1. Иисустыҥ бир муҥ јыл башкаратан ӧйинде нени энчикпей сакыйдыс?

 СЛЕР Иисус Христостыҥ бир муҥ јылга башкаратан ӧйинде тирилиш канайып болорын кӧп катап сананган болороор. Бис бу кӱнди энчикпей сакып јадыс! Јууктарын јылыйткан улус олорды тыҥ кӧрӧргӧ турган. Иегова да олорго санаап калган (Иов 14:15). Ол ӧйдӧ бастыра јердиҥ ӱстинде кӧп сӱӱнчилӱ туштажулар болор. Ӧткӧн јӧрмӧлдӧ кӧргӧнисле, јӱрӱмниҥ тӱрбегинде бичилген «актулар» ӱргӱлји јӱрӱм аларга тиргизилер (Ап. ижи 24:15; Иоанн 5:29). Тирилетен улустыҥ тоозынаҥ эҥ ле озо бистиҥ кару улузыс тирилер болор b. Анайда ок «акту эместер» тирилер. Олордо Иегова керегинде билгирлер алып, ого иштейтен арга јазап болбогон. Бу улус јаргыладарга тиргизилер.

2, 3. а) Исайя 11:9, 10-до кандый ӱредӱ программа керегинде бичилген? б) Бис бу јӧрмӧлдӧ нени шӱӱжип кӧрӧрис?

² Тирилген кажы ла кижини ӱредер керек болор (Иса. 26:9; 61:11). Оныҥ учун ол ӧйдӧ бастыра јердиҥ ӱстинде качан да болбогон ӱредӱ программа ӧткӱрилер. (Исайя 11:9, 10 кычырыгар.) Тирилген акту эмес улуска Иисус керегинде, Кудайдыҥ Каандыгы  керегинде, толынты керегинде, Иегованыҥ башкарар јаҥы ла оныҥ адыла колбулу блааш-тартышту сурак керегинде билип алар керек болор. Керек дезе акту да улуска Иегова амадузын араайынаҥ канайып ачканы керегинде кӧп јаҥы неме билип алар керек болор. Олордыҥ кезиги Агару Бичик бичилип тӱгенердеҥ озо божоп калган. Айдарда, акту да, акту эмес те улуска кӧп немеге ӱренерге келижер.

³ Бу јӧрмӧлдӧ бис мындый сурактар шӱӱжерис: Бу јаан ӱредӱ программа канайып ӧткӱрилер? Кижиниҥ ады-јолы јӱрӱмниҥ бичигине бичилип, јажына ондо артар ба, јок по деп оҥдоорго, бу ӱредӱ канайып болужар? Бу сурактардыҥ карууларын билип алар керек. Мыны оҥдоп аларга, Даниил ле Ачылта деп бичиктерде бичилген кайкамчылу судурлар болужар. Олордыҥ болужыла тирилиш болор ӧйдӧ не болорын јакшы билип аларыс. Озо баштап Даниил 12:1, 2-де бичилген кайкамчылу судурларды шӱӱжип ийектер.

4, 5. Даниил 12:1-де калганчы ӧйлӧр керегинде не айдылат?

⁴ Даниил 12:1 кычырыгар. Даниил деп бичикте калганчы кӱндерде нениҥ кийнинде не болоры айдылып калган. Темдектезе, Даниил 12:1-де Михаил, ӧскӧртӧ айтса Иисус Христос, Кудайдыҥ «албатызына болужып турган» деп айдылат. Бу ӧй дезе Иисус Кудайдыҥ теҥеридеги Каандыгында каан болуп отурганынаҥ ала, 1914 јылда, башталган.

⁵ Анайда ок Даниилге «кижиликтиҥ башталганынаҥ ала бу ӧйгӧ јетире качан да болбогон кату ӧй башталза», Иисус «туруп чыгар» деп айдылган. «Бу кату ӧй» Матфей 24:21-де «улу тӱбек» (ЈТ) деп айдылат. Иисус «кату ӧйдиҥ» учында — Армагеддондо, Кудайдыҥ ишчилерин корулаарга туруп чыгар. Ачылта деп бичикте бу улус «улу ачу-коронноҥ [улу тӱбектеҥ] келген» «кара-бајырт улус» деп адалат (Ачыл. 7:9, 14).

6. Кара-бајырт албаты улу тӱбекти ӧдӱп чыкса, јердиҥ ӱстинде не болор? Јартап беригер. (Јерде болотон тирилиш керегинде бу чыгарманыҥ «Кычыраачылардыҥ сурактарында» база айдылган.)

⁶ Даниил 12:2 кычырыгар. Кара-бајырт албаты улу тӱбекти ӧдӱп чыкса, јердиҥ ӱстинде не болор? Мынаҥ озо бис Даниилдиҥ бу судуры 1918 јылда, тыҥ истежӱлердиҥ кийнинеҥ, Кудайдыҥ албатызыныҥ кӧгӱс јанынаҥ јаранып орныктырылганын, ӧскӧртӧ айтса тирилгенин, темдектеп турган деп сананганыс c. Је кӧрӧр болзо, бу судурда келер ӧйдӧ јердиҥ ӱстинде чыннаҥ ла болотон тирилиш керегинде айдылган эмтир. Бу тирилиш калганчы кӱндер тӱгензе, Армагеддонныҥ кийнинеҥ башталар.

7. а) Кезик улус «ӱргӱлји јӱрӱмге» тиргизилер дегенин канайып оҥдоор? б) Нениҥ учун бу тирилиш «мынаҥ артык» тирилиш болор?

⁷ Даниил 12:2-де кезик улус «ӱргӱлји јӱрӱмге» тирилер деп айдылат. Мыны канайып оҥдоор? Бу дезе, тиргизилген улус бир муҥ јылдыҥ туркунына  Иегова ла Иисус керегинде билгирлер алып, сӧсуккур болорго ӱренери дегени. Учы-учында олор ӱргӱлји јӱрӱм алар (Иоанн 17:3). Агару Бичик олорды «мынаҥ артык јӱрӱмге тирилер» деп айдат (Евр. 11:35). Нениҥ учун мынаҥ артык? Нениҥ учун дезе алдында ӧйдӧ тиргизилген толо кеминде эмес улус ойто божоп калатан.

8. «Јажына уйатка тӱжерге» тирилгени дегенин канайып оҥдоор?

⁸ Тирилген кезик улус Иегова олорды ӱретсин деп кӱӱнзебес. Даниилдиҥ судурыла болзо, мындый улус «јажына уйатка тӱжерге» тирилер. Олор дезе Иеговага ла Иисуска багынарга кӱӱнзебес. Оныҥ учун олордыҥ ады-јолын јӱрӱмниҥ бичигине бичибес. Мынаҥ улам олорды «јажына уйатка тӱжери» ол эмезе ӱргӱлјиге јоголтылары сакып јат. Айдарда, Даниил 12:2-де тирилген улус ӱргӱлјиге јӱрер бе эмезе ӱргӱлјиге јоголтылып калар ба, олордыҥ тирилген кийнинде эткен керектеринеҥ камаанду болор деп айдылат (Ачыл. 20:12) d.

9, 10. а) Даниил 12:3-ле болзо, улу тӱбектиҥ кийнинде база не болор? б) Кемдер «теҥери чилеп јаркындалар»?

⁹ Даниил 12:3 кычырыгар. Удабас келетен «кату ӧйдиҥ» кийнинде база не болор? Ол тушта не болорын Даниил 12:3-теги сӧстӧр оноҥ јарт кӧргӱзет. Бу ӱлгерде улу тӱбектиҥ кийнинде не болоры айдылат.

¹⁰ Бу ӱлгерде айдылганыла, кемдер «теҥери чилеп јаркындалар»? Каруузы Матфей 13:43-те: «Актулар Адазыныҥ Каандыгында кӱн кептӱ јаркындалар». Бу ӱлгердеҥ озо Иисус «Каандыктыҥ уулдары» керегинде айткан (Матф. 13:38). Олор бир муҥ јылдыҥ туркунына Иисусла кожо каандар болуп башкаратан майлаткандар. Оныҥ учун Даниил 12:3-те майлаткандар керегинде ле бир муҥ јылдыҥ туркунына олордыҥ эдетен ижи керегинде айдылган болор.

11, 12. 1 000 јылдыҥ туркунына 144 000 кандый иш эдер?

¹¹ 144 000 майлаткандар «улуска чындык болорго» канайып болужар? Олор Иисус Христосло кожо 1 000 јылдыҥ туркунына јерде ӧдӧтӧн ӱредӱ программаны башкарар. Бу майлаткандар јӱк ле каандар болор эмес, олор абыстар да болор (Ачыл. 1:6; 5:10; 20:6). Анайып олор албатыларга «эмде[лерге]» — ӧскӧртӧ айтса, араайынаҥ толо кемине једерге болужар (Иез. 47:12; Ачыл. 22:1, 2). Майлаткандар бу ишти эдип, јаан сӱӱнчи алар!

¹² Чындык болотон улуска кемдер кирет? Олордыҥ тоозына: тирилген улус, Армагеддонды ӧдӱп чыккан улус, анайда ок райда чыгатан балдар кирер болор. 1 000 јылдыҥ учында кажы ла кижи толо кемине једип калар. Оныҥ учун мындый сурак чыгат: чындык улустыҥ ады-јолы јӱрӱмниҥ бичигине карандашла эмес, је ручкала калганчы катап качан бичилер?

13, 14. Толо кемине јеткен улуска ӱргӱлји јӱрӱм аларга нени эдер керек болор?

¹³ Келер ӧйдӧ толо кемине јетсеес, бис алаҥзу јогынаҥ ӱргӱлјиге јӱрерис деп сананбас керек. Нениҥ учун дезе Адам ла Ева толо кемдӱ де болгон болзо, олорго ӱргӱлји јӱрӱм аларга, Иегованыҥ сӧзин угуп турар керек болгон. Је олор бойыныҥ кӱӱниле јӱрерин талдап алгандар (Рим. 5:12).

¹⁴ Је бир муҥ јыл ӧткӧн кийнинде, јерде јадар улус керегинде нени айдарга јараар? Олордыҥ ончозы толо кемдӱ болуп калар. Олор Иегованыҥ башкарузына јажын-чакка јӧмӧжӧр бӧ? Эмезе толо кемдӱ де болуп калган болзо, та кемизи де Адам ла Ева чылап Кудайга удура барар ба? Бу сурактардыҥ карууларын билип алар керек.

15, 16. а) Кажы ла кижиде Кудайга чындык болгонын кӧргӱзетен арга качан болор? б) Калганчы ченелте неле тӱгенер?

¹⁵ 1 000 јылдыҥ туркунына Сатана сӱрлеп айдылган тӱрмеде отурар. Ол оныҥ учун кемди де тӧгӱндеп болбос. Је 1 000 јыл ӧтсӧ, ол тӱрменеҥ јайымдалар. Ол тушта Сатана толо кеминде улусты Иегованаҥ туура тартарга албаданар. Бу ченелтениҥ ӧйинде кажы ла кижиде Иегованыҥ адын  ла оныҥ башкаратан јаҥын тооп турган ба деп кӧргӱзетен арга болор (Ачыл. 20:7—10). Айдарда, кижиниҥ ады-јолы јӱрӱмниҥ бичигине бичилер бе, јок по кижинеҥ бойынаҥ камаанду.

¹⁶ Кезик улус — олордыҥ тоозы чике јарт эмес — Адам ла Ева чылап Иегованыҥ башкарар јаҥына багынбас. Олорло не болор? Каруузы Ачылта 20:15-те берилген: «Јӱрӱмниҥ тӱрбегинде бичилбегени, отту кӧлгӧ ташталган». Ӧскӧртӧ айтса, бу тӱймеечи улус јажын-чакка јоголтылып калар. Је толо кемине јеткен улустыҥ кӧп сабазы, бу ченелтени Кудайга чындык ӧдӱп чыгар. Оныҥ учун олордыҥ ады-јолы јажын-чакка јӱрӱмниҥ бичигине бичилип калар.

17. Ангел бистиҥ ӧй керегинде Даниилге нени айткан? (Даниил 12:4, 8—10).

¹⁷ Келер ӧйдӧ не болорын сананзаас, бастыра бойыс јымырай бередис! Ангел Даниилге бистиҥ ӧйдӧ — «ӧйдиҥ учында» база да не болоры керегинде айткан (Даниил 12:4, 8—10 кычырыгар; 2 Тим. 3:1—5). Ол айткан: «Чындык оноҥ јарт ачылар». Бу дезе  Кудайдыҥ албатызы Даниилдиҥ судурларын оноҥ јарт оҥдоп аларын темдектейт. Је Иегованыҥ ангели ол ӧй керегинде мындый сӧстӧр база айткан: «Калју улус јаман керектер эдер, олордыҥ кемизи де бу сӧстӧрди оҥдобос».

18. Калју улусла удабас не болор?

¹⁸ Бӱгӱнги кӱнде калју улустар нени ле эдейин дезе эдип јадылар (Мал. 3:14, 15). Је удабас Иисус олорды јаргылап, «кӱдӱчи койлорды эчкилердеҥ бӧлӱгендий» чылап, чындык улустаҥ айрып ийер (Матф. 25:31—33). Калју улус улу тӱбекти ӧдӱп болбос. Олор ӱргӱлји јӱрӱмге тирилбес. Олордыҥ ады-јолы да Малахия 3:16-да бичилген «эзем бичикке» бичилбес.

19. Биске эмди ле нени эдер керек, нениҥ учун? (Малахия 3:16—18).

¹⁹ Бистерге калју улусла колбу јок деп, эмди ле керектерисле кӧргӱзер керек. (Малахия 3:16—18 кычырыгар.) Иегова ого јуулып турган улусты «аҥылу калыгым» деп айдат. Бис андый улустыҥ ортозында болорго турган эмейис.

20. Иегова Даниилге нени айткан? Слер бу судурдыҥ бӱдерин кӧрӧргӧ нениҥ учун энчикпей сакып турганыгар?

²⁰ Бистер сӱреен кайкамчылу ӧйдӧ јададыс. Је келер ӧйдӧ бисти оноҥ кайкамчылу ӧй сакыйт. Удабас јаманныҥ изи де артпас. Оныҥ кийнинде Иегова Даниилге: «[Сен] кӱндердиҥ учында бойыҥныҥ кайралыҥды аларга турарыҥ» — деп айткан сӧстӧрдиҥ бӱдерин кӧрӧрис (Дан. 12:13). Слер Даниилди де, ӧскӧ дӧ улусты тыҥ кӧрӧргӧ турган эмейигер. Оныҥ учун Иеговага чындык артарга бастыра ийде-кӱчигердеҥ албаданыгар. Ол тушта слердиҥ ады-јолыгар јӱрӱмниҥ бичигинеҥ качан да кырылбас.