1, 2. а) Ёсико деген эјеге Исаия 41:10-догы сӧстӧр канайып болушкан? б) Бу сӧстӧр кемдерге бичилген?

КУДАЙДЫҤ Ёсико деген чындык ишчизи эмчинеҥ коркышту јаман солун уккан: эмчи оны тоолу ла айдаҥ божоп калар деп айткан. Ёсико мыны угуп, нени сананган? Оныҥ сагыжына Исаия 41:10 (кычырыгар *) кирген. Бу оныҥ сӱӱген ӱлгери болгон. Ёсико эмчиге: «Иегова мениҥ колымнаҥ тудуп алган, оныҥ учун мен бир де коркыбай јадым» — деп, токуналу айткан *. Бу ӱлгердиҥ токунал берип турган сӧстӧри бистиҥ кару эјеге Иеговага бир де алаҥзу јогынаҥ бӱдерге болушкан. Бу сӧстӧр бистерге де кӱч ченелтелер тушта коркыбаска болужар. Је канайып? Мыны оҥдоорго, Иегова Исаияга мындый сӧстӧрди бичизин деп, нениҥ учун јакарганын шӱӱжип ийектер.

² Кудай Вавилонныҥ олјозына баратан иудейлерди токунадарга сананган. Је Исаия 41:10-догы сӧстӧр јаҥыс ла иудейлерге эмес, је оныҥ јебрен де ӧйдиҥ, эмдиги де ӧйдиҥ ишчилерине бичилген (Иса. 40:8; Рим. 15:4). Бис коркышту «уур-кӱч ӧйлӧрдӧ» јададыс, оныҥ учун биске оморкоду, алдындагызына кӧрӧ, сӱреен керектӱ болот. Мындый оморкодуны бис Исаияныҥ бичигинеҥ алар аргалу (2 Тим. 3:1).

3. а) 2019 јылдыҥ ӱлгерине талдалган Исаия 41:10 бисти неде бӱдӱмјилейт? б) Биске мындый бӱдӱмјилӱ сӧстӧр нениҥ учун керектӱ болот?

³ Бу јӧрмӧлдӧ бистиҥ бӱдеристи тыҥыдып турган Исаия 41:10-до бичилген Иегованыҥ бӱдӱмјилӱ сӧстӧрин кӧрӱп  ийерис: 1) Иегова бисле кожо болор; 2) ол бистиҥ Кудайыс; 3) ол биске болужар. Мындый бӱдӱмјилӱ сӧстӧр биске керектӱ болот, не дезе, бис Ёсико ло чылап ченелтелерге туштайдыс. Анайда ок биске телекейде болуп турган кӱчтерди ӧдӧргӧ келижет. Керек дезе бистиҥ кемибисти де ороонныҥ јаҥдары истежип јат. Оныҥ учун бу бӱдӱмјилӱ сӧстӧрди ээчий-деечий шӱӱжип ийектер *.

4. а) Баштапкызында бис кандый бӱдӱмјилӱ сӧстӧр кӧрӧрис? (Сносканы база кӧрӱгер.) б) Иегова бисти сӱӱп турган деп, недеҥ кӧрӱнет? в) Кудай слерди сӱӱп турган деп билгенеердеҥ нени сезедигер?

⁴ Баштапкызында, Иегова бисти: «Коркыба, нениҥ учун дезе мен сенле кожо» * — деп бӱдӱмјилеп јат. Иегова бисле кожо болгонын канайып кӧргӱзет? Ол биске јаан ајару эдип, бисти сӱӱп јат. Исаия 43:4-лӧ болзо, Кудай бисти килеп, мынайып айдат: «Мен сени баалап јадым, сени тооп, сӱӱп јадым». Кем де, не де бисти Иегованыҥ сӱӱжинеҥ айрып болбос. Ол бисти качан да артыргыспас (Иса. 54:10). Оныҥ бисти сӱӱп, бисле најылажып турганы јалтанбас болорго болужат. Ол бойыныҥ најызын, Аврамды (Авраамды) корулаганы чылап бӱгӱнги кӱнде бисти де корулап јат. Иегова ого: «Коркыба, Аврам. Мен — сениҥ куйагыҥ» — деп айткан (Баш. 15:1).

5, 6. а) Иегова бистерге кӱчтерди ӧдӧргӧ болужарга турганын кайдаҥ билерис? б) Ёсиконыҥ теминеҥ неге ӱренедис?

⁵ Иегова бистерге кӱчтерди ӧдӧргӧ болужарга турган. Ол бойыныҥ албатызына: «Суулар кечсеҥ, мен сениле болорым, агын сууларга чӧҥбӧзиҥ. Оттыҥ јалбыжына кӱйбезиҥ де, куйкаланбазыҥ да» — деп, сӧзин берген (Иса. 43:2). Бу сӧстӧр нени темдектейт?

⁶ Иегова бистиҥ уур-кӱчтеристи јоголтып салар деп сакыбас керек. Је Иегова бу уур-кӱчтер чакпынду агын суу чылап бисти чӧҥдӱрип болбос деп сӧзин берет. Анайда ок оттый ченелтелердиҥ кандый ла каршузын Иегова тӱзедип салар. Андый ченелтелерде Иегова бисле кожо болор деп сӧзин берет. Ол биске коркыбаска болужар, керек дезе ӧлӱмнеҥ де коркыбай, чындык артарга болужар (Иса. 41:13). Бу сӧстӧр чын деп, ӧрӧги айдылган Ёсико эје бӱдӱмјиленип алган.  Оныҥ кызы мынайып айдат: «Бис энемниҥ санааркабай турганын кайкаганыс. Иегова оныҥ јӱрегине амыр берген деп јарт кӧрӱнген. Энем божоордыҥ божогончо эмчилерге ле кожо јаткан улуска Иегова керегинде ле оныҥ берген ижемјизи керегинде куучындаган». Ёсиконыҥ теминеҥ неге ӱренедис? Ченелтелерде Иегова бисле кожо болор деп бӱдӱп турзаас, кӱчтерди бис те турумкай болуп, недеҥ де јалтанбай ӧдӧрис.

7, 8. а) Экинчизинде Иегова кандый бӱдӱмјилӱ сӧстӧр айткан, бу сӧстӧр нени темдектейт? б) Иегова олјого баратан еврейлерге нениҥ учун санааркабазын деп айткан? в) Исаия 46:3, 4-тиҥ кандый сӧстӧри Кудайдыҥ албатызына санааркабаска болушкан болор?

⁷ Экинчизинде, Исаия: «Ајыктанба, нениҥ учун дезе мен сениҥ Кудайыҥ» — деп, бӱдӱмјилӱ сӧстӧр бичиген. Бу сӧстӧр нени темдектейт? Оригиналда «ајыктанба» деген сӧс «јеткер болор деп коркып, ајыктанып турарын» эмезе «јеткерлӱ айалгада болуп калала, тыҥ коркып ајыктанарын» кӧргӱзет. Английский тилге јаҥыдаҥ кӧрӱлген 2013 јылдыҥ «Јаҥы телекейдиҥ кӧчӱрмезинде», Исаия 41:10-догы сӧстӧр мынайып кӧчӱрилген: «Санааркаба, нениҥ учун дезе мен сениҥ Кудайыҥ».

⁸ Иегова Вавилонныҥ олјозында 70 јылдыҥ туркунына болотон еврей албатыга нениҥ учун санааркабазын деп айткан? Не дезе, Иегова Вавилонныҥ улузы 70 јыл ӧдӧ берзе, Мидо-Персияныҥ кӱчтӱ черӱзине јууладарынаҥ коркып баштаар деп, озодоҥ билген. Је Иегова Мидо-Персияныҥ болужыла бойыныҥ албатызын олјодоҥ јайымдап аларга сананган (Иса. 41:2—4). Вавилонныҥ улузы ла ӧскӧ албатылардыҥ улузы, ӧштӱлердиҥ јууктап келгенин билип ийеле, бой-бойын оморкодорго: «Јалтанба!» — деп айдар болгон. Анайда ок коруланарга, олор оноҥ кӧп чалулар эдип баштаган (Иса. 41:5—7). Бу ӧйдӧ олјодо болгон еврейлер Иегованыҥ: «Сен, Израиль [јанында јаткан албатыларга кӧрӧ] — мениҥ ишчим... [...] Ајыктанба, нениҥ учун дезе мен сениҥ Кудайыҥ» — деген сӧстӧрин ундыбай турганынаҥ улам, санааркабаган (Иса. 41:8—10). Иегова «Мен сениҥ Кудайыҥ» деген сӧстӧрлӧ бойыныҥ чындык ишчилерин ундыбаган деп бӱдӱмјилеген. Ол алдынаҥ бери олордыҥ Кудайы болгон, а олор — оныҥ албатызы. Иегова олорго: «Слерди... алып јӱрерим... аргадаарым» — деп айткан. Бу токуналу сӧстӧр олјодогы еврейлерге ийде-кӱч берген. (Исаия 46:3, 4 кычырыгар *.)

9, 10. Бистерге нениҥ учун коркыбас керек? Тем куучындап беригер.

⁹ Бӱгӱнги кӱнде там ла катуланып бараткан телекейдеги айалга улусты санааркадып јат. Уур-кӱчтер бисте де болуп јат. Је биске коркыбас керек, нениҥ учун дезе Иегова биске: «Мен сениҥ Кудайыҥ» — деп айдат. Бу сӧстӧр нениҥ учун биске санааркабаска болужат?

¹⁰ Мындый тем кӧрӱп ийектер. Эки кижи, Павел ле Артур, самолетло учуп барадарда, кенейте самолет тыҥ силкинип баштаган. Пилот: «Кайыштараарды тагып алыгар. Бистиҥ самолет турбулентный зонаны ӧдӱп јат» — деп айдат. Павел санааркай берет. Оноҥ пилот ойто ло айтты: «Экипажтыҥ командири айдып јат. Коркыбагар деп сурап турубыс». Је Павел бажын јайкап: «Айдарга јеҥил!» — деп айдат. Пилоттыҥ сӧстӧри оны токунатпады. Павел Артурдыҥ бир де санааркабай турганын кӧрӱп: «Слер бир де коркыбай турганаар ба?» — деп сурады. Артур кӱлӱмзиренип: «Јок, нениҥ учун дезе  экипажтыҥ командири — мениҥ адам. Ол керегинде эмеш куучындап берейин. Слер оны ченемелдӱ пилот деп билип алзаар, база коркыбазыгар» — деп, каруу берди.

11. Бисти бу тем неге ӱредет?

¹¹ Бисти бу тем неге ӱредет? Бис Артур ла чылап коркыбай јадыс, нениҥ учун дезе теҥеридеги Иегова Адабысты јакшы билерис. Ол биске бу телекейдиҥ калганчы кӱндериниҥ јоткондый уур-кӱчтерин ӧдӧргӧ болужар деп, алаҥзыбай јадыс (Иса. 35:4). Кудайды билбес улус коркып јат, је бис Иеговага иженип, санааркабай јадыс (Иса. 30:15). Бис Артурга база неде тӱҥей? Бис Кудайга нениҥ учун бӱдерге јараарын улуска јартайдыс, анайып олор до Иегова кандый ла тӱбекте болужар деп, бӱдӱмјиленип алар.

12. а) Бис база кандый бӱдӱмјилӱ сӧстӧрди шӱӱп кӧрӧрис? б) «Иегованыҥ колы» деген сӧстӧр нени кӧргӱзет?

¹² Ӱчинчизинде, Иегова Исаия ажыра: «Мен сеге болужарым, сени корулаарым» — деп бӱдӱмјилеген. Исаия бу сӧстӧрдӧҥ озо, Кудай бойыныҥ албатызына канайып болужары керегинде мынайып бичиген: «Бий Кайракан Иегова ийде-кӱчиле келер, оныҥ колы бойыныҥ табы аайынча башкарар» (Иса. 40:10). Агару Бичикте «кол» деген сӧс кӧп сабада ийде-кӱчти кӧргӱзет. Оныҥ учун «оныҥ колы... башкарар» дегени, Иегованы — јаан ийде-кӱчтӱ Каан деп кӧргӱзет. Кудайдаҥ кӱчтӱ кем де јок. Ол бойыныҥ ишчилерине алдындагы да ӧйдӧ болушкан ла олорды корулаган, бӱгӱнги де кӱнде Кудайга иженип тургандарга болужат ла олорды корулап јат (Јаҥ. т. 1:30, 31; Иса. 43:10).

13. а) Иегова биске анчада ла кандый айалгада болужарга белен? б) Иегова биске ийде-кӱч берерге, бӱдӱмјилӱ кандый сӧстӧр айткан?

¹³ Иегова биске анчада ла истежӱлердиҥ ӧйинде болужып јат. Кезик ороондордо бистиҥ ӧштӱлерис јарлаар ишти токтодорго ло бистиҥ организацияны јабарга, кандый ла  эп-аргалар тузаланат. Је бис бир де коркыбай јадыс, не дезе, Иегова биске ийде-кӱч берерге, бӱдӱмјилӱ мындый сӧстӧр айткан: «Сеге удура эдилген кандый да мылтык-јепсел, бир де једимдӱ болбос» (Иса. 54:17). Бу сӧстӧрдӧҥ јаан учурлу ӱч тӱп-шӱӱлте эдерге јараар.

14. Бисти нениҥ учун Кудайдыҥ ӧштӱлериниҥ истежӱлери кайкатпай јат?

¹⁴ Баштапкызында, улус бисти Христостыҥ ӱренчиктери болгоныс учун јаман кӧрӧр деп оҥдоп јадыс (Матф. 10:22). Иисус калганчы кӱндерде оныҥ ӱренчиктери калју улустыҥ истежӱлерине табартар деп айдып салган (Матф. 24:9; Иоанн 15:20).Экинчизинде, Исаияныҥ судурыла болзо, ӧштӱлер бисти јӱк ле јаман кӧрӧр эмес, је биске удура кандый ла «мылтык-јепсел» тузаланар. Темдектезе, олор кандый ла сӱмелӱ аргалар тузаланып, бисти јажыт јогынаҥ јабарлап јат, керек дезе тыҥ истежип те јат (Матф. 5:11). Иегова олордыҥ биске удура мындый «мылтык-јепсел» тузаланарын токтотпос (Еф. 6:12; Ачыл. 12:17). Је биске коркыбас керек. Нениҥ учун?

15, 16. а) Биске база кандый бӱдӱмјилӱ сӧстӧрди ундыбас керек? Бу керегинде Исаия 25:4, 5 нени айдат? б) Исаия 41:11, 12-ле болзо, биске удурлажып турган улусла учы-учында не болор?

¹⁵ Ӱчинчизинде, Иегованыҥ айтканыла болзо, ӧштӱлердиҥ биске удура тузаланып турган «кандый ла мылтык-јепсели» једимдӱ болбос. Иегова бисти «казыр улустыҥ тыныжы» «стенеге урулган ургун јааштый» да болзо, корулап јат. (Исаия 25:4, 5 кычырыгар *.) Ӧштӱлер биске качан да тӱзедип болбойтон каршу јетирип болбос (Иса. 65:17).

¹⁶ Иегова бистиҥ бӱдӱп турганысты база канайып тыҥыдат? Ол биске «чугулданып турган улустыҥ ончозыла» не болорын оок-теек  јетирӱлерине јетире ачып берет. (Исаия 41:11, 12 кычырыгар *.) Бистиҥ ӧштӱлер бисти јеҥип аларга канайып та албаданза, олорло учы-учында не болоры озодоҥ судурлалып калган: Кудайдыҥ албатызыныҥ ончо удурлажаачылары «качан да болбогон чылап, јоголып калар».

17, 18. а) Кудайга бӱткӱлинче иженерге, Агару Бичикти кычырганыс канайып болужат? Тем куучындап беригер. б) 2019 јылдыҥ ӱлгерин нениҥ учун шӱӱп сананар керек?

¹⁷ Иеговага алаҥзыбай бӱдерге, оны јакшы билип алар керек. Оныҥ учун Агару Бичикти лаптап кычырып, оны шӱӱп сананар керек. Агару Бичикте Иегова азыйдагы ӧйдӧ бойыныҥ албатызын канайып корулаганы бичилип калган. Бу биске Иегова бисти де корулаар деп алаҥзыбаска болужат.

¹⁸ Исаия Иегованыҥ бисти корулап турганын кӧргӱзерге, сӱрекей јараш сӧстӧр тузаланат. Ол Иегованы — кӱдӱчи деп, ишчилерин дезе — кураандар деп кӧргӱзет. Исаия Иегова керегинде мындый сӧстӧр айткан: «Ол бойы кураандарын јууп, олорды тӧжине алып јӱрер» (Иса. 40:11). Иегова бисти бойыныҥ кӱчтӱ колдорыла кучактап турган деп кычырып турзаас, биске кем де, не де каршу јетирбес деп сезедис. Бӱдӱмјилӱ ле керсӱ кул, кӱчтер де болзо, бисти санааркабазын деп кӱӱнзейт. Оныҥ да учун 2019 јылдыҥ ӱлгерине Исаия 41:10 талдалган. Ондо мынайып айдылат: «Санааркаба, нениҥ учун дезе мен сениҥ Кудайыҥ» (Јаҥы телекейдиҥ кӧчӱрмези, 2013 јыл, англ.). Бу сӧстӧрди шӱӱп сананзагар, олор слерге токунал берип, ченелтелердеҥ коркыбаска ийде-кӱч берер.