1. Агару Бичикти ӱренердеҥ озо слердиҥ јӱрӱмеер кандый болгон?

 АГАРУ БИЧИКТИ ӱренердеҥ озо слердиҥ јӱрӱмеер кандый болгон? Бистиҥ кӧп сабагыска мыны сананар кӱӱнис те келбей турган болор. Бис бу телекейдиҥ кӧрӱмиле јӱргенис. Слерде де мындый болгон болзо, Агару Бичикте айдылганыла, слер «бу телекейде ижемји ле Кудай јок јӱргенигер» (Эф. 2:12). Је Агару Бичикти ӱренип баштаган кийнинде слердиҥ јӱрӱмеер сӱреен тыҥ солынган.

2. Агару Бичикти ӱренип турала, нени билип алганыгар?

² Слер Агару Бичик ӱренип турала, теҥеридеги Адагар бар деп ле ол слерди тыҥ сӱӱп турган деп билип алганыгар. Мынаҥ улам слер Кудайла јууктада таныжарга ла оныҥ ишчилериниҥ тоозына кожуларга кӱӱнзегенеер. Анайда ок бойыгардыҥ јӱрӱмеерди, кӧрӱмигерди, тыш бӱдӱмеерди солыыр керек деп, база билип алганыгар. Иегованыҥ кӧрӱмиле јӱрерге солынары — сӱреен јаан учурлу алтам (Эф. 5:3—5).

3. Колоссыдагыларга 3:9, 10-до Иегова нени айдат? Бу јӧрмӧлдӧ нени кӧрӧрис?

³ Иегова — бистиҥ Јайаачыбыс ла Адабыс. Оныҥ учун ол бойыныҥ билезине некелтелер тургузар јаҥду. Ол бисти сууга чӧҥӱрилердеҥ озо «озогы кижини керектериле катай бойыгардаҥ уштыгар» деп айдат *. (Колоссыдагыларга 3:9, 10 кычырыгар, ЈТ.) Бу јӧрмӧл биске мындый ӱч сурактыҥ каруузын билип аларга болужар: 1) «Озогы кижи» ол не дегени? 2) Иегова биске нениҥ учун оны уштызын деп айдып турган? 3) Мыны канайып эдер? А сууга чӧҥӱрилип калган ака-эјелер  бу јӧрмӧлди кычырып, «озогы кижиниҥ» керектери ле кӧрӱми ойто чыгып келбезин деп нени эдерге јараарын билип алар.

4. «Озогы кижиниҥ» кылык-јаҥын айдып береер.

⁴ «Озогы кижиниҥ» кылык-јаҥы ла санаазы кинчекке тартылат. Ол ачынчак, бийиркек, јаҥыс ла бойын сананар, быйаны јок болор. Ого порнография, ӧлтӱриш, базыныш керегинде кинолор кӧрӧргӧ јарап јат. Ондо јакшы кылык-јаҥдары да бар болзо, керек дезе јаман сӧстӧри ле керектери учун уйады кыйнап та турган болзо, је солынарга ого та не де јетпей јат (Гал. 5:19—21; 2 Тим. 3:2—5).

5. «Озогы кижини» уштыганы нени кӧргӱспей јат? (Апостолдордыҥ ижи 3:19).

⁵ Бис толо кеминде эмезистеҥ улам јаман санаалардаҥ ла керектердеҥ айрылып болбой јадыс. Кезикте бис јастыра эткен керектерис ле айткан сӧстӧрис учун бойысты бурулап, санааркап јадыс (Иер. 17:9; Иак. 3:2). «Озогы кижини» уштып салган кижи кинчектӱ кӧрӱм-санаазынаҥ айрылып калат ла оныҥ кулы болбой барат (Иса. 55:7; Апостолдордыҥ ижи 3:19 кычырыгар).

6. Нениҥ учун Иегова «озогы кижини» уштызын деп кӱӱнзеп јат?

⁶ Иегова бисти тыҥ сӱӱп турганынаҥ улам јастыра санааларыстаҥ ла шиҥип калган јаман кылык-јаҥнаҥ айрылзын деп кӱӱнзеп јат. Ол бисти сӱӱнчилӱ ле ырысту јӱрзин деп сананат (Иса. 48:17, 18). Јаман кылыктаҥ айрылбазаас, јаҥыс бойыс эмес, је ӧскӧ дӧ улус шыралар деп ол оҥдоп јат. Ол ондый немени чек кӱӱнзебей јат.

7. Римдегилерге 12:1, 2-ле биске кандый талдаш эдер керек?

⁷ Озо баштап јуук улузыс ла кожо чыккан ака-карындаштарыс бистиҥ мынай солынганысты кӧрӱп, тыҥ ла сӱӱнбеген, кезиги электеген де болор (1 Пётр 4:3, 4). Олор мынайып та айдышкан болор: «Сен бойыҥ башту кижи не. Ӧскӧ улустыҥ санаазыла не јӱрерге!» Је Иеговага багынбай турган  улус јайым ла ырысту ба? Чынынча, јок эмей. Нениҥ учун дезе Сатана олорды бойына бактырып, бойыныҥ јаман кӧрӱм-санаазына ла керектерине ӱредип јат. (Римдегилерге 12:1, 2 кычырыгар.) Кажы ла кижиниҥ алдында эки талдаш бар: «озогы кижини» уштыбай артып каларыс па, ол эмезе Иегова бисти «јаҥы кижи» этире солызын деп арга берерис пе? (Иса. 64:8).

8. «Озогы кижини» уштыырга Иегова канай болужат»?

⁸ Иегова Кудай бистиҥ тӱрген ле солынып болбозысты оҥдоп јат (Сар. 103:13, 14). Оныҥ учун ол биске агару тынын, Агару Бичигин ле организациязын берген. Бу бистерге ойгор болорго ло солынарга ийде-кӱч берип јат. Мындый болушты бойоор до алган болороор. Је эмди дезе «озогы кижини» уштып, јаман санааларыска ла керектериске кайра бурылбаска, анайда ок сууга чӧҥӱрилерге белен болорго нени эдер керек деп кӧрӱп ийектер.

9. Кудайдыҥ Сӧзи слерге канайып болужар аргалу?

⁹ Бойыгарды Агару Бичиктиҥ болужыла шиҥдеп туругар. Агару Бичик кӱскӱге тӱҥей. Бис оноҥ кандый санааларысты, кандый керектеристи солыыр керек деп билип аладыс (Иак. 1:22—25). Анайда ок биске неде тӱзединетенин бисле Агару Бичик ӱренип турган кижи эмезе кӧгӱзи тереҥ ӧскӧ дӧ ака-эјелер айдып берер аргалу. Олор биске једимдеристи айдып берер эмезе неде солынатанын кӧргӱзип турган библиялык ӱлгерлерди ле бистиҥ бичиктердеҥ керектӱ јӧптӧрди кӧргӱзип берер. Биске Иегова да болужарга јаантайын белен. Ол бистиҥ јӱрегисти кӧрӱп јат, биске канайып болужарын ол эҥ ле јакшы билер (Укаа 14:10; 15:11). Оныҥ учун ого јаантайын мӱргӱп, Агару Бичикти кажы ла кӱн кычырып тураар.

10. Эли аканыҥ теминеҥ бис неге ӱренип јадыс?

¹⁰ Ундыбагар, Иегова слерге эҥ јакшыны кӱӱнзеп јат. Иегованыҥ берген јакаруларыла јӱрзеес, бойыска ла тузалу болор. Оныҥ нормаларыла јӱрген улус ырысту, олордыҥ јӱрегинде амыр, уйады да ару (Сар. 19:7—11). Је Кудайдыҥ нормаларыла јӱрбей турган улуста јӱзӱн-базын кӱчтер болот. Эмди Эли деп аканыҥ јӱрӱмин кӧрӱп ийектер. Оны јаштаҥ ала чындыкка ада-энези ӱреткен де болзо, ол эмеш чыдап келеле, јаман компанияга биригеле, балыр јӱрӱм јӱрӱп, уурданып, наркотиктер тузаланып баштаган. Оноҥ Эли айдат: «Мен ачынчак ла калју кижи болуп калгам». Је оны јаш тушта ада-энези чындыкка ӱреткени калас болбогон. Анайып, ол канча да ӧйдӧҥ санаа алынган. Оноҥ ол Агару Бичикти ӱренип баштаган. Анайда ок ол јаман кылыктарын ӱзе чачып, 2000 јылда сууга чӧҥӱрилген. Ол куучындайт: «Эмди мениҥ уйадым да ару, јӱрегим де амыр, санаам да токуналу» *. Бис бу Элиниҥ теминеҥ кӧрӱп јадыс, Иегованыҥ нормаларын биле тура јектеп турган улус бойлорына ла каршу јетирет. Је Иегова Кудай андый да улуска болужарга белен.

11. Иегова нени кӧрӧр кӱӱни јок?

¹¹ Јаманга Иегованыҥ кӧрӱмиле кӧрӱгер (Сар. 97:10). Иеговага Агару Бичикте  айдылганыла, «бийиркек кӧс, тӧгӱнчи тил, бурузы јок кижиниҥ канын тӧгӱп турган кол» јескинчилӱ (Укаа 6:16, 17). Ого база не јескинчилӱ? «Калју ла тӧгӱнчи улус» (Сар. 5:6). Бис оны Нойдыҥ кӱндеринде Иегованыҥ калју улусты канайып јоголтып салганынаҥ кӧрӱп јадыс, нениҥ учун дезе олор јаман керектериле «јерди толтырган» (Баш. 6:13). Иеговага база не јескинчилӱ болуп турган? Судурчы Малахияныҥ айтканыла, кижи бойыныҥ ӱйиле тӧзӧлгӧ јок айрылза, Иеговага јарабай јат. Мындый кижиниҥ бажырганы да Кудайга јескинчилӱ. Кудай оны кату каруузына тургузар (Мал. 2:13—16; Евр. 13:4).

12. «Јаманды кӧрӧр кӱӱнигер јок болзын» деген сӧстӧр бисти неге кӱӱнзедет?

¹² Иегова сурап јат: «Јаманды кӧрӧр кӱӱнигер јок болзын» (Рим. 12:9). «Кӧрӧр кӱӱнигер јок болзын» дегенин неге тӱҥейлеерге јараар? Темдектезе, јыдып, боктып калган курсакты кӧрӱп ийзеер, оны јиирге сананбазаар да. Андый јескинчилӱ не, кускугар келер! Оныҥ учун Иеговага јескинчилӱ болуп турган неме биске де јескинчилӱ болор учурлу.

13. Нениҥ учун бис јаман санааларысты бойыстаҥ сӱрер учурлу?

¹³ Јаман санааларды сӱрӱп туругар. Кажы ла эткен керек санаалардаҥ башталат. Оныҥ учун Иисус кинчекке экелип турган јаман санааларды башка јууктатпазын деп ӱреткен (Матф. 5:21, 22, 28, 29). Бис кажыбыс ла Иегова Кудайысты сӱӱндирерге турган эмейис. Оныҥ учун јаман санаалар тазылдангалакта, бойоордоҥ кодороло, чачар учурлу.

14. Бистиҥ айдып турган сӧстӧристеҥ кандыйыс кӧрӱнет? Бойыска кандый сурактар берер керек?

¹⁴ Нени айдарын сананып туругар. Иисус айткан: «Оостоҥ чыкканы дезе, јӱректеҥ чыкканы» (Матф. 15:18). Чыннаҥ ла, бистиҥ оозыстаҥ не чыгып турганы кӧзнӧктӧҥ чилеп, ичисте не барын ӱзе кӧргӱзип јат. Бу мындый сурактарды сананып кӧрӱгер: «Чын немени айдарга эби јок болзо, тӧгӱндеп ийерим бе? Ол эмезе эжим эмес кижиле сертежедим бе? Оозымнаҥ јаман, улусты ачындырып ийер сӧстӧр чыгат па? Кем-кем сӧзин бӱдӱрбезе, ачынып, кородоп  келедим бе?» Јаман куучынды топчыларга тӱҥейлеерге јараар. Бис јаман куучынысты солыбай турзаас, «озогы кижини» кийеле, топчыланып алганыска тӱҥей. Је «озогы кижини» уштыырга, кирлӱ, јаман куучындарды токтодор керек ол эмезе топчыларды чечер керек.

15. «Озогы кижини» столмого кадап салары ол не дегени?

¹⁵ Тӱзединигер. Павел кижиге солынар керек деп кӧргӱзерге, мындый тӱҥдештирӱ эткен. Оныҥ сӧстӧрин кычырадыс: «Бистиҥ озогы кижибис столмого јаба кададып салган» (Рим. 6:6). Бу ӱлгерде Иегованыҥ кӱӱн-табын бӱдӱрерге болуп, коркышту шыралгалу ӧлӱмле божогон Иисус Христос керегинде айдылат. Анайып ла бис Иегованыҥ кӧрӧр кӱӱни јок санааны ла керектерди јоголтор учурлу. Иегова биске болуп, нормаларын солыбас. Оныҥ учун оныҥ нормаларыла келиштире јӱрерге, биске солынар керек (Иса. 1:16—18; 55:9). Оноҥ башка бисте ару уйат та болбос, келер ӧйгӧ ижемји де болбос (Иоанн 17:3; 1 Пётр 3:21).

16. Нениҥ учун балыр кӱӱн-санаала оноҥ ло ары тартыжар керек?

¹⁶ Балыр кӱӱн-санаала оноҥ ло ары тартыжыгар. Бу мындый тартыжу сууга чӧҥӱрилген де кийнинде болуп јат. Маурисиу деп аканыҥ темин кӧрӱп ийектер. Ол јиит тужында гомосексуалист болгон. Је канча ӧй ӧдӧ берерде, ол Иегова Кудайдыҥ Керечилерине туштап, Агару Бичикти ӱренип баштаарда, оныҥ јӱрӱми сӱреен тыҥ солынган. Маурисиу 2002 јылда сууга чӧҥӱрилип, канча јылдарга Кудайдыҥ Керечизи болуп иштеп јат. Ол айдат: «Мениҥ јаман кӱӱн-санаам кезикте ойто кайра једип келет, оныҥ учун мен јаантайын оныла тартыжып јадым. Анайып, бойымныҥ кӱӱн-санаамныҥ кулы болбой, Иегова Кудайдыҥ кӱӱнин бӱдӱрип турганыма сӱӱнип јадым» *.

17. Набиха эјениҥ теминеҥ неге ӱренедис?

¹⁷ Бойыгарга иженбей, Иегованаҥ болуш сурагар (Гал. 5:22; Флп. 4:6). «Озогы кижини» уштып, оны ойто кийбеске ийде-кӱч керек болот. Набиха эјениҥ јӱрӱмин кӧрӱп ийектер. Ол 6 јашту болордо, адазы билезин таштап, јӱрӱп калган.  Ол айдат: «Адам јӱрӱп каларда меге коркышту ачу болгон, јӱрегимде јаан шырка артып калган». Мынаҥ улам Набиха сӧс укпас бала болуп чыдаган. Анайып ол наркотиктер садып туратан, бу учун оны канча да јылга тӱрмеге отургызып салган. Ол ӧйдӧ тӱрмедӧӧн бир неделеде бир катап Иегованыҥ Керечилери келип, оныла кожо ӱредӱ баштаган. Мынаҥ улам оныҥ јӱрӱми коркышту тыҥ солынган. Набиха оноҥ ары мынайып куучындаган: «Наркотиктерди таштаарга меге кӱч болбогон. Је таҥкыны таштаарга бир јылдаҥ ажыра ӧй керек болгон. Мындый јаман керектеҥ айрыларга, Иеговага мӱргӱгеним болушкан. Иеговага јараарга мендий кижи солынып каларда, кажы ла кижи солынар аргалу!» *

18. 1 Коринфтегилерге 6:9—11-ле болзо, баштапкы чактыҥ христиандары канайып солынган?

¹⁸ Баштапкы чактыҥ христиандарын сананып ийектер. Бу улустыҥ чӧҥӱрилердеҥ озо, та кемизи де балыр јӱрӱм јӱрген, кезиги гомосексуалисттер, кезиги уурчылар болгон. Је бу эр улус ла ӱй улус агару тынныҥ болужыла јӱрӱмин солыган. Оноҥ Иегова олорго Иисусла кожо башкаратан кайрал берген. (1 Коринфтегилерге 6:9—11 кычырыгар.) Анайып ла бӱгӱнги кӱнде миллиондор тоолу улус Агару Бичиктиҥ болужыла, тереҥ шиҥип калган јаман кылык-јаҥнаҥ айрылып, солынып јат *. Айдарда, слер де јӱрӱмигерди солып, чӧҥӱрилер аргалу.

19. Келер јӧрмӧлдӧ нени шӱӱжерис?

¹⁹ Је сууга чӧҥӱрилерге, «озогы кижини» јӱк ле уштыыр керек эмес, је «јаҥы кижини» кийер керек. Келер јӧрмӧлдӧ мыны канай эдерин ле ака-эјелер биске бу јанынаҥ канай болужарын шӱӱжип кӧрӧрис.