1, 2. Судурчы Аггей бистиҥ јерде болуп турган, сӱрлеп айдылган кандый јерсилкиниш керегинде айткан?

 «МАГАЗИНДЕР ле эски туралар ойынчык туралар чылап, чӱрче ле јемириле берген. Кайда ла шакпырт. Кӧп саба улус бу неме тоолу ла минутка болгон деп айдыжат. А меге бу бӱдӱн чак ӧткӧндий билдирилген» — деп, 2015 јылда, Непалда јерсилкиништи ӧдӱп чыккан кижи куучындаган. Слер мындый коркымчылу учуралда болгон болзоор, бу слердиҥ сагыжардаҥ тӱрген чыкпас болбой.

² Је бистиҥ ӧйдӧ ӧскӧ јерсилкиниш болуп јат. Бу јерсилкиниш кандый бир калада, ороондо болуп турган эмес. Оны бастыра албатылар сезип јат ла ол канча јылдыҥ туркунына улалып јат. Бу керегинде судурчы Аггей мынайып айткан: «Иегова мынайып айдат: „Мен удабас — база катап — теҥерини ле јерди, талайды ла кургак јерди силкиирим“» (Агг. 2:6).

3. Сӱрлеп айдылган «силкиниш» чын јерсилкиништеҥ незиле башка?

³ Аггейдиҥ бичиген «силкиири» деген сӧзи јайрадылышка экелип турган ар-бӱткенниҥ тӱбегин темдектебей јат. Бу силкиништиҥ учы јакшы болор деп, Иегова бойы айдат: «Мен ончо албатыларды силкиирим, ол тушта кажы ла албатынаҥ баалу эрјинелер јуулар. Оноҥ ӧргӧӧмди магымла толтырып ийерим» (Агг. 2:7). Аггейдиҥ ӧйинде јаткан албатыга бу сӧстӧр нени темдектеген? Бистерге нени темдектеп јат? Бу сурактарды шӱӱжип, албатыларды «силкииринде» бис канайып туружар аргалу деп, кӧрӱп ийерис.

4. Иегова бойыныҥ албатызына Аггейди нениҥ учун ийген?

⁴ Иегова Аггейге јаан учурлу јакылта берген. Мыныҥ алдында не болгонын эске алып ийектер. Б. э. озо 537 јылда Аггей Вавилонныҥ олјозынаҥ јанып келген израильтяндардыҥ ортозында болгон болор. Иерусалимге јанып келген Кудайдыҥ чындык ишчилери Кудайдыҥ ӧргӧӧзиниҥ тӧзӧлгӧзин салып баштаган (Езд. 3:8, 10). Је коштой јаткан албатылардыҥ удурлажузынаҥ улам бу иш токтоп калган (Езд. 4:4; Агг. 1:1, 2). Шак ла оныҥ учун б. э. озо 520 јылда Иегова Аггейди баштап салган ижин божодорго, израильтяндардыҥ кӱӱнин кӧдӱрзин деп, јакылта берип јат (Езд. 6:14, 15) *.

5. Аггейдиҥ јары Кудайдыҥ албатызыныҥ кӱӱнин нениҥ учун кӧдӱрер керек болгон?

⁵ Аггейдиҥ јары израильтяндарды Иеговага бӱдӱп турганын тыҥыдар керек болгон. Судурчы кӱӱни ӧчӱп калган израильтяндарга јалтанбай, мындый сӧстӧр айткан: «„Бу јердиҥ албатызы, ончогор турумкай болугар. Ижигерди эдигер“. „Мен, Иегова — теҥеридеги черӱлердиҥ Башчызы, слерле кожо“» (Агг. 2:4). Ајардаар ба, Иегова бойын черӱлердиҥ Башчызы деп айдат. Нениҥ учун? Иегова израильтяндарга оныҥ колында ангелдердеҥ турган ал-камык черӱ бар деп эске алындырарга сананган. Айдарда, израильтяндарга Иеговага бӱткӱлинче бӱдер керек болгон. Ол тушта олор оныҥ табын једимдӱ бӱдӱрип салар эди.

6. Аггейдиҥ айткан судуры канайып бӱдер керек болгон?

⁶ Иегова Аггей ажыра: «Мен ончо албатыларды силкиирим» — деп айткан. Бу судурла болзо, Иегова колын бош салып ийген израильтяндарга ол ӧйдӧги телекейлик держава болгон, Персияны, «силкиирим» деп айткан. Персияныҥ јеринде кӧп албатылар јаткан. Бу судурла болзо, не болор керек болгон? Озо баштап, Кудайдыҥ албатызы ӧргӧӧни тудуп божодып салар керек. Је оноҥ тудулып калган ӧргӧӧдӧ, ару бажырышка еврей эмес албатылар кожулар керек болгон. Аггейдиҥ јары Кудайдыҥ албатызыныҥ кӱӱнин сӱреен кӧдӱрген болор! (Зах. 8:9).

7. Бис бастыра албатыны «силкип» турган кандый иште туружып јадыс? Јартап беригер.

⁷ Аггейдиҥ судуры бистиҥ ӧйдӧ канайып бӱдӱп јат? Иегова ойто ло ончо албатыларды «силкийт» ле бис ого болужып јадыс. Канайып? 1914 јылда Иегова Иисус Христосты теҥеридеги бойыныҥ Каандыгыныҥ Кааны эдип кӧстӧгӧн (Сар. 2:6). Бу Каандыктыҥ тургузылганы телекейдиҥ башкараачыларына јаман солун болгон. Нениҥ учун дезе тӱӱкиде бу кара јаҥдулардыҥ башкарар ӧйиниҥ учы једип келгенин темдектеген (Лука 21:24). Кудайдыҥ албатызы мыны оҥдоп ийеле, јӱк ле Кудайдыҥ Каандыгы кижиликке сок јаҥыс ижемји деп, кайда ла јарлап баштаган. 1919 јылдаҥ ала олор Каандык керегинде сӱӱнчилӱ јарды оноҥ эрчимдӱ јарлайт, бу јар бастыра телекейди «силкийт» (Матф. 24:14).

8. Сарын 2:1—3 аайынча болзо, кӧп саба улус Каандык керегинде јарды канайып алынат?

⁸ Бу јарды улус канайып алынат? Кӧп сабазы јаратпай јат. (Сарын 2:1—3  кычырыгар.) Албатылар тӱймеп, Иегованыҥ майлап салган Каанын алынарга кӱӱнзебей јат. Каандык керегинде јарды олор сӱӱнчилӱ јар деп бодобой јат. Керек дезе кезик башкарулар јарлаар ишти токтодып салган! Бу башкарулардагы кӧп улус Кудайга бӱдӱп турганыс деп айдып та турган болзо, је бойыныҥ башкарар јаҥын артыргызарга сананбай да јат. Бӱгӱнги кӱнде баштапкы ла чакта чылап, башкараачылар Иисустыҥ ӱренчиктерин истежет. Анайып, олор Иегованыҥ майлатканына удурлажып јат (Ап. ижи. 4:25—28).

9. Улустыҥ Каандык керегинде јарды јаратпай турганын кӧрӱп, Иегова нени эдет?

⁹ Улустыҥ Каандык керегинде јарды јаратпай турганын кӧрӱп, Иегова нени эдет? Каруузын бис Сарын 2:10—12-неҥ билип аладыс: «Оныҥ учун, каандар, сагыш алыныгар, јердеги јаргычылар, тӱзединигер. Иегованаҥ айап, ого сӱӱнип иштегер. Кудайды чугулдандырбаска ла тирӱ артарга, оныҥ уулына багыныгар. Нениҥ учун дезе оныҥ чугулы тӱрген кайнап чыгар. Ого иженип турган улустыҥ ончозы ырысту». Иегова акту кӱӱнинеҥ бойыныҥ ӧштӱлерин сагыш алынып, оныҥ Каандыгын талдап алзын деп ӧй берет. Је бу ӧй чек ас арткан. Бис бу телекейдиҥ «калганчы кӱндеринде» јадып јадыс (2 Тим. 3:1; Иса. 61:2). Оныҥ учун улуска чындыкты билип, Иегованыҥ ишчилери болуп калары сӱреен учурлу. Ӧйди база чӧйбӧс керек!

10. Аггей 2:7—9-та албатыларды силкип турган јарды улус канайып угат деп айдылат?

¹⁰ Је андый да болзо, Каандык керегинде јарды јарадып турган улус база бар. Аггейдиҥ судурлаганыла, Иегова јерди «силкип» турганынаҥ улам «кажы ла албатынаҥ баалу эрјинелер јуулар», ӧскӧртӧ айтса, Иеговага кожо бажырарга ачык јӱректӱ улус јуулар *. (Аггей 2:7—9 кычырыгар.)  Бу «калганчы кӱндерде» болор деп, Исаия ла Михей база судурлап айткан (Иса. 2:2—4; Мих. 4:1, 2).

11. Кен деп атту ака Каандык керегинде јарды баштапкы катап угала, канайып алынган?

¹¹ Ончо албатыларды «силкип» турган јарды тӧс башкаруда иштеп турган Кен деп атту ака канайып алынганын кӧрӱп ийектер. 40 јыл кире кайра Каандык керегинде јарды баштапкы катап укканы оныҥ санаазына јакшы кирет. Кен куучындайт: «Бис бу телекейдиҥ калганчы кӱндеринде јадып турганысты билип, тыҥ сӱӱнгем. Је Кудайдыҥ јарадузын ла ӱргӱлји јӱрӱмди аларга, бу ижемјизи јок телекейге оноҥ ло ары иженбей, Иегованыҥ јанына бек туруп алар керек деп, меге јарт боло берген. Мен ӧйди чӧйбӧй, нени эдерге турганымды Иеговага мӱргӱӱлимде куучындагам. Мен бу телекейди артыргызып, кем де, не де каршу јетирип болбос Кудайдыҥ Каандыгынаҥ кору тапкам».

12. Калганчы кӱндерде Иегованыҥ кӧгӱс ӧргӧӧзи канайып макла толот?

¹² Иегова бойыныҥ албатызына болужып турган деп јарт кӧрӱнет. 1914 јылда Иегованыҥ ишчилериниҥ тоозы канча да муҥ болгон. Је эмди Иеговага 8 миллионоҥ ажыра улус бажырат! Анайда ок бисле кожо Кайраканныҥ Эҥирин ӧткӱрерге, канча миллион улус келет. Эйе, Иегованыҥ јердеги кӧгӱс ӧргӧӧзине, ару бажырышка, «кажы ла албатынаҥ баалу эрјинелер јуулат». Анайда ок Кудайга бажырарга бойыныҥ јӱрӱмин солып, сӱрлеп айтса, јаҥы кижини алынган улус Иегованыҥ адын макка чыгарат (Еф. 4:22—24).

13. Иегованыҥ албатызы кӧптӧӧр деп, база кандый судурларда айдылган? (Кадарындагы јурукты кӧрӱгер.)

¹³ Иегованыҥ албатызыныҥ кайкамчылу ӧзӱм алынып турганы јӱк ле Аггейдиҥ судурында айдылбаган. Бу керегинде судурчы Исаияныҥ бичигиниҥ 60-чы бажалыгында база бичилип калган. Темдектезе, 22-чи ӱлгерде мынайып айдылат: «Ас улустаҥ муҥдар тоолу улус болор. Кичинек албатынаҥ јаан албаты болор. Мен, Иегова, мыны бойыныҥ ӧйинде тӱргендедерим». Кудайдыҥ  албатызына «баалу эрјинелер» кожулып турганынаҥ улам јаан кайкал болот. Бу албатыларга кожулып турган улус Каандык керегинде јар јарлалзын деп ончо аргаларын, јайалталарын бир де кысканбай берип јат. Мынаҥ улам бис Исаияныҥ айтканыла, «албатылардыҥ сӱдиле» ажанып јадыс (Иса. 60:5, 16). Мындый иштеҥкей ака-эјелер учун бис јаан быйанду. Олордыҥ ижинеҥ улам јар 240 ороондо ло јерлерде јарлалып јат. А бичиктер 1 000-наҥ ажыра тилге чыгат.

14. Кажы ла кижиге кандый талдаш эдер керек?

¹⁴ Бӱгӱнги ӧйдӧ албатыларды «силкип» турган јарлаар иш кажы ла кижиге талдаар арга берип јат. Кудайдыҥ Каандыгыныҥ јанына турар ба эмезе бу телекейдиҥ башкаруларына иженер бе? Мындый јӧпти кажы ла кижи бойы чыгарар учурлу. Је Иегованыҥ ишчилери јадып турган орооныныҥ јасактарына сӧсуккур да болзо, је политикалык сурактарга бир де киришпей јат (Рим. 13:1—7). Нениҥ учун дезе олор кӱчтердиҥ аайына јӱк ле Кудайдыҥ Каандыгы чыгар деп билер. А Кудайдыҥ Каандыгы бу телекейдеҥ эмес (Иоанн 18:36, 37).

15. Ачылта деп бичикле болзо, Кудайга бистиҥ чындыгыс канайып ченелер?

¹⁵ Ачылта деп бичикле болзо, калганчы кӱндерде бистиҥ Кудайга чындыгыс ченелер. Нениҥ учун дезе истежӱлер там тыҥыыр. Бу телекейдиҥ башкарулары кажы ла кижини ого бажырып, јӧмӧшсин деп некеер. Олорго јӧмӧшпӧгӧн улусты истежер (Ачыл. 13:12, 15). Олор «ончозыныҥ — кичӱлердиҥ ле улулардыҥ, байлардыҥ ла тӱреҥилердиҥ, јайымда јӱргендердиҥ ле кулдардыҥ — оҥ колдорына эмезе маҥдайларына таҥма тургустыр[зын]» деп албадаар (Ачыл. 13:16). Јебрен ӧйдӧ кул кемниҥ деп билерге, ого таҥма тургузып туратан. Мынайып ла бӱгӱнги кӱнде ончо улустыҥ маҥдайына ла оҥ колына таҥма тургуссын деп некелер. Мынаҥ кижи кандый политикалык системаны санаазыла, керектериле јӧмӧп турганы кӧрӱнер.

16. Биске нениҥ учун Иеговага бастыра јанынаҥ чындык болор керек?

¹⁶ Кижиликтиҥ башкарузын јӧмӧжӧргӧ бу таҥманы тургустырбазагар уур-кӱчтер болордоҥ айабас. Нениҥ учун дезе Агару Бичикте мынайып айдылат: «Таҥма... бар кижидеҥ башка кем де садып та албас, садып та болбос (Ачыл. 13:17). Је Кудай бу таҥманы алынган улуска јаргыны чыгарып салган (Ачыл. 14:9, 10). Бис Кудайдыҥ ишчилери болгон кийнинде ӧскӧ таҥманы талдап, сӱрлеп айтса, бойыстыҥ колыска: «Мен Иегованыҥ» деп, бичип алганыс (Иса. 44:5). Оныҥ учун бистиҥ кажыбыска ла эмди ле бойыска мындый сурак берер керек: «Мен Иеговага бастыра јанынаҥ чындык па?» Эйе болзо, Иегова бисти бойыныҥ деп, сӱӱнип айдар!

17. Иегованыҥ чыдамкайы керегинде биске нени ундыбас керек?

¹⁷ Бу калју телекейдиҥ калганчы кӱндеринде Иегованыҥ чыдамкайы кӧрӱнет. Ол «кем де ӧлӱп калбазын» деп кӱӱнзейт (2 Петр 3:9). Анайып, кажы ла кижиге кинчегин алынарга ла ойгор јӱрерге арга берет. Је Кудайыҥ чыдамкайыныҥ учы-куйузы јок эмес. Оныҥ Каандыгын талдап албаган улус фараонныҥ айалгазындый айалгада болуп калар. Кудай ого Моисей ажыра мынайып айткан: «Мен туку ла качан колымды сунуп,  сени ле сениҥ калыгыҥды југуш ооруга табартып, јердиҥ ӱстинеҥ сени јоголтып салар эдим. Је мен сени, сеге бойымныҥ ийде-кӱчимди кӧргӱзерге ле бастыра јер-ӱстине адымды јарлу эдерге тирӱ артыргызып алгам» (Чыг. 9:15, 16). Учы-тӱбинде бастыра албатылар Иегова сок јаҥыс чындык Кудай деп, билип ийер (Иез. 38:23). Бу канайып болор?

18. а) Аггей 2:6, 20—22 кандый «силкиниш» керегинде айдылат? б) Аггейдиҥ сӧстӧри база да бӱдер деп, бис кайдаҥ билерис?

¹⁸ Аггей 2:6, 20—22 кычырыгар. Чактар ӧткӧн кийнинде апостол Павел Кудайдыҥ тынына башкартып, Аггейдиҥ айткан сӧстӧри база да бӱдер деп јартаган. Озо баштап ол Иегованыҥ: «База катап јӱк ле јерди эмес, теҥерини де силкиирим» — деп, берген сӧзин айткан. Је оноҥ ары мынайып бичиген: «„База катап“ дегени силкинбес немелер артсын деп, Кудайдыҥ јайабаган немелерин силкип јоголторын кӧргӱзет» (Евр. 12:26, 27, ЈТ). Бу «силкиниш» Аггей 2:7-деги айдылганынаҥ башка. Качан Иегова теҥерини ле јерди «силкизе», Иегованы башчы деп алынбаган улус фараон чылап, јажын-чакка јоголтылып калар.

19. «Силкинбей» артып калатан неме ол не, бис оны кайдаҥ билерис?

¹⁹ Апостол Павелдиҥ: «Силкинбес немелер артар» деген сӧстӧри нени темдектейт? Ол оноҥ ары айдат: «Анайдарда, јайканбас [«силкинбес», ЈТ] каандыкты алып, јакшылыкты чеберлектер. Бу ажыра Кудайды тооп ло Оноҥ айап, Ого јараар эдип бажырып јӱректер» (Евр. 12:28). Качан Иегова Кудай јер ле теҥерини «силкизе», бу эски телекейдеҥ јӱк ле тоозын артар. А Кудайдыҥ Каандыгы «ӱргӱлјиге турар» (Дан. 2:44; Сар. 110:5, 6).

20. Улуска нени талдаар керек ле бу јанынаҥ бис олорго канайып болужарыс?

²⁰ Ӧй тӱгенип јат! Оныҥ учун улуска ӱргӱлјиге јӱрер бе, ӱргӱлјиге јоголтылар ба талдаар керек. Ӧскӧртӧ айтса, олор бу телекейдиҥ принциптериле јӱрер бе эмезе јӱрӱмин солып, Кудайдыҥ табы аайынча јӱрер бе? (Евр. 12:25). Бис олорго јарлаар иште туружып, талдаш эдерге болужар аргалу. Јуулбаган «баалу эрјинелер» эмди де бар. Оныҥ учун Иисустыҥ: «Ончо калыктарга кере болзын деп, Каандык керегинде Сӱӱнчилӱ Јар јер-ӱстине јарлалар. Ол тушта чак тӱгенер» — деп, айткан сӧстӧрин ундыбай, олорды бедиректер (Матф. 24:14).