1. Матфей 24:9-ла болзо, телекей бисти јаман кӧрӱп турза, бис нениҥ учун кайкабай јадыс?

КУДАЙ улусты бой-бойын сӱӱп турзын эдип јайаган. Оныҥ учун улус бисти јаман кӧрӱп турза, јӱрегиске ачу ла јаман болуп јат. Европада јадып турган Джорджина * эје мынайып куучындайт: «Мен Иегованыҥ Керечили болорго турарымда энем мени чек кӧрӧр кӱӱни јок боло берген. Мынаҥ улам мен бойымды кемге де керек јок, јаман кижи деп сананып баштагам. Ол ӧйдӧ меге 14-лӧ јааш болгон». Эмди дезе Данил аканыҥ учуралы. Ол мынайып куучындаган: «Мени солдаттар Иегованыҥ Керечили деп айткылап, соккылаган. Ол тушта меге коркышту јаман да, коркымчылу да болгон». Мындый учуралдар болуп турганына бис кайкабай јадыс. Нениҥ учун дезе улус бисти јаман кӧрӧр деп, Иисус озодоҥ судурлап салган. (Матфей 24:9 кычырыгар.)

2, 3. Иисустыҥ ӱренчиктерин улус нениҥ учун јаман кӧргӱлеп јат?

² Бу телекей Иисустыҥ ӱренчиктерин кӧрӧр кӱӱни јок. Нениҥ учун дезе Иисустыҥ айтканыла, олор бу «телекейдеҥ эмес» (Иоанн 15:17—19). Бис ороонныҥ јаҥдарына багынып та турган болзоос, је ороонныҥ символдорына бажырбай јадыс. Нениҥ учун дезе бис јӱк ле Иегова Кудайыска бажырып јадыс. Анайда ок јер-телекейле јӱк ле Иегова башкарар јаҥду деп бӱдӱп јадыс. Је Сатана бойыныҥ «калдыгыла» (ЈТ) кожо Кудайдыҥ башкарар јаҥын блаажып јат (Баш. 3:1—5, 15). Кудайдыҥ Каандыгы удабас Сатананы ла оныҥ телекейин јоголтып салар. Јӱк ле бу Каандык улуска јайымды экелер (Дан. 2:44; Ачыл. 19:19—21). Бу сӱӱнчилӱ јетирӱ јобош улуска сӱӱнчи экелер, калју улуска дезе ачу-корон экелер (Сар. 37:10, 11).

 ³ Бу телекей бистерди база да бир шылтактаҥ улам кӧрӧр кӱӱндери јок. Нениҥ учун дезе бис Кудайдыҥ чындык нормаларыла јӱрерге албаданып јадыс. Бу нормалар дезе телекейдиҥ нормаларынаҥ чек башка. Бӱгӱнги кӱнниҥ улузы Содом ло Гоморраныҥ ла улузындый чылап јескинчилӱ јаман керектерди эткилеп јат (Иуда 7). Олор бистиҥ Иегова Кудайдыҥ бийик нормаларыла јӱрӱп турганыска каткырыжып, «слерге ӱзе ле неме јарабас» деп јамандагылап јат (1 Петр 4:3, 4).

4. Улуска јаман кӧрдӱрип турзаас, биске не болужар?

⁴ Улус биске каткырыжып, јамандап турза, Иегова Кудайга чындык артарга биске не болужар? Мындый ӧйдӧ Иегова биске болужар деп, бир де алаҥзыбай бӱдер керек. Бистиҥ бӱдеристи Агару Бичик куйакка тӱҥейлейт. Бу куйактыҥ болужыла бис «јаманныҥ кызыган ончо согоондорын ӧчӱрип ийе[дис]» (Еф. 6:16). Је бӱдерине коштой сӱӱш база керек болот. Нениҥ учун дезе сӱӱш «ачынбайт», «ончо јаманды таштайт... ончозын чыдажып ӧдӧт» (1 Кор. 13:4—7, 13). Је эмди Иегова Кудайды, ака-эјелеристи, анайда ок ӧштӱлерди сӱӱп турганыс Кудайыска чындык артарга канайып болужарын кӧрӱп ийектер.

5. Иисуска Адазын сӱӱгени канайып болушкан?

⁵ Иисус божоор алдында эҥирде бойыныҥ чындык ӱренчиктерине мынайып айткан: «Аданы сӱӱп турга[м]... оныҥ учун Аданыҥ Меге јакыганыла эдип турум» (Иоанн 14:31). Иисуска ченелтелерди ӧдӧргӧ Адазын сӱӱп турганы болушкан. Бу сӱӱш биске де болужар.

6. Телекей бисти јаман кӧрӱп турза, Римдегилерге 5:3—5-теги сӧстӧр биске канайып болужар?

⁶ Иегованыҥ ишчилери истежӱлерди Кудайды сӱӱгенинеҥ улам ӧдӱп туратан. Темдектезе, иудейлердиҥ Ӱстӱги јаргызы апостолдорды јарлабазын деп токтодып та саларда, олор «Кудайга улустаҥ артык багар керек» деп сананып, оноҥ ло ары јарлаган (Ап. ижи 5:29; 1 Иоанн 5:3). Андый сӱӱш бӱгӱнги де кӱнде бистиҥ ака-эјелерге истежӱлерди ӧдӧргӧ болужат. Олордыҥ кезиги бистиҥ ижисти чек токтодып салган ороондордо јаткылайт. Бу телекей бисти кӧрӧр кӱӱни јок то болзо, бис кунукпай, коркыбай, карын сӱӱнип јадыс! (Ап. ижи 5:41; Римдегилерге 5:3—5 кычырыгар, ЈТ).

7. Тӧрӧӧндӧрис биске удурлажып турза, биске кандый кӧрӱмдӱ болор керек?

⁷ Је эҥ ле кӱч ченелте — тӧрӧӧндӧрдиҥ биске удурлашканы болордоҥ айабас. Олор бисти улуска тӧгӱндедип салган ол эмезе јӱӱлип калган деп айдыжар болор. (Марк 3:21 тӱҥдештиригер.) Је бис бого кайкабай јадыс, нениҥ учун дезе Иисус мынайып айткан: «Кижиге бойыныҥ айылдагы улузы ӧштӱ болор» (Матф. 10:36). Тӧрӧӧндӧрис биске канайып та удурлажып, каткырыжып турза бис олорго ачынбай јадыс, олорды ӧштӱлер деп кӧрбӧй јадыс. Карын бис Иегова Кудайысты оноҥ ло ары тыҥ сӱӱзеес, улусты да анайып сӱӱрис (Матф. 22:37—39). Је бис Агару Бичиктеги бичилген јасактарды ла принциптерди кижиге болуп буспай јадыс.

8, 9. Джорджинага Кудайга чындык артарга не болушкан?

⁸ Ӧрӧги айдылган Джорджина эје мынайып куучындайт: «Бис Агару Бичикти энемле кожо бир ӧйдӧ ӱренип баштаганыс. Оноҥ кайда да алты ай кире ӧдӧ берерде јуунныҥ туштажуларына барарга кӱӱнзей береримде, энем атыйланып  чыккан. Кӧрӧр болзо, энем јана баскан улусла куучындашкан болтыр. Ол мени чек ле олордыҥ сӧстӧриле арбанатан. Энем мени айткылар болгон, бакырылдап та туратан, чачымнаҥ тудала јуулып туратан, бичиктеримди де ӱзе чыгара таштаган. Андый да болзо, 15 јаштуда сууга чӧҥӱрилгем. Энем мени Иеговага иштебезин деп токтодорго, сӧс укпас балдардыҥ интернадына да суккан. Интернатта дезе кезик балдар наркомандар болгон, ол эмезе полицияда учётто тургулаган. Јуук кижиҥ сени сӱӱрдиҥ ордына јаман кӧрӱп турза, коркышту кӱч эмей».

⁹ Джорджина эјеге бу кӱчтерди ӧдӧргӧ не болушкан? Ол мынайып куучындайт: «Мен Агару Бичикти энем атыйланган ла кӱн кычырып божодып ийген болгом. Оныҥ учун мен чындыкты табып алганымды билгем. Иегова меге јуук болуп калган деп сезип туратам. Мен ого јаантайын мӱргӱп туратам, а ол мени уккан. Анайда ок бир эје мени јаантайын айылына кычырып туратан. Бис Агару Бичикти кожо ӱренгенис. Интернатта јадып турарымда ака-эјелер меге јаан болуш болгон. Анайып олор меге бир биледий јуук улус болуп калган. Мынайып, Иеговага удура кем де туруп болбос деп оҥдоп алгам».

10. Бис неге алаҥзыбай иженип јадыс?

¹⁰ Апостол Павел бисти кем де «Христос Иисус Кайраканыстыҥ Бойындагы Кудайдыҥ сӱӱжинеҥ айрып болбос» деп айткан (Рим. 8:38, 39). Кандый да кӱчтер болотон болзо, Иегова бисти качан да артыргыспас. Кӱчтердиҥ ӧйинде ол токунал ла ийде-кӱч берер. Джорджина эјениҥ теминеҥ кӧргӧнисле, Иегова биске болужарга бойыныҥ кӧгӱс билезин тузаланат.

11. Иоанн 15:12, 13-те айдылган сӱӱш Иисустыҥ ӱренчиктерине канайып болушкан? Тем куучындап беригер.

¹¹ Иисус божоор алдында эҥирде, оныҥ ӱренчиктери бой-бойын сӱӱр учурлу деп айткан. (Иоанн 15:12, 13 кычырыгар.) Андый сӱӱш олорго кӱчтердиҥ ӧйинде бирлик артарга болужар деп, Иисус билетен болгон. Мыны бис Фессалоникадагы јууннаҥ кӧрӧдис. Бу јуун тӧзӧлӧрдӧ лӧ јаан истежӱлер башталган. Је ака-эјелер бой-бойын тӱҥей ле таштабаган (1 Фес. 1:3, 6, 7). Павел олорго баштапкы самаразын бичип турарда, «бой-бойыгарды оноҥ тыҥ  сӱӱгер» деп кӱӱнзеткен (1 Фес. 4:9, 10). Мындый сӱӱжинеҥ улам олор кунугып јӱрген ака-эјелерге болушкан (1 Фес. 5:14). Олор Павелдиҥ јӧптӧрин тузаланган деп, Павелдиҥ экинчи самаразынаҥ кӧрӱнет. Бир јыл кире ӧдӧ берерде, Павел олорго: «Кажыгардыҥ ла бой-бойыгарга сӱӱжигер арбындап јат» — деп бичиген (2 Фес. 1:3—5). Айдарда, Фессалоникадагы јуунга кӱчтерди ле истежӱлерди ӧдӧргӧ сӱӱш болушкан.

12. Бир ороондо јуу-согуш болуп турарда, ака-эјелер бой-бойына сӱӱжин канайып кӧргӱскен?

¹² Ӧрӧги айдылган Данил ака ла оныҥ ӱйиле не болгонын кӧрӱп ийектер. Олордыҥ калазында јуу-согуш башталып турарда, олор јуунныҥ туштажуларына тӱҥей ле јӱрген. Јарлаар ишке канча кире аргазы бар турушкан. Анайда ок ака-эјелерле курсак-тамакла ӱлешкилеген. Је бир катап олордыҥ айлына солдаттар киргилеп келген. Ака куучындайт: «Олор мени Иегованыҥ Керечизи болбозын деп кезетлеген. Је мен болбой турарымда, мени согуп баштагылаган. Оноҥ бу ла јериме мени ӧлтӱре адып койорыс деп айдала, адып ийген. Је карын бажымдӧӧн эмес, бажымныҥ ӱстиле аткан. Јӱрер алдында олор ойто катап келзеес, ӱйиҥди албадап койорыс деп айткан. Бу керегинде акалар угуп ла ийеле бисти поездке отургузала, ӧскӧ каладӧӧн аткаргылап ийген. Ого једип барарыста, андагы ака-эјелер биске тура, иш табып аларга болушкан. Анайда ок курсак-тамакла ӱлешкен. Кийнинде бис бойыс та јуу-согуштаҥ качкан ака-эјелерге болушканыс. Ака-эјелердиҥ сӱӱжин качан да ундыбазым!» Айдарда, телекей бисти јаман да кӧрӱп турза, Кудайга чындык артарга биске христиан сӱӱш болужар.

13. Улус бисти јаман кӧрӱп турза, Кудайдыҥ агару тыны биске канайып болужар?

¹³ Иисус бойыныҥ ӱренчиктерине: «Ӧштӱлеригерди сӱӱгер» — деп айткан (Матф. 5:44, 45, ЈК 2003). Бис бу јакылтаны Кудайдыҥ агару тыныныҥ болужы јогынаҥ бӱдӱрип болбозыс. Сӱӱш агару тынныҥ тӱжӱмине кирет. Тынныҥ тӱжӱмине — узакка чыдажыш, јалакай болоры, јобожыш ла тудуныш база кирип јат (Гал. 5:22, 23). Бу кылык-јаҥдар, улус бисти јаман кӧрӱп турза, Кудайга чындык артарга болужат. Ака-эјелердиҥ мындый кылык-јаҥдарынаҥ улам кемниҥ-кемниҥ эш-нӧкӧри, тӧрӧӧндӧри  ол эмезе балдары Иегованыҥ Керечилери болуп калат. Је удурлажып турган улусты сӱӱрге слерге кӱч болзо, Иегованаҥ агару тын сурагар (Лука 11:13). Кудайдыҥ айтканыла этсеер, качан да јастыра болбос (Укаа 3:5—7).

14, 15. Римдегилерге 12:17—21-де бичилген сӧстӧр Ясминге бойыныҥ ӧбӧӧнин сӱӱрге канайып болушкан?

¹⁴ Јуук Кӱнчыгышта јадып турган Ясмин эјениҥ учуралын кӧрӱп ийектер. Бу эје Иегованыҥ Керечили болуп каларда, оныҥ ӧбӧӧни: «Сениҥ бажыҥды улус јӱӱлтип койгон» — деп јамандап,— «Иегованыҥ Керечили болбозыҥ!» — деп коркыдып баштаган. Ол бойыныҥ ӱйин билезин чачылтып јат деп бурулап, оны тӧрӧӧндӧри ажыра, кудай-јаҥныҥ башчызы ажыра, керек дезе тармаачы да ажыра коркыткан. Бир катап ол јуунныҥ туштажузына барала, акаларды не ле деп айткылаган. Эје бойыныҥ ӧбӧӧниниҥ мындый кылыгы учун ыйлап туратан.

¹⁵ Ол ӧйлӧрдӧ ака-эјелер Ясмин эјени токунадып, кӱӱнин кӧдӱрген. Аксагалдар дезе ого Римдегилерге 12:17—21-деги (кычырыгар) принципти тузаланзын деп, јӧп бергендер. Ол куучындайт: «Меге бу јӧпти бӱдӱрерге коркышту кӱч келишкен. Оныҥ учун Иеговага мӱргӱп болуш сурагам. Ӧбӧӧним мени айткылап турза, мен ого удура неме айтпай, јобош болуп, бойымды тудунып туратам. Кезикте ол тураныҥ ичин ӧнӧтийин ӱзе киртидип, чачып салза, мен база ла јобош болуп, ӱзе немени унчукпай ла арутап салатам. Бир катап оруп та каларда мен оны кичеегем».

16, 17. Бис Ясминниҥ теминеҥ неге ӱренип јадыс?

¹⁶ Ясмин бойыныҥ эш-нӧкӧрин сӱӱрге албаданып турарда кӧп алкыштар алган. Ол айдат: «Ӧбӧӧним мени тӧгӱн неме айтпай турганымды кӧрӱп, эмди меге бӱдӱп јат. Анайда ок ол мениҥ Кудай јанынаҥ кӧрӱмимди де тооп јат, јуундарга да барзын деп айдат. Анайда ок ол билениҥ амырына бойына да јӧмӧжип баштаар керек деп оҥдоп баштаган. Эмди бис экӱ амыр, токуналу јуртап јадыс. Удабас ӧбӧӧнимниҥ јӱреги ачылып, Иегованыҥ Керечили болуп калар деп иженип јадым».

¹⁷ Ясминниҥ учуралынаҥ бис «сӱӱш ончо јаманды таштайт... јаантайын иженет, ончозын чыдажып ӧдӧт» деп кӧрӱп јадыс (1 Кор. 13:4, 7). Улуска јаман кӧрдӱрип, айткыладып турарга биске јарабай турган эмей. Је сӱӱш дезе биске  удурлашкан улустыҥ јӱрегин јымжадып салат. Је качан биске удурлажып турган улустыҥ јӱреги јымжабаза, бис Иегова Кудайысты сӱӱндирерис, анайда ок бойыс та сӱӱнчи аларыс.

18. Бис улуска јаман кӧрдӱрип турзаас, нениҥ учун сӱӱнип јадыс?

¹⁸ Иисус: «Слерди јаман кӧрӱп, айткылап турза, кежиктӱ болгоныгар ол» — деп айткан (Лука 6:22). Бис улуска айткыладып, јамандадып јӱрерге кӱӱнзебей јадыс эмей. Андый болордо, Иисус улуска јамандадып турзаар, ырысту болороор деп нениҥ учун айткан? Баштапкызында, ченелтелердиҥ ӧйинде Кудайга чындык артсаас, Иегованыҥ јарадузын алып јадыс (1 Петр 4:13, 14). Экинчизинде, бистиҥ бӱдерис бек болуп калат (1 Петр 1:7). Ӱчинчизинде, ӱргӱлји јӱрӱм берилер (Рим. 2:6, 7).

19. Апостолдор камчылаткан кийнинеҥ нениҥ учун сӱӱнген?

¹⁹ Бу сӧстӧрдиҥ учурын апостолдор Иисустыҥ тирилген кийнинеҥ оҥдоп алган. Олорды камчылап, Иисустыҥ адынаҥ база јарлабазын деп токтодып та саларда, олор оноҥ ло ары јарлаган. Нениҥ учун? Нениҥ учун дезе олор: «Иисус Кайраканныҥ ады учун базындырдыс» — деп сӱӱнгилеген (Ап. ижи 5:40—42). Олор Иисусты сӱреен тыҥ сӱӱгенинеҥ улам ӧштӱлердиҥ кезедӱзинеҥ де коркыбаган. Бӱгӱнги де кӱнде Иегованыҥ ишчилеринде андый коркыбас ака-эјелер бар. Олордо до андый ла кӱчтер, истежӱлер болуп јат. Је олор оноҥ ло ары Иеговага иштеп јат. Нениҥ учун дезе Иегова олордыҥ эткен ижин ле сӱӱжин качан да ундыбас деп оҥдоп јадылар (Евр. 6:10).

20. Келер јӧрмӧлдӧ не кӧрӱлер?

²⁰ Сатананыҥ телекейи јоголбогончо улус бисти оноҥ ло ары јаман кӧрӧр (Иоанн 15:19). Је биске бир де коркыбас керек. Нениҥ учун дезе Иегова бойыныҥ чындык улузын «тыҥыдып, јаманнаҥ чеберлеер» деп бӱдӱп јадыс (2 Фес. 3:3). Бу керегинде келер јӧрмӧлдӧ айдылар. Је эмди дезе биске Иегова Кудайысты, ака-эјелеристи, керек дезе ӧштӱлерди де сӱӱр керек. Анайып бистиҥ ортобыста бирлик болор, Иегова макталар, бӱдерис тыҥыыр, анайда ок јаманды сӱӱшле јеҥип аларыс.