1, 2. Агару Бичикти ӱренип турган кижиге сууга чӧҥӱрилерге кемдер болужат?

«МЕГЕ Агару Бичикти ӱренерге сӱреен тыҥ јарап туратан» — деп, Фиджиде јадып турган Эми эје айдат.— «Бу чындык деп оҥдоп туратам. Је јӱрӱмимди солып, сууга чӧҥӱрилерге јӱк ака-эјелерле куучындажып баштаган кийнинеҥ кӱӱнзегем». Бу эјениҥ сӧстӧринеҥ јаан учурлу шӱӱлте кӧрӱнет: Агару Бичикти ӱренип турган кижи јуундагы ака-эјелерле куучындажып турза, кӧгӱс јанынаҥ тӱрген ӧзӱп јат.

² Јуунныҥ ӧзӱмине кажы ла јарчы болужар аргалу (Еф. 4:16). Вануату деп јерде јадып турган, пионер болуп турган Лейлани эјениҥ сӧстӧрин кӧрӱп ийектер. Ол айдат: «Баланы бастыра деремне чыдадат деген кеп сӧс ӱренчиктер белетеер ишке де келижип јат деп сананып јадым». Ада-энеге баланы чыдадарга тӧрӧӧндӧри, најылары ол эмезе школдогы ӱредӱчилер де болужып јат. Ӱренип турган кижиге дезе јуунныҥ ака-эјелери јӧп берип, оны мактап эмезе бойыныҥ јакшы темин кӧргӱзип, сууга чӧҥӱрилерге болужат (Укаа 15:22).

3. Бис бу ӱч јарчыныҥ сӧстӧринеҥ неге ӱренедис?

³ Ӱредӱ ӧткӱрип турган јарчыга ака-эјелердиҥ болужы керек. Молдовада специальный пионер болуп турган Ана деген эје мынайып айдат: «Ӱренип турган кижиге кӧгӱс јанынаҥ ӧссин деп болужарга, коркышту кӧп ийде-кӱч керек болот. Оныҥ учун ӱредӱ ӧткӱрип турган јарчыга јуунныҥ ака-эјелери болужып турза, ого бир канча јеҥил». А эмди ол ло ороондо јадып турган, специальный пионер болуп турган Дорин деген аканыҥ сӧстӧри: «Кезикте ака-эјелер ӱренип турган кижиге кижиниҥ  санаазына да кирбес сӱреен јакшы сӧстӧр айдып берет». А Лейлани эје мынайып айдат: «Ӱренип турган кижи ака-эјелердиҥ сӱӱжин кӧрӱп турза, Иегованыҥ Керечилери чын ла Кудайдыҥ албатызы деп оҥдоп баштайт» (Иоанн 13:35).

4. Бис бу јӧрмӧлдӧ нени шӱӱжерис?

⁴ Је слер сураар болороор: «Ӱредӱни мен ӧткӱрбей јаткан болзом, ӱренип јаткан кижиге мен канайып болужатам?» Оныҥ учун мындый сурактар шӱӱжип ийектер: слерди ӱредӱге кычырган болзо, слер канайып болужар аргалу? ол эмезе ӱренип турган кижи туштажуларга јӱрӱп баштаза, слер ого канайып болужар аргалу? анайда ок ӱренип турган кижи сууга чӧҥӱрилзин деп, аксагалдар канайып болужар аргалу?

5. Ӱредӱге кычырылган јарчыга кандый молју берилбей јат?

⁵ Слерди ӱредӱге кычырган болзо, ӱредӱни ӧткӱрип јаткан јарчыга слер болушчы болодоор (Эккл. 4:9, 10). Ӱредӱни слер баштап апарбай јадыгар, нениҥ учун дезе ӱренчикке Кудайдыҥ Сӧзин јартайтан молју ӱредӱге кычырылган кижиге эмес, је озо ло баштап ӱредӱ ӧткӱрип турган кижиге берилген. Андый болордо, ӱредӱге кычырылган јарчы канайып болужар аргалу?

6. Слерди ӱредӱге кычырган болзо, слер Укаа сӧстӧр 20:18-теги принципти канайып тузаланар аргалу?

⁶ Ӱредӱге белетенип алыгар. Ӱредӱ ӧткӱрип турган јарчынаҥ мындый сурактардыҥ карууларын билип алыгар: «Сен кандый кижиле ӱредӱ ӧткӱрип тургаҥ? Слер кандый тема ӱренереер? Бу уроктоҥ кижини неге ӱредип саларга тургаҥ? Кижиге нени айтсам, је нени айтпазам јакшы болор? Кижини сууга чӧҥӱрилзин деп кӱӱнзедерге, нени этсем торт болор?» (Укаа сӧстӧр 20:18 кычырыгар.) Је ӱредӱ ӧткӱрип турган кижи ӱренип турган кижи керегинде бастыра немени куучындабай јат, јӱк ле оныҥ кӧгӱс ӧзӱмине болужатан немени куучындайт. Бу сурактарды тузаланып турган Джой деп миссионер эје мынайып куучындайт: «Ӱредӱге кемди-кемди кычырып алзам, бу сурактарды шӱӱжип јадыс. Анайып менле кожо ӱредӱге барып јаткан јарчы ӱренчикке кӧгӱс јанынаҥ канайып болужарын јакшы оҥдоп алат».

7. Ӱредӱге кычырылган јарчыга нениҥ учун белетенип алар керек?

⁷ Ӱредӱге кычырылган јарчыга темага база белетенип алар керек (Езд. 7:10). Ӧрӧги айдылган Дорин ака бу керегинде мындый сӧстӧр айдат: «Ӱредӱге кычырылган јарчы белетенип алза, меге јаан јӧмӧлтӧ болот. Анайып ол ӱренип турган кижиге тузалу, керектӱ шӱӱлтелер  айдып берет». Анайда ок эки јарчы экилези јакшы белетенип алза, ӱренип турган кижи база анайып ла јакшы белетенерге ӱренет. Је слерге јакшы белетенерге ӧй болбогон болзо, теманыҥ тӧс шӱӱлтелерин де болзо кӧрӱп аларга албаданыгар.

8. Ӱредӱде не керегинде мӱргӱӱрин нениҥ учун озодоҥ сананып алар керек?

⁸ Ӱредӱге кычырган јарчы слерди мӱргӱп ийзин деп сураардаҥ айабас. Оныҥ учун мӱргӱӱлде нени айдараар деп озодоҥ сананып алыгар. Ол тушта слердиҥ мӱргӱӱлигер ӱренип турган кижиге јаан туза экелер (Сар. 141:2). Јопон јеринде јадып турган Ханаэ деп эје мынайып куучындайт: «Мен Агару Бичикти ӱренип турарымда, ӱредӱге келген бир эјениҥ мӱргӱӱли санаама артып калган. Ол эјениҥ мӱргӱӱлинеҥ Иеговала колбулары јуук болгоны кӧрӱнген. Мен де Кудайла андый ла јуук болорго кӱӱнзей бергем. Анайда ок мӱргӱӱлде мениҥ адымды адап мӱргӱп турарда, олор мени сӱӱп турган деп сескем».

9. Иаков 1:19-ла болзо, ӱредӱ ӧткӱрип турган јарчыга јакшы јӧмӧлтӧ болорго слер нени эдер аргалу?

⁹ Ӱредӱ ӧткӱрип јаткан кижиге јӧмӧлтӧ болугар. Нигерияда јадып турган, специальный пионер болуп турган Омамуйови деп эје мынайып айдат: «Јакшы болужып турган јарчы ӱредӱниҥ ӧйинде лаптап угуп јат, ӱредӱни бойы апарарга албаданбай јат, артык неме айтпай јат». Айдарда нени, качан айдатанын канайып оҥдоп алар? (Укаа 25:11). Је озо ло баштап ӱредӱге кычырылган кижи ӱредӱчиниҥ ле ӱренчиктиҥ куучынын лаптап угуп турза, нени качан айдатанын билип турар. (Иаков 1:19 кычырыгар.) Је мында ајарыҥкай болор керек. Нениҥ учун дезе бис ӧткӱре кӧп куучындай берзеес, ӱредӱчиниҥ апарып јаткан темазын булгап салардаҥ айабазыс. Мыныҥ ордына ӱренчикке шӱӱлтени оҥдоп аларга болужатан кандый бир сурак берерге јараар, ол эмезе тем кыскарта куучындап беригер. Је кем де ӱредӱде менеҥ јаан ла туза јок деп сананар болор. Анайып сананбагар, нениҥ учун дезе слердиҥ јылу сӧстӧрӧӧр, ӱренчикти мактаганаар ого кӧгӱс јанынаҥ ӧзӧргӧ болужар аргалу.

10. Ӱренип турган кижиге бойоор керегинде куучындаганаардаҥ кандый туза болордоҥ айабас?

¹⁰ Бойыгар керегинде куучындап туругар. Јарагадый болзо, ӱренип турган кижиге чындыкты канайып укканаарды, кандый кӱчтер ӧткӧнӧӧрди, анайда ок Иегова канайып болушканын кыскарта куучындап берерге јараар (Сар. 78:4, 7). Слердиҥ сӧстӧрӧӧр кижиге керектӱ болуп калардаҥ айабас. Слердиҥ айткан сӧстӧрӧӧрдӧҥ кижи кӧгӱс јанынаҥ тыҥып, сууга чӧҥӱрилерге кӱӱнзеер  болор. Ол эмезе ӱренип турган кижи бойыныҥ кӱчтерин канайып ӧдӧтӧнин кӧрӱп ийер (1 Петр 5:9). Бразилияда јадып турган, пионер болуп турган Габриел деп ака мынайып куучындайт: «Мен Агару Бичик ӱренип турарымда, ака-эјелер бойыныҥ јӱрӱмин куучындагылап туратан. Олордыҥ учуралдарынаҥ Иегова кӱчтерди ӧдӧргӧ канайып болужып турганын кӧргӧм. Олор кӱчтерди ӧдӧрӧрдӧ, мен де ӧдӧрӧрим».

11, 12. Туштажуга келген ӱренип турган улусты нениҥ учун јылу уткыыр керек?

¹¹ Кӧгӱс јанынаҥ ӧзӧргӧ турган кижиге јуунныҥ туштажуларына јӱрер керек (Евр. 10:24, 25). Кижи баштапкы ла катап туштажуга келзе, бис ого туштажуларга оноҥ ло ары јаантайын келип турзын деп болужар аргалу. Мыны канайып эдерис?

¹² Јылу уткыгар (Рим. 15:7). Кижиге јуунда јарай берзе, ол база да катап келерге кӱӱнзеер болор. Оныҥ учун кижини јылу уткып, ого ајару эдип, оныла таныжыгар. Је ӧйинеҥ ӧткӱре ајару этсе, кижи эби јоксына берер болор. Кижиге јӱк ле оныла ӱредӱ ӧткӱрип турган јарчы болужар учурлу деп сананбагар. Ол туштажуга келгелек болордоҥ айабас эмезе једип келген де болзо, јуунныҥ керектерин эдип божобой турган болор. Тоолу ла јыл кайра чӧҥӱрилген, болушчы ишчи болуп турган Дмитрий ака мынайып куучындайт: «Баштапкы ла катап туштажуга келгеним санаама кирет. Каандыктыҥ Туразына једип келеле, тыштында эби јоксынып, кирип болбой тургам. Бу ӧйдӧ мени бар ака кӧрӱп ийеле, јылу уткып, Каандыктыҥ Туразына кийдирген. Анда кажы ла кижи меге јууктап, јакшылажып тургулады. Мыны коркышту кайкагам. Мындый јакшы туштажулар кажы ла кӱн болгон болзо деп санангам. Јӱрӱмимде мындый неме качан да кӧрбӧгӧм!»

13. Ӱренип турган улуска слердиҥ керектереер канайып болужар аргалу?

¹³ Јакшы тем болыгар. Слердиҥ эткен керектереер ӱренип турган кижиге, чындык мында эмтир деп, бӱдӱмјиленерге болужар (Матф. 5:16). Молдовада пионер болуп турган Виталий деп ака мынайып куучындаган: «Туштажуларга јӱрӱп турала, Иегованыҥ Керечилериниҥ кандый јӱрӱм јӱрӱп турганын, канайып сананып турганын, анайда ок керектерин кӧрӱп, олор чын ла Кудайла кожо јӱрӱп турган деп бӱдӱмјиленгем».

14. Ӱренип турган кижиге бистиҥ темис канайып болужар аргалу?

¹⁴ Ӱренип турган кижиге алган билгирлерин тузаланар керек. Је бу кезикте јеҥил эмес болот. Оныҥ учун Агару  Бичиктеги принциптердиҥ биске болужып турганын кӧрӧлӧ, олор база анайып јӱрерге кӱӱнзей берердеҥ айабас (1 Кор. 11:1). Ӧрӧги айдылган Ханаэ деп эје куучындаган: «Ака-эјелер бой-бойына болужып, јаманын таштажып, бой-бойын сӱӱп јат. Анайда ок улус керегинде јаман неме айтпай јат. Мыны кӧрӱп, мен де олор ошкош болорго кӱӱнзегем».

15. Укаа сӧстӧр 27:17-ле болзо, Агару Бичикти ӱренип турган улусла нениҥ учун најылажар керек?

¹⁵ Најылажарга албаданыгар. Ӱренип турган кижи туштажуларга келзе, ого ајару эдип туругар (Флп. 2:4). Темдектезе, кижини Агару Бичикти ӱренип, солынып турганы учун мактагар. Анайда ок Агару Бичикле ӱредӱзи кандый ӧдӱп туру эмезе айылында, иште керектери кандый деп сураарга јараар. Је мында ајарыҥкай болор керек. Нениҥ учун дезе кезик сурактар кижини эби јок айалгага тургузат. Мынайып куучындажып турзаар, кижиле најылажып калараар. Бу дезе ӱренип турган кижиге сууга чӧҥӱрилерге болужар. (Укаа сӧстӧр 27:17 кычырыгар.) Ханаэ деп эје эмди текши пионер болот. Ол айдат: «Мен кажы ла туштажуны тыҥ сакып туратам. Нениҥ учун дезе менде анда најылар болгон. Олорло најылажып турала, Иеговага бӱдӱп турганымды јаратпай турган најыларымды артыргызарга јеҥил болгон. Мен Иеговага ла ака-эјелерге оноҥ јуук болорго кӱӱнзегем. Оныҥ учун сууга чӧҥӱрилгем».

16. Бис ӱренип турган кижиге јуунга јуук болуп калзын деп, база канайып болужар аргалу?

¹⁶ Кӧгӱс јанынаҥ ӧзӱп, тӱзединип турган кижи бойын јуунда керектӱ деп сезип турзын. Оныҥ учун биске олорды айылыска кычырар керек (Евр. 13:2). Бу керегинде Молдовада јадып турган Денис ака айдат: «Ӱйим ле мен јаҥы ла Агару Бичикти ӱренип турарыста, ака-эјелер бисти кожо амыраарга кычырып туратан. Олорго Иегова канайып болужып турганын кӧрӱп, бис те Иеговага иштеерге кӱӱнзей бергенис. Анайда ок келер ӧйдӧ бисти сӱреен јакшы јӱрӱм сакып јаткан деп бӱдӱмјибис тыҥыган». Ӱренип турган кижи јарчы болуп калза, ого канайып болужар? Оны јарлаар ишке кычырып туругар. Бразилияда јадып турган Диегу аканыҥ айтканыла болзо, «акалар мени јаантайын јарлаар ишке кычырып туратан. Бу олорло јууктада таныжып алатан эҥ јакшы арга. Мынайып мен олордоҥ кӧп немеге ӱренгем. Анайда ок Иегова ла Иисуска јуук болуп калгам».

17. Ӱренип турган улуска аксагалдар канайып болужат?

¹⁷ Ӱренип турган улуска ӧй табып туругар. Олорло јуунныҥ туштажуларына  келген тушта куучындажып туругар. Кижиниҥ адын сананып алзаар јакшы болор. Анчада ла ол кижи каруулар берип баштаган болзо. Ӱредӱлерге барып турарга, графигерде нени-нени солып болороор бо? Слер ӱренип турган кижиге сӱреен јаан болуш јетирип турганаарды јетире билбей де турган болороор. Нигерияда јадып турган Джеки деп пионер эје мынайда куучындаган: «Мениҥ ӱренип турган улустарым, менле кожо аксагал келип јӱргенин билип ийеле, чек оосторы ачылып калат. Нениҥ учун дезе бир ӱренчиктиҥ айтканыла болзо, олордыҥ пасторы јӱк ле акча берип турган бай улуска келип јат». Эмди ол ӱренип турган кижи јуунныҥ туштажуларына јӱрӱп јат.

18. Аксагалдар Апостолдордыҥ ижи 20:28-те бичилген молјуны канайып бӱдӱрер аргалу?

¹⁸ Ӱредӱ ӧткӱрип турган јарчыларды ӱредигер ле олордыҥ кӱӱнин кӧдӱригер. Аксагалдарга јарчыларды јарлаарга ӱредетен, ол тоодо ӱредӱлер ӧткӱрерге болужатан јаан молју берилген. (Апостолдордыҥ ижи 20:28 кычырыгар.) Аксагалдыҥ кӧзинче јарчы ӱредӱ ӧткӱрерге уйалып турган болзо, аксагал ӱредӱни бойы ӧткӱрип ийер аргалу. Ӧрӧги айдылган Джеки эје куучындайт: «Аксагалдар мениҥ ӱренип турган улузым керегинде јаантайын сурап угуп туратан. Анайда ок ӱренип турган кижиге болужарга, меге јакшы јӧптӧр айдып беретен». Аксагалдардыҥ болужы сӱреен јаан (1 Фес. 5:11). Джеки эје оноҥ ары куучындайт: «Аксагалдардыҥ мактаган сӧстӧри изӱ кӱнде соок суу ичкенине тӱҥей. Качан аксагалдар мени мактап турза, меге сӱреен јарап јат. Анайда ок ӱренчиктер белетейтен ишке туружатан кӱӱним оноҥ тыҥ кӧдӱрилет!» (Укаа 25:25).

19. Бистиҥ кажыбыс ла неге сӱӱнер аргалу?

¹⁹ Слерде эм тургуза ӱредӱ јок то болзо, је слер ӱренип турган улуска кӧгӱс јанынаҥ ӧзӧргӧ болужар аргалу. Темдектезе, ӱредӱлердиҥ ӧйинде артык неме куучындабай, јӱк ле керектӱ ле тузалу шӱӱлтелер айдар аргалу. Анайда ок ӱренип турган кижи јуунныҥ туштажуларына јӱрӱп баштаза, ого ајару эдип, оныла јууктада таныжып, ого јакшы тем болугар. Аксагалдар ӱренчиктерге де, ӱредӱчилерге де ӧй табып болужып јат. Олор ӱредӱ ӧткӱрип турган јарчылардыҥ кӱӱнин кӧдӱрип, мактап јадылар. Бис улуска теҥеридеги Иегова Адабысты сӱӱрге ле ого иштеерге болужып турганыстаҥ, керек дезе бир кичинек те болзо болушканыстаҥ, сӱреен јаан сӱӱнчи аладыс!