1, 2. Самсонныҥ теми незиле тузалу?

 САМСОН деп атты уксаар, слер не керегинде сананадаар? Озо ло баштап, санаарда Иегованыҥ коркышту кӱчтӱ ишчизи јуралып турган болор. Эйе, Самсон андый ла болгон. Је бир катап ол јастыра јӧп чыгарганынаҥ улам јаан тӱбекке тӱшкен. Је андый да болзо, Иегова оны бойыныҥ чындык ишчизи деп кӧргӧн. Оныҥ учун ол керегинде Агару Бичикте бичилип калган.

² Иегова Самсон ажыра бойыныҥ албатызына, Израильге, болужарга, сӱреен кайкамчылу керектер эткен. Самсонныҥ божогон кийнинеҥ, канча јӱс јылдар ӧдӱп каларда, Иегова апостол Павелди Самсонныҥ адын бӱдӱмјизи тыҥ улустыҥ тоозына кожуп салзын деген (Евр. 11:32—34). Самсон кӱч те ӧйлӧрдӧ Иеговага иженген. Бу јӧрмӧлдӧ Кудайдыҥ бу ишчизинеҥ бис неге ӱренип аларысты ла оныҥ теми биске канайып болужарын шӱӱжерис.

3. Самсонго кандый јакылта берилген?

³ Самсон ак-јарыкка Израиль албатыны филистимляндар базынып турган ӧйдӧ чыккан (Јарг. 13:1). Филистимляндардыҥ кату башкарганынаҥ улам Израиль албаты тыҥ шыралаган. А Иегова Самсонды бойыныҥ албатызын филистимляндардаҥ аргадаарга талдап алган (Јарг. 13:5). Кандый јеҥил эмес јакылта! Мыны бӱдӱрерге, Самсонго Иеговага иженер керек болгон.

4. Иегова Самсонго филистимляндардаҥ јайымдаларга канайып болушкан? (Јаргычылар 15:14—16).

⁴ Самсон Иеговага иженерде, Кудай ого канайып  болушканын кӧрӱп ийектер. Бир катап филистимляндар Самсонды тудуп аларга, Лехи деп јердӧӧн келгилеген (бу јер Иудеяда болгон болор). Иудейлер филистимляндардаҥ коркышту тыҥ коркыгылап туратан. Оныҥ учун бойыныҥ ла карындажын ӧштӱлериниҥ колына берип ийер деп сананган. Олор оны эки јаҥы буула јазаптыра буулайла, филистимляндарга јетирип салгандар (Јарг. 15:9—13). Је «Самсонго Иегованыҥ тыны тӱжерде», ол олордоҥ јайымдалып, «эштектиҥ ээк сӧӧгин табала», оныла 1000 филистимлянды ӧлтӱрип салган! (Јаргычылар 15:14—16 кычырыгар.)

5. Самсонныҥ эштектиҥ ээк сӧӧгин тузаланганынаҥ нени кӧрӧдис?

⁵ Самсон нениҥ учун эштектиҥ ээк сӧӧгин тузаланган? Ол филистимляндарла саҥ башка немеле јуулашкан. Самсон оныҥ једими јуулажатан немезинеҥ эмес, а Иегованыҥ болужынаҥ камаанду деп оҥдогон. Ол не бар оныла тузаланган. Мынаҥ кӧрӱп јадыс, Самсон Иеговага бӱткенинеҥ улам ӧштӱлерди јеҥип алган.

6. Биске Иегованыҥ берип турган јакылталарын бӱдӱрерге не болужар?

⁶ Бис бӱдӱрип болбозыс деп сананып турган јакылталарды Иегованыҥ болужыла бӱдӱрип ийерис. Кудай биске олорды бӱдӱрип ийерге сакыбаган јанынаҥ болужар аргалу. Иеговага бӱдӱп турыгар! Канайып ол Самсонго болушкан, анайып биске де оныҥ табын бӱдӱрерге ийде-кӱч берер (Укаа 16:3).

7. Иегованыҥ башкарузын бедиреери јаан учурлу деп, кандый учурал кӧргӱзет?

⁷ Теократиялык туралар тудуп турган проекттерде туружып турган ака-эјелер Иеговага бӱдӱп турганын кӧргӱзет. Алдында бис Каандыктыҥ Тураларыныҥ ла ӧскӧ керектӱ туралардыҥ проекттерин бойыс эделе, тудуп турган болгоныс. Је Иегованыҥ организациязы ӧзӱп, јаанаганынаҥ улам, солынталар керек болгон. Оныҥ учун каруулу  акалар Иегованыҥ башкартузын бедиреп, јаҥы эп-аргалар тузаланып баштаган. Темдектезе, эмди тураларды садып алала, биске канай керек, анайып ла јазап аладыс. Башка-башка јерлерде кӧп строительный проекттерде турушкан Ро́берт мынайып куучындайт: «Баштап тарый бу солынта аайынча эдерге јеҥил эмес болгон. Эмди, алдындагызына кӧрӧ, чек башка иштеп јадыс. Је андый да болзо, ака-эјелер јаҥы айалгага эптежерге белен болуп јат ла Иегова бу јаҥыртуны јарадып, алкап турганын кӧрӧдис». Бу дезе Иегова бойыныҥ табын бӱдӱрерге, албатызын канайып башкарып турганыныҥ бир ле теми болды. Биске ончобыска кандый бир ӧйдиҥ бажында бойыстаҥ мынайып сураар керек: «Мен Иегованыҥ башкартузын бедиреп тургам ба? Иеговага оноҥ ло ары эҥ артыгын берип, эптежерге, мен белен бе?»

8. Самсон коркышту тыҥ суузай береле, нени эткен?

⁸ Самсонныҥ оноҥ до ӧскӧ кайкамчылу керектерин слер кычырган болороор. Темдектезе, ол куру колло карагуланы ӧлтӱрип ийген, оноҥ Ашкелон деп јерде 30 филистимлянды база ӧлтӱрип салган (Јарг. 14:5, 6, 19). Ол мыны Иегованыҥ болужы јогынаҥ эдип болбос эди. Мыны ол бойы да јарт оҥдогон. Бир катап ол бир муҥ филистимлянды ӧлтӱрип ийеле, коркышту тыҥ суузаган. Је суу бедиреп баспай, Иегованаҥ болуш сураган (Јарг. 15:18).

9. Иегова Самсонныҥ мӱргӱӱлине карууны канайып берген? (Јаргычылар 15:19).

⁹ Иегова Самсонныҥ сураганына кайкал эдип, тоҥмок суу чыгарып ийген. «Самсон оноҥ ичип, тыны кирип, ийде-кӱчтӱ боло берди». (Јаргычылар 15:19 кычырыгар.) Мыныҥ кийнинде канча јылдар ӧдӱп каларда, судурчы Самуил Јаргычы деп бичикти бичип турарда, бу суу ондо болгон болор. Бу суу, байла, израильтяндарды, Иегова олорды кӱч ӧйлӧрдӧ артыргыспас деп, эске алындырып туратан болор.

10. Иегованыҥ болужын аларга нени эдер керек? (Јурукты база кӧрӱгер.)

¹⁰ Бисте база јайалталарыс, јарлаар иште јединген једимдерис бар болор. Је андый да болзо, Иегованаҥ болуш сурап турар керек. Не дезе чын једимге, бис јӱк ле Иеговага иженип турзаас, јединерис. Самсон Иегованыҥ берген суузын ичип ийерде, кӱчтӱ боло берген. Анайып ла биске кӧгӱс јанынаҥ кӱчтӱ болорго, Иегованыҥ берип турган немелериниҥ ончозын тузаланар керек (Матф. 11:28).

11. Иеговага иженип турганыс недеҥ кӧрӱнер? Тем куучындап беригер.

¹¹ Эмдиги ӧйдӧ Россияда јадып турган ака-карындаштарыска тыҥ истежӱлер болуп турган. Алексей аканыҥ темин кӧрӱп ийектер. Ого кӧгӱс јанынаҥ бек артарга не болужат? Ол ӱйиле кожо кӧгӱс керектерди бир де туура јылдырбаган. Алексей куучындайт: «Мен кӧгӱс керектерди — таҥынаҥ ӱренерин ле Агару Бичикти кӱнӱҥ ле кычырарын — оноҥ ло ары улалтарга албаданадым. Анайда ок ӱйимле кожо кӱнниҥ ӱлгерин кычырып, Иеговага мӱргӱп јадыс». Бис олордоҥ неге ӱренер аргалу? Кандый да кӱчтер болзо, бойыска эмес, је Иеговага иженер керек. Иженерге дезе бек бӱдӱмји керек. Бӱдӱмјини канайып  тыҥыдар? Агару Бичикти ӱренер, мӱргӱӱр, туштажуларга јӱрер ле јарлаар ишке туружар керек. Бистиҥ мынайда албаданып турганысты кӧрӱп, Иегова алкыжын берер. Кудай Самсонго болушкан болордо, биске де ийде-кӱч берер.

12. Самсон кандый јастыра јӧп чыгарган?

¹² Самсон бистий ле толо кеминде эмес кижи болгон. Оныҥ учун кезикте ол јастыра јӧптӧр чыгарып туратан. Оныҥ андый бир јастыра јӧби јаан тӱбекке экелген. Самсонныҥ јаргычы болуп иштегени удай берген кийнинде, ол «Сорек ӧзӧктӧ јуртаган Дали́ла деген ӱй кижини сӱӱй берген» (Јарг. 16:4). Мынаҥ озо Самсон бир филистим ӱй кижини аларга сананган. Је ол тушта Самсон Иегованыҥ башкартузы аайынча, «филистимляндардаҥ ӧч алар арга бедиреген» болгон. Кийнинде, Самсон Газа деп филистим калага барып, анда балыр ӱй кижиниҥ айылына токтогон. Ол тӱнде, Кудай Самсонго ийде-кӱч берерде, ол каланыҥ эжиктерин кодоро тартып, кырдӧӧн апарып салган. Анайып, кала кору јок артып калган (Јарг. 14:1—4; 16:1—3). Је Далилала айалга чек башка болгон. Бу ӱй кижи Израиль албатынаҥ болгон болор, оныҥ учун Самсон бу ӱй кижиле бириккен болзо, филистимляндарла ӧштӧжип болбос эди.

13. Далила Самсонды кандый тӱбекке ийде салды?

¹³ Далила филистимляндардаҥ јаан акча аларга болуп, Самсонды садарга јӧпсинди. Ол нениҥ учун андый кӱчтӱ  деп билип аларга, кажы ла кӱн ыйлап-сыктап, јайнап баштады. Самсон ол ӱй кижиге кандый коркышту бӱткен? Байла, ол ӱй кижини сӱӱгенинеҥ улам кӧзи бӧктӧлип калган болор. Оныҥ учун ол бастыра јажыдын айдып берди. Мынаҥ улам Самсон канча да ӧйгӧ Иегованыҥ јарадузын ла бойыныҥ ийде-кӱчин јылыйтып салган (Јарг. 16:16—20).

14. Самсонныҥ Далилага бӱткени неге экелди?

¹⁴ Самсон Иеговага бӱдердиҥ ордына, Далилага бӱткени учун коркышту тыҥ шыралаган. Оны филистимляндар тудала, кӧзин ойып, Газа деп каладагы тӱрмеге таштап ийгендер. Мынаҥ озо Самсон бу ла каланыҥ эжигин кодоро тартала, кырдӧӧн апарып салган. Филистимляндар оны кул эделе, аш теермендеткен. Оныҥ кийнинде, олор бойыныҥ Дагон деп кудайына јаан тайылга эдерге, байрамга јуулышкылаган. Олордыҥ санаазыла болзо, олордыҥ колына Самсонды бу кудайы берген (Јарг. 16:21—25). Оныҥ учун филистимляндар Самсонды тӱрменеҥ шоодып, каткырыжарга чыгарып алгандар.

15. Самсон ойто Иеговага иженип баштаганын канайып кӧргӱскен? (Јаргычылар 16:28—30). (Кадарындагы јурукты кӧрӱгер.)

¹⁵ Самсон тыҥ јастырган да болзо, бир де чӧкӧбӧгӧн. Ол Кудайдыҥ берген јакылтазын оноҥ ло ары бӱдӱрерге белен болгон. (Јаргычылар 16:28—30 кычырыгар.) Оныҥ учун Самсон Иегованы: «Филистимляндардаҥ ӧч алайын» — деп сураган. Чындык Кудай оныҥ мӱргӱӱлин угуп, ого коркышту јаан ийде-кӱч берген. Мыныҥ болужыла Самсон коркышту кӧп филистимляндарды ӧлтӱрип салган. Бӱдӱн јӱрӱмине де ол ончо кире кӧп филистимляндарды ӧлтӱрбеген.

16. Самсонныҥ јастыразынаҥ бис неге ӱренерис?

¹⁶ Самсон бойыныҥ јастыразы учун шыралаган да болзо, Кудайдыҥ табын бӱдӱрерге тыҥ кӱӱнзеген. Бисти јастырганыс учун тӱзеткен болзо, ол эмезе јуундагы молјуларысты айрып салган болзо, чӧкӧбӧс керек. Иегова бистиҥ јастырагысты таштаарга белен деп ундыбай јӱректер (Сар. 103:8—10). Бис јастырган да болзоос, ол биске јаҥы јакару берер аргалу. Бойыныҥ ӧйинде  Самсонго ийде-кӱч бергени чилеп, биске де ийде-кӱч берер.

17, 18. Майклдыҥ учуралы слердиҥ кӱӱнеерди канайып кӧдӱрет? (Јурукты база кӧрӱгер.)

¹⁷ Эмди Майкл деп карындаштыҥ јӱрӱминде не болгонын кӧрӱп ийектер. Ол Иеговага эрчимдӱ иштеген. Јуунда болушчы ишчи ле текши пионер болгон. Је бир јастыразынаҥ улам, ол јуундагы молјуларын јылыйтып салган. Майкл куучындайт: «Иеговага сӱреен кӧп иштеп турган бойым неге де турбас болуп калгам. Ол ӧйдӧ Иегова мени таштап ийди деп сананбагам да болзом, је алдындагызындый чылап, Иеговага јуук болуп, ого кӧп иштеп болбозым деп санаалар келген».

¹⁸ Карын Майкл чӧкӧбӧгӧн. Ол мынайып куучындайт: «Мен ойто Иеговага јуук болорго, бастыра кӱчимнеҥ албаданып баштагам. Оныҥ учун мен јаантайын јӱрегимде не барын ӱзе ого куучындап, оныҥ Сӧзин шиҥдеп, сананып туратам». Бир эмеш ӧй ӧткӧн кийнинде, ого јуунда ойто молјулар берип баштаган. Бӱгӱнги кӱнде Майкл аксагал ла текши пионер болуп јат. Ол оноҥ ары куучындайт: «Мен сӱреен кӧп болуш ла токунал алгам, анчада ла аксагалдардаҥ. Мынаҥ, Иегова мени эмдигенче сӱӱп турган деп, оҥдоп алгам. Эмди мен јуунда ару уйатту иштенер аргалу. Анайда ок бу учуралдаҥ мындый немеге ӱренип алгам: кижи јастыразын чыннаҥ ла алынып турза, Иегова андый кижиниҥ јаманын таштап турган деп». Бисте де мындый болордоҥ айабас. Бис јастырып ийеле, акту јӱрегистеҥ кинчегисти алынып, Кудайга иженип турзаас, ол биске болужып, кайралдаар аргалу (Сар. 86:5; Укаа 28:13).

19. Самсонныҥ учуралы слердиҥ кӱӱнеерди канайып кӧдӱрет?

¹⁹ Бу јӧрмӧлдӧ Самсонло болгон кезик јилбилӱ учуралдарды кӧрдис. Ол, толо кеминде эмес кижи, Далилага јажыттарын ачып, јаан јастыра эткен. Је ол Иеговага оноҥ ло ары иштеген. Иегова да оны артыргыспаган. Анайда ок Иегова Самсонго база бир јаан иш эдетен арга берген. Иегова Самсонды бӱдӱмјизи бек кижи болгон деп кӧргӧн. Нениҥ учун дезе Еврейлерге 11-чи бажалыкта Кудайдыҥ чындык ишчилериниҥ тоозына оныҥ ады база кирип калган. Кандый ла уур-кӱчтерге табартсаас, бистерге болужарга кӱӱнзеп турган, теҥеридеги сӱӱштӱ Адабыска иштеерге кандый јакшы! Айдарда, Самсон чылап: «Мени эске алып... ийде-кӱч берзеҥ» — деп, јаантайын Иегованы сурап турактар (Јарг. 16:28).