1, 2. а) Эҥирди ӧткӱрери јанынаҥ Иисустыҥ берген башкартулары јеҥил болгон деп, нениҥ учун кайкабай јадыс? б) Бис Иисустыҥ кандый кылык-јаҥдарын шӱӱп кӧрӧрис?

ИИСУС ХРИСТОСТЫҤ ӧлӱмин эске алатан Эҥир канайып ӧткӱрилип турганын куучындап болороор бо? Бистиҥ кӧп сабагыс мыны јеҥил куучындап берер, нениҥ учун дезе бу Эҥирди ӧткӱреринде бир де кӱч неме јок. Андый да болзо, Кайраканныҥ Эҥири — јаан учурлу туштажу. Је бу туштажу нениҥ учун јеҥил ӧткӱрилип јат?

² Иисус јерде јадарда, јаан учурлу чындыктарды оҥдоорго јеҥил ле јарт эдип јартап беретениле јарлу болгон (Матф. 7:28, 29). Анайып ла ол ӱренчиктерине оныҥ ӧлӱминиҥ јылдыгын канайып ӧткӱрерин * јартап турарда, јеҥил, је тереҥ учурлу башкартулар берген. Айдарда, Кайраканныҥ Эҥири керегинде ле бу Эҥирде Иисустыҥ нени айтканын ла нени эткенин чокумдап кӧрӱп ийектер. Анайып бис Иисустыҥ јобожын, јалтанбазын ла сӱӱжин оноҥ јакшы оҥдоп аларыс, анайда ок Иисустаҥ темди оноҥ јакшы аларга нени эдерин шӱӱжип ийерис.

3. Матфей 26:26—28-те Кайраканныҥ Эҥири јанынаҥ јеҥил кандый башкарту берилген, калаш ла кызыл аракы нени темдектеген?

³ Иисус бойыныҥ ӧлӱмине учурлай Кайраканныҥ Эҥирин ӧткӱрерин кийдирип турарда, оныла кожо 11 чындык элчизи болгон. Иисус Пасхада јигенинеҥ артканын алып,  тегин байрам кийдирген. (Матфей 26:26—28 кычырыгар.) Ол столдо јаткан ачытпаган калашты ла кызыл аракыны тузаланган. Бу тегин сӱр-темдектер, олор учун берилетен оныҥ толо кемдӱ эди-канын темдектейт деп айткан. Элчилер бу јаан учурлу јаҥы башкартуныҥ јеҥил болгонына бир де кайкабаган болор. Нениҥ учун?

4. Иисустыҥ Марфага айткан сӧстӧри, Кайраканныҥ Эҥирин ӧткӱрери нениҥ учун јеп-јеҥил болгонын оҥдоорго канайып болужат?

⁴ Эмди Иисустыҥ јарлап јӱргениниҥ ӱчинчи јылында, божоорынаҥ јарым јыл кире озо, бойыныҥ јуук најыларыныҥ — Лазарь, Марфа ла Марияныҥ айылында болгон тужында не болгонын эске алып ийектер. Ол ӧйдӧ Иисус олордыҥ айылында болгон улусты ӱредип баштаган. Марфа дезе кӱндӱлӱ айылчыны азыраарга, јӱзӱн-башка аш-курсак белетеп, шакпырап турарда, Иисус мыны кӧрӱп ийеле, јаантайын сӱрекей чӱмделген курсак јазаары керек јок деп, Марфаны јалакай тӱзеткен (Лука 10:40—42). Соондо Иисус јӱрӱмин тайылга эдип берердеҥ канча да саат озо, оныҥ ӧлӱмин эске алатан байрамды — Кайраканныҥ Эҥирин — Марфага берген јӧби аайынча чӱм јок ӧткӱрген. Мынаҥ Иисус керегинде нени билип аладыс?

5. Тегин ӧткӱрилип турган Кайраканныҥ Эҥири Иисустыҥ кандый кылык-јаҥын кӧргӱзет ле бу Филиппыдагыларга 2:5, 7, 8-те айдылганына канайып келижет?

⁵ Иисустыҥ ончо сӧстӧринеҥ ле эткен керектеринеҥ оныҥ јобожы кӧрӱнет. Јердеги јӱрӱминиҥ калганчы тӱнинде де ол сӱрекей јобош болгон (Матф. 11:29). Ол удабас ла кижиликтиҥ тӱӱкизинде эҥ улу тайылга эдерин ле Иегова оны тиргизип, теҥериде Каан болотон јаҥ берерин билер болгон. Је андый да болордо, ого бойына кереги јок ајару эдилзин деп ле оныҥ ӧлӱмин эске алатан Эҥир чӱмдӱ эдип ӧткӱрилзин деп кӱӱнзебеген. Карын, тегин Эҥирди бир јылда бир катап ӧткӱрип, оны эске алып турзын деп айткан (Иоанн 13:15; 1 Кор. 11:23—25). Тегин, је јаан учурлу байрам Иисустыҥ улуркак болбогонын кӧргӱзет. Теҥеридеги Кааныбыстыҥ мындый јобош болгонын кӧрӧргӧ, кандый јакшы! (Филиппыдагыларга 2:5, 7, 8 кычырыгар.)

6. Бис ченелтелерге туштазаас, Иисустыҥ јобожынаҥ кандый тем алар аргалу?

⁶ Бис мындый јобош болорго нени эдер аргалу? Темдектезе, озо баштап бойысты эмес, је улусты сананар керек (Флп. 2:3, 4). Иисустыҥ калганчы тӱнин эске алып ийектер. Ол  удабас кыйналып божоорын билер болгон, је оныҥ божогонына кунугатан бойыныҥ чындык ишчилери учун тӱҥей ле санааркаган. Оныҥ учун тӱниле элчилериниҥ кӱӱнин кӧдӱрип, токунадып, јӧптӧр берген (Иоанн 14:25—31). Оныҥ јобожы бойы керегинде эмес, је ӱренчиктери керегинде санааркаганынаҥ кӧрӱнет. Кандый јакшы тем!

7. Иисус Кайраканныҥ Эҥирин кийдирген кийнинеҥ јаан удабай, јалтанбас болгонын канайып кӧргӱскен?

⁷ Иисус Кайраканныҥ Эҥирин кийдирген кийнинеҥ јаан удабай, сӱрекей јалтанбас болгонын кӧргӱскен. Ол Кудайды јамандаган деп буруладып, агашка кере тартырарын билген де болзо, Адазыныҥ табын бӱдӱрерге шӱӱп алган (Матф. 26:65, 66; Лука 22:41, 42). Иисус Адазыныҥ адын мактаарга, оныҥ Бийленер јаҥына јӧмӧжӧргӧ лӧ кинчектерин алынып турган улуска ӱргӱлји јӱрӱмге јол ачарга, Кудайга чындык арткан. Бу ок ӧйдӧ ӱренчиктерин келер ӧйдӧ болотон ченелтелерге белетеп салган.

8. а) Иисус чындык элчилерине нени айткан? б) Христостыҥ божогоныныҥ кийнинде, оныҥ ӱренчиктери канча јылдарга канайып Иисус чылап јалтанбас болуп арткан?

⁸ Анайда ок Иисустыҥ јалтанбазы чындык элчилериниҥ кӱӱнин кӧдӱрерге албаданганынаҥ кӧрӱнген. Ол ӧйдӧ ондо бойында да санааркаштар болгон болор, је ол ого јаан ајару этпеген. Иуда јӱре берерде Иисустыҥ кийдирген тегин байрамы, Иисустыҥ тӧгӱлген каны ла јаҥы јӧптӧжӱзи майлаткан ӱренчиктерге кандый арга ачарын эске алындырар учурлу болгон (1 Кор. 10:16, 17). Иисус ӱренчиктерин чындык артып, теҥериде оныла кожо башкаратан кайралды алзын деп, олорго Кудайдыҥ ла оныҥ јакылталарын бӱдӱрер керек деп јартап берген (Иоанн 15:12—15). Анайда ок  Иисус олордо ченелтелер болор деп айдып салган. Оныҥ кийнинде Иисус олорды оноҥ тем алзын деп кӱӱнзедип: «Сӱрнӱкпегер!» — деп айткан (Иоанн 16:1—4а, 33). Анайып канча јылдар ӧдӧ дӧ берерде, оныҥ ӱренчиктери Иисус чылап бойын килебес ле јалтанбас болгон. Олор истедеринеҥ де коркыбай, бой-бойына кандый ла ченелтелерде болужып туратан (Евр. 10:33, 34).

9. Бис Иисус чылап канайып јалтанбас болор аргалу?

⁹ Бӱгӱнги кӱнде бис Иисустыҥ темиле база јалтанбас болодыс. Темдектезе, бӱдери учун истедип турган акаларга болужарга, биске јалтанбас болор керек. Кезик ороондордо олорды тӧгӱн јерге бурулап, тӱрмелеп јат. Мындый айалгада олорго ончо ийде-кӱчистеҥ болужар керек, ол тоодо олор учун мӱргӱӱр керек, јаҥдарга баштанар керек, керек дезе јаргыларда олор учун тартыжар да керек (Флп. 1:14; Евр. 13:19). Анайда ок оноҥ ло ары коркыбай јарлаар керек (Ап. ижи 14:3). Бисти истежип те баштаза, Христос чылап Каандык керегинде куучындаарга јалтанбазыс. Је кезикте бис коркый берердеҥ айабазыс. Ол тушта биске не болужар?

10. Кайраканныҥ Эҥиринеҥ озо канча да неделениҥ туркунына нени эдер керек ле нениҥ учун?

¹⁰ Јалтанбас болорго, Христостыҥ толынты тайылгазынаҥ улам ачылган ижемјини шӱӱп сананар керек (Иоанн 3:16; Еф. 1:7). Кайраканныҥ Эҥиринеҥ озо канча да неделениҥ туркунына бис толынты учун быйанысты тыҥыдар аргалу. Темдектезе, Иисустыҥ ӧлӱминеҥ озо болгон учуралдарды ээчий-деечий кӧрӧргӧ, Агару Бичикти графикле кычырыгар. Кычырып алганаарды мӱргӱӱлде шӱӱп сананыгар. Анайып бис бу Эҥирдиҥ ӧйинде калаштыҥ, кызыл аракыныҥ ла Иисустыҥ баалу тайылгазыныҥ учурын јакшы оҥдоп аларыс. Бис Иисуска  ла Иеговага бистерге болуп эткен ончо неме учун быйанду болуп, мынаҥ улам бойыска ла јууктарыска јеткен тузаны оҥдоп турзаас, ижемјибис тыҥыыр, анайда ок ончо ченелтелерди јалтанбай ӧдӧргӧ белен болорыс (Евр. 12:3).

11, 12. Караканныҥ Эҥири биске нени эске алындырат?

¹¹ Ӧрӧги айдылганыла, Кайраканныҥ Эҥири јӱк ле Иисустыҥ баалу толынты тайылгазын эмес, је оныҥ сӱрекей јобош ло јалтанбас болгонын эске алындырат. Бу кылык-јаҥдарды Иисус эмди де теҥериде Улу абыс болуп, бис учун сурап турганыла кӧргӱзет. Бис бого тыҥ сӱӱнедис! (Евр. 7:24, 25). Оныҥ учун бойыстыҥ быйанысты кӧргӱзерге, 14 нисанга келижип турган кӱнде, Иисустыҥ јакарганын — оныҥ ӧлӱмин эске алатан Эҥирди — ӧткӱрер керек (Лука 22:19, 20). Јылдыҥ ичине бу кӱн биске эҥ учурлу кӱн болот.

¹² Кайраканныҥ Эҥириниҥ тегин ӧткӱрилип турганынаҥ Иисустыҥ бис учун јӱрӱмин берерге кӱӱнзеткен база бир кылык-јаҥын билип аладыс. Иисус јерде јӱрерде, бу кылык-јаҥыла аҥыланып туратан. Бу кандый кылык-јаҥ?

13. Иоанн 15:9-таҥ ла 1 Иоанн 4:8—10-ноҥ Иегова ла Иисустыҥ сӱӱжи канайып кӧрӱнет, олордыҥ сӱӱжинеҥ кемдер туза алар аргалу?

¹³ Иисус улусты Адазы ла чылап тыҥ сӱӱген. (Иоанн 15:9; 1 Иоанн 4:8—10 кычырыгар.) Ол бойыныҥ јӱрӱмин бистер учун акту јӱрегинеҥ берип ийген. Оныҥ тайылгазы — Иегова ла Иисус Христостыҥ бисти тыҥ сӱӱп турганыныҥ кереези. Олордыҥ сӱӱжинеҥ майлаткандар да, «ӧскӧ койлор» до туза алар аргалу (Иоанн 10:16; 1 Иоанн 2:2). Анайда ок Кайраканныҥ Эниринде тузаланылып турган сӱр-темдектерди сананып ийзеер де. Бу сӱр-темдектер Иисус бойыныҥ ӱренчиктерин сӱӱп, олорды кичееп турган деп кӧргӱзет.

14. Иисус ӱренчиктерин сӱӱп турган деп, канайып кӧргӱскен?

¹⁴ Иисус Эҥирдиҥ ӧйинде чӱмдӱ эмес, је тегин сӱр-темдектер тузаланганыла бойыныҥ майлаткан ӱренчиктерин сӱӱп турган деп кӧргӱскен. Не дезе, олорго Кайраканныҥ Эҥирин кажы ла јыл кезикте башка-башка айалгада да, керек дезе тӱрмеде де ӧткӱрер керек болгон (Ачыл. 2:10). Олор Иисустыҥ айтканын бӱдӱрип болгон бо? Эйе!

15, 16. Кезик христиандар кӱч айалгаларда да болзо, Кайраканныҥ Эҥирин канайып ӧткӱргенин куучындап беригер.

¹⁵ Чындык христиандар баштапкы чактаҥ ала бистиҥ ӧйгӧ јетире Кайраканныҥ Эҥирин кандый да айалга болзо, тӱҥей ле ӧткӱрерге албаданып туратан. Керек дезе кӱч те ӧйлӧрдӧ, олор канча кире аргазы бар, Иисустыҥ јакарганы аайынча эдетен. Бир тем кӧрӱп ийектер. Кыдат јеринде, јаҥыскан отуратан камерада отурган Харольд Кинг акага Кайраканныҥ Эҥирин ӧткӱрерге тапкыр болорго келишкен. Ол сӱр-темдектерди бар немедеҥ кемге де кӧргӱспей белетеп, ӧткӱретен кӱнди канча кире аргазы бар чотоп алган. Ӧй једе берерде, ол кожоҥ кожоҥдоп, мӱргӱп ийеле, библиялык куучын-эрмек айткан.

¹⁶ Экинчи тем. Экинчи телекейлик јуу-согуштыҥ ӧйинде концлагерьде отурган эјелер ӧлӱмнеҥ де коркыбай, Кайраканныҥ Эҥирин ӧткӱрген. Је сӱр-темдектер тегин болгонынаҥ улам, олор бу Эҥирди улуска билдиртпей, ӧткӱрип салган. Олор мынайып куучындаган: «Бис отургышка ак бӧстиҥ ӧӧнин (лоскут) јайып, сӱр-темдектерди салып алганыс. Бойлорыс айландыра туруп, улус бисти кӧрӱп ийбезин деп, светти ӧчӱрип, свеча кӱйдӱрип алганыс. [...] Бис  Адабыска, оныҥ агару адын агарулаарга ончо ийде-кӱчисти берерис деп, акту јӱрегистеҥ ойто ло катап сӧзис бергенис». Кандый тыҥ бӱдӱмји! Кайраканныҥ Эҥирин коркышту кӱч айалгаларда да ӧткӱретен арга бар. Нениҥ учун дезе Иисус бисти сӱӱп турганынаҥ улам јеҥил байрам кийдирген.

17. Бис кандый сурактарды шӱӱп сананзаас, јакшы болор эди?

¹⁷ Кайраканныҥ Эҥири јууктап келетсе, бойыгардаҥ сурагар: «Иисустаҥ тем алып, улусты оноҥ тыҥ сӱӱрге, мен нени эдер эдим? Мен озо баштап бойымды сананадым ба эмезе улусты ба? Ака-эјелердеҥ ӧткӱре кӧп неме сакыбайдым ба, эмезе олордыҥ аргазын оҥдоп јадым ба?» Айдарда јаантайын Иисустаҥ тем алып, улусты килеп турактар (1 Петр 3:8).

18, 19. а) Бис неде алаҥзыбас аргалу? б) Биске эм тургуза нени эдерге шӱӱп алар керек?

¹⁸ Удабас бис Христостыҥ ӧлӱмин эске алып турган Эҥирди ӧткӱрбезис. Иисус улу тӱбектиҥ ӧйинде «келип», оныла кожо теҥериде башкаратан «талдалгандардыҥ» арткан калганын јууп алар. Мыныҥ кийнинде Кайраканныҥ Эҥирин ӧткӱрери токтоп калар (1 Кор. 11:26; Матф. 24:31).

¹⁹ Је ол до тушта Иегованыҥ албатызы Кайраканныҥ Эҥирин — Иисустыҥ улу јобожын, јалтанбазын ла сӱӱжин кӧргӱзип турган тегин байрамды — тӱҥей ле эске алып турар. Келер ӧйдӧ Кайраканныҥ Эҥирин ӧткӱрип туратан Кудайдыҥ ишчилери улуска бу байрам керегинде куучындаар болор. Је эм тургуза Иисустыҥ јобожынаҥ, јалтанбазынаҥ ла сӱӱжинеҥ тем алып јӱректер. Ол тушта Иегова бисти кайралдаар деп алаҥзыбазыс (2 Петр 1:10, 11).