1. Ада-энелер нени кӱӱнзейт?

 КАРУ ада-энелер, слер балдараарды Иегованы јакшы билип алзын ла оны сӱӱп турзын деп кӱӱнзеп турган эмейигер. Је Иегова кӧскӧ кӧрӱнбес тын. Андый болордо, слер олорго Иегова чын ла бар деп бӱдерге ле ого јууктаарга канайып болужар аргалу? (Иак. 4:8).

2. Ада-энелер балдарын Иегованыҥ кылык-јаҥдарын јакшы билзин деп, нени эдер аргалу?

² Балдараарды Иеговага јуук болзын деп турган болзоор, олорло Агару Бичик ӱренер керек (2 Тим. 3:14—17). Је Кудайдыҥ Сӧзинде база да ӧскӧ арга бар деп айдылат. Темдектезе, Укаа сӧстӧр деп бичикте бир ада кижиниҥ уулыла кожо Кудайдыҥ јайаандары керегинде куучындажып турганы бичилген. Ол уулын айландыра јайаандардаҥ Кудайдыҥ кылык-јаҥын кӧрӱп турзын деп кӱӱнзедет (Укаа 3:19—21). Айдарда, ада-энелерге балдарын Кудайдыҥ јайаандары ажыра оны јакшы билип алзын деп болужатан бир канча эп-аргалар кӧрӱп ийектер.

3. Ада-энелер балдарына не јанынаҥ болужар учурлу?

³ Агару Бичикте айдылат: «Кудайдыҥ кӧскӧ кӧрӱнбес кылык-јаҥы телекейдиҥ јайалганынаҥ ала иле кӧрӱнет. Бис оныҥ кылык-јаҥын јайаандарын ајыктап, кӧрӱп ийер аргалу» (Рим. 1:20, ЈТ). Ада-энелер, слерге балдараарла кожо ар-бӱткенде болорго јарап турган болор. Оныҥ учун бу ӧйди олорго Иегованыҥ јайаандарыныҥ ла оныҥ кылык-јаҥдарыныҥ колбузын кӧрзин деп болужарга тузаланыгар. Бу јанынаҥ Иисустыҥ теми тузалу болор.

4. Иисус улусты ӱредип тура, ајаруны Кудайдыҥ јайаандарына канайып эткен? (Лука 12:24, 27—30).

⁴ Иисус улусты ӱредип тура, ајаруны Кудайдыҥ јайаандарына  канайып эткен? Бир катап ол бойыныҥ ӱренчиктерин кускундарга ла лилия деп чечектерге кӧрӱгер деп сураган. (Лука 12:24, 27—30 кычырыгар.) Иисус мынаҥ да ӧскӧ тындулар ла ӧзӱмдер керегинде айдар аргалу болгон. Је ол улустыҥ јакшы билер кужын ла чечегин тузаланган. Нениҥ учун дезе оныҥ ӱренчиктери теҥериде учуп турган кускундарды ла јалаҥда ӧзӱп турган лилияларды јаантайын кӧрӱп туратан. Иисус куучындап тура, Иегованыҥ бу јайаандарына колыла уулап турганын сананып ийзеер де. Ол бу темдерди нениҥ учун тузаланган? Мынайып ол теҥеридеги Адазыныҥ кысканбазын ла јалакайын кӧргӱскен. Мында јаан учурлу ӱредӱ бар. Иегова кускундарды ла лилияларды кичееп турарда, бойыныҥ чындык ишчилерин курсак-тамак та, кийим-тудум да јок артыргыспас.

5. Ада-энелер балдарына Иегова керегинде куучындаарга кандый јайаандарга ајару эдер аргалу?

⁵ Ада-энелер, балдараарды ӱредип тура, слер Иисустаҥ кандый тем алар аргалу? Темдектезе, слерге јарап турган кандый бир тынду эмезе ӧзӱм керегинде балагарга куучындап, бу тындунаҥ эмезе ӧзӱмнеҥ Иегованыҥ кандый кылык-јаҥы кӧрӱнип турганын јартап беригер. Оноҥ ого кандый чечек эмезе тынду јарап турганын сурагар. Балагарга Иегова керегинде куучындап јаткан тужыгарда, ого јарап турган неме керегинде куучындашсаар, ол слерди јазап угар болор.

6. Кристофердиҥ энезиниҥ теми бисти неге ӱредет?

⁶ Айдарда, ада-энелерге кандый бир тынду эмезе ӧзӱм керегинде јетирӱлер таап аларга кӧп ӧй чыгарар керек пе? Јок. Иисус та улусты ӱредип тура, кускундардыҥ курсакты канайып табып турганын эмезе лилиялардыҥ канайып ӧзӱп турганын кӧп куучындабаган. Кезикте балагар ар-бӱткен керегинде кӧптӧдӧ билерге кӱӱнзеер болор. Је кӧп сабада оны та неге де ӱредип саларга, тегин сӧстӧр эмезе кандый бир сурак једер. Кри́стофер бала тужын эске алып мынайда куучындайт: «Энем биске Иегованыҥ јайаандарына ајару этсин деп болужарга, тегин ле сӧстӧр тузаланып туратан. Темдектезе, бис кырдыҥ јанында болзоос, ол мынайда айдатан: „Кандый бийик кырлар! Иегова чыннаҥ ла Улу Јурукчы дезеер?“ Эмезе теҥистиҥ јарадында болзоос, ол: „Кӧрзӧӧр дӧ, бу толкулардыҥ јаанын! Иегова Кудайыстыҥ кӱчи сӱреен јаан!“ — деп айдатан». Кристофер оноҥ ары айдат: «Энемниҥ мындый тегин, је тереҥ учурлу сӧстӧри бисти санандырып ийетен».

7. Балдарды Кудайдыҥ јайаандары керегинде шӱӱп сананарга канайып ӱредер?

⁷ Балдараарды јаанаган сайын јайаандар керегинде шӱӱп сананып, бу јайаандардаҥ Иегованыҥ кылык-јаҥдарын кӧрӧргӧ ӱредигер. Темдектезе, кандый бир јайаанга ајару эдип, баланаҥ сураарга јараар: «Мынаҥ сен Иегова керегинде нени билип алдыҥ?» Оныҥ каруулары слерди кайкадар да, сӱӱндирер де болор (Матф. 21:16).

8. Израильдеги ада-энелерде балдарыла кожо јол-јорыкта болордо кандый арга болгон?

⁸ Израильдеги ада-энелерге бойыныҥ балдарын Иегованыҥ јасактарына јӱк ле айылда эмес, је јолдо до јӱрзе, ӱретсин деп айдылган (Јаҥ. т. 11:19). Израильде јолдор деремнелер ажыра ӧдӧтӧн. Оныҥ учун јолой барып јадала, кӧп тындулар, куштар, чечектер кӧрӧтӧн арга болгон. Мынаҥ улам ада-энелер бойыныҥ балдарыла Иегованыҥ јайаандары керегинде куучындажып туратан. Слерде де, кару ада-энелер, бого тӱҥей аргалар бар болор. Айдарда,  кезик ада-энелер нени эдип турганын кӧрӱп ийектер.

9. Слер Пунита ла Катянаҥ неге ӱренедеер?

⁹ Индияныҥ јаан калазында јадып турган Пуни́та мынайып куучындаган: «Бис балдарысла кожо деремнеде јадып турган тӧрӧӧндӧриске барып турзаас, олорго Иегованыҥ јайаандары керегинде куучындап јадыс. Сананзам, балдарыма каланыҥ кӧп улусту ла табышту оромдорынаҥ ыраак болзо, Иегованыҥ јайаандарын кӧрӱп, бу керегинде шӱӱп сананарга јеҥил болот ошкош». Ада-энелер, балдараар слерле кожо ар-бӱткенниҥ кандый бир јараш јеринде болгонын качан да ундыбас болор. Молдовада јадып турган Катя мынайып куучындаган: «Јаш тужымда ада-энемле кожо каладаҥ чыгып, амыраганыс сагыжыма јакшы артып калган. Бу эҥ јакшы ӧйлӧр болгон. Мен ада-энемге јаан быйанду. Нениҥ учун дезе олор мени јаштаҥ ла ала токтой тӱжеле, Иегованыҥ јайаандарын кӧрӧргӧ лӧ бу јайаандар ажыра оныҥ кылык-јаҥдарын шӱӱп сананарга ӱреткен».

10. Билезиле кожо каланаҥ чыгарга келишпей турган болзо, ада-энелер нени эдер аргалу? ( «Ада-энелерге болужатан материалдар» деген рамканы кӧрӱгер.)

¹⁰ Је каланаҥ чыгарга келишпей турган болзо, нени эдерге јараар? Индияда јадып турган Амо́л айдат: «Мениҥ јадып турган ороонымда ада-энелерге кӧп иштеерге келижет. А каланаҥ чыгарга кӧп акча керек болот. Је мындый да айалгада паркта да, балкондо до Иегованыҥ јайаандарын кӧрӱп, оныҥ кылык-јаҥдарын шӱӱп сананарга јараар». Эбиреде немени јазап кӧрӱп турзагар, айылдыҥ да јанында балагарга кӧргӱскедий Иегованыҥ јӱзӱн-јӱӱр јайаандарын база таап алараар (Сар. 104:24). Анда куштар, курт-коҥыстар ла ӧзӱмдер, оноҥ до ӧскӧ не-неме бар болор. Германияда јадып турган Карина мынайда куучындаган: «Кичинек тужымда энемле кожо амырап јӱрзеес, ол меге јараш чечектерди  кӧргӱзетен. Нениҥ учун дезе чечектер ого сӱреен јарап туратан». Анайда ок Иегованыҥ јайаандары керегинде бистиҥ организация чыгарган видеолор ло статьялар бар. Ада-энелер, слер бу јепселдерди тузаланадаар ба? Айалгагар кандый да болзо, слер балдараарды Иегованыҥ јайаандарына ајару эдип турарга ӱредер аргалу. Је эмди слер олорго Иегованыҥ кезик кандый кылык-јаҥдарын кӧрӧргӧ болужар аргалу деп кӧрӱп ийектер.

11. Ада-энелер балдарына Иегованыҥ сӱӱжин кӧрӧргӧ канайып болужар аргалу?

¹¹ Слер балдараарга Иегованыҥ сӱӱжин кӧрзин деп болужарга, тындулардыҥ балдарын канайып эрке кичееп турганына ајару эдер аргалу (Матф. 23:37). Анайда ок айландыра ар-бӱткен јӱзӱн-башка эдип јайалган деп кӧргӱзер аргалу. Ӧрӧги айдылган Карина куучындайт: «Бис энемле кожо амырап јӱрзеес, энем токтой тӱжӱп, чечектерди ајыктап кӧр деп айдатан. Ол мени кажы ла чечекти не аҥылу эдет деп ле ол чечектиҥ јаражынаҥ Иегованыҥ сӱӱжи канай кӧрӱнет деп сананарга кӱӱнзедетен. Оноҥ бери канча јылдар ӧдӱп те калган болзо, мен анайып ла чечектерди јазап ајыктап кӧрӧдим. Мени олордыҥ јӱзӱн-башка болгоны ла јаражы сӱреен кайкадат ла Иегова бисти сӱӱп турган деп эмдигенче ле эске алындырат».

12. Ада-энелер балдарына Иегованыҥ ойгорын кӧрӧргӧ канайып болужар аргалу? (Сарын 139:14). (Јурукты база кӧрӱгер).

¹² Балдараарга Кудайдыҥ ойгорын кӧрӧргӧ болужыгар. Иегова бистеҥ канча катапка ойгор (Рим. 11:33). Темдектезе, слер олорго мынай айдар аргалу: «Булуттарга кӧрзӧӧр дӧ. Олор суудаҥ да турган болзо, теҥериле андый јеҥил јылыжып јат!» (Иов 38:36, 37). Анайда ок слер кижиниҥ эди-каны кандый кайкамчылу јайалып калганына ајару эдер аргалу. (Сарын 139:14 кычырыгар.) Бу керегинде Владимир уулчагына канайып јартаганын кӧрӱп ийектер. Ол мынайып куучындайт: «Бир катап бистиҥ уулчагыс велосипедтеҥ јыгылала, тизезин јарып алган. Бир канча ӧйдӧҥ оныҥ јарылган јери јазыла берген. Бис ӱйисле кожо ого бистиҥ эди-каныс бойы эмделер аргалу эдип јайалган деп јартаганыс. Кижиниҥ сананып тапкан эдимдеринде мындый арга јок.  Темдектезе, аварияга кирген машина бойын бойы јазабай јат. Уулчагыс мыны угала, Иегова сӱреен ойгор деп оҥдогон».

13. Ада-энелер балдарына Кудайдыҥ ийде-кӱчин кӧрӧргӧ канайып болужар аргалу? (Исайя 40:26).

¹³ Иегова бисти теҥеридӧӧн кӧрӱп, оныҥ сӱреен јаан ийде-кӱчинеҥ улам, јылдыстардыҥ кажызы ла бойыныҥ јеринде турат деп сананарга кӱӱнзедет. (Исайя 40:26 кычырыгар.) Оныҥ учун слер балдараарды теҥериге кӧрӱп, анда нени кӧрӱп турганын куучындап берзин деп сураар аргалу. Тайваньда јадып турган Тинти́н деп эје бала тужын эске алып, мынайып куучындаган: «Бир катап энемле кожо ар-бӱткенге амырап барганыс. Эҥирде каланыҥ отторынаҥ ыраакта болуп, бис јылдыстарлу теҥерини ајыктаганыс. Ол ӧйдӧ мен школдо балдарга јаман кӧрдӱрип, Иеговага чындык иштеп болбозым деп санааркап туратам. Энем меге, бу ончо јылдыстарды јайаарга, Иеговага сӱреен јаан ийде-кӱч керек болгон деп, сананарга болушкан. Оныҥ ийде-кӱчи меге де кандый ла ченелтени ӧдӧргӧ болужар деп бӱдӱмјилеген. Мынаҥ улам мен Иегованы оноҥ јакшы билерге ле ого иштеерге оноҥ тыҥ кӱӱнзей бергем».

14. Ада-энелер балдарына Иегова ырысту Кудай деп кӧрӧргӧ канайып болужар аргалу?

¹⁴ Иегованыҥ јайаандарынаҥ ол ырысту ла кокырлап билер Кудай деп кӧрӱнет. Учёныйлардыҥ шиҥдегениле болзо, кӧп саба тындуларга, ол тоодо куштарга ла балыктарга, кӧкӱп ойноорго јарап јат (Иов 40:20). Темдектезе, слердиҥ балдараар кискениҥ балазы болчоктоп салган учуктыҥ кийнинеҥ маҥтап турганын ла кӱчӱктер бой-бойлорыла ойноп турганын кӧрӱп, каткырышканын кӧргӧн болороор. База бир тушта балдараар кандый бир тындуныҥ баштактанып турганын кӧрӱп, каткырыжып турза, олорго бис ырысту Кудайга иштеп турганыс деп эске алындырыгар (1 Тим. 1:11).

15. Ада-энелерге балдарыныҥ санаазын билип аларга не болужар? (Укаа сӧстӧр 20:5). (Јурукты база кӧрӱгер.)

¹⁵ Кезикте ада-энелерге балдарын бойлорыныҥ кӱчтерин чыгара айдынзын деп  кӱӱнзедерге кӱч болот. Слер де мындый айалгада болзоор, олордыҥ санаазын билип аларга албаданар керек. (Укаа сӧстӧр 20:5 кычырыгар.) Кезик ада-энелерге балдарыныҥ санаазын билип аларга олорло кожо ар-бӱткенде болгоны болужат. Нениҥ учун дезе анда балдарга да, ада-энелерге де не де чаптыгын јетирбей јат. Тайваньда јадып турган Масахи́ко ака мынайда куучындаган: «Бис балдарысла кожо ару кей тынарга, кырлардӧӧн барзаас эмезе сууныҥ јарадында амырап јӱрзеес, балдарыс бойлорын јайым тудунат. Оныҥ учун олор нени сананып турганын билерге биске јеҥил болот». А ӧрӧги айдылган Катя мынайып куучындаган: «Бис энемле экӱ школдыҥ кийнинеҥ јараш парктӧӧн барып туратаныс. Мындый амыр јерде меге бойымныҥ санааркаштарымды ла школдо не болгонын куучындаарга јеҥил болгон».

16. Билелер Иегованыҥ јайаган ар-бӱткенинде болуп, канайып кожо амыраар аргалу?

¹⁶ Билелер ар-бӱткенге барып, кожо амыраар аргалу. Бу олорго бой-бойын сӱӱп, баалап јӱрерге болужат. Агару Бичикте «каткыратан ӧй бар», «бијелейтен ӧй бар» деп айдылат (Эккл. 3:1, 4). Иегова јердиҥ ӱстинде сӱреен кӧп јараш јерлер јайап салган. Бис анда јакшызынып јӱрер аргалу. Темдектезе, кезик билелерге агаш-аразында базарга, кырларга чыгарга, талайдыҥ јарадында амыраарга јарап јат. Балдарга дезе паркта јӱгӱрип ойноорго, сууга кирип, чакпыланарга ла тындуларды кӧрӧргӧ јарап јат. Айдарда, билелерге ар-бӱткенде амырайтан сӱреен кӧп аргалар бар. Иегованыҥ јайаандарыныҥ ортозында болотоны кандый јакшы!

17. Ада-энелерге балдарын Кудайдыҥ јайаандарынаҥ сӱӱнчи алзын деп, нениҥ учун ӱредер керек?

¹⁷ Је јаҥы телекейде ада-энелер де, балдар да Иегованыҥ јайаган јайаандарын кӧрӱп, оноҥ тыҥ сӱӱнгилеер. Бис тындулардаҥ да коркыбазыс, олор до бистеҥ коркыбас (Иса. 11:6—9). Иегованыҥ сыйлаган сыйларыла јакшызынатан ӧй бисте артыгынча болор (Сар. 22:26). Је ол ӧй келгелекте, балдараарды Кудайдыҥ јайаандарына эмди ле сӱӱнип јӱрерге ӱредип, олорго Кудай керегинде куучындагар. Ол тушта балдараар Давид каанныҥ: «Иегова, сениҥ эткен керектериҥ эҥ ле артык!» — деп сӧстӧриле јӧпсинер болор (Сар. 86:8).