1 Коринфтегилерге 15:8-те Павел мынайда бичиген: «Адакыда меге, ара [ӧйинеҥ озо] чыккандый кижиге, кӧрӱлген». Павел бу сӧстӧрдӧ Иисусты теҥеридеги магында болгонын кӧргӧни керегинде айткан. Бу ӱлгерди алдында канайып оҥдогоныс? Бу сӧстӧрди бис Павелге теҥеридеги јӱрӱмге тирилетен улустаҥ канча јӱс јылдар озо тирилетен эмезе чыгатан кӱндӱ эдилген деп бодогоныс. Је тереҥжиде шиҥдеп кӧргӧн болзо, оны ӧскӧ этире оҥдоор керек эмтир.

Апостол Павел бойын «ара [ӧйинеҥ озо] чыккандый кижи» деп нениҥ учун айткан?

Павелдиҥ христиан јаҥга киргени сакыбаган јанынаҥ болгон ло каршузын јетирген. Бала сакып турган ада-энениҥ балазы ӧйинеҥ озо чыкса, кӧп сабада ада-энелер бого белен эмес болот. Савл (кийнинде Павел деп адыла јарлу болгон) христиандарды истежерге Дамаскка барып јадала, тирилген Иисусты кӧрӧр деп сананбаган да. Анайып Павел сакыбаган јанынаҥ христиан кижи болуп калган. Мындый солынтага ол бойы да белен эмес болгон, Дамасктагы христиандар да алаҥ кайкаган. Нениҥ учун дезе Павел олорды тудуп, тӱрмелеп туратан. Бого ло коштой Павелдиҥ тирилип калган Иисусты кӧргӧни оныҥ эди-канына да каршузын јетирген, не дезе, оныҥ кӧзи кӧрбӧй барган (Ап. ижи 9:1—9, 17—19).

Павел «ӧскӧ ӧйдӧ» христиан болуп калган. «Ара [ӧйинеҥ озо] чыккан кижи» деп кӧчӱрилген грек сӧсти «ӧскӧ ӧйдӧ чыккан» деп кӧчӱрерге јараар. «Иерусалимниҥ Агару Бичигинде» бу сӧстӧр мынайып кӧчӱрилген: «Сакыбаган јанынаҥ чыккан» (The Jerusalem Bible). Иисус Павелге кӧрӱлтеде кӧрӱнерде, теҥериге јӱре берген болгон. Оныҥ учун Павел Иисустыҥ тирилип, теҥериге кӧдӱрилгенин кӧргӧн христиандар чылап кӧрбӧгӧн (1 Кор. 15:4—8). Је Павел тирилип калган Иисусты Дамасктыҥ јанында болгон бу кӧрӱлтеде, «ӧскӧ ӧйдӧ» деп билдирген де болзо, кӧрӱп јат.

Павел бойын јабыс тудунган. Кезик шиҥжӱчилердиҥ санаазыла болзо, Павелдиҥ бу сӧстӧринде јаман учуры бар болордоҥ айабас. Андый болзо, Павел бойын апостол болорго уйан кижи деп сананган. Мыны оныҥ сӧстӧринеҥ кӧрӧдис: «Мен ончо апостолдордыҥ јабызы инем, апостол деп адаларга турбазым, нениҥ учун дезе Кудайдыҥ Серкпезин истегем. Је Кудайдыҥ јакшылыгыла мен эмди кем, ол болорым» (1 Кор. 15:9, 10).

Айдарда, 1 Коринфтегилерге 15:8-теги сӧстӧрлӧ Павел Иисустыҥ ого сакыбаган јанынаҥ кӧрӱнгенин, ол «ӧскӧ ӧйдӧ» христиан болуп калганын ол эмезе андый кайкамчылу кӧрӱлтени кӧрӧргӧ турбас кижи болгонын айдарга сананган болор. Је Павелдиҥ сӧстӧриниҥ учуры кандый да болзо, Иисустыҥ ого мынайып кайкамчылу эдип кӧрӱнгени оныҥ сагыжына јакшы артып калган деп јарт кӧрӱнип јат. Нениҥ учун дезе бу кӧрӱлтениҥ кийнинде, Иисус тирилген деп, ондо бир де алаҥзу артпаган. Оныҥ да учун Павел Иисустыҥ тирилгенин куучындаган ла сайын бу кӧрӱлте керегинде јаантайын айдып туратан (Ап. ижи 22:6—11; 26:13—18).