1. Улуста Иеговала кандый колбулар болор аргалу?

 ИЕГОВАНЫҤ билези сӱреен јаан. Ого Иисус, «ончо јайалганныҥ башталганы», анайда ок кӧп ангелдер кирет (Кол. 1:15; Сар. 103:20). Чындык улус Иегованы база Ада деп айдар аргалу. Нениҥ учун дезе Иисус теҥеридӧӧн барардаҥ озо ӱренчиктерине мынайып айткан: «Мен Адама, слердиҥ де Адагарга... ӧрӧ чыгып јадым» (Иоанн 20:17). Бис Иеговага учурланып, сууга чӧҥӱрилзеес, сӱӱштӱ билеге кирип, кӧгӱс ака-эјелерлӱ болуп каладыс (Марк 10:29, 30).

2. Бис бу јӧрмӧлдӧ нени шӱӱжерис?

² Кезик улуска Иегованы бисти сӱӱп турган Ада деп бӱдерге кӱч болот. А та кемге де ака-эјелерге сӱӱжин кӧргӱзерге кӱч болуп јат. Бу јӧрмӧлдӧҥ Иегова бисти сӱӱп турган Ада ла бис ого јууктаар аргалу деп оҥдоорго, Иисус биске канай болужып турганын билип аларыс. Анайда ок Иегованаҥ тем алып, ака-эјелерге сӱӱжисти канайып кӧргӱзерин шӱӱжерис.

3. Кӧргӱзӱ мӱргӱӱл Иеговага канайып јууктадат?

³ Иегова Кудай соок ло кату башкараачылардый эмес. Карын, ол бисти кандый ла ӧйдӧ угарга, болужарга белен, бисти сӱӱп турган Ада болуп јат. Иисус Иегованы шак ла андый Ада деп билер. Ол бисти де Иеговала јуук колбуларлу болзын деп кӱӱнзейт. Темдектезе, Агару Бичикте Кудай «Кӱчтӱдеҥ Кӱчтӱ», «Јайаачы» ла «Чактардыҥ Кааны» деп айдылат (Баш. 49:25; Иса. 45:18; 1 Тим. 1:17). Је Иисус мӱргӱӱлин бу титулдарла эмес, је «Адабыс» деп јылу сӧслӧ айдып баштаган (Матф. 6:9).

4. Иегова бисле кожо јуук колбуларлу болорго турган деп, бис кайдаҥ билерис? Јартап беригер.

 ⁴ Иегова бисти сӱӱп турган Ада деп бӱдерге слерге јеҥил бе? Кезик улуска кӱч болот. Нениҥ учун дезе олор јаш тужында адазыныҥ сӱӱжин кӧрбӧгӧн болор. Је Иегова мындый сезимдерис недеҥ улам болуп турганын оҥдоп јат. Бу бисти сӱреен токунадат! Иегова бисти оныла јуук колбуларлу болзын деп кӱӱнзейт. Оныҥ да учун Агару Бичикте мындый сӧстӧр бар: «Кудайга јууктагар, ол слерге јууктаар» (Иак. 4:8). Иегова бисти сӱӱп јат ла јердиҥ ӱстинде биске эҥ ле јакшы Ада болорго кӱӱнзеп јат.

5. Лука 10:22-ле болзо, Иисус биске Иеговага јууктаарга канайып болужат?

⁵ Иисус биске Иеговага јууктаарга болужып јат. Ол Адазын јакшы билген ле оныҥ кылык-јаҥдарын сӱреен јакшы кӧргӱскен. Оныҥ учун мынайып айткан: «Мени кӧргӧни, Аданы кӧргӧни ол» (Иоанн 14:9). Иисус бисти јаан акабыс чылап, бисти Иегованы тооп јӱрерге ле ого сӧсуккур болорго ӱредет. Анайда ок оны сӱӱндирерге нени эдер керек ле оны ачындырбаска нени этпес керек деп јартайт. А Иисустыҥ јердеги јӱрӱминеҥ Иегованыҥ јалакайы ла сӱӱжи керегинде кӧптӧдӧ билип јадыс. (Лука 10:22 кычырыгар.) Кезик темдер кӧрӱп ийектер.

6. Иегова Иисусты уккан деп темдер куучындап беригер.

⁶ Иегова балдарын угуп јат. Ол Иисусты канайып укканын кӧрӱп ийектер. Иисус јерде болордо, теҥеридеги Адазына кӧп мӱргӱген, а ол оны лаптап угатан (Лука 5:16). Иегова оны јаан учурлу јӧп чыгарардаҥ озо мӱргӱӱрде, темдектезе, 12 апостолды талдаган тушта уккан (Лука 6:12, 13). Анайда ок кӱч ӧйлӧрдӧ санааркаштарын куучындап турарда уккан болор. Оны садып ийген тӱнде Иисус Адазын болотон ченелтелерди ӧдӧргӧ ийде-кӱч берзин деп јайнап сураган. Је бу учуралда Иегова оны  јӱк ле уккан эмес, је оны тыҥыдарга ангелди ийген (Лука 22:41—44).

7. Иегова мӱргӱӱлдеристи угуп турганынаҥ улам бисте кандый сезимдер болот?

⁷ Бӱгӱнги де кӱнде Иегова ишчилериниҥ мӱргӱӱлдерин угуп, каруузын берип јат (Сар. 116:1, 2). Оныҥ каруулары эҥ јакшы ла керектӱ ӧйдӧ болот. Темдектезе, Индияда јадып турган эје эмоциональный јанынаҥ шыралап, Иеговага јайнап мӱргӱген. Ол бичийт: «Санааркаштардыҥ аайына канайып чыгары керегинде болгон 2019 јылдыҥ кӱӱк айыныҥ JW Broadcasting^®-тиҥ программазы чек ле меге чыгарылгандый билдирген. Бу дезе мениҥ мӱргӱӱлдериме Иегованыҥ каруузы болгон».

8. Иегова Иисуска сӱӱжин канайып кӧргӱскен?

⁸ Иегова Иисусты јерде болордо канайып сӱӱген ле кичееген, бисти анайып ла сӱӱп, кичееп јат (Иоанн 5:20). Ол оныҥ бӱдӱмјизин тыҥыткан, кӱч ӧйдӧ болушкан ла јӱрӱмге керектӱ немези болзын деп кичееген. Анайда ок сӱӱжин сӧстӧрлӧ кӧргӱскен ле оны мактаган (Матф. 3:16, 17). Иисус Адазы ого кандый ла ӧйдӧ болужар деп иженген. Оныҥ учун бойын јаҥыскан деп бир де сеспеген (Иоанн 8:16).

9. Бис Иегованыҥ сӱӱжин недеҥ кӧрӧдис?

⁹ Бистиҥ кажыбыс ла Иисус чылап, Иегованыҥ сӱӱжин кӧрӱп јадыс. Ол биске кӧпти берген. Бисти бойына јууктадып алган ла бисти сӱӱп турган ака-эјелер берген. Олор бисле кожо кӱч те, јакшы да ӧйдӧ кожо болуп, кӱӱн-санаабысты кӧдӱрет (Иоанн 6:44). Анайда ок Иегова бистиҥ бӱдӱмјибис бек болзын деп, кӧгӱс курсакты артыгынча берип јат. Керек дезе биске јӱрӱмге керектӱ немени кажы ла кӱн берип јат (Матф. 6:31, 32). Иегованыҥ сӱӱжин канча ла кире шӱӱп сананып турзаас, оны ончо ло кире сӱӱп јадыс.

10. Иегованаҥ ака-эјелерге баштанып турганынаҥ бис неге ӱренер аргалу?

¹⁰ Иегова ака-эјелерди сӱӱп јат. А биске ака-эјелерге сӱӱжисти кӧргӱзерге кезикте јеҥил эмес. Нениҥ учун дезе бистиҥ культурабыс та, чыдаган айалгаларыс та башка болот. Анайда ок бис ончобыс јастырып, кезикте бой-бойысты ачындырып ийедис. Је андый да болзо, бис ака-эјелерди сӱӱр аргалу. Иегованаҥ ака-эјелерди сӱӱп турганынаҥ тем алып, олорды анайып ла сӱӱрге албаданып турзаас (Еф. 5:1, 2; 1 Иоанн 4:19). Бис Иегованыҥ теминеҥ неге ӱренер аргалу деп, кӧрӱп ийектер.

11. Иисус Иегованыҥ килеҥкейин канайып кӧргӱскен?

¹¹ Иегова килеҥкей Кудай (Лука 1:78). Килеҥкей кижи улустыҥ шыралап турганын кӧрӧлӧ, ичи ачый берет. Ол олорго болужатан ла токунадатан арга бедиреп јат. Иисус улусты јазып турарда, Иегованыҥ килеҥкейин кӧргӱскен (Иоанн 5:19). Темдектезе, кӧп улусты кӧрӧлӧ, оныҥ ичи ачыган, нениҥ учун дезе олор «кӱдӱчизи јок койлордый тӱймеп, тозуп калгандар» (Матф. 9:36). Иисус улусты јӱк ле килеген эмес, је олорды оору-јоболынаҥ јазып, «јобоп-чучурап калгандарды ла уур-кӱчке бастыргандарды» токунадып туратан (Матф. 11:28—30; 14:14).

12. Ака-эјелерге килемјибисти канайып кӧргӱзерге јараар?

¹² Ака-эјелерде кандый кӱчтер болуп турганын сананып турзаас, олорды килеп,  олорго болужарга кӱӱнзеерис. Темдектезе, эје тыҥ оорый берген болзын. Ол биске оору-јоболы керегинде айтпас та болор. Је бис ого болужып берзеес, ол сӱӱнер эди. Мынайып сананып ийерге јараар, ол нени эдип болбой турган болор? Курсак азып беретен бе эмезе айлын јуунадып берер бе? Эмезе ака иш јок артып калган болзын. Ого канайып болужарыс? Ака иш тапканча, ого сый эдип, бир эмеш акча берзе, јакшы болор (је кем бергенин айтпаска да јараар).

13, 14. Бис Иегова чылап канайып кысканбас болор аргалу?

¹³ Иегова кысканбас Кудай (Матф. 5:45). Ака-эјелер бистеҥ болушты бойлоры сураар деп, сакыбас керек. Биске олорго Иегова чылап, болушты сурагалакта болужар керек. Иегова биске кӱнди кысканбай, кажы ла кӱн берип јат. Кӱн кажы ла кижиге јылу берет, је јӱк ле быйанду болгон улуска эмес. Слер јӧпсинер болороор, биске јӱрӱмге керектӱ немениҥ ончозын берип турганынаҥ Иегованыҥ сӱӱжи кӧрӱнет деп. Бис Иегованы оныҥ јалакайы ла кысканбазы учун тыҥ сӱӱп јадыс.

¹⁴ Бистиҥ ака-эјелер Иегованаҥ тем алып, болушты тӱрген-тӱкей јетирерге албаданат. Темдектезе, 2013 јылда Филиппиныда «Хайян» деп коркышту тыҥ тайфун болгон. Кезик ака-эјелер тураларын, јӧӧжӧзин јылыйткан. Је бу айалгада бастыра телекейдеги ака-эјелер акча-манатла болужып, берӱлер эдерде ле туралар тударында туружарда бир јылдаҥ ас ӧйгӧ ака-эјелердиҥ 750 туразы тудулып, јазалган! Анайда ок COVID-19-тыҥ ӧйинде ака-эјелердиҥ болужы база јакшы кӧрӱнген. Мындый тӱрген јетирилип турган болуштаҥ ака-эјелериске сӱӱжис кӧрӱнет.

15, 16. Лука 6:36-ла болзо, биске теҥеридеги Адабыстаҥ неге ӱренер керек?

¹⁵ Иегова буурзак ла јаманысты таштап турган Кудай. (Лука 6:36 кычырыгар.) Теҥеридеги Адабыс биске буурзап, јаманысты кажы ла кӱн таштап јат (Сар. 103:10—14). Иисус та толо кемдӱ эмес ӱренчиктерине буурзап,  олордыҥ јаманын таштап туратан. Керек дезе ол бистиҥ кинчектерис ташталзын деп, јӱрӱмин берген (1 Иоанн 2:1, 2). Иегова ла Иисустыҥ биске буурзап, јаманысты таштап турганы бисти олорго јууктадып јат.

¹⁶ Бис ака-эјелердиҥ јаманын акту јӱректеҥ таштап турзаас, кӧгӱс билегистиҥ бирлиги там тыҥыыр (Еф. 4:32). Је кезикте јаманды таштаарга јеҥил эмес болот. Темдектезе, бир эјеге «Великодушно прощайте друг друга» * деген јӧрмӧл болушкан. Ол мынайып бичиген: «Бу јӧрмӧл меге улустыҥ јаманын таштаарына кӧрӱмимди солыырга ла оныҥ тузазын кӧрӧргӧ болушкан: „Ол јӧрмӧлдӧ айдылганыла, улустыҥ јаманын таштаары дегени ол кижиниҥ эткен кылыгын јарадып турганаарды ла слерге кандый да каршу болбогон деп кӧргӱспей јат. Је олордыҥ јаманын таштап салзаар, слер олорго ачынбай јадаар. Мынаҥ улам јӱрегерде амыр болуп јат“». Ака-эјелердиҥ јаманын акту јӱректеҥ таштап, јӱрегисте ачу тутпай турганыстаҥ олорды сӱӱп турганыс ла теҥеридеги Адабыстаҥ тем алып турганыс кӧрӱнет.

17. Матфей 5:16-ла болзо, бис теҥеридеги Иегова Адабысты канайып мактаар аргалу?

¹⁷ Иеговага бажырары ла телекейлик карындаштыкка кирери — јаан кӱндӱ! Је бисле кожо Иеговага оноҥ до кӧп улус бажырзын деп кӱӱнзеп јадыс. Оныҥ учун биске теҥеридеги Адабыстыҥ ла кӧгӱс билегистиҥ јакшы адын уйатка тӱжӱрбеске албаданар керек. Улус бистиҥ јӱрӱмисти кӧрӱп, Иеговага бажырарга кӱӱнзей берзин. (Матфей 5:16 кычырыгар.)

18. Биске јалтанбай јарлаарга не болужар?

¹⁸ Теҥеридеги Иегова Адабыска сӧсуккур болуп турганыс учун бисти јамандаардаҥ ла истежердеҥ айабас. Бу айалгада јалтанбай јарлаарга биске не  болужар? Бис Иегова ла Иисустыҥ болужына иженер аргалу. Иисус бойыныҥ ӱренчиктерине мындый сӧстӧр айткан: «Канайып айдар эмезе нени айдар деп санааркабагар. Айдар сӧс ол тушта слерге берилер. Слер бойыгардаҥ айдар эмезигер, Адагардыҥ Тыны ичигердеҥ айдар» (Матф. 10:19, 20).

19. Јалтанбай јарлаарга Кудайдыҥ тыны болужар деп, учурал куучындап беригер.

¹⁹ ЮАР-да јадып турган Роберт аканыҥ бир канча јыл кайра болгон учуралын кӧрӱп ийектер. Ол черӱге барбаста, оны јаргыга берген. Оныҥ Агару Бичикти ӱренип турганы јаан удабаган. Билгири де ас болгон. Је ол ака-эјелерди сӱӱп турганынаҥ улам колго мылтык-јепсел албас деп јарт айткан. Роберт Иегованыҥ билезинде болотон арганы сӱреен баалаган! Је кенетийин јаргычы оноҥ мынайып сураган: «Сениҥ ака-карындаштарыҥ кем?» Ол бу суракка белен эмес те болгон болзо, сагыжына ол кӱнниҥ ӱлгери келген: «Теҥеридеги Адамныҥ табын бӱдӱрип јӱргени, Мениҥ карындажым да, эје-сыйыным да, энем де» (Матф. 12:50). Ол тушта Роберт Иегованыҥ Керечизи болбогон до болзо, Кудайдыҥ тыны ого јаргычыныҥ бу да, ӧскӧ дӧ сурактарына каруу берерге болушкан. Иегова Робертле оморкогон деп, бир де алаҥзыбай јадыс. Ол бисле де оморкоп јат. Качан бис јеҥил эмес айалгаларда ол керегинде јалтанбай јарлаарга болуш сурап турзаас.

20. Бис нени эдерге бек шӱӱп алдыс? (Иоанн 17:11, 15).

²⁰ Бисте кӧгӱс биле бар учун јаан быйанду болуп јадыс! Бисте эҥ јакшы Ада ла кӧп ака-эјелер бар. Мыны оноҥ ло ары баалап јӱректер. Сатана ла оныҥ телекейи Иегова бисти сӱӱбей турган деп алаҥзыдарга ла бистиҥ бирлигисти бузарга албаданат. Оныҥ учун Иисус Адазына мӱргӱп, бистиҥ билени бирлик болуп артсын деп, корулазын деп сураган. (Иоанн 17:11, 15 кычырыгар.) Иегова бу мӱргӱӱлге каруузын берип јат. Оныҥ учун Иисус чылап, теҥеридеги Адабыс бисти сӱӱп турган ла биске болужар деп, бир де алаҥзыбактар. Анайда ок Иеговала, ака-эјелерисле колбуларысты оноҥ ло ары тыҥыдып јӱректер.