1. Пётр сӱреен кӧп балык тудуп алала, канайтты?

 ПЁТР тӱниле балыктаган да болзо, бир де болчок балык тудуп болбоды. Бу ла ӧйдӧ Иисус базып келеле, мынайып айтты: «Кӧлдиҥ тереҥ деген јерине јӱс, анда шӱӱндегер» (Лука 5:4). Пётр Иисустыҥ сӧстӧрине алаҥзыган да болзо, је оныҥ сӧзин угуп, анайып ла этти. Оноҥ олор андый кӧп балык тудуп алды, балыктыҥ кӧбине олордыҥ шӱӱни јыртылып баштады! Бу мындый кайкалды кӧрӧлӧ, Пётр ла ӧскӧ балыкчылар оной «тыҥ кайкашкан». Бу ла ӧйдӧ Пётр Иисуска мынайып айтты: «Мени артыргызып сал, Кайракан, мен кинчектӱ кижи эдим!» (Лука 5:6—9, ЈТ). Айдарда, Пётр бойын Иисустыҥ јанына турбас кижи деп сананган болор.

2. Биске Пётрдыҥ темин шӱӱшкени нениҥ учун тузалу болор?

² «Мен кинчектӱ кижи» — деп, Пётрдыҥ айтканы чын болгон. Кезикте Пётр эткен керектери эмезе сӧстӧри учун тыҥ санааркап туратан. Слерге Пётрдыҥ сезимдери таныш па? Слер узак ӧйдиҥ туркунына кандый бир једикпестереерле эмезе уйан јандараарла тартыжып турган болороор. Андый болзо, Пётрдыҥ темин шиҥдезеер, слер бу тартыжуны јеҥип чыгарар деп, билип алараар. Бис нениҥ учун оной сананып јадыс? Мынайып сананып ийзеер де: Иегова Пётрдыҥ јастыраларын Агару Бичикке бичитпес аргалу болгон, је бисти кӧп немеге ӱренип алзын деп бичидип салган (2 Тим. 3:16, 17). Пётр бистий ле ошкош уйан јандарлу ла једикпестерлӱ кижи болгон деп кӧрӱп ийерис. Иегова Пётрдаҥ толо кемдӱ болорын сакыбаган. Бистеҥ де сакыбай јат. Иегова бисти колысты бош салбазын ла јастыраларыс ого иштеерге буудак болбозын деп кӱӱнзейт.

3. Биске колысты нениҥ учун бош салбас керек?

³ Биске колысты нениҥ учун бош салбас керек? Кижи та нени де јаантайын эдерге албаданып турза, оны  јакшы эдип ӱренип алат. Мындый тем кӧрӱп ийектер. Кижи скрипкала јакшы, јараш эдип ойноорго ӱренип аларга турган болзо, бого сӱреен кӧп ӧй керек. Је ӱренип јаткан ӧйдиҥ туркунына ол кӧп јастыра ноталар ойноор болор. Је јастыраларына кӧрбӧй, оноҥ ло ары албаданып турза, ол учы-учында јакшы ла јараш эдип ойноорго ӱренип алар. Јакшы ойноорго ӱренип алган кийнинде де ол јастырар болор, је ол колын бош салбай, оноҥ ло ары албаданып јат. Анайып, биске кандый бир једикпестиҥ аайы-бажына чыгып калганыс деп билдирип те турза, кезикте ол ойто ло чыгып келер аргалу, је бис амадубыска једерге, оноҥ ло ары албаданып јадыс. Кезикте бис та нени де айдып ийеле эмезе эдип ийеле, тыҥ санааркап јадыбыс. Је андый да болзо, бис колысты бош салбаска бек шӱӱп алган болзоос, Иегова биске болужар (1 Пётр 5:10). Пётрдыҥ јӱрӱми биске сӱреен јакшы тем болуп јат. Иисус Пётрдыҥ јастыраларына кӧрбӧй, оны јакшы оҥдогон. Бу шӱӱлте бисти Иеговага оноҥ ло ары иштеерге кӱӱнзедер аргалу.

4. Лука 5:5—10-ло болзо, Пётр бойын кандый кижи деп айткан ла Иисус оны неде бӱдӱмјилеген?

⁴ Пётр бойын нениҥ учун «кинчектӱ кижи» деп адаган ла кандый кинчектер керегинде айтканын Агару Бичикте айдылбаган. (Лука 5:5—10, ЈТ кычырыгар.) Ол јаан јастыралар эткен болордоҥ айабас. Иисус Пётрдыҥ коркып турганын кӧргӧн. Оныҥ коркып турганыныҥ шылтагы бойын уйан кӧрӱп турганы болгон болор. Је Пётр Кудайга чындык артар аргалу деп, Иисус билген. Оныҥ учун ол бойыныҥ ӱренчигине јылу этире: «Коркыба» — деп айткан. Иисустыҥ мындый бӱдӱмјилӱ айткан сӧстӧринеҥ Пётрдыҥ јӱрӱми солынган. Кийнинде ол Андрейле кожо балык тудар ижин артыргызала, Мессияныҥ кийнинеҥ барган. Бу учун Иегова олорго јаан алкыжын берген (Марк 1:16—18).

5. Пётр коркып та турган болзо, Иисустыҥ кийнинеҥ барганы учун кандый алкыштар алган?

⁵ Иисустыҥ кийнинеҥ барала, Пётр сӱреен кайкамчылу кӧп учуралдар кӧргӧн. Ол Кайраканныҥ улусты јасканын, кӧрмӧстӧрди сӱргенин ле божогон улусты да тиргискенин бойыныҥ кӧзиле кӧргӧн (Матф. 8:14—17; Марк 5:37, 41, 42) b. Анайда ок Иисус келер ӧйдӧ Каан болотон ӧйин кӧрӱлтеде кӧргӱзип турарда, Пётр оны база кӧргӧн. Бу кӧрӱлтени ол  бастыра јӱрӱмине сананып алган (Марк 9:1—8; 2 Пётр 1:16—18). Пётр Иисустыҥ ӱренчиги болбогон болзо, бу кайкалдарды качан да кӧрбӧс эди. Карын ол јастыра санааларына алдыртып, коркыйла, отурып калбаганына сӱреен тыҥ сӱӱнген болор.

6. Пётрга једикпестеринеҥ айрыларга јеҥил болгон бо? Јартап беригер.

⁶ Пётр Иисустыҥ сӱреен кӧп кайкалдарын кӧргӧн! Је андый да болзо, оныҥ једикпестери тӱҥей ле чыгып келетен. Бир канча учуралдар кӧрӱп ийектер. Темдектезе, Иисус ого Агару Бичикте айдылганыла, шыралап ӧлӧр учурлу деп айдарда, Пётр оныла ондый неме болбос деген (Марк 8:31—33). Анайда ок ол до, ӧскӧ дӧ апостолдор олордыҥ ортозында кем эҥ ле јаан деп кӧп катап сӧс блаажып туратан (Марк 9:33, 34). А бир катап, Иисус божоор тӱнде, Пётр баш билинип, колына кылышты алала, бир кижиниҥ кулагын кезе чабып ийген (Иоанн 18:10). Ол ло тӱнде, Пётр Иисустыҥ јуук најызы да болгон болзо, коркыйла, ӱч катап оны билбезим деп айткан (Марк 14:66—72). Мынаҥ улам ол ачу ыйлаган (Матф. 26:75).

7. Иисус тирилген кийнинде, Пётрга кандый арга берген?

⁷ Је Иисус бойыныҥ апостолынаҥ чӧкӧбӧгӧн. Пётр оны сӱӱген деп, ол билген. Анайда ок ого сӱӱжин кӧргӱзер арга берген. Тирилген кийнинеҥ, Иисус Пётрга јолугып: «Койлорымды кабыр» — деп айткан. Пётр Иисустыҥ айтканын бӱдӱрерге белен болгон (Иоанн 21:15—17). Иерусалимде, Беженинчи кӱнинде, баштапкы катап агару тын ӱренчиктерге урулып турарда, Пётр олордыҥ ортозында болгон.

8. Пётр Антиохияда болордо, кандый јаан јастыра эткен?

⁸ Пётрдыҥ једикпестери майлаткан кийнинде де јоголбогон. Б. э. 36-чы јылында, еврей эмес Корнилий деп кижиге агару тын тӱжерде, Пётр оны кӧргӧн. Бу учуралдаҥ «Кудай улустыҥ чырай-бӱдӱжине кӧрбӧй» турган ла ӧскӧ укту улус христиан јуунга кожулар аргалу деп јарт кӧрӱнген (Ап. ижи 10:34, 44, 45). Мыныҥ кийнинде Пётр андый улусла отурып ажанып туратан, је мынаҥ озо ол оны качан да этпес эди (Гал. 2:12). Кезик еврей укту христиандар олорго ӧскӧ укту албатыларла кожо ажанарга јарабас деп сананып туратан. Качан Антиохиядӧӧн анайып сананып туратан кезик христиандар келерде, Пётр еврей эмес укту акалардаҥ тууралап баштаган. Ол еврей укту христиандарды ачындырып ийбеске мынайып эткен болор. Је апостол Павел мыны кӧрӱп ийеле, Пётрды улустыҥ кӧзинче ле тӱзедип ийген (Гал. 2:13, 14). Андый да болзо, Пётр бойынаҥ чӧкӧбӧй, Иеговага оноҥ ло ары чындык иштеерге албаданган. Ого не болушкан?

9. Иоанн 6:68, 69-ла болзо, Пётр Иисуска канайып чындык арткан?

⁹ Пётр Иисуска чындык болгон. Оныҥ чындыгы бир учуралдаҥ јарт кӧрӱнген. Бир катап ӱренчиктер Иисустыҥ айтканын оҥдобой, оны таштайла, јӱре бергендер. (Иоанн 6:68, 69 кычырыгар.) Је бу айалгада Пётр оны таштабаган. Ол: «Сениҥ сӧстӧриҥ ӱргӱлји јӱрӱм берет» — деп, алаҥзыбай айткан.

10. Иисустыҥ Пётрга бӱткени недеҥ кӧрӱнген? (Јурукты база кӧрӱгер.)

¹⁰ Пётр кӧп јастырган да болзо, Иисус оны таштабаган. Иисустыҥ божоор алдында не болгонын кӧрӱп ийектер. Ол кӱнде Иисус, Пётр ла апостолдор оны таштап ийеле, кача берер деп, билген. Андый да болзо, Иисус, кийнинде Пётрдыҥ бӱдӱмјизи тыҥып, Кудайга  чындык иштеер деп бӱткен (Лука 22:31, 32). Ол «тын сергек, эт-канда дезе чине јок» деп оҥдогон (Марк 14:38). Оныҥ да учун Пётр оноҥ ӱч катап јана тӱжерде, Иисус апостолынаҥ чӧкӧбӧгӧн. Тирилген кийнинде, Пётр јаҥыскан болордо, ого кӧрӱнген (Марк 16:7; Лука 24:34; 1 Кор. 15:5). Сананып ийзеер де, бу дезе ал-санаага тӱжӱп калган Пётрдыҥ бӱдӱмјизин не аайлу тыҥыткан не!

11. Иисус Пётрга Иегова оны артыргыспас деп оҥдоорго канайып болушкан?

¹¹ Иисус Пётрга Иегова оны артыргыспас деп оҥдоп аларга болушкан. Тирилген кийнинде ол, Пётр ла ӧскӧ апостолдор кӧп балык тудуп алзын деп, эткен (Иоанн 21:4—6). Бу кайкал Пётрды Иеговага оныҥ керексиништерин јеткилдеерге бир де кӱч эмес деп бӱдӱмјилеген. Ол, Кудайдыҥ Каандыгын јӱрӱминде баштапкы јерге тургузып турган улустыҥ керексиништерин Иегова јеткилдеер деп, Иисустыҥ айткан сӧстӧрин эске алган болор (Матф. 6:33). Оныҥ учун Пётр јӱрӱмин балык тударына эмес, је јарлаар ишке учурлаган. Б. э. 33-чи јылыныҥ Беженинчи кӱнинде Пётр јалтанбай, куучын-эрмек айткан. Бу куучын-эрмектеҥ улам канча муҥ улус чындыкты алынган (Ап. ижи 2:14, 37—41). Анайда ок Пётр самаритяндарга ла еврей эмес укту улуска Христостыҥ ӱренчиги болорго болушкан (Ап. ижи 8:14—17; 10:44—48). Бу учуралдардаҥ Иегова Пётрды јуундӧӧн башка-башка укту улусты экелерге, эрчимдӱ тузаланган деп јарт кӧрӱп јадыс.

12. Кандый бир једикпезиле тартыжып турган улуска Пётрдыҥ теми канайып болужар аргалу?

¹² Је Иегова биске де ого чындык артарга болужар. Анчада ла бойыстыҥ кандый бир једикпезисле тартыжып турзаас. Кезикте апостол Пётрга бистерге кӧрӧ јеҥил болгон деп сананар болорыс. Је Иегова биске колысты бош салбаска, ийде-кӱч берер аргалу (Сар. 94:17—19). Бир ака Иегованыҥ Керечили болордоҥ озо канча јылдардыҥ туркунына гомосексуалист болгон. Чындыкка болуп, ол бӱдӱн јӱрӱмин солыган. Је кезикте оныҥ јастыра кӱӱни тӱҥей ле чыгып келет. Иеговага чындык артарга ого не болужат? Ол аканыҥ сӧстӧриле болзо, Иегованыҥ агару тыны эмес болзо, ол колын бош салып ийер эди. «Меге Кудайдыҥ агару тыны  чындыктыҥ јолынаҥ туура јӱре бербеске болужып јат... ...Иегова меге оныҥ ишчизи болотон арга берген, анайда ок менде једикпестер бар да болзо, ол мени бир де артыргыспай јат» — деп, ол ака куучындаган.

13. Апостолдордыҥ ижи 4:13, 29, 31-де бичилген Пётрдыҥ теминеҥ бис неге ӱренер аргалу? (Јурукты база кӧрӱгер.)

¹³ Улустаҥ коркып турганынаҥ улам Пётр јастырып туратан деп кӧрдис. Ого јалтанбас болорго мӱргӱӱл болужатан. (Апостолдордыҥ ижи 4:13, 29, 31, ЈТ кычырыгар.) Бис база коркыбас аргалу. Нацисткий Германияда јаткан Хорст деген карындашла мындый учурал болгон. Школдо: «Хайль Гитлер!» — деп айдарга албадап турза, ол коркый береле, айдып ийетен. Је андый неме болуп турза, оныҥ ада-энези оны арбанбай, Иегова ого јалтанбас болорго болушсын деп, кожо мӱргӱп туратан. Кудайга чындык артарга, ого ада-энезиниҥ болужы ла Иеговага иженгени болушкан. Кийнинде ол мынайда аткан: «Иегова мени качан да артыргыспаган» c.

14. Колын бош саларга тургандарга сӱӱштӱ кӱдӱчилер канайып болужар аргалу?

¹⁴ Иегова ла Иисус бисти качан да артыргыспас. Пётрга Кайраканнаҥ јана болгон кийнинде, Иисустыҥ кийнинеҥ оноҥ ары барар ба, јок по деп шӱӱлте чыгарар керек болгон. Иисус Пётрдыҥ бӱткени уйадабазын деп, Иеговага јайнап мӱргӱген. Анайда ок Пётрга ол керегинде мӱргӱгенин ле кийнинде ол акалардыҥ бӱткенин тыҥыдар аргалу деп айткан (Лука 22:31, 32). Иисустыҥ бу сӧстӧрин кажы ла катап эске алган тужында Пётрдыҥ кӱӱни кӧдӱрилген болор.  Бис мындый талдаштыҥ алдында турзаас, Иегова биске сӱӱштӱ кӱдӱчилер ажыра болужар аргалу. Бисти чындык артып калзын деп, олор керектӱ болушты јетирер (Эф. 4:8, 11). Кӧп јылдардыҥ туркунына Иеговага иштеп турган Пол деп аксагал мындый кӱдӱчи болорго албаданат. Ол кӱӱни ӧчӱп калган улусты Иегова олорды бойына канайып јууктатканын эске алзын деп сурайт. Оноҥ Иегова олорды сӱӱп турган ла качан да артыргыспас деп бӱдӱмјилейт. Пол куучындайт: «Кӱӱни ӧчӱп бараткан кӧп ака-эјелерге Иегова ойто ийде-кӱч алынарга болушкан деп кӧргӧм».

15. Апостол Пётр ла Хорст Хеншель аканыҥ темдеринеҥ Матфей 6:33-теги сӧстӧр чын деп канайып кӧрӱнет?

¹⁵ Иегова Кудай апостол Пётрды ла ӧскӧ дӧ апостолдорды јӱрӱмге керектӱ не-немеле ӱзе јеткилдеген. Анайып ла бисти де бӱгӱнги кӱнде Кудайдыҥ Каандыгын баштапкы јерге тургузып турзаас, ӱзе керектӱ немеле јеткилдеер (Матф. 6:33). Ӧрӧги айдылган Хорст аканыҥ темин эске алып ийектер. Экинчи телекейлик јууныҥ кийнинде Хорст пионер болорго тыҥ кӱӱнзеген. Је ол јокту болгонынаҥ улам, Иеговага ӧйимди толо берип иштезем, бойымды канайып јеткилдеерим деп, алаҥзып баштагам. Је ол оны Иегова кичеер бе, јок по деп кӧрӧргӧ сананган. Бир катап аймак кӧрӧӧчи келерде, ол бир неделениҥ туркунына јарлаар ишке турушкан. Неделениҥ учы једип келерде, аймак кӧрӧӧчи ого ады-јолы бичилбеген конверт берди. Хорст бу конвертти ачып ийерде, оныҥ ичинде канча айга јадатан акча болды. Ол бу сыйдаҥ Иегова оны качан да артыргыспас деп билип алды. Оноҥ ло бери Хорст ака јӱрӱминде Кудайдыҥ Каандыгын баштапкы јерге тургузып баштаган (Мал. 3:10).

16. Пётрдыҥ темин ле самараларын биске нениҥ учун ајаруга алар керек?

¹⁶ Качан да Пётр Иисусты оны артыргызып салзын деп сураган. Карын Иисус оны укпаганы учун ол тыҥ сӱӱнген болор! Иисус Пётрды оноҥ ло ары ӱреткен. Оныҥ болужынаҥ улам ол чындык апостол болуп калган ла биске сӱреен јакшы тем болуп јат. Иисустыҥ Пётрды канайып ӱреткенинеҥ бис те кӧп немеге ӱренер аргалу. Бу ӱредӱлердиҥ кезигин, анайда ок ӧскӧ дӧ кӧп немелерди Пётрдыҥ эки самаразынаҥ билип аларга јараар. Озо баштап олор баштапкы чактыҥ христиандарына бичилген болгон, је кийнинде Агару Бичикке кирген. Келер јӧрмӧлдӧ бу самараларда бичилген кезик ӱредӱлерди кӧрӱп, бис олордоҥ неге ӱренер аргалу деп билип аларыс.