1—3. а) Иегова Соломонды нениҥ учун сӱӱген ле ого кандый алкыш берген? б) Бу јӧрмӧлдӧ кандый сурактар кӧрӱлер?

СОЛОМОН јиит ле тужында Израильдиҥ кааны болуп калган. Башкарып баштаган ӧйдӧ тӱш јеринде ого Иегова келип: «Айт, сеге нени берейин?» — деп айдарда, Соломон — «Мен арай ла јиит... [...] Сениҥ албатыҥды јаргылаарга, кулыҥа уккур јӱрек берзеҥ» — деп айткан (1 Каан. 3:5—10). Мынаҥ Соломонныҥ јобожы кӧрӱнет. Оныҥ да учун Иегова оны сӱӱген (2 Сам. 12:24). Кудайга оныҥ сӧстӧри ичине кирген, оныҥ учун ол Соломон каанга «ойгор јӱрек» берген (1 Каан. 3:12).

² Соломон Иеговага чындык иштеерде, ол ого ӱзе јанынаҥ алкыжын берген. Керек дезе Соломонго «Израильдиҥ Кудайына, Иеговага учурлалган» ӧргӧӧ тудатан кӱндӱ эдилген (1 Каан. 8:20). Анайда ок Кудайдыҥ берген ойгоры Соломонды јарлу кижи эдип салган. Кудайдыҥ тыныла айткан каанныҥ сӧстӧри Агару Бичиктиҥ ӱч бичигинде бичилген. Мындый бичиктердиҥ бирӱзи — Укаа сӧстӧр.

³ Бу бичикте «јӱрек» деген сӧс 100 кире катап туштайт. Темдектезе, Укаа сӧстӧрдӧ 4:23-те мынайып айдылат: «Эҥ ле тыҥ бойыҥныҥ јӱрегиҥди чеберле». Бу ӱлгерде «јӱрек» деген сӧс нени темдектейт? Каруузы бу јӧрмӧлдӧ јарталат. Анайда ок Сатана бистиҥ јӱрегисти ӱреерге нени эдип јат? Бойысты корулап аларга, нени эдер керек? деп сурактардыҥ каруулары кӧрӱлер. Кудайга чындык артарга турган болзоос, бу сурактардыҥ карууларын билип алар керек.

4, 5. а) Јӱрек деген сӧс нени темдектеп турганын оҥдоорго, Сарын 51:6 канайып болужат? б) «Јӱректи» чеберлеер керек деп, кандый тем кӧргӱзет?

⁴ Укаа сӧстӧр 4:23-те айдылган «јӱрек» деген сӧс кижиниҥ кандый болгонын кӧргӱзет. (Сарын 51:6 кычырыгар *.) Ӧскӧртӧ айтса, «јӱрек» — бистиҥ јажытту санааларыс, сезимдерис ле кӱӱнис. Бу бистиҥ тыш јанысты эмес, је ич јанысты кӧргӱзет.

⁵ Биске нениҥ учун бойыстыҥ «јӱрегисти» чеберлеер керек дегенин оҥдоорго болужатан баштапкы тем кӧрӱп ийектер. Кижиниҥ эди-каны јакшы иштезин деп, тузалу курсак јип, спортло јаантайын тазыктырынар керек. Мынайып ла кӧгӱс јанынаҥ бек болорго, тузалу кӧгӱс курсак јип, јаантайын Кудайга бӱдеристи керелеер керек, ӧскӧртӧ айтса Агару Бичиктеҥ билип алганысты тузаланып, улуска куучындаар керек (Рим. 10:8—10; Иак. 2:26). Эмди экинчи тем кӧрӱп ийектер. Кезик ооруларды кижи билбей јат. Оныҥ учун андый оорулу кижи ооруп та турза, бойын су-кадык деп сананардаҥ айабас. Мынайып ла бистиҥ кӧгӱс јанысты айдарга јараар. Темдектезе, бис: «Мениҥ кӧгӱс керектерим јакшы, оныҥ учун бӱткеним бек» — деп сананар болорыс. Је јӱрегисте јастыра санаалар ӧзӧрдӧҥ айабас (1 Кор. 10:12; Иак. 1:14, 15). Оныҥ учун Сатана бисти бойыныҥ кӧрӱмине ӱредерге турганын ундыбас керек. Ол мыны канайып эдет? Биске коруланарга нени эдер керек?

6. Сатанада кандый амаду бар? Амадузына једерге, ол нени эдет?

⁶ Сатана бисти бойы чылап Иегованыҥ нормаларын тообозын, јаҥыс бойын сӱӱген тӱймечилер болзын деп кӱӱнзейт. Сатана бисти оныҥ санаазыла јӱрзин деп албадап болбос, оныҥ учун ол ӧскӧ эп-арга тузаланат. Темдектезе, бисти оныҥ кӧрӱмин алынган улустыҥ ортозында болзын деп албаданат (1 Иоанн 5:19). Андый улустыҥ кӧрӱми санааларыска ла керектериске каршузын јетирер деп оҥдоп то турзаас, Сатана бисти олорло кӧп ӧй ӧткӱрип турзын  деп кӱӱнзейт (1 Кор. 15:33). Соломон Сатананыҥ мындый ла тузагына тӱжӱп калган. Оныҥ ӧскӧ кудайларга бажырып турган кӧп ӱйлери, Соломонныҥ «јӱрегин араайынаҥ ӱреп салган» (1 Каан. 11:3).

7. Сатана бисти бойыныҥ кӧрӱмине ӱредерге база канайып умзанат? Биске нениҥ учун ајарыҥкай болор керек?

⁷ Сатана бойыныҥ кӧрӱмин кинолор ло телеберилтелер ажыра таркадат. Ол бистерге јилбилӱ учуралдар јарап турган деп билер, оныҥ учун санааларысты, сезимдеристи ӧскӧ немеге ӱредип салза, эткен керектерис те солынып калар деп оҥдоп јат. Иисус мындый ӱредетен арганы јалакай самар кижи керегинде эмезе тенибер уул керегинде укаа сӧстӧр куучындаарда сӱреен јакшы тузаланган (Матф. 13:34; Лука 10:29—37; 15:11—32). Је кинолор ло телеберилтелер ажыра Сатананыҥ кӧрӱмиле корондолып калган улустыҥ кӧрӱмине бис те корондолып калардаҥ айабазыс. Је кезик кинолордо ло телеберилтелерде јаман неме јок, олорды кӧрӱп, амыраарга, керек дезе та неге де ӱренип те аларга јараар. Андый да болзо, тӱҥей ле ајарыҥкай болор керек. Нени-нени кӧрӧрдӧҥ озо бойыгардаҥ сурагар: «Бу кино эмезе телеберилте эт-канныҥ керектерин бӱдӱреринде јаман неме јок деп ӱредет пе?» (Гал. 5:19—21; Еф. 2:1—3). Эйе болзо, андый кинолорды југуш оору деп кӧрӱгер, не дезе, олор ажыра Сатана бистиҥ јӱрегисти ӱреп салардаҥ айабас.

8. Балдарды бойыныҥ јӱрегин чеберлезин деп ӱредерге нени эдер керек?

⁸ Сатана бойыныҥ кӧрӱмиле балдардыҥ да јӱрегин корондоп саларга умзанат. Оныҥ учун ада-энелерге балдарын корулайтан јаан молју берилген. Слер балдарыгарды оору-јоболдоҥ корулаарга, ӱзени эдип турган болорыгар. Айлыгардыҥ ичин ару тудуп, билениҥ су-кадыгына каршу јетиретен не-немени јайладып јадыгар. Анайып ла слерге балдараарды Сатананыҥ кӧрӱмине ӱредип турган кинолордоҥ, телеберилтелердеҥ,  электронный ойындардаҥ ла сайттардаҥ корулаар керек. Балдардыҥ ич-кӧгӱзин корулайтанын Иегова слерге бойы јакарган (Укаа 1:8; Еф. 6:1, 4). Оныҥ учун биледе библиялык принциптерге тайанган ээжилер тургузарга коркыбагар. Кичинек балдарга нени кӧрӧтӧнин, нени кӧрбӧйтӧнин јартап беригер (Матф. 5:37). Чыдап калган балдарга Иегованыҥ нормаларына тайанып, «јакшыны јаманнаҥ ылгаштырар[га]» ӱредигер (Евр. 5:14). Ундыбагар: балдар слердиҥ нени айдып турганаарды угуп, кӧп немеге ӱренер, је слердиҥ керектереерди кӧрӱп, оноҥ кӧп немеге ӱренер (Јаҥ. т. 6:6, 7; Рим. 2:21).

9. Сатана бисти неге ӱредип саларга албаданат, је мындый кӧрӱм кандый каршу јетирет?

⁹ Сатана бистиҥ јӱрегиске база кандый каршузын јетирерге албаданат? Ол бисти Кудайдыҥ ойгорына эмес, је кижиниҥ ойгорына ижензин деп албаданат (Кол. 2:8). Темдектезе, Сатана бай болорын јӱрӱмде эҥ ле учурлу неме деп сананарына ӱредет. Је байып та калган кижи, байып болбогон до кижи — экилези каршулу јолдо турат. Нениҥ учун? Андый улус акчага болуп, бойыныҥ су-кадыгын, билезин, керек дезе Кудайла колбуларын неге де бодобой барат (1 Тим. 6:10). Је бис акчага чын кӧрӱмдӱ болорго болужып турган теҥеридеги ойгор Адабыска быйанду болодыс! (Јарл. 7:12; Лука 12:15).

10, 11. а) Јӱрегисти чеберлеп аларга нени эдер керек? б) Јебрен ӧйдиҥ каруулчыктарыныҥ ижи кандый болгон ло уйатты нениҥ учун каруулчыкка тӱҥейлеерге јараар?

¹⁰ Јӱрегисти чеберлеерге, биске кандый бир јеткерди кӧрӱп ийеле, капшай ла коруланар керек. Јебрен ӧйдиҥ каруулчыктарыныҥ ижи андый болгон. Олор каланыҥ стенезине каруулда туруп, кандый бир јеткер болзо, капшай ла улуска айдар учурлу болгон. Бу тем Сатана бистиҥ јӱрегисти ӱреп салбазын деп, нени эдерин оҥдоорго болужат.

¹¹ Каруулчыктар каланыҥ эжиктерин корулап турган улусла јуук иштеген (2 Сам. 18:24—26). Олор ӧштӱ келип јатса, каланыҥ эжиктери бӧктӱ бе деп, кӧрӱп турар учурлу болгон (Неем. 7:1—3). Анайып ла Агару Бичикле ӱредилген бистиҥ уйадыс *, Сатана бистиҥ јӱрегисти, ӧскӧртӧ айтса санааларысты, сезимдеристи ле кӱӱнисти ӱреп саларга турза, каруулчык чылап капшай ла иштей берет. Оныҥ учун уйадыс иштей ле берзе, оны угар керек, ӧскӧртӧ айтса јӱрегистиҥ эжиктерин јабар керек.

12, 13. Бисте кандый ченелте болордоҥ айабас, је оны ӧдӧргӧ не болужар?

¹² Сатананыҥ кӧрӱмине ӱренип калбаска нени эдер керек деп сананып ийектер. Темдектезе, Агару Бичикте: «Балыр јӱрӱм, быјар... ортогордо адалбас та учурлу» — деп бичилет (Еф. 5:3). Кожо иштеп эмезе ӱренип турган улус Иегованыҥ нормаларына келишпей турган немелер куучындажып баштаза, бис канайдарыс? Бис «телекейдеги кычаларды јектеп» јӱрер учурлу деп билип јадыс (Тит. 2:12, ЈК 2003). Оныҥ учун бистиҥ уйат — «каруулчык» — иштей берердеҥ айабас (Рим. 2:15). Ол тушта бис оны угарыс па? Бис кожо иштеп эмезе ӱренип турган улустыҥ куучынын угарга, эмезе олордыҥ кӧргӱзип турган фотолорын кӧрӱп ийерге кӱӱнзеер болорыс. Мындый ӧйдӧ «эжиктерди бӧктӧӧр» керек, ӧскӧртӧ айтса  куучынныҥ темазын солыыр эмезе олорды укпай, туура база берер керек.

¹³ Бисти јастыра санааларга эмезе керектерге кӱӱнзедип турган улуска удурлажарга, јалтанбас болор керек. Иегова бистиҥ албаданып турганысты кӧрӱп турган деп алаҥзыбагар. Ол слерге Сатанага удурлажарга ийде-кӱч ле ойгор берер (2 Лет. 16:9; Иса. 40:29; Иак. 1:5). Је јӱрегисти кичеерге, биске база нени эдер керек?

14, 15. а) Биске јӱрегисти неге ачар керек ле мыны канайып эдер керек? б) Агару Бичикти тузалу болзын эдип кычырарга, Укаа сӧстӧр 4:20—22 канайып болужар аргалу? (« Канайып шӱӱп сананар керек?» деген рамканы кӧрӱгер).

¹⁴ Јӱрегисти чеберлеерге, оныҥ эжиктерин јабып, кандый бир јаман кӧрӱм-санаадаҥ корулаар керек, је анайда ок јакшы немеге ачар керек. Каланыҥ стенези керегинде темди эске алып ийзеер де. Калага ӧштӱ јууктап келип јатса, каланыҥ эжиктерин корулап турган кижи эжиктерди јабып туратан, је качан калага аш-курсак эмезе ӧскӧ кандый бир немелер келзе, каруулчы эжиктерди ачып туратан. Је эжиктер јаантайын сомокту турза, калада торо башталар эди. Анайып ла јӱрегистиҥ эжиктерин Кудайдыҥ кӧрӱмиле толтырарга ачар керек.

¹⁵ Агару Бичикте Иегованыҥ санаалары бичилген, оныҥ учун бис оны кычырып турзаас, санааларыска, сезимдериске ле керектериске тузалу болот. Је Агару Бичик туза экелзин деп, оны канайып кычырар керек? Јаан болушты мӱргӱӱл јетирет. Бир эје мынайып айдат: «Агару Бичикти кычырар алдында, Иеговага мӱргӱп, оныҥ Сӧзинеҥ „кайкамчылу керектерин“ кӧрӧргӧ болужып берзин деп сурап јадым» (Сар. 119:18). Анайда ок кычырганысты шӱӱп сананар керек. Бис мӱргӱп, Кудайдыҥ Сӧзин кычырып, шӱӱп сананып турзаас, Иегованыҥ санаалары бистиҥ јӱрегиске тереҥ кирет. Анайып, бис оныҥ кӧрӱмин сӱӱп баштайдыс. (Укаа сӧстӧр 4:20—22 кычырыгар *; Сар. 119:97).

16. Бистиҥ интернет-телевидение биске канайып болужып јат? Тем куучындап беригер.

¹⁶ Бистиҥ интернет-телевидениени де кӧрӱп турзаас, Кудайдыҥ санаалары биске тузазын јетирет. Бир биле мынайып айдат: «Кажы ла ай чыгып турган программалар — бистиҥ мӱргӱӱлдеристиҥ каруулары болот! Бу программалар кунугып эмезе јаҥысканзыраган тужыста, кӱӱнисти кӧдӱрип, ийде-кӱч берет. Бистиҥ телевидениениҥ кожоҥдоры айылыста јаантайын ойноп јат: курсак азып јатсаас, айылды арутап турзаас эмезе чайлап јатсаас». Бу программалар бистиҥ јӱрегисти корулап јат. Анайып, бис Иегова чылап сананып, Сатананыҥ кӧрӱмине удурлажарга ӱренедис.

17, 18. а) 1 Каандар 8:61-ле болзо, Кудайдыҥ Сӧзинеҥ алган билгирлерди тузаланып турзаас, бис нени керелейдис? б) Езекия каанныҥ теми неге ӱредет? в) Сарын 139:23, 24-тӧги Давидтиҥ сӧстӧриле болзо, бис не керегинде мӱргӱӱр аргалу?

¹⁷ Кудайдыҥ сӧзиле јӱргенистиҥ тузазын кӧрӱп турзаас, бистиҥ бӱдерис тыҥып јат (Иак. 1:2, 3). Мынаҥ улам сӱӱнип јадыс, нениҥ учун дезе Иегова бисле оморкоп, балдарыныҥ тоозына кожот, анайып бис оны оноҥ тыҥ сӱӱндирерге кӱӱнзейдис (Укаа 27:11). Кажы ла ченелте — килеҥкей Адабыска «экиленген јӱректӱ» иштебей турганысты кӧргӱзетен арга болот (Сар. 119:113). Мынайып бис оны сӱӱп турганысты, бастыра јӱрегистеҥ ого чындык болгонысты, оныҥ ончо јакаруларын бӱдӱрерге турганысты  ла оныҥ табы аайынча јаантайын јӱрерге турганысты кӧргӱзедис. (1 Каандар 8:61 кычырыгар *.)

¹⁸ Је бис эмди бир де јастырбазыс па? Јок, јастырарыс, нениҥ учун дезе толо кемдӱ эмезис. Је јастырып ийзегер, Езекия каанды сананыгар. Ол јастырган да болзо, кинчегин алынып, «бастыра јӱректеҥ» Иеговага иштеген (Иса. 38:3—6; 2 Лет. 29:1, 2; 32:25, 26). Сатананыҥ кӧрӱмине ӱредип турган не ле немени кезе чабып, «уккур јӱректӱ» болорго мӱргӱп турактар (1 Каан. 3:9; Сарын 139:23, 24 кычырыгар *). Бис Иеговага чындык артарыс па, јок по јӱрегисти чеберлегенистеҥ камаанду.