1. Пётр божоордоҥ озо Кудайдаҥ кандый јакылта алган?

 АПОСТОЛ Пётр канча јылдардыҥ туркунына Иеговага чындык иштеген. Иисус јарлап турарда, ол оныла кожо болгон. Апостолдыҥ болужыла еврей эмес укту улустыҥ ортозында сӱӱнчилӱ јар таркадылган. Кийнинде Пётр башкару јӧптӧ иштеген. Божоордоҥ озо Иегова ого база бир јакылта берген. Б. э. 62—64 јылдары киреде ого эки самара бичизин деп јакарган. Бу самаралар Агару Бичикке кирген. Бӱгӱнги кӱнде бу эки самараны Пётрдыҥ 1-кы ла 2-чи самаразы деп билерис. Апостол, божоп то калза, олор христиандарга Иеговага чындык артарга болужар деп иженген (2 Пётр 1:12—15).

2. Пётрдыҥ самаралары нениҥ учун ӧйинде болгон?

² Пётр бойыныҥ самараларын бичип турарда, ака-эјелер тыҥ шыралап, башка-башка ченелтелер ӧдӱп турган болгон (1 Пётр 1:6). Јуунда тӧгӱн ӱредӱлер јайып, балыр керектерди јарадып турган улус табылган (2 Пётр 2:1, 2, 14). Анайда ок Римниҥ черӱзи Иерусалимди ле оныҥ ӧргӧӧзин јемирер кӱн јууктап келеткен болгон. Оныҥ учун ол калада јадып турган христиандарга сергелеҥ болор керек болгон (1 Пётр 4:7). Пётрдыҥ самаралары ол ака-эјелерге кӱчтерди ӧдӧргӧ лӧ келер кӱчтерге белетенип аларга болушкан деп алаҥзыбайдыс b.

3. Пётрдыҥ самараларын нениҥ учун шиҥдеер керек?

³ Пётр бойыныҥ самараларын баштапкы чактагы христиандарга бичиген де болзо, Иегова олорды Агару Бичикке кийдирип салзын деп кичеенген. Оныҥ учун ол биске де тузалу болуп јат (Рим. 15:4). Бис база балыр  јӱрӱмди јарадып турган телекейде јададыс. Оныҥ учун Иегова Кудайга иштеерге јеҥил эмес болуп јат. Бого ло коштой иудейлердиҥ системазын јоголткон тӱбектеҥ јаан тӱбек келип јат. Пётрдыҥ бу эки самаразынаҥ сӱреен јаан керектӱ эзедӱлер табып аларыс. Олор биске Иегованыҥ кӱнин сакыырга, улустаҥ коркыбаска ла ака-эјелерди оноҥ тыҥ сӱӱрге болужар. Анайда ок аксагалдар бу эзедӱлердеҥ јуундагы ака-эјелерди оноҥ тыҥ кичеерге ӱренип алар.

4. 2 Пётр 3:3, 4-лӧ болзо, бистиҥ бӱдӱмјибис недеҥ улам уйадаар аргалу?

⁴ Бис библиялык судурларга бӱтпей турган улустыҥ ортозында јададыс. Чактыҥ учы јууктап келеткен деп канча јылдардыҥ туркунына јарлап турганыска удурлажаачылар каткырыжат. Кезиктери бу кӱн качан да келбес деп айдыжат. (2 Пётр 3:3, 4, кычырыгар.) Мындый сӧстӧрди тӧрӧӧндӧристеҥ, кожо иштеп турган улустаҥ эмезе јарлап јӱреле туштаган улустаҥ угар болорыс. Олордыҥ шоодып каткырганы бистиҥ бӱдӱмјибисти уйададардаҥ айабас. Мындый неме болуп калбазын деп, Пётр биске нени эдерин јартап берген.

5. Бу телекейдиҥ јоголтыларын чыдамкай сакыырга биске не болужар? (2 Пётр 3:8, 9).

⁵ Је кем де сананар болор: «Иегова бу калју телекейди нениҥ учун эмдигенче јоголтпогон?» Је Пётрдыҥ сӧстӧринеҥ Иегованыҥ ӧйгӧ кӧрӱми улустыйынаҥ чек башка деп кӧрӱнет. (2 Пётр 3:8, 9 кычырыгар.) Иеговага бир муҥ јыл — бир кӱндий болот. Оныҥ да учун ол кемди де ӧлӱп калбазын деп турганынаҥ улам чыдажып јат. Качан оныҥ кӱни једип келзе, бу калју телекейди Иегова јоголтып салар. Айдарда, артып калган ӧйди ойгор тузаланып, улусты ылгабай, ончозына јарлап турактар.

6. Иегованыҥ кӱнин ундыбаска биске не болужар? (2 Пётр 3:11, 12).

⁶ Пётр бисти Кудайдыҥ кӱнин ундыбазын деген. (2 Пётр 3:11, 12 кычырыгар.) Бис мыны канайып эдерис? Аргалу болзоор, кажы ла кӱн келип јаткан јаҥы јараш телекей керегинде сананып туругар. Санаагарга канай ару кей тынып, амтанду курсак јип, тирилип келген јуук улузаарды уткуп ла канча чак мынаҥ озо јаткан улуска бу судурлардыҥ канай бӱткенин куучындап турганаарды јурап туругар. Мынайып этсеер, Иегованыҥ кӱнин сакып тура, арыбазаар ла айландыра болгон немени керекке албай јӱрбезигер. Анайда ок айландыра не болуп турганын билип турзагар, Кудайдыҥ кӱни тӱрген јууктап келеткенине бӱтпей турган улустыҥ сӧзине кирбезигер (2 Пётр 3:17).

7. Улустаҥ коркыыры кандый каршу јетирердеҥ айабас?

⁷ Иегованыҥ кӱни јууктап келеткенин ундыбай јадыс, оныҥ учун сӱӱнчилӱ јарла ӱлежедис. Је кезикте Агару Бичик керегинде куучынды баштап болбой јадыс. Нениҥ учун дезе улус бис керегинде нени сананар, бисле нени эдип саларынаҥ коркып јадыс. Андый ла неме Пётрла болгон. Иисусты јаргылаган тӱнде, ол оныҥ ӱренчиги эмес ле оны чек билбес деп, канча катап айткан (Матф. 26:69—75). Је кийнинде бу ла апостол бӱдӱмјилӱ болуп: «Олордыҥ коркып турган немелеринеҥ коркыбагар ла не де керегинде санааркабагар» (ЈТ) — деп айткан  (1 Пётр 3:14). Пётрдыҥ бу сӧстӧри бис улустаҥ јалтанбай барар аргалу деп бӱдӱмјилейт.

8. Улустаҥ коркыбаска не болужар? (1 Пётр 3:15).

⁸ Улустаҥ коркыбаска биске не болужар? Пётр айткан: «Христосты Кайраканды чылап акту јӱрегердеҥ тооп јӱрӱгер». (1 Пётр 3:15, ЈТ кычырыгар.) Мыны канайда эдер? Биске Иисус Христос бистиҥ Кааныс ла оныҥ јаҥы сӱреен јаан деп шӱӱп сананып турар керек. Качан бис ӧкпӧӧрип турзаас, бу керегинде сананып ийерге јараар. Темдектезе, Иисус теҥеридеги ширееде миллиондор тоолу ангелдердиҥ ортозында отурган деп. Анайда ок ого «теҥери ле јерде ончо јаҥ... берилген» ле ол «телекейдиҥ учы келгенче... слерле кажы ла кӱн кожо болор» (ЈТ) деп ундыбай туругар (Матф. 28:18—20). Пётр бисти неге бӱдӱп турганысты куучындаарга белен болзын деп кӱӱнзедет. Слер кожо ӱренип турган балдарга, ӱредӱчилерге, кожо иштеп турган улуска ла керектерле јӱрген ӧйдӧ туштап турган улуска јарлаарга кӱӱнзеп турганаар ба? Эйе болзо, андый арга качан болорын ла нени айдараарды сананып алыгар. Иегованаҥ јалтанбас болорын сурап, ол слерге болужып ийер деп, бир де алаҥзыбагар (Ап. ижи 4:29).

9. Кандый учуралда Пётр ака-эјелерге сӱӱжин кӧргӱспеген? (Јурукты база кӧрӱгер.)

⁹ Пётр капшай ла сӱӱштӱ боло бербеген. Качан Иисус: «Слерге јаҥы јакылта берип турум: бой-бойыгарды сӱӱп јӱрӱгер. Мен слерди сӱӱгемдий, бой-бойыгарды сӱӱп јӱрӱгер» — деп айдарда, Пётр оныҥ јанында болгон (Иоанн 13:34, ЈТ). Је кийнинде ол еврей эмес укту ака-эјелерле ажанбай барган. Байла ол, еврей христиандар нени сананар деп, коркый берген болор. Мыны кӧрӧлӧ, Павел оны «экијӱстенип» баштаганы учун тӱзедип ийген (Гал. 2:11—14). Ол Павелдиҥ сӧзинеҥ јаан ӱредӱ алган болор. Нениҥ учун дезе эки самаразында ака-эјелерди јӱк ле сӱӱр керек эмес, је сӱӱжисти керектерисле кӧргӱзип турактар деп бичиген.

10. Биске бой-бойыбысты акту-јӱректеҥ сӱӱрге не болужар? Јартап беригер (1 Пётр 1:22).

¹⁰ Пётр баштапкы чактыҥ христиандарына: «Карындаштар чылап, бой-бойыгарды акту јӱрегердеҥ сӱӱп баштадаар» — деп бичиген. (1 Пётр 1:22, ЈТ кычырыгар.) «Чындыкка сӧсуккур болуп», ӧскӧртӧ айтса, библиялык ӱредӱлерди јӱрӱмисте тузаланып турзаас, биске мынайда эдерге келиже берер. Темдектезе, Агару Бичикте: «Кудай улустыҥ чырай-бӱдӱжине кӧрбӧй турган» — деп бичилет (Ап. ижи 10:34, 35). Бис јуунда јӱк ле кезик ака-эјелерди сӱӱп турзаас, Иисустыҥ: «Бой-бойыгарды сӱӱп јӱрӱгер» — деп јакылтазын бӱдӱрип турганыс деп айдып болбозыс. Је јуунда бис та кем ле де јуук најылажар болорыс. Иисуста да ончо ӱренчиктериле бир тӱҥей колбулар болбогон (Иоанн 13:23; 20:2). Је Пётр биске јуунда ончо ака-эјелерди сӱӱр керек деп эске алындырат. Ол тушта кажы ла кижи бойын сӱӱштӱ, нак билеге кирип турган деп сезер (1 Пётр 2:17).

11. «Акту јӱректеҥ тыҥ сӱӱгер» деген сӧстӧр нени темдектейт?

¹¹ Пётр бисти бой-бойыбысты акту јӱректеҥ, тыҥ сӱӱгер деп кӱӱнзеткен. Бу сӧстӧр биске јӱрегисти элбеде ачып, ары сӱӱрге јеҥил эмес улусты кийдирерин темдектейт. Темдектезе, слерди кем-кем ачындырып ийген болзын, бу тушта слердиҥ капшай ла ӧч алар кӱӱнеер келер. Иисус Пётрга Иегова мындый кылык-јаҥды јаратпай турган деп оҥдоорго болушкан (Иоанн 18:10, 11). Ол бичиген: «Јаманныҥ ордына јаман этпегер, айткылаштыҥ ордына айткылабагар. Карын, алкагар» (ЈТ) (1 Пётр 3:9, сноска). Айдарда, изӱ сӱӱш бисти ачындырып та ийген кижиге јалакай баштанарга ла ого ајару эдип турарга кӱӱнзетсин.

12. а) Тыҥ сӱӱш бисти база неге кӱӱнзедер аргалу? б) Слер «Дорожите нашим единством» деген видеоноҥ нени тузаланар эдеер?

¹² Апостол Пётр бойыныҥ баштапкы самаразында тыҥ сӱӱш бир-эки кинчекти эмес, је «кӧп кинчектерди таштаттырып јат» деп айткан (1 Пётр 4:8). Ол канча јыл кайра Иисустыҥ канайып јаманды таштаары керегинде ӱреткенин эске алган болор. Ол ӧйдӧ Пётр 7 катап јаманын таштаары тыҥ деп сананган болор. Је Иисус ого ло бистерге кинчектерди 77 катап таштазын деп айткан, ӧскӧртӧ айтса, ол јаантайын таштаары дегени (Матф. 18:21, 22). Слерге бу коркышту кӱч деп билдирип турган болор. Је слер санааркабагар, нениҥ учун дезе бис ончобыс толо кеминде эмезис, оныҥ учун биске улустыҥ јаманын таштаарга јеҥил эмес болуп јат. Андый да болзо, бойоордыҥ ичеерде ачынып кородобой, ол кижиле јаражып аларга албаданыгар c.

13. Нениҥ учун аксагалдарга ака-эјелерди кичеерге јеҥил эмес болот?

¹³ Иисус тирилген кийнинде, Пётрга: «Койлорымды кабыр» — деген. Ол бу сӧстӧрди качан да ундыбаган болор деп, бис алаҥзыбай јадыс (Иоанн 21:16). Сен аксагал болзоҥ, бу јакылта сеге де берилген деп билериҥ. Је аксагалдарга бу јакылтаны бӱдӱрерге ӧй табарга јеҥил эмес болот, нениҥ учун дезе олорго билелерин физический, эмоциональный ла кӧгӱс јанынаҥ јеткилдеер керек болот. Олор јарлаар ишке эрчимдӱ туружып јат, курултайларга, јуунныҥ туштажуларына берилген јакылталарын јазап белетеерге албадангылайт. Олордыҥ кезиги больницаларла колбожор комитетте эмезе јербойыныҥ проектно-строительный бӧлӱгинде иштегилейт. Бистиҥ кару аксагалдарыс — слер чыннаҥ ла коркышту иштеҥкей!

14. Аксагалдарга Кудайдыҥ ӱӱрин кабырарга не болужар? (1 Пётр 5:1—4).

¹⁴ Апостол Пётр аксагалдарды Кудайдыҥ ӱӱрин кабырзын деп айткан. (1 Пётр 5:1—4, ЈТ кычырыгар.) Кару аксагал, сен ака-эјелериҥди сӱӱп тургаҥ ла олорды кичеерге кӱӱнзеп тургаҥ деп билерис. Је кезикте керектердиҥ кӧбинеҥ улам эмезе арыганыҥнаҥ улам сеге бойыҥныҥ молјуларыҥды бӱдӱрерге келишпей турган деп билдирердеҥ айабас. Мындый айалгада нени эдер? Бойыҥныҥ санааркаштарыҥды Иеговага куучында. Пётр бичиген: Ӧскӧ улуска иштеп турган кижи «Кудай берип турган кӱчле иштезин» (1 Пётр 4:11). Бӱгӱнги кӱнде ака-эјелердиҥ туштап турган кезик кӱчтери јӱк ле јаҥы телекейде јоголор. Је ундыба, Иисус, «эҥ јаан кӱдӱчи», олорго сениҥ эдип болбос немеҥди эдип ийер аргалу. Та нени де ол эмди эдип ийер, а та нени де — келер ӧйдӧ. А Иегова аксагалдардаҥ, олор ака-эјелерди сӱӱп турзын, кичееп турзын ла олорго тем болзын деп, сакып јат.

15. Иегованыҥ койлорын бир аксагал канайып кичеейт? (Јурукты база кӧрӱгер.)

¹⁵ Узак ӧйлӧргӧ аксагал болуп иштеп турган Уильям ака Кудайдыҥ койлорын кичеери сӱреен керектӱ деп айдат. Анчада ла COVID-19 башталарда, ол ло ӧскӧ аксагалдар кажызы ла бойыныҥ  јарлаар ижиниҥ бӧлӱгинде неделениҥ ичинде бир катап кажы ла ака-эјеле колбожып турар деп шӱӱп алгылаган. Олор нениҥ учун мынайып эткен? Уильям ака мынайып јартаган: «Нениҥ учун дезе бу ӧйдӧ ака-эјелер айылында кандый ла санааларга алдыртып, јаҥыскан отургылайт. А мындый айалгада јаман санаалар тӱрген келет». Качан ака-эјелер бойлорыныҥ кӱчтерин айдып турза, Уильям олорды јазап угуп, канай болужарын шӱӱп сананат. Оноҥ ол керектӱ јетирӱлер бедирейт. Бу дезе кӧп сабада бистиҥ сайттаҥ видеолор болот. Уильям оноҥ ары куучындайт: «Бӱгӱнги кӱнде кӱдӱчиниҥ ижи сӱреен керектӱ болот. Бис улусты чындыкка экелерге тыҥ албаданадыс, је Иегованыҥ койлорын чындыктаҥ туура барбазын деп кичееп аларга, биске оноҥ тыҥ албаданар керек».

16. Пётрдыҥ самараларындагы ӱредӱлерди бис канайып тузаланар аргалу?

¹⁶ Бис Пётрдыҥ самараларынаҥ бир канча ӱредӱлер шӱӱштис. Слер бу ӱредӱлердиҥ кажызын оноҥ јакшы тузаланар эдеер? Темдектезе, јаҥы телекейде нени эдереерди кӧптӧдӧ сананарга кӱӱнзейдеер бе? Эмезе кожо иштеп турган улуска, ӱредӱчилерге ле кожо ӱренип турган балдарга, анайда ок керектерле јӱрген тушта јолыккан улузыска јарлаарга амаду тургузып алдаар ба? Ол эмезе ака-эјелериске сӱӱшти оноҥ тыҥ кӧргӱзетен аргалар кӧрӧдӧӧр бӧ? Аксагалдар, слер Иегованыҥ койлорын оноҥ ло ары акту јӱрегердеҥ албаданып кичеерге белен бе? Бойоорды шиҥдеп турала, тӱзединетен јер кӧрӱп ийген болзоор, кунукпагар! Бистиҥ јалакай Кудайыс олорды тӱзедерге болужар (1 Пётр 2:3). Пётр бисти бӱдӱмјилейт: «Кудай... бойы слердиҥ ӱредӱгерди учына јетирер. Ол слерди тыҥыдып, кӱчтӱ ле турумкай эдер» (1 Пётр 5:10, ЈТ).

17. Колысты бош салбай турганыс ла Иеговага бисти ӱредер арга берип турганыс неге экелер?

¹⁷ Качан да Пётр бойын Кудайдыҥ Уулыныҥ јанында болорго турбас деп сананган (Лука 5:8). Је Иегованыҥ ла Иисустыҥ болужынаҥ улам ол колын бош салбаган ла оноҥ ло ары Иисустыҥ кийнинеҥ барган. Кийнинде Пётрга «Кайраканыстыҥ — Аргадаачы Иисус Христостыҥ мӧҥкӱлик Каандыгына кирер» кӱндӱ эдилген (2 Пётр 1:11). Слер Пётрдаҥ тем алып, колоорды бош салбай, Иеговага слерди оноҥ ло ары ӱредерге арга берип турзаар, кайрал эдип, ӱргӱлји јӱрӱм алараар. Ол тушта, слер, «бӱдӱп турганыгардыҥ амадузына — тыныгарды аргадаарына» једеригер (1 Пётр 1:9).