1, 2. Слер чӧҥӱрилерге эм тургуза белен эмес болзоор, нениҥ учун тыҥ санааркабас керек? (Кадарындагы јурукты кӧрӱгер.)

 СЛЕР сууга чӧҥӱрилерге кӱӱнзейдеер бе? Бу сӱреен јакшы амаду! Слер бойоорды сууга чӧҥӱрилерге белен деп кӧрӱп турган болзогор, анайда ок аксагалдар слерди чӧҥӱрилерге јарадып салган болзо, арга боло ло берзе, тӱрген ле чӧҥӱрилигер. Ол тушта Иеговага иштеп, јилбилӱ ле ырысту јӱрӱм јӱререер.

² Је слерди сууга чӧҥӱрилерге, јетире тӱзедилбеген дезе, канайдар? Ол эмезе слер бойоор до тӱзедилбегенеерди оҥдоп турган болороор. Андый болзо, тыҥ санааркабагар. Слер тӱҥей ле солынып, мындый јаан учурлу алтамды, канча да јашту болзоор, эдер аргалу.

3. Эфиоп кижи Филипптеҥ нени сураган? Мынаҥ улам кандый сурак чыгат? (Апостолдордыҥ ижи 8:36, 38).

³ Апостолдордыҥ ижи 8:36, 38 кычырыгар, ЈТ. Эфиоп кижи Филипптеҥ: «Чӧҥӱрилерге мени не буудактап јат?» — деп сураган. Бу кижи сууга чӧҥӱрилерге тыҥ кӱӱнзеген де болзо, ол бу алтамды эдерге белен болгон бо?

4. Эфиоп кижиниҥ оноҥ кӧп билгирлер аларга кӱӱнзегени недеҥ кӧрӱнет?

⁴ Эфиоп кижи «Кудайга бажырарга Иерусалимге» барып туратан (Ап. ижи 8:27). Ол, байла, прозелит болгон, ӧскӧртӧ айтса, иудаизмди јаҥдап баштаган. Иегова керегинде ол Еврей Бичимелдердеҥ уккан болор. Санаарга  кирип туру ба, Филипп оны јаба једип аларда, ол нени эдип јаткан болгон эди? Ол судурчы Исайяныҥ тӱрбегин кычырып јаткан болгон! (Ап. ижи 8:28). Бу дезе кату кӧгӱс курсак. Бу кижи тӧс чындыктарды билип те алган болзо, оноҥ до кӧп билгирлер аларга кӱӱнзеген.

5. Эфиоп эр кижи билип алганын канайып тузаланган?

⁵ Бу эр кижи Эфиопияныҥ каан ӱй кижизиниҥ «акча-јӧӧжӧзиниҥ коручызы» болгон (Ап. ижи 8:27). Јамылу кижиниҥ ижи-тожы кӧп болгон болор. Андый да болзо, ол Иеговага бажырарга ӧй табып туратан. Ол чындыкты билерге јӱк ле кӱӱнзеген эмес, је билип алганын тузаланып туратан. Оныҥ да учун ол Иеговага бажырарга, Эфиопиянаҥ Иерусалимдеги ӧргӧӧгӧ барып јӱрген. Мындый узун јол-јорыкка кӧп акча-манат та, кӧп ӧй дӧ керек болгон болор. Је Иеговага бажырарга ол нени де карамдабаган.

6, 7. Эфиоп кижиниҥ Иеговага сӱӱжи недеҥ улам тыҥыган, бу сӱӱш оны неге кӱӱнзетти?

⁶ Эфиоп јериниҥ эр кижизи Филипптеҥ Агару Бичимелдиҥ кезик чындыктарын, ол тоодо Иисусты Мессия деп, билип алган. (Ап. ижи 8:34, 35). Оныҥ јӱрегин Иисустыҥ толынты тайылгазы керегинде чындык томулткан. Мынаҥ улам ол нени эткен? Бу кижи јӱрӱмин солыбай, оноҥ ло ары јамылу прозелит кижи болуп јӱрер аргалу болгон. Је Иегованы ла Иисусты сӱӱп баштаганынаҥ улам ол јӱрӱмин солып, Иисус Христостыҥ ӱренчиги болорго кӱӱнзей берген. Филипп мыны кӧрӧлӧ, оны сууга чӧҥӱрген.

⁷ Слер эфиоп кижинеҥ тем алзаар, сууга чӧҥӱрилерге белен болороор. Ол тушта слер де: «Сууга чӧҥӱрилерге мени не буудактап јат?» — деп, айдар аргалу болороор. Бу кижи билгирлер алган, билерин тузаланган, анайда ок Иеговага сӱӱжин тыҥыткан. Је эмди дезе бу алтамдарды слер канай эдер аргалу деген суракты кӧрӱп ийектер.

8. Иоанн 17:3 слерди неге кӱӱнзедет?

⁸ Иоанн 17:3 кычырыгар, ЈТ. Слер Иисустыҥ бу сӧстӧрин угала, Агару Бичикти ӱренерге кӱӱнзей берген болороор. Кӧп улус шак ла бу сӧстӧрдӧҥ улам Агару Бичикти ӱренип баштаган. Је бу ла сӧстӧрлӧ болзо, биске јаантайын «чын Кудай керегинде... билгирлер алып турар керек» (Эккл. 3:11). Иегова керегинде билгирлерди јажын-чакка аларыс. Бис Кудай керегинде канча ла кире кӧп билзеес, ого ончо ло кире јуук болорыс (Сар. 73:28).

9. Агару Бичиктиҥ тӧс ӱредӱлерин билип алган кийнинде нени эдер керек?

 ⁹ Бис Иегова керегинде билгирлерди Агару Бичиктиҥ тӧс ӱредӱлеринеҥ билип алганыс. Апостол Павел бу ӱредӱлерди еврейлерге бичиген самарада «баштаҥы ӱредӱлер» деп адаган. Оны Павел јаш баланы азыраган сӱтке тӱҥейлеген (Евр. 5:12; 6:1). Анайда ок ол бисти Агару Бичиктиҥ оноҥ тереҥ чындыктарын билзин деп кӱӱнзеткен. Андый кӱӱн слерде бар ба? Иегова ла оныҥ амадузы керегинде оноҥ кӧп билерге кӱӱнзейдеер бе?

10. Нениҥ учун кезик улуска ӱренерге јеҥил эмес?

¹⁰ Бистиҥ кезигис: «Ӱренерге кӱч» — деп айдар болор. Је слер кандый каруу берер эдеер? Слер школдо ӱренип турараарда, кычырарга, шиҥжӱ ӧткӱрерге ӱренип алганаар ба? Слерге ӱренерге ле јаҥы неме билерге јарап туратан ба? Ол эмезе ӱренерге слерге кӱч болгон бо? Андый болзо, слер јаҥыскан эмезигер. Иегова слерге болужар аргалу. Нениҥ учун дезе ол толо кемдӱ эҥ ле јакшы Ӱредӱчи.

11. Иегованы «Улу таскадаачы» деп нениҥ учун айдарга јараар?

¹¹ Иегова бойын «Улу таскадаачы» деп адайт (Иса. 30:20, 21). Ол јалакай, чыдамкай, кижини оҥдоп турар Ӱредӱчи (Сар. 130:3). Ол бойыныҥ ӱренчиктериниҥ јастыраларына эмес, карын јакшы јандарына ајару эдет. Ол бистеҥ качан да эдип болбос неме сакыбай јат. Нениҥ учун дезе ол сӱреен јакшы сыйды — бистиҥ меегисти — бойы эткен (Сар. 139:14). Анайда ок ол бисти билгирлер алатан кӱӱндӱ эдип јайаган. Јайаачы Иегова Кудайыс бисти билгирлерди ӱргӱлјиге алып турзын ла ол билгирлер биске сӱӱнчи экелип турзын деп кӱӱнзейт. Оныҥ учун Агару Бичиктеги чындыктарды билер кӱӱнисти ӧскӱрзеес, ойгор болор (1 Пётр 2:2). Једингедий амадулар тургузып, Агару Бичикти кычыратан ла ӱренетен графигердеҥ тудуныгар (Иис. Н. 1:8). Ол тушта Иегованыҥ алкыжыла билгирлер аларга слерге там ла там јарап турар.

12. Нениҥ учун Иисустыҥ јӱрӱмин ле агару ижин шиҥдеер керек?

¹² Иисустыҥ јӱрӱмин ле агару ижин шӱӱп сананарга ӧй табып туругар. Бис Иеговага бажырарга турган болзоос, анчада ла бу уур-кӱч ӧйлӧрдӧ биске Иисустыҥ изиле чике барар керек (1 Пётр 2:21). Нениҥ учун дезе кӱчтер болор деп, Иисус ӱренчиктерине озодоҥ айдып салган (Лука 14:27, 28). Је олор кӱчтерди ӧдӱп чыгар деп, ол бир де алаҥзыбаган (Иоанн 16:33). Оныҥ учун Иисустыҥ јӱрӱмин шиҥдеп, оноҥ тем аларга амаду тургузыгар.

13. Иегованаҥ нени сураар керек, нениҥ учун?

¹³ Јӱк ле билгирлер алары ас. Бу билгирлер биске Иеговала јууктада таныжып, оны сӱӱрге ле ого бӱдерге болужат (1 Кор. 8:1—3). Оныҥ учун Агару Бичикти ӱренип јаткан ӧйдӧ Иегованаҥ слердиҥ бӱдӱмјигерди тыҥытсын деп болуш сурагар (Лука 17:5). Мындый мӱргӱӱлдер каруу јок артпас. Кудай керегинде чындыкка тӧзӧлӧнгӧн бӱдӱмји билгирлеристи тузаланарга болужар (Иак. 2:26).

14. Алган билгирлерди тузаланар керек деп, Пётр канайып кӧргӱскен? (Јурукты кӧрӱгер.)

¹⁴ Иисустыҥ ӱренчиктерине алган билгирлерин тузаланар керек деп, апостол Пётр аҥылап айткан. Мыны бис  оныҥ Ной керегинде айтканынаҥ кӧрӧдис. Кудай Нойго удабас чайык болор ло ондо калју улус јоголтылар деп айдып салган. Је Нойго ло оныҥ билезине тирӱ артарга, чайык болоры керегинде јӱк билери ас болгон. Пётр чайыктаҥ озо болгон ӧй керегинде нени айтканын ајарып ийзеер де. Ол мынайда бичиген: Кудай «олорды ковчег тудулганча... узак чыдажып сакыган» (1 Пётр 3:20). Айдарда, Ной ло оныҥ билези алган билгирлерин тузаланып, чайыктаҥ озо јаан ковчег туткандар (Евр. 11:7). Оноҥ Пётр Нойдыҥ эткен ижин аргаданыш берип турган сууга чӧҥӱрилерине тӱҥдештирген (1 Пётр 3:21). Оныҥ учун сууга чӧҥӱрилерге белетенерин Ной ло оныҥ билезиниҥ канча јылдардыҥ туркунына ковчег тутканына тӱҥдештирерге јараар. Је слер сууга чӧҥӱрилерге белен болорго нени эдер аргалу?

15. Кинчекти акту јӱректеҥ алынары нени темдектейт?

¹⁵ Слер чӧҥӱрилерге турган болзогор, акту јӱрегердеҥ кинчегерди алыныгар (Ап. ижи 2:37, 38). Бу слерди тӱзединерге кӱӱнзедер. Слер Иеговага јарабай турган јаман керектердеҥ, темдектезе, балыр јӱрӱмнеҥ, таҥкы тартарынаҥ, кирлӱ куучынаҥ ла ачу сӧстӧр айдарынаҥ айрылганаар ба? (1 Кор. 6:9, 10; 2 Кор. 7:1; Эф. 4:29). Айрылбаган болзоор, оноҥ ло ары тӱзединерге албаданыгар. Слерле Агару Бичик ӱренип турган кижинеҥ эмезе јуунныҥ аксагалдарынаҥ болуш сурагар. Ол эмезе слер ада-энегерле кожо јадып турган јиит кижи болзоор, сууга чӧҥӱрилерге чаптыгын јетирип турган јаман кылык-јаҥнаҥ айрыларга, олордоҥ болуш сурагар.

16. Кӧгӱс графикке нени эдери кирет?

¹⁶ Анайда ок кӧгӱс графиктеҥ тудунып туругар. Бу графикке јуунныҥ туштажуларына јӱрери ле ондо туружары кирет (Евр. 10:24, 25). Бого коштой јуунла кожо јарлап турган болзоор, бу иш кӧгӱс графигерге база кирзин. Канча ла кире кӧп јарлап турзагар, бу иш слерге ончо ло кире јарап турар (2 Тим. 4:5). Слер јиит ле ада-энегерле кожо јадып турган болзогор, бойоордоҥ сурагар: «Мен јуунга ла јарлаар ишке ада-энемниҥ айдыжы јогынаҥ бойым барып  тургам ба?» Јуундарга ла јарлаар ишке барып турзаар, Иеговага бӱдӱп, оны сӱӱп, ого быйанду болгоноорды кӧргӱзедеер. А бу дезе Иеговага чындык болгонысты кӧргӱзет (Евр. 13:15; 2 Пётр 3:11). Мыны акту јӱректеҥ эдип турзаас, Кудайысты сӱӱндиредис. (2 Коринфтегилерге 9:7 тӱҥдештиригер.) Бу керектерди бис Иеговага эҥ артыгын берерге турганыстаҥ улам эдедис.

17, 18. Сууга чӧҥӱрилерге слерге кандый кылык-јаҥ болужар? Нениҥ учун? (Укаа сӧстӧр 3:3—6).

¹⁷ Сууга чӧҥӱрилердеҥ озо слерде кӱчтер болордоҥ айабас. Кандый кӱчтер? Темдектезе, улус слерге, Иегова Кудайга бӱдӱп турганаар учун каткырыжар эмезе удурлажар болор (2 Тим. 3:12). Ол эмезе айрыларга турган кандый бир јаман кылык-јаҥыгар чыгып келет. Анайда ок амадугар бӱтпей калза, чӧкӧп, нени де эдер кӱӱнеер келбей барат. Слерге бу кӱчтерди ӧдӧргӧ не болужар? Иегованы сӱӱп турганаар болужар. Бу кылык-јаҥ сӱреен керектӱ.

¹⁸ Иегованы сӱӱп турганаар — слердиҥ кылык-јаҥдараардыҥ эҥ јакшызы. (Укаа сӧстӧр 3:3—6 кычырыгар.) Иегова Кудайды тыҥ сӱӱгенеер јӱрӱмеерде болуп турган кӱчтерди ӧдӧргӧ болужар. Бис Агару Бичиктеҥ Иегованыҥ чындык сӱӱжин кӧрӱп јадыс. Бу дегежин Иегова бойыныҥ улузына тыҥ карузып, олорды качан да артыргыспазы́н кӧргӱзет (Сар. 100:5). Кудай слерди бойына тӱҥей јайаган болордо, андый сӱӱшти кӧргӱзерге слер нени эдереер? (Баш. 1:26).

19. Иегованыҥ сӱӱжи учун быйаныгарды кӧргӱзерге нени эдереер? (Галаттарга 2:20).

¹⁹ Озо ло баштап быйанду болорго ӱренигер (1 Фес. 5:18). Кажы ла кӱн бойыгардаҥ сурап туругар: «Бӱгӱн Иегова мени сӱӱп турганын канайып кӧргӱсти?» Оноҥ мӱргӱӱлеерде Иегованыҥ кандый бир болужы учун быйанаарды айдыгар. Апостол Павелдеҥ тем алып, Кудайдыҥ эдип турган керектеринеҥ оныҥ слерге сӱӱжин кӧрӱп туругар. (Галаттарга 2:20 кычырыгар.) Бойоордоҥ сурагар: «А мен Иеговага сӱӱжимди кӧргӱзерге кӱӱнзейдим бе?» Иегованы сӱӱп турганаар слерге кандый ла ченелтелерди ле истежӱлерди ӧдӧргӧ болужар. Анайда ок слерди кӧгӱс графигердеҥ тудунарга  ла теҥеридеги Адагарга сӱӱжигерди кажы ла кӱн кӧргӱзерге кӱӱнзедер.

20. Јӱрӱмисти Иеговага учурлаарга нени эдер керек, нениҥ учун?

²⁰ Иегованы тыҥ сӱӱгенеер јӱрӱмеерди Кудайга учурлаарга кӱӱнзедер. Иеговага учурланганаар — јажын-чакка оныйы болотон арга ачат. Учурланыш кижиниҥ јӱрӱминде бир ле катап болот. Оныҥ учун слерде кандый да кӱчтер болзо, оныҥ ийдези јылыйбас. Иеговага учурланары јаан учурлу алтам деп оҥдоп јадыс. Је бир немени ундыбас керек: биске јӱрӱмисте кӧп алтамдар эдерге келижер. Је ол алтамдар кандый да јакшы болзо, Иеговага учурланган алтам эҥ јакшызы болот (Сар. 50:14). Сатана слерди Иеговага чындык артпазын деп, Иеговага сӱӱжигерди соодорго албаданар. Је слер бир де јеҥдиртпегер! (Иов 27:5). Иегованы тыҥ сӱӱзеер, учурланганаар аайынча јӱререер ле Иеговага оноҥ јуук болороор.

21. Нениҥ учун сууга чӧҥӱрилери христиан јолдыҥ учы эмес, је јӱк ле башталганы?

²¹ Слер Иеговага Кудайга учурланган кийнинде јуунныҥ аксагалдарына сууга чӧҥӱрилерге турганаарды айдып салыгар. Ундыбагар, сууга чӧҥӱрилери — учы эмес, је христиан јолдыҥ јӱк ле башталганы. Чӧҥӱрилген кийнинде Иеговага јажын-чакка иштейтен јол ачылат. Оныҥ учун теҥеридеги Адагарга сӱӱжигерди тыҥыдыгар. Иегованы кӱннеҥ-кӱнге оноҥ тыҥ сӱӱрге болужатан амадулар тургузыгар. Бу слерди чӧҥӱрилерге кӱӱнзедер. Сууга чӧҥӱрилген кӱн эҥ ле сӱӱнчилӱ кӱн болор. Айдарда, Иегова ла Иисуска слердиҥ сӱӱжеер јажын-чакка тыҥызын!