4). Слерде теократиялык туралар тудар ийде-кӱч јок то болзо, слер бу ишке акту јӱрегердеҥ берӱлер эдип, јӧмӧжӧр аргалу. Анайда ок јииттерле ченемелеерле ӱлежер аргалу.

15. Павелдиҥ кысканбас болгоны недеҥ кӧрӱнген?

¹⁵ Апостол Павел база кысканбас кижи болгон. Ол Тимофейди миссионер ижине кожо барзын деп кычырган. Анайып, Павел Тимофейди јарлаарга ла ӱренчиктер белетеерге ӱреткен (Ап. ижи 16:1—3). Кийнинде Тимофей Павелдиҥ ӱреткен эп-аргаларын тузаланып, јакшы ӱредӱчи ле јарчы болуп калган (1 Кор. 4:17).

16. Сигэо ака карындаштарды нениҥ учун ӱреткен?

¹⁶ Бӱгӱнги де кӱнде јажы јаанап калгандар јииттерди бойыныҥ эткен ижине  ӱредип јат. Олор јииттерди ӱредип салза, бойлоры эш-кереги јок болуп калар деп санааркабай јадылар. Темдектезе, ӧрӧги айдылган Сигэо ака узак јылдардыҥ туркунына филиалдыҥ комитединдеги карындаштарды ӱреткен. Нениҥ учун? Нениҥ учун дезе ол Каандыктыҥ керектери токтоп калзын деп кӱӱнзебеген. Оноҥ ого молјуларын бӱдӱрерге кӱч боло берерде, оныҥ ордына јакшы ӱредип салган карындаш иштеп баштаган. Сигэо аканыҥ филиалдыҥ комитединде иштегени 45 јылдаҥ ажып калган, је ол карындаштарла ченемелиле оноҥ ло ары ӱлежип јат. Кудайдыҥ албатызында мындый акалар бары кандый јакшы!

17. Лука 6:38 аайынча јажы јаанап калган ака-эјелер нени эдер аргалу?

¹⁷ Јажы јаанап калган кару ака-эјелер, слер јӱрӱмеерле Иеговага чындык артып иштеери эҥ ле артык деп кӧргӱзедеер. Анайда ок Агару Бичиктиҥ принциптерин билери ле ол аайынча јӱрери бойыска ла тузалу деп кӧргӱзедеер. Слер ченемелдӱ де болзоор, ӧй јаҥыс јерге турбай турганын ла јаҥы айалгаларга ӱренижер керек деп оҥдоп јадаар. Керек дезе слердиҥ кемигердиҥ де сууга чӧҥӱрилгени јаан удабаган да болзо, јииттерге куучындайтан неме слерде тӱҥей ле бар. Темдектезе, јажы јаанап калган тужыгарда чындыкты билип алганаар јӱрӱмигерди канайып солыганын ла ӧткӧн јӱрӱмеердеҥ неге ӱренип алганыгарды куучындап берерге јараар. Мынайып ченемелеерле ӱлежип турзаар, Иегова слерге алкыжын јетирер. (Лука 6:38 кычырыгар.)

18. Јажы јаанап калгандар ла јииттер бой-бойына канайып болужар аргалу?

¹⁸ Јажы јаанап калгандар ла јииттер бой-бойына болужар аргалу. Нениҥ учун дезе јажы јаанап калгандарда ойгор ло ченемел бар, а јииттерде ийде-кӱч бар. Качан олор бой-бойыла иштеп, најылажып турза, теҥеридеги Иегова Адабысты макка чыгарат ла бастыра јуунды тыҥыдып јат (Рим. 1:12).