1, 2. Сууга чӧҥӱрилердеҥ озо нени эдер керек?

 КАЛГАНЧЫ беш јылдыҥ туркунына миллионноҥ ажыра улус сууга чӧҥӱрилип, Иегованыҥ Керечилери болуп калган. Олордыҥ кезиги баштапкы чактагы Тимофей чилеп чындыкты јаштаҥ ала билер (2 Тим. 3:14, 15). Кезиги дезе јаанап калала, керек дезе карып калала, чындыкты уккан. Темдектезе, бир ӱй кижи 97 јаштуда сууга чӧҥӱрилген!

² Слер Агару Бичик ӱренип турган болзоор, ол эмезе Иегованыҥ Керечилериниҥ балазы болзогор, чӧҥӱрилерге кӱӱнзеп турганаар ба? Бу сӱреен јакшы амаду! Бу амадуга јединерге, Иеговага учурланар керек. Учурланары ол не дегенин бу јӧрмӧл јартап берер. Анайда ок нениҥ учун кезик улус учурланарга коркып турган ла коркыбаска нени эдер керек деп јартап берер.

УЧУРЛАНАРЫ ОЛ НЕ?

3. Библиялык ӧйлӧрдӧ Иеговага кемдер учурлалып калган болгон?

³ Је учурланары ол не дегени? Агару Бичикте «учурлаганы» деген сӧс «кандый бир агару амадуга нени-нени башкалап саларын» темдектейт. Израиль албаты Иеговага учурлалып калган болгон. Је бу албатыда кезик улусты кандый бир аҥылу иш бӱдӱрзин деп башкалап салатан. Темдектезе, Ааронды. Оныҥ бажындагы тюрбанына учурланып салганыныҥ темдеги — јылтырууш  алтын пластина — тагылган. Бу пластина оны агару амадуга — улу абыс болуп иштеерге — башкалап салганын кӧргӱскен (Лев. 8:9). Назорейлер керегинде база анайып айдарга јараар. «Назорей» деген сӧс нази́р деп еврей сӧстӧҥ келген. Бу сӧс «башкалап; учурлап» салганын кӧргӱзет. Назорейлер дезе Моисейдиҥ јасагында олорго бичилген некелтелер аайынча јӱрер учурлу болгон (Тоол. 6:2—8).

4. а) Иеговага учурланып салзаас, баштапкы јерге нени тургузадыс? б) Бойынаҥ бойы мойнооры дегени нени темдектейт? (Јурукты база кӧрӱгер.)

⁴ Јӱрӱмин Иеговага учурлаган кижи Иисус Христостыҥ ӱренчиги болорго ло Кудайдыҥ кӱӱнин баштапкы јерге тургузарга бек шӱӱп алат. Учурланган кижи нени эдер учурлу? Иисус Христостыҥ айтканыла, «Мениле кожо барайын дегенигер, бойынаҥ бойы мойно[ор]» учурлу (Матф. 16:24). Грек тилдеҥ «бойынаҥ бойы мойно[ор]» учурлу деп кӧчӱрилген сӧстӧрди «бойы бойына јок» деп айдар учурлу деп кӧчӱрерге јараар. Ӧскӧртӧ айтса, андый кижи Иегованыҥ нормаларына келишпей турган не ле немеге јок деп айдар учурлу (2 Кор. 5:14, 15). А бу дезе «кинчектӱ эт-канныҥ керектеринеҥ» (ЈТ), темдектезе, балыр јӱрӱмнеҥ мойноорын темдектейт (Гал. 5:19—21; 1 Кор. 6:18). Бу некелтелерди бӱдӱрерге слерге кӱч болор бо? Слер Иегова Кудайды сӱӱп, оныҥ јасактары слерге ле тузалу болзын деп берилгенине алаҥзыбай турган болзоор, јок, кӱч болбос (Сар. 119:97; Иса. 48:17, 18). Ни́колас деп ака оны мынайда јартайт: «Иегованыҥ нормаларын кижиге јайым бербей турган тӱрмениҥ темир кӧзнӧктӧри деп кӧрӧргӧ јараар эмезе карагулалардаҥ корулап турган темир решётка деп кӧрӧргӧ јараар».

5. а) Иеговага учурланыш канайып болот? б) Учурланыштыҥ ла чӧҥӱрилиштиҥ нези башка? (Јурукты база кӧрӱгер.)

 ⁵ Кижи Иеговага канайып учурланат? Учурланган ӧйдӧ слер Кудайга мӱргӱп, јӱк ле ого бажырарга ла оныҥ табын бӱдӱрерге турганаарды айдынып јадыгар. Бу дезе слер Иегованы «бастыра јӱрегиҥле, бастыра јулаҥла [«бойыҥла», ЈТ], бастыра санааҥла, бастыра кӱчиҥле» сӱӱп јӱререер деп сӧзӧӧрди берип јатканаар болор (Марк 12:30). Учурланып јатсагар, слерди јӱк ле Иегова угуп јат. А чӧҥӱрилзегер, слерди кӧп улус кӧрӧт. Анайып улуска слер Кудайга учурланып салганаарды кӧргӱзедеер. А чӧҥӱрилген кийнинеҥ слердиҥ амаду — берген сӧзигерди бӱдӱрери. Иегова слердеҥ база мыны сакыйт (Эккл. 5:4, 5).

БИСКЕ НЕНИҤ УЧУН ИЕГОВАГА УЧУРЛАНАР КЕРЕК?

6. Кижини Иеговага учурланарга не кӱӱнзедет?

⁶ Кижини Иеговага учурланарга не кӱӱнзедип јат? Озо ло баштап Кудайды сӱӱп турганы кӱӱнзедет. Је андый сӱӱшти ӧскӱрерге, кижи Агару Бичикти шиҥдеп, кӧгӱс сурактарды оҥдоп аларга албаданат (Кол. 1:9). Мынаҥ улам ол: 1) Иегова — чын ла бар Кудай деп, 2) Агару Бичик оныҥ Сӧзи деп ле 3) Кудай бойыныҥ табын организациязы ажыра бӱдӱрип турганына бӱдӱп баштайт.

7. Слер јӱрӱмеерди Иеговага учурлаарга белен деп, недеҥ кӧрӱнер?

⁷ Јӱрӱмин Иеговага учурлаган кижи Агару Бичиктиҥ тӧс ӱредӱлерин билер ле Кудайдыҥ нормаларыла јӱрет. Ол канча кире аргазы бар Кудай керегинде  улуска куучындап турган (Матф. 28:19, 20). Анайда ок оныҥ Иеговага сӱӱжи тыҥып турган ла ол јӱк ле Кудайга иштеерге кӱӱнзейт. Мынайып слер керегинде айдарга јараар ба? Эйе болзо, слер чын јолдо. Андый болзо, слер јӱк ле ада-энегерге, слерле Агару Бичикти ӱренип турган кижиге ол эмезе најылараарга болуп чӧҥӱрилбезеер. Је слер Иегованы тыҥ сӱӱп турганаар учун јӱрӱмеерди ого учурлаараар.

8. Иеговага быйанду болгоноор ого јӱрӱмеерди учурлаарга канайып болужар? (Сарын 116:12—14).

⁸ Слер Иегованыҥ болужын шӱӱп сананып турзаар, бойоорды Иеговага учурлаарга албадабазаар. Андый кӱн бойы ла једип келер. (Сарын 116:12—14 кычырыгар.) Агару Бичикте Иегова «кандый ла толо кемдӱ јакшы сыйлар» берип турган Ада деп айдылып калган (Иак. 1:17, ЈТ). Эҥ ле јаан сыйларыныҥ бирӱзи — оныҥ Уулыныҥ, Иисустыҥ, толынты тайылгазы. Бу сый слерге Иегованыҥ јуук најызы болотон ло јажын-чакка јӱретен арга ачат (1 Иоанн 4:9, 10, 19). Слер Иеговага јӱрӱмеерди учурлазаар, оныҥ бу да, ӧскӧ дӧ сыйлары учун быйанду болгоноорды кӧргӱзереер (Јаҥ. т. 16:17; 2 Кор. 5:15). Бу тема «Јажын-чакка ырысту јӱригер!» деген бичиктиҥ 46-чы урогыныҥ, 4-чи пунктында шӱӱжилет. Ондо «Кудайга бистиҥ сыйларыс» деген ӱч минуттыҥ видеозы бар.

СЛЕР УЧУРЛАНАРГА ЛА ЧӦҤӰРИЛЕРГЕ БЕЛЕН БЕ?

9. Кажы ла кижиниҥ кӧгӱс ӧзӱми башка деп, нениҥ учун ундыбас керек?

⁹ Слер Иеговага јӱрӱмеерди учурлаарга ла сууга чӧҥӱрилерге белен эмезигер деп сананып турган болороор. Нениҥ учун дезе слерге Иегованыҥ нормаларына келижерге та нени де солыыр керек деп сананып јадыгар, ол эмезе слер Иеговага бӱдӱмјигерди база эмеш тыҥыдып аларга кӱӱнзеп турган болороор (Кол. 2:6, 7). Агару Бичикти ӱренип турган улустыҥ кӧгӱс ӧзӱми башка болот. Иегованыҥ Керечилериниҥ балдарыныҥ да кӧгӱс ӧзӱми башка, олор бир ле ӧйдӧ сууга чӧҥӱрилбей јат. Оныҥ учун бойоорды улусла тӱҥдештирбегер. Чике ле слерге бойоорго нени солыыр керек деп оҥдоп аларга албаданыгар (Гал. 6:4, 5).

10. Учурланарга ла чӧҥӱрилерге белен эмес болзоор, слер нени эдер аргалу? ( «Чындыкта чыдап јаткан балдарга» деген рамканы база кӧрӱгер.)

¹⁰ Слер эм тура Иеговага јӱрӱмигерди учурлаарга белен эмес те болзогор, амадугарга једерге оноҥ ары албаданыгар. Анайда ок керектӱ солынталар эдерге, Иегованаҥ болуш сурагар (Флп. 2:13; 3:16). Бир де алаҥзыбагар: ол слердиҥ мӱргӱӱлеерди угар ла каруузын берер (1 Иоанн 5:14).

НЕНИҤ УЧУН КЕЗИК УЛУС ТӰРГЕДЕБЕЙ ЈАТ?

11. Иегова биске ого чындык артарга канайып болужат?

¹¹ Кезик улус Иеговага јӱрӱмин учурлабай, сууга чӧҥӱрилбей узак јӱргилейт. Олор мынайып сананып турган болор: «Мен кандый бир јаан кинчек эдип ийзем, мени јууннаҥ чыгарып салза, канайдарым?» Слерде де андый санаалар болуп турган болзо, Иегова слерге «оныҥ кӱӱнин бӱдӱрип турар[га] болужар» деп, бир де алаҥзыбагар (Кол. 1:10, ЈТ). Анайда ок кинчек этпеске, Иегова слерге ийде-кӱч берер. Ака-эјелердиҥ јӱрӱмин кӧрзӧӧс, Иеговага бӱдерге  јараар деп кӧрӧдис (1 Кор. 10:13). Христиан јууннаҥ чыгарылып турган улустыҥ тоозы чек ас. Айдарда, Иегова бойыныҥ улузына ого чындык артарга болужып турган деп, јарт кӧрӱп јадыс.

12. Јаан кинчектер этпеске слерге не болужар?

¹² Толо кемдӱ эмес улустыҥ ончозында ченелтелер болуп јат. (Иак. 1:14). Је ченелтеге киретен бе, јок по — слердеҥ бойоордоҥ камаанду. Учы-учында нени эдетенин, канай јӱретенин слер бойоор кӧрӧдӧӧр. Кезик улус мыныла јӧпсинбей јат. Је слер бойоордыҥ јастыра кӱӱнеерди колго тударга ӱренип алар аргалу. Је тудунбай калзагар, чӧкӧбӧгӧр. Слерге кинчек этпеске болужатан бир канча јӧптӧр бар: Иеговага кажы ла кӱн мӱргӱп туругар, анайда ок Агару Бичикти шиҥдейтен график тургузып алала, оны буспагар. Јуунныҥ туштажуларына јӱрӱгер, билип алганаарды улуска куучындап туругар. Ол тушта слерде учурланганаар аайынча јӱрерге ийде-кӱч болор. Бого коштой, Иегова слерге болужар деп, бир де ундыбагар (Гал. 5:16).

13. Иосиф биске кандый тем кӧргӱскен?

¹³ Ченелтелердиҥ ӧйинде нени эдеристи озодоҥ сананып койзоос, учурланганыс аайынча јӱрерге јеҥил болор. Агару Бичикте ченелтеге кирбеген кӧп улустыҥ темдери бар. Темдектезе, Иосифтиҥ учуралы. Потифардыҥ ӱйи оныла канча ла катап сертежерге албаданган, је Иосиф ого јаантайын јок деп айдатан. Агару Бичикте айдылганыла ол: «Кудайдыҥ алдына мындый кинчекти мен канайып эдетем?» (ЈТ) — деп айткан (Баш. 39:8—10). Айдарда, Иосиф мындый айалгада нени эдерин озодоҥ сананып салган болтыр. Оныҥ учун ого ол ӱй кижиниҥ сӧзине кирип, кинчек эдип салбаска јеҥил болгон.

14. Иегованыҥ кӧрӧр кӱӱни јок немеге «јок» деп айдарга канайып ӱренип алар?

¹⁴ Слер Иосифтиҥ теминеҥ неге ӱренер аргалу? Ченелтениҥ ӧйинде нени эдереерди эмди ле сананып алыгар. Иегованыҥ кӧрӧр кӱӱни јок немеге «јок» деп айдып ӱренигер. Анайда ок Иегованы санаагарда да ачындырбагар (Сар. 97:10; 119:165). Анайып, ченелтениҥ ӧйинде нени эдереерди озодоҥ сананып салган болзоор, ченелтеге тӱшпезеер.

15. Кижи Иегованы тыҥ бедиреп турган деп недеҥ кӧрӱнер? (Еврейлерге 11:6).

¹⁵ Је слер чындыкты таап алганаар деп бӱдӱп турганаар ла Иеговага иштеерге  кӱӱнзеп те турган болзоор, тӱҥей ле Кудайга јӱрӱмеерди учурлап, сууга чӧҥӱрилерге коркып турган болороор. Андый болзо, слер Давид кааннаҥ ӱренер аргалу. Давид чилеп Иеговага мынай мӱргӱгер: «О Кудайым, мени ченеп, јӱрегимди билип ал. Мени шиҥдеп, амыр бербей турган санааларымды билип ал. Менде јеткерлӱ јолго ийде салып турган неме јок по деп шиҥдеп, ӱргӱлјиниҥ јолыла апар» (Сар. 139:23, 24). Мындый мӱргӱӱлеердеҥ слер бойоордыҥ амадугарга — Кудайга јӱрӱмигерди учурлап, сууга чӧҥӱрилерге — албаданып турганаар ла Кудайдаҥ болуш сурап турганаар кӧрӱнер. А Иегова «оны тыҥ бедиреген улусты» кайрал јок артыргыспай јат. (Еврейлерге 11:6, ЈТ кычырыгар.)

ИЕГОВАГА ОНОҤ ЛО АРЫ ЈУУКТАГАР

16, 17. Керечилердиҥ балдарын Иегова канайып јууктадат? (Иоанн 6:44).

¹⁶ Иисустыҥ айтканыла болзо, Иегова кижини јууктатпаганча, кижиде Иисустыҥ ӱренчиги болотон аргазы јок. (Иоанн 6:44 кычырыгар.) Бу сӱреен тереҥ шӱӱлтенеҥ слерге кандый туза болуп турганын сананып ийзегер де. Иегова кажы ла кижини, оныҥ јакшы кылык-јаҥдарын кӧрӧлӧ, бойына јууктадып алган. Иегованыҥ кӧзинде ол «сӱреен баалу» ла аҥылу кижи болот (Јаҥ. т. 7:6, сноска). Кудай слерди де сӱреен тыҥ баалап јат.

¹⁷ Јииттерис керегинде нени айдарга јараар? Сен јуундарга бойыҥды адаҥ, энеҥ ле учун јӱредим деп сананып турган болорыҥ. Андый болзо, Агару Бичиктеги: «Кудайга јууктагар, ол слерге јууктаар» — деген сӧстӧрди эске алып ий (Иак. 4:8; 1 Лет. 28:9). Айдарда, сен бойыҥ Кудайга јууктаарга албаданзаҥ, Иегова сеге база јууктаар. Иегова кажы ла кижини, Керечилердиҥ де балдарын, бойына јууктадарга кӱӱнзейт. Оныҥ учун Иаков 4:8-те айдылганыла, Иеговага јууктаар алтам этсеҥ, Кудай да сеге удура алтам эдер. (2 Фессалоникадагыларга 2:13 тӱҥдештиригер.)

18. Келер јӧрмӧлдӧ нени шӱӱжерис? (Сарын 40:8).

¹⁸ Слер јӱрӱмигерди Иеговага учурлап, сууга чӧҥӱрилзеер, Иисустаҥ тем аладыгар. А Иисус дезе Адазыныҥ айткан кажы ла сӧзин кӱӱнзеп бӱдӱрген (Сарын 40:8 кычырыгар; Евр. 10:7). Келер јӧрмӧлдӧ, чӧҥӱрилген кийнинеҥ слерге Иеговага чындык иштеерге не болужарын шӱӱжерис.