1. Иегованыҥ ишчилеринде кандый ченелтелер болот?

СЛЕРДЕ эмди ле кандый бир ченелте болуп турган ба? Темдектезе, јуунда слерди кем-кем ачындырып ийген болор (Иак. 3:2). Иште эмезе школдо улус слерди Иегованыҥ Керечизи дежип, каткырыжып турган (1 Петр 4:3, 4). Ол эмезе тӧрӧӧндӧрӧӧр слерди јуунга барбазын эмезе јарлабазын деп токтодып турган болор (Матф. 10:35, 36). Мындый ченелтелердеҥ улам слер ал санаага алдыртып, Иеговага иштебей токтоп калар керек деп сананар болороор. Је кандый да ченелтелерде Иегова слерге ойгор ло ийде-кӱч берер деп бир де алаҥзыбагар.

2. Римдегилерге 15:4-лӧ болзо, Агару Бичикти кычырганыстаҥ бис кандый туза алар аргалу?

² Иегова Агару Бичикте бистий ле толо кемдӱ эмес улусла не болгонын бичип койгон. Римдегилерге 15:4-лӧ (кычырыгар) болзо, бис бу учуралдарды кычырып, бойыска ӱредӱ, токунал ла ижемји аладыс. Је биске Агару Бичикти јӱк ле кычырар керек эмес. Оныҥ сӧстӧри бистиҥ санаабысты солып, јӱрегисти томултып турар учурлу. Је чике ле бистиҥ айалгага келишкедий принциптерди таап аларга нени эдер керек? Мында тӧрт алтам болужар: 1) мӱргӱгер, 2) кычырганыгарды санаагарда јурагар, 3) шӱӱп сананыгар, 4) тузаланыгар. Бу алтамдарды шӱӱжип ийектер *. Анайда ок мындый тӧрт алтамныҥ болужыла Давид каанныҥ ла  апостол Павелдиҥ јӱрӱминде болгон учуралдарды кӧрӱп ийектер.

3. Агару Бичикти кычырардаҥ озо нени эдер керек, нениҥ учун?

³ 1. Мӱргӱгер. Агару Бичикти кычырардаҥ озо Иеговага мӱргӱп алыгар. Иегова слерге кычырган ӱзӱгердеҥ туза кӧрӱп турарга болужар. Темдектезе, слер кандый бир айалгада нени эдерин билбей турзагар, Иегованы бу айалгага келишкедий принцип таап аларга болушсын деп сурагар (Флп. 4:6, 7; Иак. 1:5).

4. Бойысты Агару Бичикте айдылган улустыҥ ордына тургузып турарга биске не болужат?

⁴ 2. Санаагарда јурагар. Иегова биске кӧргӧн уккан немени санаабыста јурап ийетен кайкамчылу арга берген. Бу арганыҥ болужыла Агару Бичикте айдылган улустыҥ ордына бойысты тургузып јадыбыс. Анайып бис ол улустыҥ нени кӧргӧнин, нени сескенин јарт кӧрӱп ийедис.

5. Шӱӱп сананары ол не дегени? Шӱӱп сананарга биске не болужар?

⁵ 3. Шӱӱп сананыгар. Шӱӱп сананары дегени — кычырганын канайып тузаланарын јазап сананып кӧрӧрин темдектейт. Агару Бичикти шӱӱп сананбай кычырганы чачылып калган пазлды јуубай турганына тӱҥей. Је качан бис Агару Бичикти кычырып, оныҥ шӱӱлтелери бой-бойыла канайып колболып турганын шӱӱп сананып турзаас, пазлды јууп алганыска тӱҥей болот. Мынайып шӱӱп сананып турзаас, кычырган немегистиҥ бӱдӱн јуругы кӧрӱне берет. Кычырганыстыҥ бӱдӱн јуругын кӧрӱп турарга мындый сурактар болужар: бу кижиге кӱчтерди ӧдӧргӧ не болушкан? Иегова ого канайып болушкан? Меге бу учурал кӱчтеримди ӧдӧргӧ канайып болужар?

6. Алган билгирлеристи нениҥ учун тузаланар керек?

⁶ 4. Тузаланыгар. Алган билгирлерин тузаланбай турган кижини Иисус тураны кумакка тудуп јаткан кижиге тӱҥейлеген. Бу кижи тура тударга коркышту уур иштенген де болзо, оныҥ эткен ижи калас болуп калат, нениҥ учун дезе кандый бир јоткон болзо эмезе суу кӧдӱрилзе, ол тура аҥтарылып калар (Матф. 7:24—27). Анайып ла Агару Бичикти кычырардаҥ озо мӱргӱп, ондо бичилген улустыҥ ордына бойын тургузып, кычырганын јазап шӱӱп сананып турган кижи алган билгирлерин тузаланбай турза, уур-кӱчтердиҥ ӧйинде аҥтарылып калар. Је качан кижи алган билгирлерин тузаланып турза, оныҥ јӱрегинде амыр болор, бӱдӱмјизи бек болор, анайда ок ол јаан јастыралар да этпес (Иса. 48:17, 18). Эмди дезе бу тӧрт алтамныҥ болужыла Давид каанныҥ јӱрӱминеҥ бис неге ӱренер аргалу деп кӧрӱп ийектер.

7. Бис кемниҥ темин кӧрӧрис?

⁷ Слерди качан бирде најыгар эмезе јуук кижигер тӧгӱндеген бе? Эйе болзо, слерге Давидтиҥ јӱрӱминде болгон учурал болужар. Оныҥ уулы Авессалом адазын тӧгӱндеп ийеле, оныҥ ордына каан болуп отурарга сананган (2 Сам. 15:5—14, 31; 18:6—14).

8. Иегованаҥ бис кандый болуш сураар аргалу?

⁸ 1. Мӱргӱгер. Агару Бичикти кычырардаҥ озо Иеговага мӱргӱп, бойыгардыҥ сезимдереерди, кӱчтереерди чокымдап куучындап беригер (Сар. 6:6—9). Оныҥ кийнинде, кӱчтереерди ӧдӧргӧ болужатан принцип таап аларга болушсын деп сурагар.

9. Давид ле Авессаломныҥ ортозында не болгон?

 ⁹ 2. Санаагарда јурагар. Давид ле Авессалом керегинде кычырып јадала, Давидке не аайлу ачу болгонын сананып ийзегер де. Авессалом улуска јараарга болуп, канча јылдардыҥ туркунына экијӱстенип јӱрген (2 Сам. 15:7). Оноҥ ол эптӱ ӧй боло берген деп сананып ийеле, бойыныҥ улузын туйказынаҥ бӱдӱн Израиль ичине аткарып јат. Анайып ол адазыныҥ ордына каан болуп отуратан јолын белетеген. Керек дезе ол адазыныҥ јуук најызын да, Ахитофелди, бойына тартып алат. Бу ӧйдӧ Давид тыҥ ооруп турган болор (Сар. 41:1—9). Је ол Авессаломныҥ оны ӧлтӱрерге турганын билип ийеле, Иерусалимнеҥ кача берген. Учы-учында Давидтиҥ черӱзи ле Авессаломныҥ черӱзи јуулашкан. Авессаломныҥ черӱзи оодо соктырткан, Авессалом бойы божоп калган.

10. Давид нени эдер аргалу болгон?

¹⁰ Мынаҥ улам Давидте кандый сезимдер болгонын сананып ийектер. Давид Авессаломды сӱӱген, Ахитофел најызына бӱткен. Је бу эки кижи оны тӧгӱндеп, коркышту тыҥ ачындырып, керек дезе ӧлтӱрерге де сананган. Мынаҥ улам Давид ал санаага тӱжеле, ӱзе улуска чӧкӧп, олорго бӱтпей барар эди. Ол ӧскӧ дӧ најыларын Авессаломго болушкан деп бурулаардаҥ айабас болгон. Эмезе ӱзе улустаҥ качар керек деп сананар эди. Је Давид мынайып этпеген. Ого бу кӱчтерди ӧдӧргӧ не болушкан?

11. Давид кӱч айалгада нени эткен?

¹¹ 3. Шӱӱп сананыгар. Бу учуралдаҥ бис неге ӱренер аргалу? Озо ло баштап Давидке не болушкан деп сурактыҥ каруузын билип алактар. Мындый айалгада Давид коркыйла, сандырайла јазап сананбаган алтамдар этпеген. Је бир јанынаҥ ол ӧй чӧйип база отурбаган. Ол коркышту јаман тӧгӱндеткен де болзо, јӱрегин катуландырып, улуска јаман сананып јӱрбеген. Карын Иеговага ла најыларына бӱдӱп, олордоҥ болуш сурап туратан.

12. Иегова Давидке канайып болушкан?

¹² Иегова Давидке канайып болушкан? Давидле болгон учуралды тереҥжиде кӧрӱп ийзе, Иегова ого кӱчтерин ӧдӧргӧ болужатан ийде-кӱч берген. Анайда ок Давидтиҥ эткен керектерине алкыжын јетирген (3 Сар. бажындагы сӧстӧр; 3:1—8). Бого коштой Иегова Давидке чындык арткан улуска да болушкан.

13. Бисте кемле-кемле јаан ачыныштар болгон болзо, Давидтеҥ кандый тем аларыс? (Матфей 18:15—17).

¹³ 4. Тузаланыгар. Бойыгардаҥ мынайып сурагар: «Мен Давидтеҥ неге ӱренер эдим?» Темдектезе, слерде кемле-кемле јаан ачыныштар болгон болзо, слер нени эдереер? Слер Матфейдиҥ 18-чи бажалыгында Иисус канайып айткан, анайып ла эдер аргалу, эмезе бу сӧстӧрдиҥ кийнинде турган принципти тузаланар аргалу. (Матфей 18:15—17 кычырыгар.) Је ӱзе неме айалганаҥ камаанду болот. Айалга кандый да болзо, ӧйди чӧйбӧгӧр, сурактыҥ аайына тӱрген чыгыгар, је изӱ тарый неме этпегер. Оныҥ учун бу айалгада токунай берерге ле нени этсе јакшы болор деп оҥдоп аларга Иегованаҥ болуш сурагар. Ол слерге ойгор болорго болужар ла јӱрегерге амыр берер. Најылараарга оноҥ ло ары бӱдӱгер, олордыҥ болужын јектебегер (Укаа 17:17). Је эҥ ле учурлузы, Агару Бичикте берилген јӧптӧрди бӱдӱригер (Укаа 3:5, 6).

14. 2 Тимофейге 1:12—16-да ла 4:6—11-де, 17—22-де бичилген ӱлгерлер слерге кандый айалгаларда болужар аргалу?

¹⁴ Слерге билениҥ улузы Иеговага иштеерге удурлажат па? Эмезе слер Иегованыҥ Керечилериниҥ ижин бир эмеш токтодып койгон эмезе чек токтодып салган ороондо јададаар ба? Андый болзо, слердиҥ кӱӱнигерди 2 Тимофейге 1:12—16-да ла 4:6—11-де, 17—22-де * бичилген ӱлгерлер кӧдӱрер аргалу. Павел бу сӧстӧрди тӱрмеде отурган тужында бичиген.

15. Иегованаҥ нени сураарга јараар?

¹⁵ 1. Мӱргӱгер. Бу ӱлгерлерди кычырардаҥ озо, Иеговага слерде кандый кӱчтер болуп турганын ла бойыгардыҥ сезимдереерди чокумдап куучындап беригер. Анайда ок Павелдиҥ учуралынаҥ слердиҥ кӱчтереерге келишкедий принципти кӧргӱзип берзин деп мӱргӱгер.

16. Павел кандый айалгада болгон?

¹⁶ 2. Санаагарда јурагар. Павелдиҥ кӱчтерин сананып ийектер. Павел Римниҥ тӱрмезинде кынјыладып салган отурып јат. Ол мынаҥ да озо тӱрмелеткен болгон, је бу учуралда ол ӧлтӱртип саларын јарт оҥдоп јат. Анайда ок оноҥ кезик акалар да јана болуп, оны таштайла јӱре берген. Оныҥ ийде-кӱчи де чек ас (2 Тим. 1:15).

17. Павел кӱч айалгада нени сананар аргалу болгон?

¹⁷ Павел мынайып сананар аргалу болгон: Кудайдыҥ ижин кӧскӧ јаан илинбей эдер керек болгон, ол тушта тӱрмеге отурбас эдим. Анайда ок ол оны артыргызып салган Азияныҥ ака-эјелерине ачынып, ӧскӧ дӧ најыларына бӱтпей барар эди. Је Павел мынайып бир де сананбаган. Најылары оны сатпас ла Иегова оны кайралдаар деп бир де алаҥзыбаска Павелге не болушкан?

18. Павелге кӱчтерди ӧдӧргӧ не болушкан?

¹⁸ 3. Шӱӱп сананыгар. Павелге кӱчтерди ӧдӧргӧ не болушкан? Ол ӧлӱмниҥ кырында да болгон болзо озо ло баштап Иегова макталар керек деп ундыбай јӱрген, анайда ок улустыҥ кӱӱн-санаазын кӧдӱрерге албаданган. Ол Иеговага иженип, јаантайын ого мӱргӱп турар болгон (2 Тим. 1:3). Павел дезе оны таштап ийген Азиядагы акалардаҥ улам санааркаардыҥ ордына, ого чындык арткан најыларыныҥ болужы учун быйанын кӧргӱзетен. Анайда ок ол Кудайдыҥ Сӧзин оноҥ ло ары шиҥдеп туратан (2 Тим. 3:16, 17; 4:13). Је эҥ керектӱзи Павел дезе Иегова ла Иисус оны сӱӱп турган, олор оны бир де таштабаган, анайда ок оны чындык ижи учун кайралдаар деп бӱткен.

19. Иегова Павелге канайып болушкан?

¹⁹ Иегова Павелди бӱдӱмјизи учун истедер деп озодоҥ айдып салган (Ап. ижи 21:11—13). Андый болордо, ол бойыныҥ ишчизине канайып болушкан? Иегова Павелдиҥ мӱргӱӱлдерине каруу берген ле ого кӱчтерди ӧдӧргӧ болужатан ийде-кӱч берген (2 Тим. 4:17). Анайда ок оны чындык ижи учун кайралдаар деп бӱдӱмјилеген. Бого коштой Иегова ого чындык најылары ажыра болушкан.

20. Римдегилерге 8:38, 39-та айдылганыла, бис Павелдеҥ неге ӱренер аргалу?

²⁰ 4. Тузаланыгар. Бойыгардаҥ сурагар: «Мен Павелдеҥ неге ӱренер аргалу?» Бис Павел ле чилеп истедерис деп оҥдоп јадыс (Марк 10:29, 30). Оныҥ учун Иеговага чындык артарга биске јаантайын мӱргӱп турар керек,  анайда ок оныҥ сӧзин шиҥдеп турар керек. Је эҥ учурлузы, кандый да кӱчтер болуп турза, Иегова макталар керек деп оҥдоп јадыс. Иегова бистерди кӱчтерде бир де таштабас, оныҥ сӱӱжинеҥ бисти «кем де, не де айрып болбос» деп бир де алаҥзыбайдыс. (Римдегилерге 8:38, 39 кычырыгар; Евр. 13:5, 6.)

21. Ая ла Хекторго ченелтелерди ӧдӧргӧ не болушкан?

²¹ Агару Бичикте бичилген темдер биске кандый ла айалгада болужып јат. Темдектезе, Јопон јеринде јадып турган Ая деп эјеге кӧп улусту јерлерде јалтанбай јарлаарга Ионаныҥ теми болушкан. Индонезияда јадып турган Хектор деп јиит карындашка Иегова керегинде билгирлер аларга ла ого иштеп баштаарга Руфьтиҥ теми болушкан.

22. «Подражайте их вере» деген јӧрмӧлдӧрдӧҥ лӧ библиялык драмалардаҥ туза аларга нени эдер керек?

²² Бӱдӱмјибисти тыҥыдатан темдерди кайдаҥ табар? Слерге аудио, видео драмалар, ол эмезе «Подражайте их вере» * деген јӧрмӧлдӧр болужар. Је олорды кычырардаҥ, кӧрӧрдӧҥ, угардаҥ, эмезе шиҥдеердеҥ озо слердиҥ айалгага келишкедий принциптер таап аларга мӱргӱгер. Оноҥ бойоорды кижиниҥ ордына тургузып кӧрӱгер. Мыныҥ кийнинде Иегованыҥ чындык ишчилериниҥ нени эткенин ле Иегова олорго кӱчтерин ӧдӧргӧ канайып болушканын шӱӱп сананыгар. Анайда ок алган билгирлереерди тузаланыгар. Иеговага болужы учун быйаныгарды кӧргӱзигер. Анайда ок улуска болужатан ла олордыҥ кӱӱнин кӧдӱретен аргалар бедиреп туругар.

23. Исаия 41:10, 13-ле болзо, Иегова биске кандый сӧзин берген?

²³ Сатананыҥ телекейинде јӱрерге коркышту кӱч болот. Кезикте бис нени эдерин де билбей јадыс (2 Тим. 3:1). Је бис тыҥ коркып, санааркабайдыс. Нениҥ учун дезе Иегова Адабыс бисте кандый кӱчтер болуп турганын билип јат. Ол биске кӱч ӧйдӧ оҥ колыҥнаҥ бек тудуп аларым деп сӧзин берет. (Исаия 41:10, 13 кычырыгар.) Оныҥ учун Иегова биске болужар ла Агару Бичик кандый ла кӱчтерди ӧдӧргӧ ийде-кӱч берер деп, бир де алаҥзыбай јадыс.