1, 2. Б. э. 33 јылында, Беженинчи кӱнде кайкамчылу кандый учурал болгон?

БИСТИҤ эраныҥ 33 јылы, Беженинчи кӱн. Иерусалим. Воскресен кӱнде эртен тура, Иисус Христостыҥ 120 кире ӱренчиги тураныҥ ӱстиндеги кыбында јуулыжып јат (Ап. ижи 1:13—15; 2:1). Бу кӱнде ӱренчиктерге аҥылу сый берилер керек болгон. Оныҥ учун Иисус олорды Иерусалимде артсын деп, канча да кӱн озо јакарып салган (Ап. ижи 1:4, 5). Оноҥ ары не болгон?

² Агару Бичикте айдылат: «Кенетийин теҥеридеҥ тыҥ салкын соккондый шуулт угулып, олор отурган ӱйдиҥ ичин толтырып ийди». Мыныҥ кийнинде ӱренчиктердиҥ баштарыныҥ ӱстинде «от-јалбыш ошкош айрыланып турган тилдер» кӧрӱнип келерде, «ончозы Агару Тынла тол[о]» бердилер (Ап. ижи 2:2—4). Иегова ӱренчиктерге агару тынды мындый кайкамчылу эдип берген (Ап. ижи 1:8). Бу улус Кудайдыҥ агару тыныла * эҥ ле озо майлаткан. Анайып, Кудай олорго теҥериде Иисусла кожо башкарар ижемји берген.

3. Б. э. 33 јылында, Беженинчи кӱнде, Христостыҥ ӱренчиктери Кудайдыҥ агару тыныла майлатканына нениҥ учун алаҥзыбаган?

³ Слер Беженинчи кӱнде, ӱстиндеги кыпта јуулышкан  Христостыҥ ӱренчиктериниҥ ортозында болгон болзогор, ондо не болгонын качан да ундыбас эдигер. Слердиҥ бажаарга оттыҥ јалбыжына тӱҥей неме тӱжӱп келерде, башка-башка тилдерге куучындана бергенеер деп сананып ийзегер! (Ап. ижи 2:5—12). Мындый кайкалдыҥ кийнинеҥ Кудай слерди агару тыныла майлады деп, бир де алаҥзыбас эдеер. Је кажы ла майлаткан кижи агару тынды мынайып алып турган ба? Јок. Бис мыны кайдаҥ билерис?

4. Баштапкы чакта улус бир ле ӧйдӧ майлаткан ба? Јартап беригер.

⁴ Кижи качан майладып турганын шӱӱжип ийектер. Б. э. 33 јылында, Беженинчи кӱнде, јаҥыс ла 120 кире ӱренчик майлатпаган. Бу кӱнде база да 3 000 кире кижи агару тынла майлаткан. Олор агару тынды сууга чӧҥӱрилип јаткан тужында алган (Ап. ижи 2:37, 38, 41). Је кезик христиандар ӧскӧ ӧйдӧ майлаткан. Темдектезе, самаритяндар агару тынды чӧҥӱрилгенинеҥ канча да кире ӧй ӧдӧ берерде алган (Ап. ижи 8:14—17). А Корнилий ле оныҥ айылындагы улузы агару тынла чӧҥӱрилердеҥ озо майлаткан (Ап. ижи 10:44—48).

5. 2 Коринфтегилерге 1:21, 22-ле болзо, майладып калган кижиле не болот?

⁵ Эмди дезе, кижи майладып калза, оныла не болуп турганын шӱӱжип ийектер. Кезик улуска, Иегова олорды талдап алган деп санаага ӱренижерге баштап тарый кӱч болот. Олор: «Кудай нениҥ учун мени талдап алган?» — деп сананардаҥ айабас. Је кезик майлаткандар мынайып сананбай јат. Кандый да болзо, апостол Павел, ончо майлаткандарла не болуп турганын јартап берген: «Ого бӱдереерде, Кудай слерге таҥма * тургускан. Мынызы — слерге берер болгон Агару Тын. Ол энчибисти аларыс деп, биске бӱдӱмји эдип... берилген» (Еф. 1:13, 14). Айдарда, бу христиандар талдалганын јарт оҥдоп турзын деп, Иегова агару тынын тузаланат. Бу христиандар келер ӧйдӧ јерде эмес, је ӱргӱлјиге  теҥериде јадар деп, агару тын олорго кере, ол эмезе гарантия берет. (2 Коринфтегилерге 1:21, 22 кычырыгар.)

6. Майлаткан христиан теҥеридеги кайралды аларга нени эдер учурлу?

⁶ Христиан кижи майладып калган болзо, теҥериге баратан кайрал ого кыйалта јогынаҥ берилер бе? Јок. Андый христиан, Иегова оны теҥериге талдап алганына алаҥзыбай турган да болзо, мындый сӧстӧрди ундыбас учурлу: «Карындаштар, слерди Кудай кычырып ла талдап алганын јӱрӱмде кӧргӱзерге кичеенигер. Анайда эдип, качан да бӱдӱрилбезигер» (2 Петр 1:10). Оныҥ учун майлаткан христиан теҥериге барар деп талдалып калган да болзо, је кайралды јӱк ле чындык арткан кийнинде алар (Флп. 3:12—14; Евр. 3:1; Ачыл. 2:10).

7. Кижи теҥериге кычырылып турганын канайып билип ийет?

⁷ Кижи теҥериге кычырылганын канайып билип ийет? Бу сурактыҥ каруузы апостол Павелдиҥ, «агару... болорго кычырылган» улуска айткан сӧстӧринде бичилген: «Слер ойто коркып јӱрбес учурлу, слер кулданыштыҥ тынын албадыгар, је слерди Кудайга балазынып турган Тынды алдыгар. Бу Тынла: „Авва, Ада!“ — деп, кыйгырып јадыбыс. Ол ок Тын бистиҥ тынла кожо бисти Кудайдыҥ балдары деп керелейт» (Рим. 1:7; 8:15, 16). Айдарда, Иегова, майлаткан кижи теҥериге кычырылып турганын јарт билип ийзин деп, агару тынын тузаланып јат (1 Фес. 2:12).

8. 1 Иоанн 2:20, 27 майлаткандардыҥ теҥериге кычырылганын Иегованаҥ ӧскӧ кем де керелебей јат деп канайып кӧргӱзет?

⁸ Иегова майлаткандарга теҥериге барар деп јап-јарт кӧргӱзип берет, оныҥ учун олор майлатканында бир де алаҥзыбай јат. (1 Иоанн 2:20, 27 кычырыгар.) Майлаткандарга, ончобыска ла чылап, Иегованаҥ ӱренер керек, анайда ок јуун ажыра Оныҥ берип турган ӱредӱзин баалаар керек. Је олорды Иегованаҥ ӧскӧ кем де майлаткандар деп керелебей јат. Иегова агару тыныла — Јер-телекейде эҥ јаан ийделе, майлаткандар теҥериге кычырылганын јарт оҥдозын деп, тузаланып јат.

9. Ефестегилерге 1:18-ле болзо, майлаткан кижи канайып солынып калат?

⁹ Кудайдыҥ кӧп саба ишчилерине кижи агару тынла канайып майладып турганын оҥдоорго кӱч болот. Нениҥ учун дезе кӧп саба улус агару тынла майлалбай јат. Иегова улусты ӱргӱлјиге јӱрер эдип јайап турарда, теҥериде јӱрер эдип эмес, је јерде јӱрер эдип јайаган (Баш. 1:28; Сар. 37:29). Је Кудай кезик улусты теҥериде јӱрер эдип амадап салган. Оныҥ учун Кудай андый улусты майлаган кийнинде санаазын бӱдӱнге солып, теҥериде јӱретен јаҥы ижемји берет. (Ефестегилерге 1:18 кычырыгар.)

10. Ӧрӧртинеҥ туулганы дегени нени темдектейт? (Сносканы база кӧрӱгер.)

¹⁰ Кижи майлалып калза, ӧрӧртинеҥ ол эмезе јаҥыдаҥ туулган болот *. Ӧрӧртинеҥ туулганын, ӧскӧртӧ айтса агару тыннаҥ туулганын, Иисустыҥ айтканыла болзо, агару тынла майлалбаган кижи учына јетире аайлап болбос (Иоанн 3:3—8).

11. Майлаткан улустыҥ санаазы канайып солынып калат?

¹¹ Майлаткан улустыҥ санаазы канайып  солынып калат? Майладардаҥ озо олор ӱргӱлјиге јерде јадатан ижемјилӱ болгон. Олор, Иегова јаманды јоголтып, јердиҥ ӱстин ойто рай эдерин сӱреен тыҥ сакыган. Анайда ок, тирилген јуук улузын да уткыырга иженген болор. Је майлатканынаҥ ала ӱзе солына берген. Нениҥ учун? Олордыҥ санаазы, кандый бир кӱчтердиҥ кийнинеҥ јердеги јӱрӱмге чӧкӧй бергенинеҥ улам эмезе ӱргӱлји јӱрӱм кунукчылду болор деп сананганынаҥ улам солынган эмес. Андый солынталар Иегова агару тыныныҥ болужыла олордыҥ санаазын ла ижемјизин солып салганынаҥ улам болгон.

12. 1 Петр 1:3, 4-лӧ болзо, майлаткан христиандар келер ӧйдӧ алатан кайралын сананып, нени сезет?

¹² Кезик майлаткандар бойын теҥериге баратан кайралды аларга турбас деп сананып турган болор. Је Иегова олорды талдап алган деп, олор бир де алаҥзыбай јат. Келер ӧйдӧ алатан кайралын сананганда, олордыҥ јӱреги сӱӱнчиле толуп, быйанду болот. (1 Петр 1:3, 4 кычырыгар.)

13. Майлаткандар јердеги јӱрӱмине кандый кӧрӱмдӱ болот?

¹³ Айдарда, майлаткандар тӱрген ле божоп каларга кӱӱнзеп турган ба? Бу суракка апостол Павел каруу берген. Ол, майлаткан христиандардыҥ эди-канын чадырга (шатер) тӱҥдештирип: «Бис бу чадырда јӱрӱп, уур јӱктиҥ алдында онтойдыс, бу чадырды бойыбыстаҥ уштыырга турганыс учун эмес, ӧлӱмдӱни јӱрӱм јуда салзын деп, теҥеридеги чадырга кирерге турганыс учун» (2 Кор. 5:4). Бу христиандар јердеги јӱрӱмге чӧкӧп, оны тӱрген ӧдӱп калзын деп кӱӱнзебей јат. Карын, олор јӱрӱмди сӱӱп, најыларыла, тӧрӧӧндӧриле кожо Иеговага иштеген кажы ла кӱнди баалап јадылар. Је андый да болзо, олор келер ӧйдӧ алатан сӱрекей јакшы ижемјизин бир де ундыбай јат (1 Кор. 15:53; 2 Петр 1:4; 1 Иоанн 3:2, 3; Ачыл. 20:6).

14. Слерди Иегова теҥериге кычырбаган деп, недеҥ кӧрӱнет?

¹⁴ Слер: «Иегова мени агару тынла майлаган ба?» — деп, билерге турган болороор. Эйе деп сананып турган болзогор, бу сурактарды шӱӱп кӧрӱгер: слер Иегованыҥ кӱӱн-табын сӱрекей тыҥ кӱӱнзеп бӱдӱредигер бе? Јарлаар ишке бар-јок кӱчигерди бередигер бе? Слерге Кудайдыҥ Сӧзин тереҥ шиҥдеп, «Кудайдыҥ јажыдыныҥ тереҥин» билерге јарап турган ба? (1 Кор. 2:10). Иегова слерге јарлаар иште сӱрекей јакшы једимдерге једерге алкыжын берет пе? Слер бойыгарды улуска кӧгӱс јанынаҥ болужар молјулу деп сезедигер бе? Иегова слерге кӧп катап болушкан деп бӱдӱп јадыгар ба? Слер бу сурактардыҥ ончозына: «Эйе» — деп каруу берген болзогор, слерде теҥериге баратан ижемји бар ба? Јок. Нениҥ учун дезе мындый сезимдер јӱк ле майлаткандарда эмес, је Кудайдыҥ ончо ишчилеринде де болуп јат. Иегованыҥ агару тыны теҥериде де, јерде де јадатан христиандарга теҥ берилет. Слер агару тынла майлатканаар деп, алаҥзып турган болзогор, Иегова слерди майлабаган деп, јарт кӧрӱнип јат. Иегованыҥ теҥериге кычырылган улузы агару тынла майлалганына бир де алаҥзыбайдылар. Олор майлатканын јарт билип јат!

15. Агару тын алган улустыҥ кезиги теҥериге кычырылбай јат деп, бис кайдаҥ билерис?

¹⁵ Агару Бичикте Кудайдаҥ агару тын алган, је теҥериге кычырылбаган кӧп чындык ишчилердиҥ учуралдары бар. Темдектезе, Кудайдыҥ агару тыны Давид каанга  берилген (1 Сам. 16:13). Агару тын ого Иегова керегинде тереҥ чындыктарды оҥдоорго болужып, Агару Бичиктиҥ кезик ӱзӱктерин бичиирге кӱӱнзеткен (Марк 12:36). Андый да болзо, Беженинчи кӱнде Петр Давидти «теҥериге чыкпаган» деп айткан (Ап. ижи 2:34). Крестеечи Иоаннга база агару тын берилген (Лука 1:13—16). Иисустыҥ айтканыла, «энедеҥ чыккандар ортодо Иоаннаҥ јааны јок». Је Иоаннды Иисус теҥеридеги Каандыкка кирбес деп айткан (Матф. 11:10, 11). Иегова бу улуска агару тынды теҥеридеги јӱрӱмге кычырарга эмес, је кайкамчылу керектер эдерге берген. Андый болзо, бу улустыҥ бӱткени, теҥериге кычырылган улустыҥ бӱткенине кӧрӧ, ас болгон бо? Јок. Бу дезе, Иегова олорды јердеги райда тиргизип саларын кӧргӱзет (Иоанн 5:28, 29; Ап. ижи 24:15).

16. Кудайдыҥ кӧп саба ишчилеринде кандый ижемји бар?

¹⁶ Бӱгӱнги кӱнде Кудайдыҥ ишчилериниҥ кӧп сабазы теҥериге кычырылбаган. Олор, библиялык ӧйлӧрдӧ јаткан Авраам, Сарра, Давид, Крестеечи Иоанн ла оноҥ до ӧскӧ чындык эр ле ӱй улус чылап, Каандыктыҥ башкарар ӧйинде јадарга тыҥ кӱӱнзеп јадылар (Евр. 11:10).

17. Келер јӧрмӧлдӧ кандый сурактар шӱӱжилер?

¹⁷ Эм тургуза майлаткандардыҥ кезиги теҥериге баргалак болордо, мындый сурактар чыгат (Ачыл. 12:17). Майлаткандар бойына кандый кӧрӱмдӱ болор учурлу? Кайраканныҥ Эҥиринде кем-кем калаштаҥ јип, кызыл аракынаҥ амзаза, биске бойысты канайып тудунар керек? Андый улустыҥ тоозы кӧптӧп турганына бис кайкаарыс па? Бу сурактар келер јӧрмӧлдӧ шӱӱжилер.