1. Иегованыҥ ишчилериниҥ кезигинде кандый санаалар болуп јат?

 ИЕГОВА бойыныҥ чындык ишчилерин сӱреен баалап турган деп, бир де алаҥзыбай јадыс. Агару Бичикте айдылганыла, «Иегова бойыныҥ албатызын кӧрӱп сӱӱнет» (Сар. 149:4). Андый да болзо, кем-кем Иегова мени сӱӱбей турган деп айдардаҥ айабас. Мындый санаалар јебрен ӧйдӧ Кудайдыҥ чындык ишчилеринде де болгон (1 Сам. 1:6—10; Иов 29:2, 4; Сар. 51:11).

2. Иегованыҥ јарадузын аларга нени эдер керек?

² Агару Бичиктеҥ толо кемдӱ эмес улус Иегованыҥ јарадузын алар аргалу деп јарт кӧрӱнет. Је Кудайдыҥ јарадузын аларга нени эдер керек? Иисус Христоско бӱдер керек ле сууга чӧҥӱрилер керек (Иоанн 3:16). Слер бу алтамдарды эткенеерле кинчектереерди алынганаарды ла оныҥ табын бӱдӱрерге белен болгоноорды кӧргӱскенеер (Ап. ижи 2:38; 3:19). Иегова андый керектереерди кӧрӱп, сӱреен тыҥ сӱӱнип јат. Анайда ок слер учурланганаар аайынча јӱрӱп турзаар, ол слерди баалап, бойыныҥ јуук најылары деп кӧрӧт (Сар. 25:14).

3. Бу јӧрмӧлдӧ кандый ӱч сурак шӱӱжилер?

³ Нениҥ учун кезик улус бойлорын Иегованыҥ сӱӱжине турбас улус деп бодойт? Иегова бисти сӱӱп турганын канайып кӧргӱзет? Иегованыҥ сӱӱжине алаҥзыбаска биске не болужар?

КЕЗИК УЛУС ИЕГОВАНЫҤ СӰӰЖИНЕ НЕНИҤ УЧУН АЛАҤЗЫЙТ?

4, 5. Бойын уйан кӧрӱп турган улуска не болужар?

⁴ Бистиҥ кезигис јаштаҥ ла ала бойысты уйан улус деп сананып јат (Сар. 88:15). Темдектезе, Адриа́н деп ака мынайып куучындаган: «Мен бойымды јаштаҥ ла ала неге де турбас кижи, менеҥ кандый да туза јок деп сананып туратам.  Кичинек тужымда, јууктарым райда јатсын деп мӱргӱп туратам. А мендий кижини Кудай кайтсын деп санангам». Анайда ок ада-энези Иегованыҥ Керечилери эмес То́ни деп ака мынайда айткан: «Мен ада-энемниҥ сӱӱжин качан да кӧрбӧгӧм. Олор мени мактабай да туратан. Нени де этсем олорго башказы јок болгон».

⁵ Бис бойысты неге де турбас кижи деп кӧрӱп турган болзоос, Иегова анайып сананбай турганын ундыбас керек. Нениҥ учун дезе Агару Бичикте айдылганыла, Иегова бойы бисти јууктадып алган (Иоанн 6:44). Бис бойыстыҥ јакшы јандарысты кӧрбӧй турган болорыс. Је Иегова јӱрегисти кӧрӱп јат (1 Сам. 16:7; 2 Лет. 6:30). Кудайыс бисти сӱӱп турарда, бис оныҥ сӱӱжине не алаҥзыырыс (1 Иоанн 3:19, 20).

6. Апостол Павел чындыктаҥ озо эткен јастыраларын сананып, нени сескен?

⁶ Кезик улус бойлорын чындыктаҥ озо эткен јаман керектери учун јинип јат (1 Пётр 4:3). Керек дезе чындык та христиандарга кинчектӱ кӱӱниле тартыжарга келижет. А слер керегинде нени айдарга јараар? Иегова слердиҥ кинчегерди таштабаган деп санаалар болот по? Эйе болзо, андый санаалар Иегованыҥ чындык ишчилеринде де болуп турганы слерди токунадар аргалу. Темдектезе, апостол Павел јастыраларынаҥ улам бойын јинип туратан (Рим. 7:24). Је ол кинчегин алынып, сууга чӧҥӱрилген. Андый да болзо, ол бойын уйан кижи деп кӧрӱп, мен «ончо апостолдордыҥ јабызы» деп айткан (1 Кор. 15:9; 1 Тим. 1:15).

7. Кинчек эдип салган болзоос, нени ундыбас керек?

⁷ Бистиҥ теҥеридеги Адабыс кинчектеристи акту јӱректеҥ алынып турзаас, јаманысты таштап саларга сӧзин берген (Сар. 86:5). Айдарда, бис Кудай нени айткан оны эдер деп бӱдер аргалу (Кол. 2:13).

8, 9. Иеговага ас иштеп турганыс деп санаадаҥ канайып айрыларыс?

⁸ Бистиҥ ончобыс Иеговага кӧп иштеерге кӱӱнзеп јат. Је кезикте бистиҥ кезигис Иеговага ас иштеп турган ла оныҥ јарадузын качан да албас деп сананат. Темдектезе, Ама́нда деп сыйын мынайда куучындаган: «Иеговага эҥ артыгын берерге, меге ого јаантайын ла кӧп иштеер керек деп сананып туратам. Мынаҥ улам качан да јединип болбос амадулар тургузып, бойымнаҥ ӧйинеҥ ӧткӱре кӧпти сакыгам. Оныҥ учун не-не келишпей калза, бойымнаҥ чӧкӧй беретем. Иегова да менеҥ чӧкӧп калган деп билдиретен».

⁹ Иеговага ас иштеп турганыс деп санаадаҥ айрыларга нени эдер керек? Ундыбагар, Иегова бистеҥ эдип болбос неме некебей јат. Ол ӧткӱре кату эмес. Кудай бистиҥ канча кире аргабыс бар, ончо кире эдип турганысты кӧрӱп, сӱӱнет. База бир ундыбайтан неме: Иеговага бастыра ийде-кӱчинеҥ иштеген улустыҥ темдерин шӱӱп сананары. Темдектезе, Павел. Ол Кудайга акту кӱӱнинеҥ бастыра ийде-кӱчин берип иштеген. Анайып, канча муҥ километр ӧткӧн, кӧп-кӧп јуундар тӧзӧгӧн. Је кезикте айалгалар солынганынаҥ улам, Павел кӧп јарлап болбой туратан. Мынаҥ улам Павелди Кудайдаҥ јараду албай барган деп айдарыс па? Јок. Нениҥ учун дезе ол Кудайга канча кире аргазы бар ончо ло кире иштеген, а Кудай дезе ого алкыжын берген (Ап. ижи 28:30, 31). Андый ла неме бисте де болуп јат. Кезикте бис Иеговага кӧп иштейдис, је кезикте ас иштеерге келижет. Је Кудай бисти ого кандый кӱӱнисле иштеп турганысты баалап јат. А эмди дезе Иегова биске сӱӱжин  канайып кӧргӱзип турганын кӧрӱп ийектер.

ИЕГОВА БИСКЕ СӰӰЖИН КАНАЙЫП КӦРГӰЗЕТ?

10. Иегованыҥ бисти баалап турганын бис канайып «угар» аргалу? (Иоанн 16:27).

¹⁰ Агару Бичик ажыра. Иеговага бойыныҥ ишчилерине сӱӱжин ле олорды баалап турганын кӧргӱзерге јарап јат. Бу бичикте ол Иисусты «сӱӱген Уулым» деп айткан эки учурал бичилген (Матф. 3:17; 17:5). Слер Иегованаҥ мындый јылу сӧстӧр угарга кӱӱнзейдеер бе? Бӱгӱн бис Иегованы бойын угуп болбозыс, је бис оны Агару Бичиктеҥ угар аргалу. Иисустыҥ сӧстӧрин кычырып турзаас, Иегова бисти баалап турган деп кӧрӧдис. (Иоанн 16:27 кычырыгар.) Иисус Адазына сӱреен јуук болгон, оныҥ учун Адазы канайып эдер эди, Иисус анайып ла эдет. Иисустыҥ ӱренчиктери јастырып туратан, је андый да болзо, олор Иеговага чындык иштеген. Иисус олорды мактап, олорго карузып туратан. Бис Иисустыҥ бойыныҥ ӱренчиктерине айткан сӧстӧрин кычырып турзаас, бу Иегованыҥ меге айткан сӧстӧри деп сананар аргалу (Иоанн 15:9, 15).

11. Кӱч ӧйлӧрдӧ Иегова мени таштап ийген деп нениҥ учун сананбас керек? (Иаков 1:12).

¹¹ Болуш јок артыргыспай јат. Иегова бисти болуш јогынаҥ качан да артыргыспай јат. Ол биске јӱрӱмиске керектӱ не-немелерди јаантайын берет. Је ол бисти бастыра кӱчтердеҥ корулабай јат. Оныҥ учун бис Иов чылап, кандый бир тӱбекке тӱжердеҥ айабазыс (Иов 1:8—11). Бисте ченелтелер болуп турза, Иегова бисти таштап ийген деп сананбас керек. Карын андый ӧйдӧ бисте ого сӱӱжисти ле ого иженип турганысты кӧргӱзетен арга болот. (Иаков 1:12, JT кычырыгар.) Анайда ок Иегованы бис ӧскӧ јанынаҥ кӧрӱп ийер болорыс. Ол ченелтени учына јетире ӧдӧргӧ болужып турган сӱӱштӱ, јалакай Ада деп билип аларыс.

12. Дмитрий аканыҥ учуралы слерди неге ӱредет?

¹² Дмитрий аканыҥ учуралын кӧрӱп ийектер. Бир катап ол иш јок артып калала, узак ӧйгӧ ойто иш таппай турды. Мындый айалга болуп каларда, ол Иеговага бӱткӱлинче иженип турганын кӧргӱзерге, ого кӧптӧдӧ иштеер деп сананган. Је канча айлар ӧдӧ дӧ берерде,  ол ишти анай ла таап болбой турды. Мыныҥ ӱстине ол јаан ооруга табартала, орынынаҥ чек туруп болбой барган. Анайып турала, ого јаман санаалар келип баштаган. Ол бойын јаман ада деп сезип, билезине оноҥ кандый да туза јок деп сананган. Анайда ок Иегова оны база сӱӱбей турган деп бодогон. Је бир катап эҥирде, оныҥ кыбына кызычагы кирип келеле, чаазын берген. Ол чаазында Исайя 30:15 бичилген болгон: «Токуналу артып, меге иженигер, ол тушта ийде-кӱчтӱ болорыгар». Ол бу чаазынды орынга салып койоло, айткан: «Ада, сеге кунукчылду болуп турза, бу сӧстӧрди эске алынып тур». Ол тушта Дмитрий оҥдогон, Иегова оныҥ билезин кичееп турган деп. Олордо курсак-тамак, кийим-тудум, јадатан јер ӱзе болгон. А ого бойыныҥ јанынаҥ јӱк ле токуналу артып, ого иженер керек болгон. Слер мындый айалгада болуп калган болзоор, Иеговага бӱткӱлинче иженигер. Ол тушта ол слерге болужып, ийде-кӱч берер.

13. Иегова биске сӱӱжин кем ажыра кӧргӱзер аргалу ла канайып?

¹³ Ака-эјелер ажыра. Иегова бисти сӱӱп ле баалап турганын ака-эјелер ажыра кӧргӱзип јат. Темдектезе, Иегова олорды биске јылу сӧстӧр айдып ийзин деп кӱӱнзедип ийер аргалу. Андый учурал Азияда јадып турган бир эједе болгон. Бистиҥ эје ижин јылыйткан, оноҥ јаан ооруга табарткан. Кийнинде оныҥ ӧбӧӧни уур кинчек эдип ийеле, аксагал болбой барган. Эје куучындайт: «Мен нени јастыра эткем, нениҥ учун мениле андый јаман немелер болуп турган? Иегова мени алкабай барган ба деп санангам». Оныҥ учун эје Иегова ого сӱӱжин кӧргӱзип берзин деп, јайнап болуш сураган. Эје оноҥ ары куучындайт: «Јаан удабай меге аксагалдар келген. Олор мени токунадып, Иегова мени сӱӱп ле баалап турган деп кӧргӱзип берген». Бир эмеш ӧйдӧҥ эје ойто катап Иегованаҥ болуш сураган. Ол айдат: «Ол ло кӱн меге ака-эјелердеҥ самара келген. Олордыҥ јылу сӧстӧрин кычырып јадала, Иегова мениҥ мӱргӱӱлиме каруузын берген деп оҥдоп турдым». Айдарда, Иегова бисти сӱӱп ле баалап турганын  ака-эјелердиҥ јылу сӧстӧри ажыра кӧргӱзер аргалу (Сар. 10:17).

14. Иегова биске сӱӱжин база канайып кӧргӱзет?

¹⁴ Анайда ок Иегова сӱӱжин кемди-кемди биске јӧп берзин деп кӱӱнзеткениле кӧргӱзет. Темдектезе, Иегова баштапкы чакта апостол Павелди ака-эјелерге 14 самара бичизин деп кӱӱнзеткен. Павел бу самараларда ака-эјелерди мактаган да болзо, је олордыҥ јастыраларын да ачыгынча бичип салган. Нениҥ учун Иегова Павелди мындый јӧптӧр берзин деп кӱӱнзеткен? Нениҥ учун дезе Иегова — јакшы Ада. Ол балдарын сӱӱп јат. Олорды тӱзедерге кӱӱнзейт (Укаа 3:11, 12). Анайып ла биске Агару Бичикке тӧзӧлгӧн јӧп берилзе, ачынардыҥ ордына сӱӱнер керек. Не дезе јӧп ажыра Иегова бисти јаман кӧрӱп турганын эмес, је карын сӱӱп турганын кӧргӱзет (Евр. 12:6). А биске Иегованыҥ сӱӱжине нениҥ учун алаҥзыбас керек?

ИЕГОВАНЫҤ СӰӰЖИНЕ БИС НЕНИҤ УЧУН АЛАҤЗЫБАС АРГАЛУ?

15. Иегова биске агару тынын берип турганыла нени кӧргӱзет?

¹⁵ Иегова баалап турган улузына агару тын берет (Матф. 12:18). Агару тынныҥ болужыла бистер кӧп јакшы кылык-јаҥдарга ӱренип аладыс. Бойыҥнаҥ сурап ий: «Бу кылык-јаҥдардыҥ мен кажызына ӱренип алгам? Темдектезе, чыдамкай болотонын алза, Кудайды ӱренип баштап турарымда, мен кандый болгом? А эмди кандый болуп калгам?» Канча ла кире агару тынныҥ болужыла јакшы кылык-јаҥдарга ӱренип турзаҥ, Иегова сени баалап турган деп, ончо ло кире тыҥ бӱдериҥ. ( «Кудайдыҥ агару тыны кандый кылык-јаҥдарга ӱренип аларга болужат?» деген рамканы кӧрӱгер.)

16. Иегова сӱӱнчилӱ јарды јарлаар ишти кемге берген? Мынаҥ улам слер нени сезедеер? (1 Фессалоникадагыларга 2:4).

¹⁶ Иегова баалап турган улузына сӱӱнчилӱ јар јарлайтан иш берген. (1 Фессалоникадагыларга 2:4, JT кычырыгар.) Бу чын ла андый деп Джо́селин эје бӱдӱмјиленген. Оныҥ учуралын кӧрӱп ийектер. Бир кӱн эртен тура ол јаман кӱӱн-санаалу ойгонып келген. Ол куучындайт: «Менде чек чыдал јок болгон. Менеҥ кандый да туза јок деп сескем. Је мен пионер, јарлаар ишке де барарга куучындажып алгам. Оныҥ учун мӱргӱп  ийеле, јарлаар ишке јазанып баштагам». Ол кӱн эртен тура Джоселин эје Мэри деп атту јалакай ӱй кижиге туштаган. Ол Агару Бичик ӱренерге јӧпсинген. Канча ай ӧткӧн кийнинде Мэри Джоселинге куучындаган: «Слер меге эжиктӧӧн токулдаткан кӱнде мен Кудайдаҥ болуш сурап, мӱргӱп отурган болгом». Ол тушта Джоселинге Кудай ого: «Сен молодец! Мен сени баалап јадым» — деп айткандый билдирген. Бисте јарлаар иште мындый учуралдар јаантайын болбой турган болор. Је бис бу ишке бастыра ийде-кӱчистеҥ туружарга албаданып турзаас, Иегова бисти кӧрӱп, сӱӱнип турган деп алаҥзыбас аргалу.

17. Виктория толынты керегинде шӱӱп сананып турала, нени оҥдогон? (Сарын 5:12).

¹⁷ Иегова сӱӱп турган улузыныҥ кинчектерин толынты тайылгага тӧзӧлӧнип таштап јат (1 Тим. 2:5, 6). Је толынты бистиҥ кинчектеристи бӧктӧп турган деп, бис чӧҥӱрилип те калган болзоос, бӱтпей турган болорыс. Бу учуралда биске бойыстыҥ сезимдериске эмес, је Иеговага бӱдер керек деп ундыбагар. Иегова толынтыга бӱдӱп турган улусты акту деп кӧрӧт лӧ олорды алкаар деп айдат (Сарын 5:12 кычырыгар; Рим. 3:26). Викторияныҥ учуралын кӧрӱп ийектер. Ол толынты тайылга керегинде шӱӱп сананала, мындый неме оҥдогон: «Иегова туку алдынаҥ бери меге сӱӱжин кӧргӱзерге албаданып турган эмтир не... А мен ого мынайып айдып тургандый болгон эмтирим: „Сен мендий кижини канайып сӱӱйтеҥ? Сениҥ Уулыҥныҥ тайылгазы мениҥ кинчектеримди качан да бӧктӧп болбос“». Толынты тайылганы Иегова оны сӱреен тыҥ сӱӱп турганынаҥ улам берген деп, Виктория оҥдоп алган. Айдарда, бис база толынты тайылганыҥ тузазын шӱӱп сананып турзаас, Иегованыҥ сӱӱжин ле биске карузып турганын кӧрӱп ийерис.

18. Теҥеридеги Адабысты сӱӱп турган болзоос, бис неде алаҥзыбас аргалу?

¹⁸ Бис бу јӧрмӧлдӧ берилген јӧптӧрди тузаланарга албаданзаас та, кезикте тӱҥей ле кунугарыс ол эмезе Иегова бисти сӱӱбей турган деп сананар болорыс. Андый неме боло берзе, Иегова слердиҥ оны сӱӱрге албаданып турганаарды тыҥ баалап турган деп ундыбай јӱрӱгер (Иак. 1:12). Оныҥ учун ого јууктаарга албаданып, Иегова слерге сӱӱжин канайып кӧргӱзип турган деп кӧрӱп туругар. Агару Бичикте айдылганыла, Иегова Кудай бистиҥ «кажыбыстаҥ ла ыраак эмес» (Ап. ижи 17:27).