1, 2. Сууга чӧҥӱрилген кийнинеҥ кижи кандый алкыштар алат?

 СУУГА ЧӦҤӰРИЛИП, Иегованыҥ билезине кожулары кандый јаан сӱӱнчи! Иегованыҥ најызы болоры јаан кӱндӱ эмей. Бис те Давидтиҥ: «Сениҥ тураҥда јатсын деп, бойыҥа кемди талдап, јууктадып аларыҥ, ол кижи ырысту» — деп айткан сӧзиле јӧпсинип јадыс (Сар. 65:4).

² Иегова бойыныҥ айылына кемдерди кычырат? Ӧткӧн јӧрмӧлдӧ кӧргӧнисле, кижи бойы Иеговага јууктаза, Иегова да ого јууктайт (Иак. 4:8). Иеговага јӱрӱмеерди учурлап, сууга чӧҥӱрилзеер, слерде оныла коркышту јуук, аҥылу колбулар башталар. Ол тушта Иегованыҥ алкыштары слерге артыгынча урулар деп, бир де алаҥзыбагар (Мал. 3:10; Иер. 17:7, 8).

3. Кудайга учурланган ла чӧҥӱрилген кижи нени эдер учурлу? (Экклезиаст 5:4, 5).

³ Сууга чӧҥӱрилери — Иеговага иштеп баштаганы. Чӧҥӱрилген кийнинеҥ бис Иеговага учурланып јадарыста берген сӧзисти ле кандый ла ченелтелер болзо, Кудайга чындык артарга берген сӧзисти бӱдӱрер учурлу. (Экклезиаст 5:4, 5 кычырыгар.) Иисустыҥ ӱренчиктери болуп калзаас, биске оныҥ темиле, јакылталарыла јӱрерге албаданар керек (Матф. 28:19, 20; 1 Пётр 2:21). Оны канайып эдерин кӧрӱп ийектер.

 ИИСУСТЫҤ КИЙНИНЕҤ, КӰЧТЕР ДЕ, ЧЕНЕЛТЕЛЕР ДЕ БОЛУП ТУРЗА, БАРЫГАР

4. Иисустыҥ ӱренчиктери «кере тартыратан агажын» апарар учурлу дегенин канайып оҥдоор керек? (Лука 9:23).

⁴ Сууга чӧҥӱрилген кийнинде слерде кандый да кӱчтер болбос деп сананбагар. Нениҥ учун дезе Иисустыҥ айтканыла болзо, оныҥ ӱренчиктериниҥ кажызы ла «кере тартыратан агажын кажы ла кӱн» апарар учурлу болгон. (Лука 9:23, ЈК 2003 кычырыгар.) Айса болзо, Христостыҥ ӱренчиги кажы ла кӱн шыралап јӱрер учурлу ба? Јок, андый эмес. Иисус бу сӧстӧриле христиан кижиниҥ јӱрӱминде алкыштар да, кӱчтер де болор деп айдарга сананган. А кӱчтердиҥ кезиги коркышту кӱч болор (2 Тим. 3:12).

5. Иисус учун чыгым эткен улуска не берилер?

⁵ Слерге, байла, јуук улустараар удурлашкан болор. Ол эмезе слер Кудайдыҥ Каандыгыныҥ ижине ӧйӧӧрди ле кӱчеерди берерге, јӱрӱмеерди јеҥилткен болороор (Матф. 6:33). Иегова слердиҥ эткен ижеерди ӱзе кӧрӱп јат деп, бир де алаҥзыбагар (Евр. 6:10). Слер, байла, Иисустыҥ айткан сӧстӧрин бойоордыҥ јӱрӱмеердеҥ кӧргӧн болороор: «Чынын айдадым слерге: кем айлы-јуртын, эмезе ага-карындажын, эмезе эје-сыйнын, эмезе адазын, эмезе энезин, эмезе бала-барказын, эмезе кыразын Меге болуп, Сӱӱнчилӱ Јарга болуп таштаза, эмдиги ӧйдӧ, бу чакта, айыл-јуртты, ага-карындашты, эје-сыйынды, ада-энени, бала-барканы, кыраны, истедип јӱрӱп, јӱс катап артыктай алар, келер чакта дезе ӱргӱлји јӱрӱмди алар» (Марк 10:29, 30). Иегова слердиҥ ого болуп эткен чыгымдараарды ӱзе бӧктӧп салар (Сар. 37:4).

6. Чӧҥӱрилген де кийнинде кинчектӱ «эт-канныҥ кӱӱниле» нениҥ учун тартыжар керек?

⁶ Сууга чӧҥӱрилген кийнинеҥ слерге оноҥ ло ары кинчектӱ «эт-канныҥ кӱӱниле» тартыжар керек болор (1 Иоанн 2:16, ЈТ). Нениҥ учун дезе слер анайып ла толо кеминде эмес кижи болодоор. Кезикте слерде апостол Павелдиҥ сезимдериндий сезимдер болордоҥ айабас. Ол айткан: «Ичимдеги кижи Кудайдыҥ Јасагына сӱӱнип јат, је эди-каным ӧскӧ јасакла јӱрӱп јат. Ол санаам јарадып турган јасакка удура тартыжып, эди-канымдагы кинчектӱ јасакка мени олјолоп јат» (Рим. 7:22, 23). Слер бойоордо јастыра кӱӱн-санаа кӧрӱп турган болзоор, кезикте кунуга берердеҥ айабазаар. Је чӧкӧбӧгӧр! Учурланган тушта Иеговага берген сӧзӧӧрди сананып туругар. Ол тушта ченелтеге кирбеске слерге јеҥил болор. Эйе, чын ла, учурланган тушта берген сӧзӧӧрди сананзаар, слерге ийде-кӱч берилер. Мыны канайып оҥдоор?

7. Иеговага учурланганыс ого чындык артарга канайып болужат?

⁷ Слер Иеговага учурланып јадараарда, бойоорды јектеп салганаар. Бу дезе Кудайды ачындыратан кӧрӱмеерле, амадулараарла јӱрбезим деп айдып салганаар болот (Матф. 16:24). Оныҥ учун кандый бир кӱч айалга боло берзе, бодоп ӧй јылыйтып, канайдайын деп сананып отурбазаар. Нениҥ учун дезе слер учурланып јаткан тужыгарда ла Кудайга чындык артараар деп сӧзӧӧрди берип салганаар. Айдарда, слер коркышту кӱч те ӧйлӧрдӧ Иегованы сӱӱндирерге, Иов чылап: «Кудайга чындык артарым!» — деп, бек шӱӱп алганаар (Иов 27:5).

8. Учурланганы ченелтелерди ӧдӧргӧ канайып болужат?

 ⁸ Иегованыҥ табын баштапкы јерге тургузараар деп берген сӧзӧӧрди эске алып турзаар, ченелтелерди јеҥил ӧдӧ беререер. Темдектезе, слер билелӱ кижиле сертежереер бе? Јок эмей! Нениҥ учун дезе слер Кудайга андый немени этпезеер деп сӧзӧӧрди берип койгоноор. Јаман кӱӱн-санаа тазылдана берзе, кыйалта јогынаҥ санааркаштарга экелер. А слер мындый санааркаштарга алдыртпазаар. Карын «кинчектӱлердиҥ јолына» кирбегенер учун не аайлу сӱӱнгейеер не! (Укаа 4:14, 15).

9. Учурланганы Иеговага бажырарын баштапкы јерге тургузарга канайып болужар?

⁹ Ол эмезе слерге јуунныҥ туштажуларына јӱрерге чаптыгын јетиргедий иш келижерге јатса канайдараар? Слер ойто ло ӧй ӧткӱрип, канайдайын деп сананып отурбазаар. Нениҥ учун дезе мындый ишке кирбезеер деп, слер туку качан сананып койгоноор. Јастыра тӱп-шӱӱлте эткенеер јакшыга экелер болор деп, бойоорды мекелебезеер. Иисустыҥ темин сананыгар. Ол теҥеридеги Адазын јаантайын сӱӱндирерге албаданган. Оныҥ теми слерге Иегованы ачындыргадый керектерди тӱрген ле јектеп ийерге болужар (Матф. 4:10; Иоанн 8:29).

10. Чӧҥӱрилген кийнинеҥ Иисустыҥ јолыла барарга, Иегова канайып болужар?

¹⁰ Ченелтелер ле кӱчтер биске Иисустыҥ кийнинеҥ барарга турганысты кӧргӱзетен арга болот. Бир де алаҥзыбагар, Иегова андый айалгаларда слерге болужар. Агару Бичикте айдылган: «Кудай чындык, Ол кӱчигер јетпес ченелтелерди болдыртпас, је ченелте тужында  оны ӧдӱп чыгар арга берер» (1 Кор. 10:13).

ИИСУСТЫҤ КИЙНИНЕҤ БАРАРГА НЕ БОЛУЖАР?

11. Иисустыҥ кийнинеҥ баратан эҥ јакшы аргалардыҥ бирӱзи кандый? (Јурукты база кӧрӱгер.)

¹¹ Иисус Иеговага акту јӱректеҥ иштеген ле ого јаантайын мӱргӱп туратан (Лука 6:12). Слерге сууга чӧҥӱрилген кийнинеҥ Иисустыҥ јолыла барарга не болужар? Эҥ јакшы аргалардыҥ бирӱзи — Иеговага јууктадатан јакшы керектер эдери. Агару Бичик мынайып айдат: «Је бис неге де јединип алган болзоос, оноҥ ло ары бу ла јолло барактар» (Флп. 3:16, ЈТ). Кезик ака-эјелердиҥ Кудайга кӧптӧдӧ иштеерге албаданып турганын уккан болороор. Олордыҥ кезиги Каандыктыҥ јарчыларыныҥ сургалына ӱренип јат. Кезиги дезе јарчылар јетпей турган јерлердӧӧн барат. Слердиҥ айалгагарда мынайып эдерге келижип турган болзо, јол ачык — ичкери јӱткӱгер! Иегованыҥ Керечилери Кудайга кӧптӧдӧ иштейтен аргалар бедирегилейт (Ап. ижи 16:9). Је слердиҥ айалгагарда бӱгӱнги кӱнде мынай эдерге келишпей турган болзо, бойоордыҥ эдип турган ижеерди уйан кӧрбӧгӧр. Эҥ ле керектӱзи — бу јолдоҥ туура барбагар ла бойоордоҥ чӧкӧбӧгӧр (Матф. 10:22). Бойоорды улусла тӱҥдештирбей, Иеговага акту јӱректеҥ иштенигер. А бу дезе Иисустыҥ јолыла сууга да чӧҥӱрилген кийнинеҥ барарга болужар (Сар. 26:1).

12, 13. Иеговага иштейтен кӱӱнеер ӧчӱп баратса нени эдер керек? (1 Коринфтегилерге 9:16, 17). ( «Дистанциянаҥ чыкпагар» деген рамканы кӧрӱгер.)

¹² Слердиҥ мӱргӱӱлдереер ле јарлаар  ижеер коомойтый берген болор, ол эмезе Агару Бичикти кычырып турала, алдында чылап сӱӱнчи албай турган болороор. Андый боло берген болзо, Иегова слерге агару тынын бербей барган деп кӧргӱспей јат. Толо кемдӱ эмезистеҥ улам, сезимдерис капшай солына берет. Слердиҥ кӱӱнеер ӧчӱп бараткан болзо, апостол Павелдиҥ темин шӱӱп сананыгар. Павел Иисустаҥ тем аларга албаданган да болзо, је кезикте оныҥ Кудайга иштеер кӱӱни келбей турар деп билер болгон. (1 Коринфтегилерге 9:16, 17 кычырыгар.) Ол айткан: «Оны эдерге кӱӱнзебей де турган болзом, тӱҥей ле эдер керек, нениҥ учун дезе бу меге берилген јакылта эмей». Ӧскӧртӧ айтса, кӱӱни бар да болзын, јок то болзын Павел Кудайдыҥ табын бӱдӱрерге тыҥ албаданган.

¹³ Анайып ла слер де нени-нени эдерге турзагар, сезимдереерге башкартпагар. Кӱӱнзебей де турган болзоор, эдетен немени эдерге албаданыгар. Кудайга јарагадый немени эдерге албаданып турзаар, бир эмеш ӧйдӧҥ керектӱ сезимдер чыгып келер. Је эм тургуза јакшы кӧгӱс графиктеҥ тудуныгар. Мынайып, Иеговага эрчимдӱ иштеп турганаар јарт кӧрӱне берер ле ака-эјелердиҥ кӱӱн-санаазын кӧдӱрер (1 Фес. 5:11).

«ЧЕНЕГЕР... ШИҤДЕГЕР»

14. Бойыгарды канайып јаантайын шиҥдеер керек, нениҥ учун? (2 Коринфтегилерге 13:5).

¹⁴ Чӧҥӱрилген кийнинеҥ бойоорды јаантайын шиҥдеп туругар. (2 Коринфтегилерге 13:5 кычырыгар.) Бойоорго мындый сурактар берерге јараар: «Мен мӱргӱп тургам ба? Агару Бичикти канайып шиҥдеп, кычырып тургам? Јарлаар ишке ле туштажуларга канайып јӱрӱп тургам? Бу керектер меге туза ла сӱӱнчи берет пе?» Јок болзо, бойоордоҥ мынайда сурап кӧрӱгер: «Агару Бичиктиҥ ӱредӱлерин јартап болорым ба? Јарлаар иштеҥ јаан сӱӱнчи аларга нени эдер эдим? Мӱргӱӱлдерим чокум ба, јок по? Мӱргӱӱлдеримнеҥ Иеговага бӱткӱл бӱдӱп турганым кӧрӱнет пе? Јуунныҥ туштажуларын бир де божотпойдым ба? Туштажуныҥ программазын јазап угарга ла ондо туружарга меге не болужар?»

15, 16. Бир карындаш ченелте болордо нени эткен, слер мынаҥ неге ӱренедеер?

¹⁵ Анайда ок бойыстыҥ уйан јандарыска ајару эдип турар керек. Мыны Ро́берт бойыныҥ јӱрӱминде оҥдоп алган. Ол айдат: «20 јашту болорымда, кожо иштеп турган бир јиит кыс мени бойыныҥ айылындӧӧн кычырган. Оноҥ ол мынайда айткан: „Бис экӱдеҥ экӱ ле болорыс, сӱреен јакшы болор“.  Озо баштап мен ого јок деп, чокум јарт айдып болбогом. Је оноҥ дезе кату айдала, шылтагын јартап бергем». Роберт бу ченелтеге кирбеди. Ол талдама! «Је кийнинде мен бу айалганы эске алып, мынайда санандым: бажында ла јок деп айдар керек болгон. Иосиф Потифардыҥ ӱйинеҥ канайып тӱрген качкан эди! (Баш. 39:7—9). Меге ол тушта јок деп айдарга коркышту кӱч болгонын алаҥ кайкадым. Карын бу учуралдаҥ Иеговала колбуларымды тыҥыдар керек деп билип алгам».

¹⁶ Слер бойоорды Роберт ле чилеп шиҥдеер аргалу. Слер кинчек этпеген де болзоор, бойоордоҥ мынайып сурап кӧрӱгер: «Ченелтениҥ ӧйинде меге нени эдеримди сананарга, узак ӧй керек болгон бо?» Эйе болзо, ал-санаага тӱшпегер. Карын, слерге не јанынаҥ иштеер керек деп билип алганаар. Оныҥ учун бу керегинде мӱргӱп, Иеговага јаантайын сӧсуккур болотон кӱӱнеерди тыҥыдыгар (Сар. 139:23, 24).

17. Роберт Иегованыҥ агару адын канайып корулаган?

¹⁷ Бис Роберттиҥ теминеҥ база да бир немеге ӱренер аргалу. Ол оноҥ ары куучындаган: «Менле кожо иштеп турган кыска јок деп айдып ийеримде ол: „Сен молодец!“ — деген. Оныҥ нени айдарга турганын оҥдобой калгам. Кӧрӧр болзо, бу кыста алдында ӧйдӧ Керечи болгон таныжы бар эмтир. Ол ого јиит Керечилердиҥ ӱзези эки јӱстенип турган ла олорды имдеп ле ийзеҥ, Кудайын ундып койор деп айткан! Оныҥ учун олор экӱ мени канайдар эмеш деп кӧрӧргӧ, куучындажып алыптыр. Је карын, Кудайдыҥ адын уйатка тӱжӱрбегем».

18. Слер сууга чӧҥӱрилген кийнинеҥ нени эдерге шӱӱп алдаар? ( «Јииттерге јарайтан статьялар» деген рамканы кӧрӱгер.)

¹⁸ Слер Иеговага учурланып чӧҥӱрилгенеерле оныҥ адын кандый ла айалгада јаантайын агарулаарга турганаарды кӧргӱзедеер. Иегова слерде кандый кӱчтер ле ченелтелер болуп турганын кӧрӱп јат. Анайда ок Кудай слердиҥ ого чындык болорго албаданып турганаарды кӧрӱп, алкаар. Оныҥ учун бир де санааркабагар, Кудай слерге агару тынын берер (Лука 11:11—13). Айдарда, слер Кудайдыҥ болужыла чӧҥӱрилген де кийнинеҥ Иисустыҥ јолыла барар аргалу.