1, 2. Апостолдордыҥ ижи 8:27—31, 35—38-ле болзо, эфиоп эр кижи недеҥ улам чӧҥӱрилерге кӱӱнзеген?

СЛЕР Христостыҥ ӱренчиги болорго, чӧҥӱрилерге кӱӱнзейдеер бе? Кӧп улус бу алтамды эдип салган. Бу алтамды олор Иегованы сӱӱп турганынаҥ ла ого быйанзак болгонынаҥ улам эткен. Эфиоп эр кижиниҥ темин кӧрӱп ийектер. Ол Эфиопияныҥ абакай-кааныныҥ ишчизи болгон.

² Бу кижи Агару Бичиктеҥ билгирлерди алган ла кийнинеҥ сууга чӧҥӱрилген. (Апостолдордыҥ ижи 8:27—31, 35—38 кычырыгар.) Чӧҥӱрилерге оны не кӱӱнзеткен? Ол Кудайдыҥ Сӧзин тыҥ баалаган, оныҥ учун јуучыл абралу барып јадала, судурчы Исаияныҥ бичигин кычырган. А Филиппле куучындашкан кийнинеҥ, Иисус Христоско быйанын кӧргӱзерге кӱӱнзей берген. Је бу эфиоп кижи Иерусалимге нениҥ учун јӱрген? Нениҥ учун дезе оныҥ јӱрегинде Кудайга сӱӱш болгон. Мыны кайдаҥ билип јадыс? Эфиоп кижи ада-ӧбӧкӧлӧриниҥ кудай јаҥын артыргызып, чындык Кудайга бажырып турган сок јаҥыс албатыга кожулган болор. Оныҥ учун Иерусалимге Иеговага бажырарга барып јӱрген. Иегованы сӱӱп турганынаҥ улам ол јаан учурлу база бир алтамды эдерине — Христостыҥ ӱренчиги болуп чӧҥӱрилерине кӱӱнзеген (Матф. 28:19).

3. Сууга чӧҥӱрилерге не буудак болордоҥ айабас? (« Слердиҥ јӱрегерди кандый јерле тӱҥдештирерге јараар?» деп рамканы кӧрӱгер.)

³ Сӱӱш слерди сууга чӧҥӱрилерге кӱӱнзедер аргалу. Је сӱӱш сууга чӧҥӱрилерге буудак та болордоҥ айабас.  Темдектезе, слер Иеговага иштебей турган најылараарды ла тӧрӧӧндӧригерди тыҥ сӱӱп турганаардаҥ улам, мынайып сананар болороор: «Мен сууга чӧҥӱрилип калзам, олор менле куучындашпас» (Матф. 10:37). Эмезе слер Иеговага јарабай турган керектер эдип турган болороор. Оныҥ учун оныҥ нормаларыла јӱрерге, слерге кӱч болуп јат (Сар. 97:10). Анайда ок слер јаштаҥ бери кандый бир чӱм-јаҥдарды ла байрамдарды сӱӱп турган болороор. Алдында олорды канайып ӧткӱргенигерди де сананарга јарап јат. Је тӧгӱн кудай јаҥла колбулу бу чӱм-јаҥдар ла байрамдар Иеговага јарабай турган деп билип алала, олорды артыргызарга кӱч болуп турган болор (1 Кор. 10:20, 21). Андый болзо, эҥ ле тыҥ кемди эмезе нени сӱӱйтенин талдап алар керек.

4. Слерди сууга чӧҥӱрилерге озо ло баштап не кӱӱнзедер учурлу?

⁴ Бисте сӱӱйтен ле быйанысты кӧргӱзетен шылтактар кӧп. Темдектезе, слер Иегованыҥ Керечилериле таныжардаҥ да озо, Агару Бичикти тыҥ баалаган болороор, анайда ок Иисусты сӱӱген болорыгар. Оныҥ учун Иегованыҥ Керечилериле таныжып, слерге олорло куучындажарга јараган болор. Је мындый јылу сезимдер слерди Иеговага учурланып, чӧҥӱрилерге кӱӱнзетпестеҥ айабас. Нениҥ учун дезе чӧҥӱрилерге, озо ло баштап Иегова Кудайды сӱӱп турганаар кӱӱнзедер учурлу. Слер эҥ ле тыҥ Иегованы сӱӱп турзагар, ого иштеерге слерге кем де, не де чаптыгын јетирип болбос. Иегованы сӱӱп турганаар слерди чӧҥӱрилерге кӱӱнзедер ле чӧҥӱрилген де кийнинде Кудайга чындык артарга болужар.

5. Бис бу јӧрмӧлдӧҥ нени билип аларыс?

⁵ Иисус биске Иегованы бастыра јӱрегисле, бастыра бойысла, бастыра санаасла, бастыра ийде-кӱчисле сӱӱр керек деп айткан (Марк 12:30). Је Иегованы мынайып тыҥ сӱӱрге ле тооп јӱрерге, нени эдер керек? Иегова бисти канайып тын сӱӱп турганын сананып турзаас, бис Иегованы сӱӱп баштаарыс (1 Иоанн 4:19). Слер бу јӧрмӧлдӧҥ, Иеговага сӱӱжисти ӧскӱрип, сууга чӧҥӱрилерге нени эдер керек деп, билип аларыгар.

6. Римдегилерге 1:20-ле болзо, Иегова керегинде бис недеҥ билип алар аргалу?

⁶ Иегова керегинде билгирлер аларга, оныҥ јайаандарын кӧрӱгер. (Римдегилерге 1:20 кычырыгар; Ачыл. 4:11.) Кайкамчылу јайалган ӧзӱмдерди ле тындуларды кӧрӱп, Јайаачыныҥ ойгорын кӧрӧргӧ ӱренигер. Бого ло коштой кайкамчылу бӱткен эди-каныгар керегинде кӧптӧдӧ билип алыгар (Сар. 139:14). Анайда ок Кӱнди сананып кӧрӱгер. Кӱн сӱрекей јаан ийде-кӱчтӱ де болзо, миллиардтар тоолу јылдыстарга кӧрӧ, јаан эмес јылдыс болот (Иса. 40:26) *. Мынайып слер Иеговала оноҥ тыҥ оморкоорыгар. Је Иегованы тыҥ сӱӱрге ле оныҥ најызы болорго, оныҥ јӱк ле ойгорын ла ийде-кӱчин билер керек эмес, је оныҥ ӧскӧ дӧ кылык-јаҥдарын билип алар керек.

7. Иегованы тыҥ сӱӱрге, неде бӱдӱмјиленип алар керек?

⁷ Иегова слерди сӱӱп турган деп, бӱдӱмјиленип алар керек. Слерге, Јер-телекейдиҥ Јайаачызы слерди билер ле сӱӱп турган деп, бӱдерге кӱч пе? Эйе болзо, Иегова «кажыбыстаҥ ла ыраак эмес» деп ундыбагар (Ап. ижи 17:26—28). Кудай «ончо јӱректерди шиҥдеп јат», оныҥ учун слер Давидтиҥ Соломон уулына: «Сен оны [Кудайды] бедиреер болзоҥ, ол бойын сеге ачып берер» — деп  айткан сӧстӧрин слерге де айдылган деп сананар аргалу (1 Лет. 28:9). Сананып ийзеер де: слерди Агару Бичик ӱрензин деп, Иегова кӱӱнзеген. Ол: «Мен сени бойымга јууктадып алгам» — деп айдат (Иер. 31:3). Айдарда, Иегованыҥ слерге эдип турганын канча ла кире тыҥ баалап турзагар, Оны ончо ло кире тыҥ сӱӱригер.

8. Иегованыҥ сӱӱжин баалап турганаарды канайып кӧргӱзеригер?

⁸ Иегованыҥ сӱӱжин баалап турганаарды канайып кӧргӱзеригер? Сӱӱжисти кӧргӱзетен аргалардыҥ бирӱзи — оныла мӱргӱӱлде куучындажары. Кудайга бойыгардыҥ санааркаштараарды куучындап турзагар ла слерге эдип турганы учун быйаныгарды айдып турзагар, Кудайга сӱӱжигер тыҥыыр. Анайда ок мӱргӱӱлдереердиҥ карууларын кӧрӱп турзагар, Иеговала колбулараар тыҥыыр (Сар. 116:1). Анайып, Кудай слерди оҥдоп турган деп бӱдӱмјиленип аларыгар. Је Иеговага јууктаарга, слерге оныҥ кӧрӱм-санаазын база оҥдоп турар керек. Анайда ок ол слердеҥ нени некеп турганын билип турар керек. Мындый билгирлерди јӱк оныҥ Сӧзин, Агару Бичикти, шиҥдеп турзаас, аларыс.

9. Агару Бичикти баалап турганаарды слер канайып кӧргӱзеригер?

⁹ Кудайдыҥ Сӧзин, Агару Бичикти, баалап турыгар. Иегова керегинде чындыкты ла Кудайдыҥ слерге нени белетеп салганын јӱк ле Агару Бичик ачып јат. Слер Агару Бичикти баалап турганаарды канайып кӧргӱзереер? Оны кажы ла кӱн кычырыгар. Иегованыҥ Керечилери слерге ӧткӱрип турган ӱредӱлерге белетенигер, анайда ок билип алганаарды јӱрӱмигерде тузаланыгар (Сар. 119:97, 99; Иоанн 17:17). Слерде Агару Бичикти кычыратан график бар ба? Је бу графикти тузаланадаар ба? Кудайдыҥ Сӧзин кажы ла кӱн кычырарга келижет пе?

10. Агару Бичик незиле аҥылу?

¹⁰ Анайда ок Иисус Христосты кӧргӧн улустыҥ куучындары јӱк ле Агару Бичикте бичилет. Бу эҥ ле бӱдӱмјилӱ бичик. Ондо Иисус улуска нени эткени керегинде бичилет. Иисустыҥ айткан сӧстӧрин ле эткен  керектерин кычырып, слер оныҥ најызы болорго кӱӱнзей берер болорыгар.

11. Иегованы сӱӱрге нени эдер керек?

¹¹ Иисусты сӱӱп турзагар, Иегованы оноҥ тыҥ сӱӱригер. Иисус Адазынаҥ темди канайып алатанын толо кеминде кӧргӱскен (Иоанн 14:9). Айдарда, слер Иисус керегинде канча ла кире кӧп билзегер, Иегованы ончо ло кире јакшы оҥдоп, ончо ло кире тыҥ сӱӱригер. Темдектезе, Иисус јокту-јойу, ооруп-чылап ла улуска јаман кӧрдӱрип јӱрген улусты канайып килегенин сананып ийзеер. Анайда ок оныҥ тузалу јӧптӧрин сананып, бу јӧптӧр јӱрӱмигерди канайып солып турганын база сананып кӧрӱгер (Матф. 5:1—11; 7:24—27).

12. Иисус керегинде билгирлер слерди неге кӱӱнзедер?

¹² Слерге Иисусты оноҥ тыҥ сӱӱрге, кинчектереерди таштап турган толынты тайылганы шӱӱп сананганаар болужар (Матф. 20:28). Иисус слер учун јӱрӱмин берген деп оҥдоп баштазаар, кинчегерди алынарга ла Иегованыҥ јарадузын аларга кӱӱнзей береригер (Ап. ижи 3:19, 20; 1 Иоанн 1:9). Иисусты ла Иегованы сӱӱп баштазаар, олорды база сӱӱп турган улусла куучындажарга кӱӱнзеригер.

13. Иегова слерге нени берген?

¹³ Иегованыҥ билезин сӱӱгер. Иеговага иштебей турган слердиҥ билегердиҥ улузы ла алдындагы најылараар, јӱрӱмигерди Кудайга нениҥ учун учурлаарга турганаарды оҥдобой турган болор. Керек дезе олор слерге удурлажардаҥ да айабас. Је Иегова слерге кӧгӱс биле берген. Слер Иеговага бӱдӱп турган ака-эјелерле јуук колбуларлу болзогор, керектӱ сӱӱшти ле болушты таап аларыгар (Марк 10:29, 30; Евр. 10:24, 25). Кийнинде слердиҥ тӧрӧӧндӧригер база Иегованыҥ Керечилери болуп, оныҥ нормаларыла јӱрер болор (1 Петр 2:12).

14. 1 Иоанн 5:3-те бичилген сӧстӧр чын деп, слер канайып бӱдӱмјиленгенеер?

¹⁴ Иегованыҥ нормаларын баалап, олорды тузаланыгар. Иегованы билердеҥ озо, слер бойыгардыҥ санаагарла јӱрген болорыгар, је эмди Иегованыҥ нормаларыла јӱрери канча катапка артык деп оҥдоп јадыгар (Сар. 1:1—3; 1 Иоанн 5:3 кычырыгар). Темдектезе, Агару Бичикте ӧбӧӧндӧргӧ, ӱй улуска, ада-энелерге ле балдарга берилген јӧптӧрди сананып ийзегер (Еф. 5:22—6:4). Бу јӧптӧрди тузаланып баштаганаардаҥ слердиҥ биле ырысту болуп калды ба? Иегованыҥ ойгор јӧбиле најылар талдараарда, слердиҥ кылык-јаҥыгар јакшы болуп калды ба? Слер ырысту болуп калдаар ба? (Укаа 13:20; 1 Кор. 15:33). Бу сурактарга слер «эйе» деп каруу берер болороор.

15. Слерге Агару Бичиктиҥ принциптерин тузаланарга не болужар?

¹⁵ Кезикте слерге Агару Бичиктиҥ принциптерин канайып тузаланарын оҥдоорго кӱч болордоҥ айабас. Иегова мыны оҥдоп јат, оныҥ учун слерге бойыныҥ организациязы ажыра библиялык бичиктер, видеолор ло интернет-бичиктер берет. Олор слерге «јакшыны јаманнаҥ ылгаштырар[га]» болужып јат (Евр. 5:13, 14). Бу материалдарды ӱренип, принциптерди канайып тузаланарын билип алараар. Анайып, слер Иегованыҥ организациязына кожуларга кӱӱнзеер болороор.

16. Иегова бойыныҥ албатызын канайып аайлу-башту башкарат?

¹⁶ Иегованыҥ организациязын сӱӱгер ле ого јӧмӧжигер. Иегова бойыныҥ ишчилерин бириктирип, јуундар тӧзӧгӧн. А јуундардыҥ бажы эдип, бойыныҥ Уулын, Иисус Христосты, тургускан (Еф. 1:22; 5:23). Иисус майлаткан христиандардаҥ турган јаан эмес бӧлӱкке бистиҥ кӱндерде эдилетен агару ишти башкарзын деп јакару берген.  Ол бу улусты «бӱдӱмјилӱ ле керсӱ кул» деп адаган. Бу бӧлӱкке кирип турган акалар бойыныҥ молјуларын — кӧгӱс курсак берерин ле кӧгӱс каршунаҥ корулаарын — јаан учурлу иш деп, лаптап бӱдӱрет (Матф. 24:45—47). Керсӱ кулдыҥ болужы, темдектезе, јуундагы аксагалдардыҥ бисти ӱредип ле корулап турганынаҥ кӧрӱнет (Иса. 32:1, 2; Евр. 13:17; 1 Петр 5:2, 3). Аксагалдар слерди токунадарга ла слерге Иеговала јуук колбуларлу болзын деп болужарга, бастыра кӱчинеҥ албаданып јат. Је эҥ ле јаан болужы — слерге Иегова керегинде улуска куучындаарга болужып турганы (Еф. 4:11—13).

17. Римдегилерге 10:10, 13, 14-лӧ болзо, бис улуска Иегова керегинде нениҥ учун куучындап јадыбыс?

¹⁷ Улусты Иегованы сӱӱрге ӱредигер. Иисус ӱренчиктерин улуска Иегова керегинде куучындазын деп јакарган (Матф. 28:19, 20). Бу јакаруны молју чылап бӱдӱрип турзаар, јастыра болбос, је Иеговага сӱӱжигер тыҥыган сайын, Петр ла Иоанн апостолдордыҥ сезимдерин сезеригер. Олор мынайып айткан: «Нени кӧргӧнисти ле нени укканысты айтпас аргабыс јок» (Ап. ижи 4:20). Бис эҥ јаан сӱӱнчини кижиге Иегованы сӱӱрге болушканынаҥ алып јадыс. Филипптиҥ эфиоп эр кижиге чындыкты билип аларга ла сууга чӧҥӱрилерге болушканынаҥ сӱрекей јаан сӱӱнчи алганын сананып ийзеер! Слер Филипптеҥ тем алып, Иисустыҥ јакарузын бӱдӱрип турзагар, Иегованыҥ Керечили болорго турганаарды кӧргӱзеригер. (Римдегилерге 10:10, 13, 14 кычырыгар.) Ол тушта слер эфиоп эр кижи чилеп: «Креске тӱжерге кем меге буудактап јат?» — деп, айдар болорыгар (Ап. ижи 8:36).

18. Бис келер јӧрмӧлдӧ нени шӱӱжерис?

¹⁸ Сууга чӧҥӱрилери — јӱрӱмисте эҥ учурлу алтам. Оныҥ учун мындый сурактарды јазап шӱӱп сананыгар: чӧҥӱрилери керегинде нени билер керек? Чӧҥӱрилердеҥ озо кандый алтамдар эдер керек? Чӧҥӱрилген кийнинде нени эдер керек? Бу сурактар келер јӧрмӧлдӧ шӱӱжилер.