1, 2. Иегованыҥ ишчилеринде кандый кӱчтер болот, бу кӱчтер неге экелет?

ӰЧ УЧУРАЛ кӧрӱп ийектер: јиит карындашка јаман диагноз тургузып јат; 50 јаштаҥ ажа берген билелӱ ака ижин јылыйтып салала, ӧскӧ иш табып болбой јат; Кудайга чындык эје, јажы јаанап, су-кадыгы уйадап турарда, Иеговага кӧп иштеп болбой барган.

² Слерде бу учуралдардыҥ кажы бирӱзи болуп турган болзо, бойоорды эш-кереги јок кижи деп сананып баштаардаҥ айабазаар. Андый айалгалардаҥ улам сӱӱнчигер јылыйып, бойоорды тообой барарыгар, анайда ок улусла колбулараар ӱрелер болор.

3. Сатана ла оныҥ телекейи кижиниҥ јӱрӱмин баалап турган ба?

³ Бу телекей кижиниҥ јӱрӱмин Сатана ла чылап баалабай јат. Сатана улусты качан да не де кире бодобогон. Ол, кижи Кудайдыҥ сӧзин укпаза ӧлӱп калар деп билген де болзо, Еваны бир де килебей, јайым болорыҥ деп тӧгӱндеп салган. Сатана бу телекейдиҥ коммерческий ле политический анайда ок кудай јаҥдарыныҥ системазын јаантайын башкарган. Оныҥ да учун кӧп бизнесмендердиҥ, политиктердиҥ ле кудай јаҥдардыҥ башчыларыныҥ кижиниҥ јӱрӱмин бир де баалабай турганын кайкабай јадыс.

4. Бу јӧрмӧлдӧ бис нени шӱӱп кӧрӧрис?

⁴ Је Иегова Кудай бисти бойысты баалап турзын деп кӱӱнзейт, анайда ок кӱч айалгалардаҥ улам бойыска чӧкӧп турзаас, болужып јат (Сар. 136:23; Рим. 12:3). Бу јӧрмӧлдӧ Иегова биске канайып болужып турганын шӱӱжип ийерис: 1) ооруп  турзаас, 2) акча-манатка јединбей турзаас, 3) јажыс јаанап, Иеговага иштеп болбой турганыстаҥ улам, бойысты эш-кереги јок деп сезип турзаас. Је озо баштап, Иегова кажы ла кижини баалап турганын бис кайдаҥ билерис деп суракты шӱӱжип ийектер.

5. Иегова улусты баалап турган деп, слер нениҥ учун алаҥзыбай јадыгар?

⁵ Бис јердиҥ тобырагынаҥ јайалган да болзоос, Кудайдыҥ кӧзинде баалу эрјинелер болуп јадыс (Баш. 2:7). Иегова бисти нениҥ учун анайып баалап турганын билерге, тоолу шылтактар кӧрӱп ийектер. Ол улусты бойына тӱҥей кылык-јаҥду эдип јайаган (Баш. 1:27). Оныҥ учун бис Кудайдыҥ кӧзинде, јердеги јайаандарга кӧрӧ, канча катапка баалу болодыс. Анайда ок Иегова биске јерди ле тындуларды «башкарар» јаҥ берген (Сар. 8:4—8).

6. Иегова толо кемдӱ эмес улусты баалап турган деп, база недеҥ кӧрӱнет?

⁶ Адам кинчек эдип ийерде де Иегова улусты баалаган. Ол бисти сӱрекей тыҥ баалап турганынаҥ улам, бойыныҥ сӱӱген Уулын, Иисусты, бис учун толынты эдип берген (1 Иоанн 4:9, 10). Иегова Христостыҥ толынты тайылгазына тайанып, Адамныҥ кинчегинеҥ улам божоп калган улусты — «актуларды да, акту эместерди де» тирилтип алар (Ап. ижи 24:15). Айдарда, Агару Бичиктеҥ кӧргӧнисле, бис канча да јашту болзоос, су-кадыгыс кандый да болзо эмезе бай да, јокту да болзоос, Иегова бисти баалап јат (Ап. ижи 10:34, 35).

7. Иегова бисти база кандый шылтактардаҥ улам баалап јат?

⁷ Иегова бисти оноҥ до ӧскӧ шылтактардаҥ улам баалап јат. Ол бистиҥ сӱӱнчилӱ јарды канайып алынганысты кӧрӧлӧ, бисти бойына јууктадып алган (Иоанн 6:44). Бис ого јууктап баштаарыста, ол до биске јууктаган (Иак. 4:8). Анайда ок Иегова бисти ӱредерге, ас эмес ӧйин ле ийде-кӱчин берет. Мынаҥ бисти баалап турганы кӧрӱнет. Ол бисти эм тура кандый болгонысты ла келер ӧйдӧ кандый болорысты кӧрӱп јат. Бого коштой, Иегова бисти сӱӱп турганы учун тӱзедет (Укаа 3:11, 12). Бу ончо немедеҥ, бис Иегованыҥ кӧзинде баалу эрјинелер болгонысты кӧрӱп јадыс!

8. Сарын 18:27—29 кӱчтерге чын кӧрӱмдӱ болорго канайып болужат?

⁸ Кезик улус Давид каанды неге де турбас кижи деп јамандап туратан. Је ол, Иегова оны сӱӱп, ого болужып турганын билер болгон. Оныҥ учун Давид кӱч айалгаларда чын кӧрӱмдӱ арткан (2 Сам. 16:5—7). Качан бис кунугып эмезе кӱчтерге табартсаас, Иегова биске де болужарга белен. Мынаҥ улам бис ӱзе немеге чын кӧрӱмдӱ болуп, кандый ла кӱчтерди ӧдӧр аргалу болодыс. (Сарын 18:27—29 кычырыгар *.) Айдарда, биске Иегова болужып турган болордо, Оныҥ ижин сӱӱнчилӱ бӱдӱрерге, биске кандый бир неме чаптыгын јетирип болор бо? (Рим. 8:31). Эмди, Иегованыҥ бисти сӱӱп ле баалап турганын, анчада ла кандый ӱч учуралда ундыбас керек деп шӱӱжип ийектер.

9. Оору-јоболдоҥ улам кандый сезимдер болордоҥ айабас?

⁹ Кезикте оору-јоболдоҥ улам, эмоциональный ийде-кӱчис чыгып, бойысты эш-кереги јок деп санааркап јадыс. Улус бистиҥ ооруп турганысты кӧрӱп ийзе эмезе биске улустаҥ болуш сураарга келишсе, эбијоксынардаҥ айабазыс. Ол эмезе бистиҥ ооруп  турганысты кем де билбес те болзо, бис алдындагызындый чылап кӧпти эдип болбой барганыстаҥ улам, бойысты јинип турган болорыс. Мындый кӱч ӧйдӧ Иегова биске ийде-кӱч берет. Канайып?

10. Укаа сӧстӧр 12:25-ле болзо, ооруган тужыста биске не болужар?

¹⁰ Бис ооруп турзаас, «јакшы сӧс» ийде-кӱч берер аргалу. (Укаа сӧстӧр 12:25 кычырыгар *.) Агару Бичикте Иегова кӧп јакшы сӧстӧр кичееп салган. Бу сӧстӧр, Иегова бисти ооруп та турзаас, баалап турган деп кӧргӱзет (Сар. 31:19; 41:3). Бис Иегованыҥ тыныла бичилген сӧстӧрди кычырып, керек тушта канча ла катап кычырып турзаас, Иегова биске оорудаҥ улам келген јаман санааларла тартыжарга болужар.

11. Иегова бир акага канайып болушкан?

¹¹ Хорхе деген акала мындый учурал болгон. Јиит тужында ого југуш оору табарган. Бу оору коркышту капшай тыҥып, оныҥ кӧп ийде-кӱчин айрып турарда, ол бойын эш-кереги јок деп сезип баштаган. Ол айдат: «Бу оорунаҥ улам келген сезимдерге белен болбогом, оныҥ учун улустыҥ ајару эдижинеҥ эбијоксынып туратам. Ооруум там ла тыҥып турарда, оноҥ ары не болор деп санаалар амыр бербей барган. Оныҥ учун тыҥ кунугып, Иеговага јайнап, болуш сурагам». Иегова ого кандый каруу бергенин Хорхе эске алынат: «Оорунаҥ улам меге кычырарга кӱч болгон, оныҥ учун мен Сарындардыҥ тоолу ла ӱлгерлерин кычырып туратам. Бу ӱлгерлерде Иегова бойыныҥ ишчилерин кичееп турган деп айдылат. Олорды кажы ла кӱн кычырып, јаан токунал алатам. Оноҥ бир эмеш ӧй ӧдӧ берерде, мени улус сӱӱнчилӱ болуп калган деп ајарып баштаган. Мениҥ јакшы кӱӱн-санаамды кӧрӱп, олордыҥ да кӱӱни кӧдӱрилип  калатан. Мынайып, Иегова мениҥ мӱргӱӱлдеримге каруузын берген деп оҥдоп ийгем! Ол меге бойымга чын кӧрӱмдӱ болорго болушкан. Агару Бичиктиҥ болужыла, мен ооруп та турган болзом, Иегова мени баалап турган деп оҥдоп алгам».

12. Ооруган тужыста Иегованыҥ болужын аларга, нени эдер керек?

¹² Слер ооруп турган болзогор, Иегова слердиҥ кӱчтереерди кӧрӱп турган деп, бир де алаҥзыбагар. Бойоордыҥ айалгаарга чын кӧрӱмдӱ болорго, Кудайдаҥ болуш сурагар. Оноҥ, Агару Бичиктеҥ слерди токунаткадый Иегованыҥ јакшы сӧстӧрин бедирегер. Анчада ла, Иегова бойыныҥ ишчилерин тыҥ баалаганын кӧргӱскен ӱлгерлерди јазап шӱӱп сананыгар. Ол тушта, слер Иегованыҥ бойыныҥ чындык ишчилерине јалакай болгонын кӧрӱп ийеригер (Сар. 84:11).

13. Билениҥ бажы ижин јылыйтса, кандый сезимдерге табартардаҥ айабас?

¹³ Кажы ла билениҥ бажы, билезиниҥ ӱзе немези јеткил болзын деп кӱӱнзейт. Темдектезе, христиан билениҥ бажы, ижинде јаман неме этпеген де болзо, ижинеҥ чыгардырып ийген. Ого иштеер иш чек табылбай турарда, ол бойын эш-кереги јок кижи деп сезет. Је бу ӧйдӧ ол бойыныҥ санааркаштарын сананбай, Иегованыҥ сӧстӧрин сананган болзо, айалга кандый болор эди?

14. Иегова айткан сӧзин нениҥ учун јаантайын бӱдӱрип јат?

¹⁴ Иегова айткан сӧзин јаантайын бӱдӱрет (Иис. Н. 21:45; 23:14). Нениҥ учун? Баштапкызында, Кудайдыҥ ады макталат. Иегова бойыныҥ чындык ишчилерине болужар деп сӧзин берген, оныҥ учун айткан сӧзин бӱдӱрерин — молју деп кӧрӧт (Сар. 31:1—3). Экинчизинде, Иегова бойыныҥ улузына болушпаза, бисти Оноҥ чӧкӧй берер деп оҥдоп  јат. Ол биске ич-кӧгӱс те јанынаҥ, акча-јӧӧжӧ дӧ јанынаҥ болужарга, Ого не де чаптык эдип болбос деп сӧзин берет! (Матф. 6:30—33; 24:45).

15. а) Баштапкы чактыҥ христиандары кандый кӱчтерге туштаган? б) Сарын 37:18, 19 бисти неде бӱдӱмјилейт?

¹⁵ Иегова айткан сӧзин нениҥ учун јаантайын бӱдӱрип турганын ундыбай турзаас, ол бисти акча-манатка јединбей турган ӧйдӧ артыргыспас деп санааркабазыс. Баштапкы чактыҥ христиандарын сананып ийектер. Иерусалимдеги јуун тыҥ истежӱлерге табартарда, «апостолдордоҥ ӧскӧзи ончозы... јерлер сайын тозо бергендер» (Ап. ижи 8:1). Андагы христиандарга коркышту кӱч болгонын сананып ийзеер де. Олор тураларын, ижин эмезе бойыныҥ бизнесин јылыйткан болор. Је Иегова олорды артыргыспаган, олор бойлоры дезе, сӱӱнчизин јылыйтпаган (Ап. ижи 8:4; Евр. 13:5, 6; Иак. 1:2, 3). Иегова озогы чындык христиандарга болушкан болордо, кыйалта јогынаҥ биске де болужар. (Сарын 37:18, 19 кычырыгар *.)

16. Иегова бисти баалабай турган деп, недеҥ улам сананып баштаардаҥ айабазыс?

¹⁶ Јажыс јаанаган сайын, биске Иеговага чек ас иштеп турганыс деп билдирердеҥ айабас. Давид каан јажы јаанап турарда база андый сезимдерге алдырган болор (Сар. 71:9). Мындый ӧйдӧ Иегова биске канайып болужар аргалу?

17. Джери эјениҥ учуралынаҥ бис неге ӱренедис?

¹⁷ Джери эјениҥ учуралын кӧрӱп ийектер. Оны Каандыктыҥ Тураларын обслуживать эдетен ӱредӱге кычырарда, эје бу ӱредӱге барарга кӱӱнзебеген. Ол айдат: «Мен карып калгам, ӧбӧӧним де божоп калган. Мен нени  де эдип билбезим. Менеҥ кандый болуш болотон?» Је андый да болзо, эје ӱредӱнеҥ бир кӱн озо, эҥирде Иеговага јӱрегинде не барын чыгара айдынып јат. Эртезинде эје Каандыктыҥ Туразына, менеҥ кандый туза болор деп санаалу једип келген. Ӱредӱниҥ ӧйинде акалардыҥ бирӱзи: «Эҥ керектӱзи — Иегованаҥ ӱренерге белен болор керек» — деп айткан. Джери эје айдат: «Бу сӧстӧрдиҥ кийнинеҥ: „Ӱренетен кӱӱн менде бар!“ — деп санангам. Бу сӧстӧр ажыра Иегова мениҥ мӱргӱӱлимге каруу берди деп оҥдоп ийеле, тыҥ ыйлай бергем. Мыныҥ кийнинеҥ, мен Иеговага тузалу кандый бир иш эдер аргалу, анайда ок ол мени ӱредип аларга кӱӱнзейт деп бӱдӱмјиленип алгам!» Эје ӱредӱге барган ӧйин сананып, мынайып айдат: «Ӱредӱге барып јадарымда, кылыктанып, ачынып-кородоп калган болгом, је ӱредӱниҥ кийнинеҥ тыҥ сӱӱнип, кӱӱним кӧдӱрилип, бойымды керектӱ деп сезип јандым!»

18. Иегова бистиҥ ижисти, јажыс јаанап та калза, баалап турган деп, Агару Бичик канайып кӧргӱзет?

¹⁸ Бис канча да јашту болзоос, Иегованыҥ организациязында биске иш јаантайын табылар (Сар. 92:12—15). Бис кӧпти эдип болбой турганыс эмезе чек ас иштенип турганыс деп сананып турган да болзоос, је Иисустыҥ ӱреткениле Иегова бистиҥ ижисти тӱҥей ле тыҥ баалап јат (Лука 21:2—4). Оныҥ учун озо ло баштап, ийде-кӱчигер јеткедий керектерди сананыгар. Темдектезе, слер улуска Иегова керегинде куучындаар аргалу, ака-эјелер учун мӱргӱӱр аргалу, анайда ок олорды Кудайга чындык артсын деп кӱӱнзедер аргалу. Иегова слерди, Ого эдип турган ижигер учун эмес, је слердиҥ Ого сӧсуккур болгоноор учун, бойыныҥ чындык ишчилери деп кӧрӧт (1 Кор. 3:5—9).

19. Римдегилерге 8:38, 39-та бичилген сӧстӧр неге алаҥзыбай бӱдерге болужат?

¹⁹ Чындык улузын тыҥ баалап турган Иегова Кудайга иштеп јӱрерге, кандый јакшы! Ол бисти оныҥ сӧзин бӱдӱрер эдип јайаган, оныҥ учун Кудайга иштеп јӱрзеес, јӱрӱмис куру ӧтпӧй јат (Ачыл. 4:11). Бу телекей бисти уйан, јаман, неге де турбас улус деп бодоордоҥ айабас, је Иегова бисти эш-кереги јок деп кӧрбӧй јат (Евр. 11:16, 38). Бис оору-јоболдоҥ, јажыс јаанап турганыстаҥ эмезе акча-манатка јединбей турганыстаҥ улам кунугып турган болзоос, бисти теҥеридеги Адабыстыҥ сӱӱжинеҥ не де айрып болбос деп ундыбай јӱректер! (Римдегилерге 8:38, 39 кычырыгар.)