1. Давидте Иеговага кандый сезимдер болгон? Бу оны неге кӱӱнзеткен?

ДАВИД КААН бичиген: «Иегова улу, ол улу макты аларга јарамык» (Сар. 145:3). Давид Иегованы сӱӱген. Оныҥ учун Кудайды «јуунда» мактаарга кӱӱнзеген (Сар. 22:22; 40:5). Слер Иегованы база сӱӱп турган болороор, оныҥ учун Давидтиҥ: «Иегова, Израиль адабыстыҥ Кудайы, сеге чактаҥ чакка алкыш јетсин» — деген сӧстӧриле јӧпсинип јадыгар (1 Лет. 29:10—13).

2. а) Бис Иегованы канайып мактаар аргалу? б) Кезик ака-эјелерде кандый ченелте болот? Бу јӧрмӧлдӧ нени шӱӱжерис?

² Бис Иегованы канайып мактаар аргалу? Темдектезе, христиан туштажуларда јартамал берип, туружып турзаас. Је кезик ака-эјелерге бу јаан ченелте болот. Олор каруу берерге кӱӱнзеп те турган болзо, коркып јадылар. Коркыбаска не болужар? Туштажуларда туружып, бой-бойыбысты оморкодорго, ончобыска кандый тузалу јӧптӧр болужар? Бу сурактардыҥ карууларын билип алардаҥ озо, туштажуларда нениҥ учун туружып турганыстыҥ тӧрт тӧс шылтагын кӧрӱп ийектер.

3—5. а) Еврейлерге 13:15-те айдылганыла, нениҥ учун бис туштажуларда јартамал бередис? б) Туштажуларда ончобыс кӧп јартамалдар берер учурлу ба? Јартап беригер.

³ Иегова оны мактайтан арганы ончобыска берген (Сар. 119:108). Јуундарда бистиҥ берип турган карууларыс — ол «макташтыҥ тайылгазыныҥ» бӧлӱги, оны бис учун кем де этпес. (Еврейлерге 13:15 кычырыгар.) Је Иегова бастыра ишчилеринеҥ «макташтыҥ тайылгазын» бир тӱҥей этсин деп некеп турган ба? Јок эмей!

 ⁴ Бистиҥ айалгаларыс ла аргаларыс башка деп, Иегова билер. Оныҥ учун ол бистиҥ эдип ийер тайылгаларысты тыҥ баалап јат. Иегова Израиль албатыныҥ кандый тайылгаларын алып туратанын эске алып ийектер. Ол ӧйдӧ кем де кой эмезе эчки тайар аргалу болгон. Је кижи јокту болзо, ол «эки кӱӱлечек эмезе эки кӱӱле» берер аргалу болгон. Је мыны да берер аргазы јок болгон болзо, Иегова тайылга эдип «эҥ јакшы бир ефа кулурдыҥ онынчы бӧлӱгин» алган (Лев. 5:7, 11). Кулурдыҥ баазы јеҥил болгон до болзо, Иегова мындый тайылганы тыҥ баалаган. Је бу кулур эҥ јакшы болор учурлу болгон.

⁵ Бистиҥ јалакай Кудайыс солынбаган. Иегова бисти туштажуларда чечен тилдӱ Аполлостый ла бӱдӱмјилӱ айдар Павелдий болзын деп сакыбай јат (Ап. ижи 18:24; 26:28). Иегова бисти туштажуда канча кире аргабыс бар, албаданып туружып турзын деп кӱӱнзейт. Ол бистеҥ эдип болбосты некебей турган деп, тайылга эдип эки јес акча салган тул ӱй кижиниҥ учуралынаҥ кӧрӱнет. Иеговага оныҥ тайылгазы сӱрекей баалу болгон, не дезе, ол бар немезиниҥ эҥ артыгын берген (Лука 21:1—4).

6. а) Еврейлерге 10:24, 25-те айдылганыла болзо, туштажуларга келип тургандардыҥ каруулары јӱрегисти канайып томултар аргалу? б) Шӱӱжеринде туружып тургандардыҥ албаданганын баалап турганысты канайып кӧргӱзерис?

⁶ Јартамалдар берип, бой-бойысты оморкодып јадыс. (Еврейлерге 10:24, 25 кычырыгар.) Биске ака-эјелеристиҥ башка-башка карууларын угарга јарап јат. Балдардыҥ кыска, је акту јӱректеҥ айткан сӧстӧри бисти сӱӱндирет. Чындыкты укканы удабаган кижиниҥ чындык керегинде кӧдӱриҥилӱ јартамалы јӱрегисти тыҥ томултып јат. Уйалчаҥ эмезе тилди јазап билбес ака-эјелерис санаазын јалтанбай айтканына бис тыҥ сӱӱнип јадыс (1 Фес. 2:2). Олордыҥ албаданганын баалап турганысты канайып кӧргӱзерис? Јуунныҥ кийнинде олорго каруулары учун быйан айдарга јараар, анайда ок шӱӱжерине бойлорыс турушсаас база јакшы. Анайып, оморкодуны јаҥыс ла бис эмес, је ӧскӧ дӧ улус алар (Рим. 1:11, 12).

7. Јартмалдар берери незиле тузалу болот?

⁷ Јартамалдар берери биске бойыска ла тузалу болот (Иса. 48:17). Нениҥ учун? Баштапкызында, каруу берерге кӱӱнзегени јазап белетенерге болужат. Јазап белетенип  турзаас, Кудайдыҥ Сӧзин јакшы оҥдоп јадыс. Оны канча ла кире јакшы оҥдоп турзаас, билгенисти ончо ло кире јакшы тузаланадыс. Экинчизинде, јартамалдар берип турзаас, туштажулардаҥ кӧп сӱӱнчи алып турарыс. Ӱчинчизинде, каруу берерге албаданып белетенип јадыс, оныҥ учун шӱӱжеринде айткан шӱӱлте санаабыска узакка артып калар.

8, 9. а) Туштажуларда каруу берип турзаас, Малахия 3:16-ла болзо, Иегова нени сезет? б) Нениҥ учун кезик христиандар каруулар бербей јат?

⁸ Бӱткенис керегинде куучындаганыс Иегованы сӱӱндирет. Иегова бисти угуп, туштажуларда каруу берерге албаданып турганысты баалап турган деп алаҥзыбаска јараар. (Малахия 3:16 кычырыгар *.) Бастыра кӱчисле албаданып турзаас, ол биске алкыжын берип јат (Мал. 3:10).

⁹ Анайдарда, бисте христиан туштажуларда јартамалдар берип, шӱӱжеринде туружатан кӧп шылтактар бар. Андый да болзо, кезик улус кол кӧдӱрерге коркып јат. Слерде де мындый сезимдер болуп турган болзо, кунукпагар. Туштажуларда карууларды кӧптӧдӧ берерге болужатан библиялык принциптерди, јӱрӱмниҥ учуралдарын ла тузалу јӧптӧрди шӱӱжип ийектер.

10. а) Бистиҥ кӧп сабагыс недеҥ коркып јат? б) Мынайып коркып турганыгар нени кӧргӱзет?

¹⁰ Колды кӧдӱреле, каруу беретенин сананып ла ийзегер, јӱрегер типилдей берип турган болзо, јаҥыс слер андый эмезигер деп ундыбагар. Чынынча айтса, бистиҥ кӧп сабагыс туштажуларда каруу берерге коркып јат. Мынайып коркыбаска, коркып турганыстыҥ шылтактарын билип алар керек. Айса болзо, слер шӱӱлтени јылыйтып алараар эмезе јастыра каруу беререер деп коркып турган болороор. Эмезе слердиҥ каруугар ӧскӧ улустый јилбилӱ болбос деп  санааркап турган болороор. Чынынча, мынаҥ слердиҥ јакшы кылыгар кӧрӱнет: мындый сезимдер слердиҥ јобожоорды ла ӧскӧ улусты бойыгардаҥ бийик тургузып турганаарды кӧргӱзет. Иегова јобош улусты сӱӱп јат (Сар. 138:6; Флп. 2:3). Је бу ла ок ӧйдӧ ол слерди јуундарда оны мактап, ака-эјелердиҥ кӱӱнин кӧдӱрзин деп кӱӱнзейт (1 Фес. 5:11). Кудай слерди сӱӱп јат, оныҥ учун слерге јалтанбас болорго кыйалта јогынаҥ болужар.

11. Агару Бичиктиҥ кандый шӱӱлтелери биске коркыбаска болужар?

¹¹ Агару Бичиктиҥ кезик шӱӱлтелерин кӧрӱп ийектер. Анда бис ончобыс кезикте кереги јок неме айдып, эмезе јастыра айдып турганыс деп јарталат (Иак. 3:2). Иегова бистерди качан да јастырбас деп сананбай јат. Ака-эјелер де мынайып сананбайт (Сар. 103:12—14). Олор — бисти тыҥ сӱӱп турган кӧгӱс билегис (Марк 10:29, 30; Иоанн 13:35). Бис санаагысты кезикте чын айдып болбозыс деп, олор оҥдоп јат.

12, 13. Неемия ла Ионаныҥ темдери бисти неге ӱредет?

¹² Эмди дезе Агару Бичиктеги коркыбаска болужатан темдер кӧрӱп ийектер. Неемияныҥ теми. Ол јаан ийде-кӱчтӱ башчы кижиде иштеген. Бир катап Иерусалимниҥ стенелери ле каалгазы јемирилип калган деп угуп ийеле, ол тыҥ санааркаган (Неем. 1:1—4). Каан Неемияны неге санааркап калганын сураарда, оныҥ јӱреги типилдей берген болор. Неемия бу ла тарый Кудайга мӱргӱп ийеле, каанга ӱзе немени јартап берди. Мынаҥ улам не болды? Каан Кудайдыҥ албатызына болужын јетирди (Неем. 2:1—8). Анайда ла ок Ионаныҥ темин эске алып ийектер. Иегова ого Ниневияныҥ улузына јарлазын деп јакару берерде, ол тыҥ коркыган бойынча, тескери јанындӧӧн — Фарсис јаар кача берген (Иона 1:1—3). Је соондо Иегованыҥ болужыла ол берилген јакылтазын бӱдӱрип салган. Оныҥ јарынаҥ улам, Ниневияныҥ улузы кинчегин алынып, аргаданган (Иона 3:5—10). Неемияныҥ теми бистерди карууны берердеҥ озо, мӱргӱп турар керек деп ӱредет. Ионаныҥ теми дезе, Иегованыҥ табын бӱдӱрерге коркып та турзаас, ол биске болужар деп кӧргӱзет. Сананып ийзегер де: бистиҥ ака-эјелерис Ниневияныҥ улузындый коркымчылу эмеш пе?

¹³ Биске бойыстыҥ карууларысла ӧскӧ улустыҥ кӱӱнин кӧдӱрерге, тузалу кандый јӧптӧр болужар? Олордыҥ кезигин кӧрӱп ийектер.

14. Нениҥ учун туштажуларга јазап белетенип турар керек, мыны качан эдерге јараар?

¹⁴ Кажы ла туштажуга белетенигер. Белетенер ӧйди озодоҥ пландап, материалды јакшы шиҥдеп алганы, шӱӱжеринде коркыбай туружарга болужар (Укаа 21:5). Кажы ла кижиниҥ белетенетен графиги башка. Темдектезе, 80 јаштаҥ ажып калган Элоиз деп тул эје «Каруулчы шибеениҥ» јӧрмӧлине неделениҥ бажында белетенип баштайт. «Мен озодоҥ белетенип алзам, туштажулар меге  кӧп сӱӱнчи берет» — деп, ол айдат. Кере тӱжине иштеп турган Джой эје «Каруулчы шибееге» суббот кӱндерде белетенет. Ол: «Неделениҥ учындӧӧн белетензем, јӧрмӧлдиҥ шӱӱлтелери санаамга јакшы артып калат» — деп куучындайт. Јуунда кӧп керектерлӱ аксагал ла пионер болуп турган Айк мынайып айдат: «Меге бастыра материалды бир уунда эмес, неделениҥ туркунына бир эмештеҥ белетезем јеҥил».

15. Туштажуларга јазап белетенип турарга не болужар?

¹⁵ Туштажуларга јазап белетенип турарга не болужар? Кажы ла белетеништеҥ озо, Иегованаҥ агару тын сурагар (Лука 11:13; 1 Иоанн 5:14). Мыныҥ кийнинде тоолу минутка материалла таныжып аларга, оныҥ темазын, бӧлӱктерин, јуруктарын ла рамкаларын шӱӱп кӧрӱгер. Кажы ла абзацты шиҥдеп тура, аргагар бар болзо, берилген ӱлгерлердиҥ кажызын ла кычырарга албаданыгар. Кычырганаарды шӱӱп сананыгар. Шӱӱжетен ӧйдӧ айдарга турган шӱӱлтелеригерге аҥылу ајару эдигер. Канча ла кире јакшы белетенип алзагар, ончо ло кире слерге кӧп туза болор, анайда ок каруу берерге јеҥил болор (2 Кор. 9:6).

16. Слерде кандый электронный јепселдер бар, слер олорло канайып тузаланадыгар?

¹⁶ Аргалу болзогор, слердиҥ тилигерге бар электронный јепселдерле тузаланыгар. Иегова организациязы ажыра туштажуларга белетенерге болужатан электронный јепселдер берет. JW Library® деген приложение ӱренетен материалды мобильный эдимдӧӧн чыгарып аларга болужат. Анайып бу материалды бис кайда ла, кандый ла ӧйдӧ шиҥдеер аргалу, ол эмезе јӱк кычырып эмезе угуп алар аргалу. Кезик ака-эјелер бу приложениени јолдо, иште эмезе школдо тыштанып ажанар ӧйдӧ тузаланып јадылар. Кандый бир суракты тереҥжиде шиҥдеерге турган болзоос, электронный библиотекала эмезе «Каруулчы шибеениҥ онлайн-библиотеказыла» тузаланарга јараар.

17. а) Нениҥ учун карууларды кӧптӧдӧ белетезе јакшы? б) «Иегова Кудайдыҥ најызы бол. Јартамал белетеп ал» деген кӧрӱлмедеҥ нени билип алдаар?

¹⁷ Аргалу болзогор, кажы ла јӧрмӧлгӧ бир канча каруулар белетегер. Бу неге керектӱ? Белетеп алган сурагарды ӧскӧ дӧ улус белетеп алган болор, оныҥ учун туштажуны ӧткӱрип јаткан ака слерди эмес, је ӧскӧ кижини сураардаҥ айабас. Не дезе бастыра улусты сураза, шӱӱжерине берилген ӧй јетпей калар. Оныҥ учун слерди сурабаган болзо, кунукпагар. Карууларды кӧптӧдӧ белетеп алзаар, слерде јартамал беретен бир канча арга болор. Агару Бичиктиҥ ӱлгерин кычырарга эмезе кандый бир суракка карууны бойыныҥ сӧстӧриле айдарга, белетенип аларга јараар *.

18. Нениҥ учун карууларды кыскарта айтса јакшы?

 ¹⁸ Карууны кыскарта айдыгар. Ака-эјелерди кандый каруулар оморкодор аргалу? Кӧп сабада кыска ла јарт каруулар. Оныҥ учун кыска каруу беретен амаду тургузып алыгар. Каруугар 30 секундтаҥ ашпаза, јакшы болор (Укаа 10:19; 15:23). Јуунныҥ туштажуларында каруулар берип турганаар удап калган болзо, кыска каруулараарла ака-эјелерге тем болыгар. Каруулар узун, оҥдоорго кӱч болзо, ака-эјелер качан да анайып айдып болбозыс деп сананар болор. Анайда ок каруулар канча ла кире кыска болзо, ончо ло кире кӧп каруулар болор. Анчада ла баштапкы каруу кыска ла јарт болзын. Абзацты бӱдӱнге куучындап берерге албаданбагар. Абзацтыҥ тӧс шӱӱлтези јарталып калган болзо, кожулта шӱӱлтелерин айдарга јараар. (« Каруулар кандый болор аргалу?» деген рамканы кӧрӱгер.)

19. Талдап алган суракка каруу берерге турган болзоор, нени эдерге јараар?

¹⁹ Ӱредӱ ӧткӱрип јаткан акага кандый сурактыҥ каруузын берерге турганаарды айдып салыгар. Мыны озолодо этсе јакшы. Талдап алган сурагарды ака кычырып ла ийзе, колоорды јакшы кӧрӱнер эдип кӧдӱригер.

20. Јуунныҥ туштажузын кандый учурыла најыларла кожо ажанып јатканыла тӱҥейлештирерге јараар?

²⁰ Јуунныҥ туштажузы најыларла кожо ажанып јатканына тӱҥей. Слерди пикникке кычырып, тегин курсак белетеп алзын деп сураган болзо, канайдараар? Слер ӧкпӧӧрип те турзагар, је ончозына јарагадый курсак белетеер болорыгар. Иегова кӱндӱзек кижи чилеп, кӧгӱс курсакты туштажуларда арбынду берет (Сар. 23:5; Матф. 24:45). Бастыра бар аргабыстыҥ эҥ артыгын берип турзаас, Кудайга тыҥ јарап јат. Оныҥ учун туштажуларга јазап белетенип, колоорды канча ла кире кӧп кӧдӱригер. Ол тушта Иегованыҥ берип турган кӧгӱс курсагыла јаҥыс слер бойыгар јакшызынараар эмес, је јуунныҥ улузы да јакшызынар.