1. Иегова бойыныҥ ишчилерине кандый сыйлар эткен?

 БУ ТЕЛЕКЕЙДЕ јӱрӱм там ла кӱч болуп бараткан. Је Иегованыҥ организациязында бис амыр-энчӱ јӱредис. Кудай биске бастыра јердиҥ ӱстинде ака-эјелерисле бирлик јӱрер арга сыйлаган (Сар. 133:1). Бистиҥ билелерис бек болзын деп болужып јат (Эф. 5:33—6:1). Анайда ок Иегова бисти амыр санаалу јӱрзин деп ӱредет.

2. Биске Иеговага иштеерге кезикте нениҥ учун кӱч болот?

² Кезикте биске Иеговага иштеерге јеҥил эмес болот. Бисти ака-эјелердиҥ сӧстӧри эмезе керектери ачындырар болор. Ол эмезе бис бойыстыҥ јастыраларыстаҥ улам, анчада ла бир ле немеге канча катап бӱдӱрилип турган болзоос, кунугып турган болорыс. Је бойыстаҥ да, улустаҥ да чӧкӧбӧс керек. Иеговага оноҥ ло ары иштеер керек: 1) бисти ака эмезе эје ачындырып турза, 2) бис эш-нӧкӧристеҥ чӧкӧп турзаас эмезе 3) бойыстаҥ чӧкӧп турзаас. Агару Бичикте бичилген ӱч кижиниҥ учуралын кӧрӱп ийектер. Олордоҥ бис неге ӱренер аргалу?

СЛЕРДИ АКА ЭМЕЗЕ ЭЈЕ АЧЫНДЫРЫП ТУРЗА, ИЕГОВАГА ОНОҤ ЛО АРЫ ИШТЕГЕР

3. Кудайдыҥ ишчилеринде кандый кӱчтер болот?

³ Кӱчтер. Кезикте бис јуунда кемге-кемге ачынып јадыс. Нениҥ учун дезе олордыҥ сананбай ла айткан сӧстӧрине эмезе керектерине кыртыштана бередис. Эмезе биске олордыҥ кандый бир кылык-јаҥы јарабай калат. Ол эмезе аксагалдардыҥ чыгарган јӧби ичиске кирбей јат. Мынаҥ улам кезик ака-эјелерде: «Кудайдыҥ организациязында мындый неме болот по?» — деп санаа келет. Оныҥ учун олор Кудайга «теҥ-тай» иштеердиҥ ордына, јаражып болбой турган кижинеҥ качып, керек дезе јуунга да јӱрбей барат (Соф. 3:9). Мынай эдери ойгор бо? Агару Бичикте  бого тӱҥей кӱчтерге туштаган бир кижиниҥ теми бар. Оны кӧрӱп ийектер.

4. Апостол Павелде кандый кӱчтер болгон?

⁴ Агару Бичиктеги тем. Качан Павел христиан болуп каларда, јуунныҥ улузы оны кыйа кӧргӧн (Ап. ижи 9:26). Анайда ок кезик улус ол керегинде јаман немелер айдып, коп јайып туратан (2 Кор. 10:10). Бир катап Павел аксагалдыҥ јастыразын јарт кӧрӱп ийген (Гал. 2:11, 12). Бу аксагалдыҥ јастыразынаҥ улам ака-эјелердиҥ бӱдӱмјизи уйадай берердеҥ айабас болгон. Бого коштой Павел кожо иштеген Маркка тыҥ ачынган (Ап. ижи 15:37, 38). Је Павел ака-эјелерди толо кемдӱ эмес улус деп коркышту јакшы аайлаган. Оныҥ учун ол олордоҥ чӧкӧбӧй, карын олордыҥ јакшы јандарын кӧрӱп, Иеговага оноҥ ло ары иштеген. Ого не болушкан?

5. Павелге ака-эјелердеҥ тууралабаска не болушкан? (Колоссыдагыларга 3:13, 14). (Јурукты база кӧрӱгер.)

⁵ Павел ака-эјелерди сӱӱген, оныҥ учун ол олордыҥ јаманын эмес, јакшызын кӧрӧргӧ албаданган. Бу сӱӱш ого Колоссыдагыларга 3:13, 14-тӧ (кычырыгар, ЈТ) бичилген сӧстӧрди тузаланарга болушкан. Павел ака-эјелерди бой-бойыныҥ јаманын таштап турзын деп ӱреткен. Бу ла јӧпти ол бойы да Маркла болгон учуралда тузаланган. Павелдиҥ баштапкы миссионер јорыгында оны Марк артыргызала јӱре берген, је Павел ачынып калган јӱрбеген. Мыны бис кайдаҥ билерис? Кийнинде, Павел Колоссыдагы јуунга јылу сӧстӧрлӱ самара бичиген. Анда ол Маркты болужы учун мактап, оны сӱреен баалу ишчи деген (Кол. 4:10, 11). А кийнинде Павел Римде болордо, ол ло Маркты келип барзын деп сураган (2 Тим. 4:11). Айдарда, Павел ака-эјелердиҥ јаманын таштап туратан ла олордоҥ тууралабаган деп кӧрӧдис. Бис мынаҥ неге ӱренедис?

6, 7. Оҥдошпостор до болуп турза, ака-эјелерди сӱӱрге не болужар? (Еврейлерге 13:1).

⁶ Неге ӱренедис? Иегова бисти јуундагы ака-эјелеристи сӱӱп турзын деп кӱӱнзейт. (Еврейлерге 13:1, JK 2003 кычырыгар.) Је кезикте кем-кем биске эби јок сӧстӧр айдып ийзе, бис ачынып каладыс (Укаа 12:18). Мындый учуралда Иегованаҥ тем алар керек. Ол чындык ишчилеринеҥ, олор јастырып та ийзе, тууралабай јат. Оныҥ учун ака-эјелерис јакшыны эдерге албаданып та турза, кезикте јастырып ийет деп ундыбас керек. Агару Бичик Кудайды: «Ол...чактарга чугулданбас» — деп айдат (Сар. 103:9). Оныҥ учун теҥеридеги Адабыстаҥ тем алып,  јастырган улустыҥ јаманын таштап турактар (Эф. 4:32—5:1).

⁷ Анайда ок мындый немени ундыбактар: бу телекейдиҥ учы јууктаган сайын, биске јуундагы ака-эјелериске оноҥ јуук болор керек. Нениҥ учун дезе истежӱлер там ла тыҥыыр болор. Керек дезе бис тӱрмеге де кирип калардаҥ айабазыс. Андый айалгаларда биске ака-эјелердиҥ болужы сӱреен керектӱ болор (Укаа 17:17). Испанияда јадып турган Хосе́п a деп аксагалдыҥ учуралын кӧрӱп ийектер. Оны да, ӧскӧ дӧ акаларды колына мылтык албай турганы учун тӱрмеге отургызып салган. Хосеп ака куучындаган: «Бис кӧп улус бир јерде тыгылыжып калган отурганыс. Јаҥыскан болотон арга чек јок болгон. Мынаҥ улам бис бой-бойыска кыйгастанып баштаардаҥ айабас болгоныс. Оныҥ учун бой-бойыстыҥ јаманысты тӱрген ӧткӱрижерге ӱренгенис. Бу биске нак болорго ло бой-бойыска болужарга болушкан. Биске бой-бойысты корулаар керек болгон, нениҥ учун дезе бис Иеговага иштебей турган улустыҥ ортозында отурганыс. Бир катап мен кезинип аларымда, колымды таҥып аларга келишкен. Мынаҥ улам нени де эдип болбой баргам. Ол ӧйдӧ меге бир ака коркышту тыҥ болушкан. Кийимимди де јунып беретен. Ол ака эмес болгон болзо, мен канайткайым не. Анайып чын сӱӱш кандый болор керек деп оҥдоп алгам». Оныҥ учун кӱч ӧйлӧрди сакыбай, оҥдошпостордыҥ аайына эмди ле чыгып турарга ӱренектер!

ЭШ-НӦКӦРӦӦРДӦҤ ДӦ ЧӦКӦП ТУРЗААР, ИЕГОВАГА ОНОҤ ЛО АРЫ ИШТЕГЕР

8. Эш-нӧкӧрлӧрдӧ кандый кӱчтер болот?

⁸ Кӱчтер. Кӱчтер јок биле јок. Агару Бичикте айдылганыла, биле тӧзӧгӧн улуста «јаҥы кӱчтер башталар» (1 Кор. 7:28, ЈТ). Нениҥ учун? Нениҥ учун дезе биле тӧзӧгӧн эмеен-ӧбӧӧн — экӱлези ле толо кеминде улус эмес. Олордыҥ кажызында ла бойыныҥ кӧрӱм-санаазы бар, олор эки башка культурада чыдаган болор, анайда ок тойдоҥ озо кӧрӱнбеген кылык-јаҥ кӧрӱнип келер болор. Мынаҥ улам оҥдошпостор башталардаҥ айабас. Бу кӱчтердиҥ аайына кожо чыгардыҥ ордына, эш-нӧкӧрлӧр бой-бойына ачынып баштаардаҥ айабас. Керек дезе бис эки башка јатсаас, ол эмезе айрылыжып калзаас, торт болор деп санаага да келер болор. Је мынай олор ырысту болор бо? b Агару Бичикте айдылган бир ӱй кижиниҥ јӱрӱмин эске алып ийектер. Оны ӧбӧӧниле эптӱ-јӧптӱ јаткан деп айдып болбозыҥ. Бис ол ӱй кижинеҥ неге ӱренер аргалу деп кӧрӱп ийектер.

9. Авигеяныҥ билезинде айалга кандый болгон?

⁹ Агару Бичиктеги тем. Авигея Навал деп ӧбӧӧндӱ болгон. Навал коркышту кату-казыр ла килемји јок кижи болгон (1 Сам. 25:3). Авигеяга мындый кижиле јуртаарга кӱч келишкен. Ондо казыр ӧбӧӧнинеҥ айрылар арга болгон бо? Эйе, болгон, качан Давид каан оныҥ ӧбӧӧнин ӧлтӱрерге сананарда. Нениҥ учун дезе мынаҥ озо Навал Давидти ле оныҥ черӱчилдерин јамандаган (1 Сам. 25:9—13). Бу ӧйдӧ Авигея Давид Навалды ӧлтӱретен эмтир деп маказырап, кача берер аргалу болгон. Је ол анайып этпеген. Карын Навалдыҥ јӱрӱмин аргадап аларга албаданган (1 Сам. 25:23—27). Авигея нениҥ учун анайып эткен?

10. Авигеяныҥ билези ырысту болбогон до болзо, ол недеҥ улам билезин кичеерге албаданган?

 ¹⁰ Авигея Иегованы сӱӱген, анайда ок оныҥ билеге тургускан нормаларын тооп туратан. Иегова Адам ла Евага, баштапкы билеге, кандый јакылта бергенин ол јакшы билген болор (Баш. 2:24). Анайда ок Иегова эш-нӧкӧрлӧрдиҥ колбуларын агару деп кӧрӱп турганын оҥдоп туратан. Оныҥ да учун Авигея Иегованы сӱӱндирерге болуп, айылындагы улузын, ол тоодо, эш-нӧкӧрин, Навалды, корулап аларга албаданган. Јайымжып отурбай, ол тӱрген ле Давидке удура чыкты. Керек дезе Авигея бойы јаман неме этпеген де болзо, ӧбӧӧниниҥ јаманын таштазын деп, Давидти јайнап сураган. Иегова Кудай бу јалтанбас ла бойын кысканбас ӱй кижини сӱреен тыҥ сӱӱп турган деп јарт кӧрӱнип јат. Эш-нӧкӧрлӧр Авигеянаҥ неге ӱренер аргалу?

11. а) Иегова эш-нӧкӧрлӧрди кандый болзын деп кӱӱнзейт? (Эфестегилерге 5:33). б) Кармен эјениҥ билезин кичееп аларга албаданганынаҥ неге ӱренедигер? (Јурукты база кӧрӱгер.)

¹¹ Неге ӱренедис? Иегова эш-нӧкӧрлӧрди јарашпай да турза, айрылышпазын деп кӱӱнзейт. Эш-нӧкӧрлӧр бой-бойын сӱӱп, тооп, кӱчтериниҥ аайына кожо чыгарга албаданып турза, Кудайга сӱреен јарап јат. (Эфестегилерге 5:33 кычырыгар.) Ка́рмен деп эјениҥ учуралын кӧрӱп ийектер. Ол кижиге барган кийнинеҥ, алты кире јыл ӧдӧ берерде, Керечилерле кожо Агару Бичик ӱренип, сууга чӧҥӱрилген. Эје куучындайт: «Ӧбӧӧниме мындый неме чек јарабаган. Ол мени Иеговага кӱнӱркеген. Керек дезе айткылап, сени таштап јӱре берерим деп айдатан». Андый да болзо, Кармен билезин кичееп аларга албаданган. Ол 50 јылдыҥ туркунына ӧбӧӧнине сӱӱжин ле тоомјызын кӧргӱскен. Эје оноҥ ары куучындайт: «Канча јылдардыҥ туркунына ӧбӧӧнимди оноҥ јакшы оҥдоп баштагам. Анайда ок оныла јымжак куучындажарга ӱренип алгам. Иегова билени агару деп кӧрӱп турганын билетенимнеҥ улам, билем чачылбазын деп, бастыра ийде-кӱчимнеҥ албадангам. Мен Иегованы тыҥ сӱӱп јадым. Оныҥ учун менде ӧбӧӧнимнеҥ айрылатан санаа да болбогон» c. Андый кӱчтер слерде де болуп турган болзо, Иеговага иженигер. Ол слерге ӱзе кӱчтерди ӧдӧргӧ болужар.

БОЙЫГАРДАҤ ДА ЧӦКӦП ТУРЗААР, ИЕГОВАГА ОНОҤ ЛО АРЫ ИШТЕГЕР

12. Уур кинчек эткен кижиде кандый кӱчтер болот?

¹² Кӱчтер. Уур кинчек эткен кижи бойын тообой барат. Агару Бичикти де  кӧрзӧӧс, андый кинчектеҥ улам кижи бойынаҥ чӧкӧй берет (Сар. 51:17). Робе́рто ака канча јылдардыҥ туркунына јуунда болушчы ишчи болорго албаданган. Је уур кинчек эдип ийеле, Иегованы коркышту тыҥ ачындырганын оҥдоп ийген. Ол куучындайт: «Мен бойымды коркышту тыҥ јингем. Кинчегим ӱстимде јаан таш чылап јаткандый билдирген. Бойымды кӧрӧр кӱӱним јок болгон. Мен ачу-ачу ыйлап, Иеговага мӱргӱп туратам. Је менде: „Мен Кудайды андый тыҥ ачындырган болорымда, ол мени эм база качан да укпас, мен ого не керек?“ — деп санаалар болгон». Слер де уур кинчек эделе, бойоордоҥ чӧкӧп турган болороор. Андый ӧйдӧ јӱрегер слерге, Иегова сени база качан да укпас, ого бодоп ло не иштеер деп, айдып турган болор (Сар. 38:4). Је баштапкы чакта јаткан кижиниҥ темин кӧрӱп ийектер. Ол уур кинчек те эткен болзо, Иеговага оноҥ ло ары чындык иштеген.

13. Апостол Пётр кандый уур кинчек эткен, бу неге экелди?

¹³ Агару Бичиктеги тем. Иисустыҥ божоор алдында Пётр канча-канча јастыралар эткен. Андый јастыралары оны уур кинчекке экелген. Озо баштап, бастыра апостолдор Иисусты артыргызып та салза, Пётр бойына иженип, оны качан да артыргыспас деп мактанган (Марк 14:27—29). Оноҥ Гефсиман садта канча катап уйуктап калган (Марк 14:32, 37—41). Кийнинде Иисусты арестке алып келгилеерде, Пётр бойы да кача берген (Марк 14:50). Керек дезе ол Иисусты билбезим деп, ӱч катап чертенип айдынган (Марк 14:66—71). Је Пётр коркышту јаман кинчек эткенин оҥдоп ийеле, ачу ыйлай берген (Марк 14:72). Тоолу ла сааттаҥ Иисусты ӧлтӱрип салдылар. Кӧӧркий Пётр кандый тыҥ санааркады не! Ол бойын эш-кереги јок деп сескен.

14. Иеговага оноҥ ло ары иштеерге Пётрга не болушкан? ( јурукты кӧрӱгер.)

¹⁴ Је Пётр колын бош салбай, Иеговага оноҥ ло ары иштеген. Ого не болушкан? Ол улустаҥ тууралабай, бойыныҥ кӧгӱс ака-карындаштарына барарда, олор оны токунаткан (Лука 24:33). Анайда ок Пётрдыҥ кӱӱн-санаазын кӧдӱрерге, тирилип калган Иисус келген (Лука 24:34; 1 Кор. 15:5). Кийнинде Иисус Пётрды јастыразы учун бурулабай, ого оноҥ јаан каруулу иш берип салган (Иоанн 21:15—17). Пётр уур кинчек эткен деп билген де болзо, бойын эш-кереги јок кижи деп кӧрбӧгӧн. Нениҥ учун? Нениҥ учун дезе Иисус оны андый кижи деп сананбаганын билетен болгон. Пётрдыҥ  кӧгӱс ака-карындаштары да ого оноҥ ло ары болушкан. Пётрдыҥ теминеҥ бис неге ӱренерис?

15. Иегова бисти неде бӱдӱмјилейт? (Сарын 86:5; Римдегилерге 8:38, 39). (Јурукты база кӧрӱгер.)

¹⁵ Неге ӱренедис? Иегова бисти оныҥ сӱӱжине ле ол кинчектеристи таштап турганына алаҥзыбазын деп кӱӱнзейт. (Сарын 86:5 кычырыгар; Римдегилерге 8:38, 39, ЈТ кычырыгар.) Качан бис кинчек эдип ийзеес, уйадыс бисти јип јат. Је бу айалгада Иегова бисти сӱӱбей барган ла кинчектеристи качан да таштабас деп сананбас керек. Оныҥ ордына капшай ла болуш сураар керек. Ӧрӧги айдылган Роберто куучындайт: «Мен бойыма иженеле, ченелтени бойымныҥ ийде-кӱчимле ӧдӱп ийерим деп санангам. Оныҥ учун кинчек эткем». Оныҥ кийнинде ого аксагалдарга баштанар керек деп, ол оҥдоп ийген. Роберто оноҥ ары куучындайт: «Иегова меге сӱӱжин аксагалдар ажыра кӧргӱскен. Олор меге Иегова мени јектебеген деп оҥдоорго болушкан». Бис те Иегованыҥ сӱӱжине алаҥзыбас аргалу. Бис кинчектеристи алынып, аксагалдарга баштанып, бастыра кӱчисле тӱзединерге албаданып турзаас, Иегова бистиҥ јаманысты таштаар (1 Иоанн 1:8, 9). Бӱдӱрилеле јыгылып та калзаас, Иегованыҥ сӱӱжи биске ого оноҥ ары иштеерге болужар.

16. Слер нениҥ учун Иеговага оноҥ ло ары иштеерге бек шӱӱп алганаар?

¹⁶ Иегова калганчы кӱч ӧйлӧрдӧ бистиҥ ого албаданып иштеп турганысты сӱреен баалап јат. Кезикте бойыстаҥ ла улустаҥ чӧкӧгӧнистеҥ улам, биске ого иштеерге кӱч болуп јат. Је Иегованыҥ болужыла бисте ӱзе јакшы болор. Бис ака-эјелерди оноҥ ло ары сӱӱрис ле олор бисти ачындырып та ийзе, олордыҥ јаманын таштаарга белен болорыс. А эш-нӧкӧрлӧр дезе кӱчтериниҥ аайы-бажына теҥ-тай чыгар аргалу. Анайып олор билениҥ Јайаачызына, Иеговага, сӱӱжин ле тоомјызын кӧргӱзет. Анайда ок бис уур кинчек эдип ийзеес, болуш сурап, Иеговага баштанадыс. Оныҥ бисти сӱӱп турганына ла бистиҥ кинчектеристи таштап турганына иженип, ого оноҥ ло ары акту јӱректеҥ иштенедис. Бис «јакшыны эдип... уйадабазабыс», Иегова бисти артыгынча алкаар! (Гал. 6:9).