Мындый сурак, бу ӱлгерлерди јазап сананбай ла тӱрген кычырза, чыгардаҥ айабас. Је бу учуралды тереҥжиде кӧрӱп ийзе, ондо Мефивошет деп атту эки кижи болгоны кӧрӱне берет. Мында бистерге сӱреен јакшы ӱредӱ бар. Оныҥ учун бу ӱлгерлерди шиҥдеп кӧрӱп ийектер.

Израильдиҥ кааны, Саул, јети уулдыҥ ла эки кыстыҥ адазы болгон. Оныҥ баштапкы уулы — Ионафан. Рицпа деп наложницанаҥ Мефивошет деп уул чыккан. Кайкамчылу немези дезе, Ионафанныҥ да уулы Мефивошет болуптыр. Айдарда, Саулдыҥ уулы да, уулыныҥ балазы да Мефивошет деп атту болгон.

Кандый да ӧйдӧ Саул Гаваонныҥ улузын јоголтып саларга ал-камык улус ӧлтӱрген. Бу кала Израильдиҥ јеринде турган. Иисус Навинниҥ ӧйинде Израильдиҥ башчылары Гаваонныҥ улузыла амыр-энчӱ јадарга јӧптӧжӱ тургузып алган (Иис. Н. 9:3—27). Оныҥ учун Саулды коркышту јаан јастыра эткен деп айтсаас јастыра болбос.

Гаваонныҥ улузыла тургускан јӧптӧжӱ Саулдыҥ да ӧйинде болгон. Је андый да болзо, Саул бу јӧптӧжӱни бузып, олорды јоголторго сананган. Оныҥ да учун «Саул ла оныҥ бала-барказы кан тӧккӧни учун бурулу» болгондор (2 Сам. 21:1). Израильдиҥ кааны болуп отурган Давид Саулдыҥ ондый кинчегинеҥ улам Иегова албатызына алкыжын бербей барганын билип ийеле, Гаваонныҥ артып калган улузынаҥ, Саулдыҥ бурузы ташталзын деп нени этсе јакшы болор деп сураган. Олор Давидтеҥ кандый да акча-јӧӧжӧ сурабай, мынайып айткан: «Бисти ӧлтӱрген, бисти Израильдиҥ јеринеҥ јоголторго сананган кижи учун, оныҥ уулдарынаҥ јетӱзин биске беригер. Бис олорды... столмого илип саларыс». Давид олордыҥ сураганын бӱдӱрип салды (2 Сам. 21:2—6; Тоол. 35:30, 31).

Давид, каан болуп баштап турарда, Ионафан ла Саул божоп калган болгон. Је Ионафанныҥ уулы, Мефивошет, тирӱ јӱрген. Ол јаш ла тужында кенеп калган. Анайып, ол карган адазыныҥ јаман керектеринде турушпаган (1 Сам. 18:1; 20:42). Агару Бичикте мындый сӧстӧр бар: «Давид каан Иегова алдына бойыныҥ ла Ионафанныҥ берген чертине болуп, Саулдыҥ Ионафан уулыныҥ уулын, Мефивошетти, карамдай берген» (2 Сам. 21:7). Ионафан тирӱ јӱрерде, Давидле экӱ јӧптӧжӱ тургускан. Мыныҥ да учун Давид Мефивошетти Гаваонныҥ улузына бербеген.

Давид Гаваонныҥ улузыла тургускан јӧптӧжӱни ундыбаган. Оныҥ учун олорго Саулдыҥ эки уулын, олордыҥ бирӱзиниҥ ады Мефивошет болгон, оноҥ ол беш барказын берип ийген (2 Сам. 21:8, 9). Анайып, Давид израильтяндардыҥ кан тӧккӧн бурузын бӧктӧп салган.

Је Агару Бичикте мындый јасак бар эди: «Балдарды адаларыныҥ кинчеги учун ӧлтӱрерге јарабас» (Јаҥ. т. 24:16). Саулдыҥ уулдары ла баркалары бурулу эмес болгон болзо, Иегова олордыҥ ӧлӱмин јаратпас эди. Бу ла јасакта мындый сӧстӧр база бар: «Кижи јӱк ле бойыныҥ кинчеги учун ӧлӧр учурлу». Айдарда, Саулдыҥ уулдары ла баркалары Гаваонныҥ улузын ӧлтӱргенде бурулу болуп јат. Олор бойыныҥ кинчеги учун ӧлтӱрткен.

Бу учурал тегиндӱ бичилбеген. Мынаҥ бойыска јаан ӱредӱ аладыс. Кижи кемниҥ-кемниҥ јакарузын бӱдӱрерге јаман керек эдип ийзе, бойын актанып болбос. Оныҥ учун Агару Бичиктеги ойгор јӧпти ундыбай јӱректер: «Будыҥ баскан јолды тӱзедип тур, барган јолдорыҥда јеткер болбос. Оҥ до јанындӧӧн, сол до јанындӧӧн бурыба, јаманнаҥ тууралап јӱр» (Укаа 4:24—27; Эф. 5:15).