1. Бистиҥ туштажуларга баштапкы катап келген улусты не кайкадат? (Јурукты кӧрӱгер.)

 БАШТАПКЫ катап Иегованыҥ Керечилериниҥ Каандыгыныҥ Туразына келген эш-нӧкӧрлӧрди сананып ийзеер де. Олорды ака-эјелер јылу уткып, олорго сӱӱжин кӧргӱскен. Мыны кӧрӱп, олор сӱреен кайкаган. Јанып барадала, ӱйи ӧбӧӧнине айтты: «Иегованыҥ Керечилери улустаҥ чек башка эмтир. Меге мында тыҥ јарады!»

2. Нениҥ учун кезик улус Иегованаҥ туура јӱре берген?

² Кудайдыҥ албатызыныҥ сӱӱжи коркышту кайкамчылу неме. Андый да болзо, Иегованыҥ Керечилери толо кеминде эмес улус (1 Иоанн 1:8). Оныҥ учун ака-эјелерле канча ла кире јӱк таныжып келзеес, олордыҥ ончо ло кире кӧп уйан јандарын кӧрӱп јадыс (Рим. 3:23). Је кезик улустыҥ, ака-эјелердиҥ јастыраларын ӧткӱрип болбой турганынаҥ улам, Иегованаҥ туура јӱре бергени коркышту ачынчылу болот.

3. Христостыҥ чындык ӱренчиктери незиле аҥыланат? (Иоанн 13:34, 35).

³ Бу јӧрмӧлдиҥ тӧс ӱлгерин ойто катап кӧрӱп ийектер. (Иоанн 13:34, 35 кычырыгар.) Христостыҥ чындык ӱренчиктери незиле аҥыланып турган? Толо кеминде болгоныла эмес, је бой-бойын чыннаҥ сӱӱп турганыла аҥыланат. Иисус мынайып айтпаган не: «Слер мениҥ ӱренчиктерим деп, ончогор танып ийер[еер]». Карын ол айткан: «Слерди мениҥ ӱренчиктерим деп, ончолоры танып ийер». Мынайып Иисус, христиан јуунга кирбей де турган улус Иисустыҥ чындык ӱренчиктерин, олордыҥ ортозында сӱӱш болгонынаҥ танып ийер деп кӧргӱскен.

4. Кезик улус чындык христиандар керегинде нени билип аларга јат?

⁴ Иеговага бӱтпей турган улус сураардаҥ айабас: «Нениҥ учун Иисустыҥ чындык ӱренчиктерин сӱӱш ажыра  танып ийерге јараар? Иисус апостолдорына сӱӱжин канайып кӧргӱскен? Анайда ок бис Иисустаҥ кандый тем аларыс?» Иегованыҥ Керечилерине де бу сурактарды сананза, јакшы болор. Бу биске ака-эјелерди оноҥ тыҥ сӱӱрге болужар, анчада ла бис олордыҥ јастыраларын кӧрӱп турзаас (Эф. 5:2).

5. Иисустыҥ Иоанн 15:12, 13-те айдылган сӧстӧрин јартап беригер.

⁵ Иисус оныҥ ӱренчиктери аҥылу сӱӱшле танылар деп јарт кӧргӱскен. (Иоанн 15:12, 13 кычырыгар, ЈТ.) Иисус мынайып айткан: «Мен слерди канайып сӱӱп тургамдый, слер де бой-бойыгарды анайып сӱӱгер». Мынайып ол нени айдарга сананган? Ол ӱренчиктерине бой-бойын кысканбас сӱӱшле сӱӱзин деп јакарган. Андый сӱӱш ака-эјелер учун јӱрӱмисти де берерге белен болорго кӱӱнзедер b.

6. Агару Бичик бой-бойыстыҥ ортобыста сӱӱш болор учурлу деп канайып кӧргӱзет?

⁶ Кудайдыҥ Сӧзинде сӱӱшке сӱреен јаан ајару эдилет. Кӧп улус мындый ӱлгерлерди јакшы билер: «Кудай — ол сӱӱш» (1 Иоанн 4:8); «Бойыҥды сӱӱгеҥдий, јуугыҥды сӱӱп јӱр» (Матф. 22:39); «Сӱӱш кӧп кинчектерди таштаттырып јат» (1 Пётр 4:8); «Сӱӱш качан да тӱгенбейт» (1 Кор. 13:8). Агару Бичиктиҥ бу да, ӧскӧ дӧ ӱлгерлери сӱӱшти ӧскӱрип, оны керектерле кӧргӱзер керек деп јарт кӧргӱзип јат.

7. Нениҥ учун Сатана улусты качан да чын сӱӱшле бириктирип болбос?

⁷ Кӧп улус кандый кудай јаҥ чындык деп билбей турган. Олор кайкап јат: «Кажы ла јаҥ: „Чындык бисте“ — деп  айдыжат. Је олордыҥ кажызы ла Кудай керегинде башка эдип ӱредет». Сатана улусты булгаарга, коркышту кӧп тӧгӱн кудай јаҥ тӧзӧгӧн. Је ол чын сӱӱжиле аҥыланып турган телекейлик карындаштык качан да тӧзӧп болбос. Мыны јӱк ле Иегова Кудай эдип ийер аргалу. Нениҥ учун дезе јӱк ле Иегова — чын сӱӱштиҥ тӧзӧӧчизи болот. Јӱк ле Иегованыҥ агару тынын ла оныҥ алкыжын алып турган албаты бой-бойын чыннаҥ ла сӱӱр аргалу (1 Иоанн 4:7). Оныҥ да учун Иисус оныҥ чындык ӱренчиктери сӱӱшле аҥыланар деп айткан.

8, 9. Иегованыҥ Керечилериниҥ сӱӱжин кӧрӱп ийеле, кезик улус нени оҥдоп ийген?

⁸ Христостыҥ судурлаганыла, улус бистиҥ чын сӱӱжисти кӧрӱп, бисти чындык христиандар деп танып јат. И́ен аканыҥ учуралын кӧрӱп ийектер. Ол баштапкы катап курултайда болгонын эске алат. Бу курултай дезе оныҥ айылыныҥ јанында, стадиондо ӧткӧн. Курултайдаҥ озо бу ака ол ло стадиондо спортивный ойын кӧргӧн. Ака мындый сӧстӧр айдат: «Иегованыҥ Керечилериниҥ курултайы ла спротчылардыҥ ойыны чек эки башка неме болгон. Иегованыҥ Керечилери дезе ару-чек, јалакай, бой-бойына ајарыҥкай, балдары да сӧсуккур. Је эҥ ле тыҥ јараган немези дезе, олордыҥ кемизи де јӱрӱмге комыдабай, карын јӱрӱмле јакшызынып јӱрген. А меге мындый неме чек ле јетпей турган болгон. Курултайдыҥ программазынаҥ бажымда не де артпаган да болзо, је Керечилердиҥ јакшы кылык-јаҥы санаамга артып калган» c. Мында кайкамчылу неме јок, нениҥ учун дезе, бис бой-бойысты акту јӱрегистеҥ сӱӱйдис. Ака-эјелерди сӱӱп турганыстаҥ улам бис бой-бойыска јалакай ла тоомјылу баштанып турганыс.

⁹ Бого тӱҥей сезимдер Джон акада туштажуларга јӱрӱп баштаарда болгон. Ол куучындайт: «Керечилер андый ачык-јарык болгонына мен тыҥ кайкагам. Олор меге чек ле агару улус деп билдирген. Олордыҥ акту јӱрегинеҥ сӱӱжин кӧрӱп, мен чын кудай јаҥ тапкам деп оҥдоп ийгем» d. Андый учуралдардаҥ Иегованыҥ Керечилери — чындык христиандар деп јарт кӧрӱнип јат.

10. Кандый айалгада христиан сӱӱшти кӧргӱзетен арга болот? (Сносканы база кӧрӱгер.)

¹⁰ Јӧрмӧлдиҥ бажында айдылганыла болзо, бистиҥ ака-эјелер толо кеминде эмес. Оныҥ учун олор кезикте бисти кандый бир айткан сӧстӧриле, эткен керектериле ачындырып јат (Иак. 3:2) e. Је мындый айалгада сӱӱжисти олорго сӧстӧрисле, керектерисле кӧргӱзетен арга болот. Мындый учуралда Иисустаҥ кандый тем аларыс? (Иоанн 13:15).

11. Иаков ло Иоанн апостолдордо кандый јаман кылык-јаҥ болгон? (Јурукты кӧрӱгер.)

¹¹ Иисус ӱренчиктеринеҥ олор качан да јастырбас деп сакыбаган. Карын ол олорго Иеговага јараарга, јастыраларын тӱзедерге болушкан. Бир катап Иаков ло Иоанн апостолдор Иисуска бойыныҥ энезин ийип, теҥеридеги Каандыкта Иисустыҥ јанында отуратан  јерлер сураган (Матф. 20:20, 21). Олордыҥ мындый сурагынаҥ бийиркек кӧрӱм-санаазы кӧрӱне берген (Укаа 16:18).

12. Јаман кылык-јаҥ јӱк ле Иаков ло Иоаннда болгон эмес деп недеҥ кӧрӱнет? Јартап беригер.

¹² Ол айалгада јӱк ле Иаков ло Иоанныҥ јаман кылыгы кӧрӱнип келген эмес. Ӧскӧ апостолдор канайткан эди? «Арткан он ӱренчик мыны угала, бу эки карындашка чугулданды» (Матф. 20:24). Олор Иаков ло Иоаннга кандый кезем сӧстӧр айткан болор деп сананып ийзеер де: «Теҥеридеги Каандыкта тӧриндеги јерлерди сураарга слер кем андый? Бойоорды кем деп бодоп турганаар? Иисусла кожо јӱк ле слер кӧп иштенип турганаар ба? Каандыктыҥ тӧриндеги јерлерине отуратан јаҥ бисте де бар!» Чынынча апостолдор нени айткан деп бис билбезис, је ол айалгада олор сӱӱжин кичееп болбогон деп кӧрӱнип јат.

13. Иисус бойыныҥ апостолдорыныҥ јастыраларына кандый кӧрӱмдӱ болгон? (Матфей 20:25—28).

¹³ Бу мындый учуралда Иисус бойын канайып тудунган? Ол олорго ачынып, мен бой-бойын сӱӱп турган, слердеҥ јобош апостолдор таап аларым деп айтпаган. Карын ол ачык јӱректӱ бу эр улуска јастыразын оҥдоорго ло тӱзединерге болушкан. (Матфей 20:25—28 кычырыгар.) Бу мындый учурал мынаҥ да озо, мыныҥ да кийнинде болгон болзо,  Иисус бу улусты јаантайын сӱӱген (Марк 9:34; Лука 22:24).

14. Иисустыҥ апостолдоры кандый айалгада чыдаган?

¹⁴ Иисус ӱренчиктериниҥ кандый улустыҥ ортозында чыдаганын јакшы билген (Иоанн 2:24, 25). Олордыҥ культуразыла болзо, јасактыҥ ӱредӱчилери ле фарисейлер јарлу, јамылу улус болуп, тоомјыда јӱрерге кӱӱнзеп туратан (Матф. 23:6; 2010 јылдыҥ кандык айыныҥ 1-кы кӱниниҥ «Каруулчы шибеезинде» «Иисус и его ученики проповедовали в синагогах» деген јӧрмӧлиле тӱҥдештирип кӧрӱгер). Бу улус бойлорын улустаҥ бийик тудунып, јӱк ле бойлорын кудайзак улус деп сананган (Лука 18:9—12) f. Бу ӱзе неме апостолдордыҥ кӧрӱм-санаазына каршузын јетирген деп, Иисус оҥдоп туратан (Укаа 19:11). Оныҥ учун Иисус апостолдордыҥ јастыраларына качан да кыртыштанбаган, олор качан да јастырбас деп бир де сакыбаган. Карын олорго улустаҥ бийиркенип турган кылык-јаҥыла тартыжып, сӱӱшке ӱренерге болушкан. Иисус апостолдорды јӱреги јымжак, јобош улус деп билген.

15. Иаков ло Иоанныҥ учуралы бисти неге ӱредет?

¹⁵ Иаков ло Иоаннла болгон учурал бисти кӧп немеге ӱредет. Эйе, бу эки апостолдыҥ тӧрдӧ јерлерди сураганы јастыра болгон. Је ол учуралда арткан да апостолдор јастырган, олор бирлигин кичееп болбогон. Андый да болзо, Иисус бу 12 апостолдордыҥ кажызына ла сӱӱштӱ баштанып, јалакай куучындашкан. Бис мынаҥ неге ӱренедис? Ака-эјелердиҥ нени эдип ийгенине эмес, је олордыҥ эткенине бистиҥ кӧрӱмис кандый деп, ајаруга алар керек. Чын кӧрӱмдӱ болорго биске не болужар? Бисти кем-кем ачындырып ийген болзо, бойыска мындый сурактар берерге јараар: «Нениҥ учун мен андый тыҥ ачынгам? Менде тӱзединетен јаман кылык-јаҥ бар болор бо? Мени ачындырган кижиде бойында кӱчтер болуп турган болор бо? Мениҥ ачынарым јолду да болзо, мен ака-эјениҥ јаманын таштап, ого сӱӱштӱ баштанар аргалу ба?» Ака-эјелерге сӱӱштӱ баштанып турзаас, бис чыннаҥ ла Иисустыҥ ӱренчиктери деп кӧргӱзип јадыс.

16. Иисустыҥ теми бисти база неге ӱредет?

¹⁶ Иисустыҥ теми ака-эјелерди оҥдоорго болужат (Укаа 20:5). Је Иисус улустыҥ јӱрегинде не барын кӧрӱп ийет, а бис кӧрӱп болбозыс. Андый да болзо, бисти ачындырган ака-эјелердиҥ јастыразын бис ӧткӱрип турар аргалу (Эф. 4:1, 2; 1 Пётр 3:8). Бис ака-эјелерле јууктада таныжып алзаас, олордыҥ јастыраларын ӧткӱрерге јеҥил болор. Бир тем кӧрӱп ийектер.

17. Бир аймак кӧрӧӧчи бир акала јууктада таныжып алганынаҥ кандый туза болды?

¹⁷ Кӱнчыгыш Африкада бир аймак кӧрӧӧчиле мындый учурал болгон. Ого бир аканыҥ кылыгы коркышту кӱч деп билдирген. Бу аксагал куучындайт: «Мен ол аканаҥ качпай, карын оныла јууктада таныжып аларга албадангам».  Мынайып аймак кӧрӧӧчи, аканыҥ кылык-јаҥы недеҥ улам мындый кӱч болгонын оҥдоп ийген. Аксагал оноҥ ары куучындайт: «Бу ака кандый айалгада чыдаганын, јаш тужын эжин угала, ол карын да тыҥ солынып калган эмтир деп оҥдоп ийгем. Ого мынайып солынарга коркышту кӱч болгон болор. Оныҥ учун мен оныла оморкоп баштагам. Эмди бис јакшы најылар болуп калганыс». Айдарда, ака-эјелерди оҥдоорго албаданып турзаас, биске олорды сӱӱрге јеҥил болор.

18. Бисти кем-кем ачындырган болзо, бойыска кандый сурактар берер керек? (Укаа сӧстӧр 26:20).

¹⁸ Кезикте, бисти ачындырган акала эмезе эјеле куучындажып ийер керек деп билдирет. Је куучындажардаҥ озо бойыстаҥ сурап ийер керек: «Мен айалганы јакшы оҥдоп тургам ба? [Укаа 18:13]. Кижи мени ачындырарга сананбаган болор бо? [Эккл. 7:20]. Мен бойым анайып ла јастырган болорым ба? [Эккл. 7:21, 22]. Кижиле куучындажып ийеле, айалганы оноҥ кӱч эдип ийбезим бе?» (Укаа сӧстӧр 26:20 кычырыгар.) Бу сурактарды шӱӱп сананала, сӱӱжистеҥ улам ака-эјениҥ јастыразына ајару этпезе торт болор деп кӧрӱп ийер болорыс.

19. Слер нени эдерге шӱӱп алдаар?

¹⁹ Иегованыҥ Керечилери бой-бойын сӱӱп турганыла, Христостыҥ чындык ӱренчиктери деп керелеп јат. Бистиҥ кажыбыс ла Христостыҥ јолыла барып јатканысты канайып кӧргӱзерис? Ака-эјелер толо кеминде эмес те болзо, бис олорды акту јӱректеҥ сӱӱп турганысла кӧргӱзерис. Ол тушта улус бистиҥ чын сӱӱжисти кӧрӱп, чындык кудай-јаҥ кайдазын билип ийеле, бисле кожо сӱӱштӱ Иегова Кудайыска бажырып баштаар болор. Айдарда, чындык христиандардыҥ сӱӱжин јаантайын кӧргӱзип турактар.