1. Иегованыҥ кезик ишчилери кандый уур-кӱчтерге табартат?

БАСТЫРА јердиҥ ӱстинде Иегованыҥ кезик ишчилеринде ас эмес санааркаштар ла кыйын-шыра экелип турган кӱчтер болуп јат. Андый ака-эјелер слердиҥ де јуунда бар болор. Олордыҥ кемизи де јаан ооруга табарткан. Кемизиниҥ де јуук кижизи божогон. Кемизи де, јуук кижизи эмезе најызы чындыкты артыргызып саларда, тыҥ санааркап јат. Је кем де ар-бӱткенниҥ тӱбегинеҥ улам шыралап јат. Мындый ака-эјелердиҥ ончозына болужып, олорды токунадар керек. Олорго канайып болужарга јараар?

2. Нениҥ учун кезикте апостол Павелге болуш керек болгон?

² Кезикте апостол Павел уур-кӱчтердеҥ улам арай ла божобой туратан (2 Кор. 11:23—28). Анайда ок ол «тегенегинеҥ» улам ас эмес шыралаган. Бу тегенек оныҥ кандый бир оору-јоболы болгон болор (2 Кор. 12:7). Бого ло коштой, кандый да ӧйдӧ Павелле кожо иштеген Димас, «эмдиги телекейди сӱӱп», оны артыргызып саларда, Павелге коркышту ачу болгон (2 Тим. 4:10). Павел јалтанбас, бойын килебес, улуска ла болужып јӱретен майлаткан ака болгон до болзо, је кезикте ол до ал-санаага алдыртып туратан (Рим. 9:1, 2).

3. Иегова Павелдиҥ кӱӱнин канайып кӧдӱрип, болужып туратан?

³ Павел, керектӱ токуналды ла болушты алган ба? Эйе. Иегова ого агару тыныныҥ болужыла ийде-кӱч берген (2 Кор. 4:7). Анайда ок Кудай ого ӧскӧ ака-эјелер ажыра болушкан. Павел олордыҥ кезиги керегинде мындый сӧстӧр  бичиген: «Олор меге коот [болуш] болгондор» (Кол. 4:11). Павелдиҥ кӱӱнин кӧдӱрип, уур-кӱчтерди ӧдӧргӧ болушкан улустыҥ тоозына Аристарх, Тихик ле Марк кирген. Бу ӱч аканыҥ кандый кылык-јаҥы Павелге болуш болгон? Бис бой-бойыстыҥ кӱӱнисти кӧдӱрерге ле бой-бойыска болужарга, олордоҥ неге ӱренер аргалу?

4. Нениҥ учун Аристархты Павелдиҥ чындык најызы деп айдарга јараар?

⁴ Македон јериниҥ Фессалоника калазынаҥ болгон Аристарх деген ака, Павелдиҥ чындык најызы болгон. Аристарх керегинде баштапкы катап Павелдиҥ Эфестеги ӱчинчи миссионер јоругында айдылат. Ол тушта Эфестиҥ улузы Аристархты тудуп алган (Ап. ижи 19:29). Је качан оны божодып ийерде, ол тӱрген ле качпай, Павелле кожо артып калган. Канча да ай ӧдӧ берерде, Грецияда ӧштӱлер Павелди ӧлтӱрерге де турарда, Аристарх оны артыргыспаган (Ап. ижи 20:2—4). Б. э. 58 јылы кирезинде, каруулда отурган Павел Римдӧӧн аткарылып јат. Бу узун јолдо корабльды јаан толкулар оодып та турарда, Аристарх оныла кожо болгон (Ап. ижи 27:1, 2, 41). Ол, Римде кандый да ӧйдӧ Павелле кожо каруулда отурган (Кол. 4:10). Бу кӱч ӧйлӧрдӧ, Аристарх Павелге јаан болуш болгон.

5. Укаа сӧстӧр 17:17-ле болзо, чындык најы кандый болот?

⁵ Бис те ака-эјелерге, јаҥыс ла јакшы амыр ӧйдӧ эмес, је «кыйын-шыраныҥ ӧйинде» де, Аристарх чылап, чындык најылар болор аргалу. (Укаа сӧстӧр 17:17 кычырыгар *.) Ака-эјелердиҥ кӱч ӧйлӧри ӧдӱп те калза, олорго тӱҥей ле болужар керек. Темдектезе, Франсес * эјениҥ адазы рак оорудаҥ божоп каларда, ӱч ле айдаҥ энези божогон. Ол эје мынайып айдат: «Мындый ачу-коронныҥ кийнинеҥ, узак ӧйгӧ токунап болбой јадыҥ. Оныҥ учун, ада-энемниҥ божогонынаҥ бери кӧп ӧй ӧткӧн дӧ болзо, је меге кӱч болуп турганын  ундыбай турган чындык најыларымды баалап јадым».

6. Најыларыска чындык болгоныс бисти неге кӱӱнзедет?

⁶ Најыларыска чындык болзоос, бис олорго ӧйисти ле кӱчисти берерге белен болорыс. Тем кӧрӱп ийектер: Питер деп ака тыҥ ооруга табарткан. Оныҥ эш-нӧкӧри Кэтрин мынайып куучындайт: «Биске Питердиҥ диагнозын угарга, врачка барар керек болордо, јуундагы бир биле, бисти машиналу јетиргизип салган. Анда, Питердиҥ эмделбес јаан оорула ооруп калганын угуп ийгенис. Је бу ла ӧйдӧ, олор бисти, оорула тартыжарга, бир де артыргыспазыс деген. Бу биле, биске керек ле болзо, болужарга белен болгон». Айдарда, кӱч ӧйлӧрдӧ болужарга белен чындык најыларлу болоры кандый јакшы!

7, 8. Колоссыдагыларга 4:7—9-ла болзо, Тихикти нениҥ учун чындык најы деп айдарга јараар?

⁷ Тихик, Азиядагы Рим јериниҥ христианы, Павелдиҥ база бир чындык најызы болгон (Ап. ижи 20:4). Б. э. 55 јылы кирезинде, Павел Иудей јеринде јаткан христиандарга болуш эдип акча јууп баштаган. Тихик бу јаан иште база турушкан болор (2 Кор. 8:18—20). Соондо, качан Павел Римде баштапкы катап каруулда болордо, ол Тихикке, Азия јериндеги јуундарга оныҥ самараларын јетирзин деп ле ондогы ака-эјелердиҥ кӱӱнин кӧдӱрзин деп, јакылта берген (Кол. 4:7—9).

⁸ Тихик јаантайын Павелдиҥ чындык најызы болгон (Тит. 3:12). Ол ӧйлӧрдӧ Тихиктий бӱдӱмјилӱ христиандар ас болгон. Б. э. 65 јылы кирезинде Павел экинчи катап каруулда отурарда, Азия јериниҥ акалары оныла куучындашпай туратан. Олор, ӧштӱлердеҥ коркыган болор (2 Тим. 1:15). Је Павел, Тихикти бӱдӱмјилӱ кижи болгонын билип, ого база бир јакылта берген (2 Тим. 4:12). Павел андый најызын тыҥ баалаган эмей.

9. Тихиктеҥ бис кандый тем аларыс?

⁹ Бис те, Тихик чилеп, чындык најы болор аргалу. Темдектезе, бис ака-эјелерге  болужысты јӱк ле сӧслӧ эмес, је сӧзисти керектерисле кӧргӱзерге албаданадыс (Матф. 5:37; Лука 16:10). Болуш керексип турган улус, бисти олорго болужар деп билип турза, чыннаҥ ла токунал алат. Бу шӱӱлтени бир эје мынайып јартайт: «Кижи айткан сӧзин бӱдӱрер деп бӱдӱп турзаҥ, јӱрегиҥ амыр болот».

10. Укаа сӧстӧр 18:24-лӧ болзо, ченелтеге туштап, чӧкӧп калган улуска кемдер болужар аргалу?

¹⁰ Ченелтеге туштаган эмезе недеҥ-недеҥ чӧкӧп калган улус, чындык најызына иженер аргалу деп билип турза, олордыҥ санаазына да јеҥил болот. (Укаа сӧстӧр 18:24 кычырыгар *.) Јууннаҥ уулын чыгарып ийерде, тыҥ санааркаган Биджей ака куучындайт: «Меге сезимдеримди оҥдоор кижи керек болгон». А Карлос ака дезе, билбей калала јастырганынаҥ улам, јуундагы молјуларын јылыйтып, мындый сӧстӧр айдат: «Мындый ӧйдӧ јӱрегимдеги сезимдеримди айдынзам, мени јамандабай ла угатан улус керек болгон». Карлоско кӱчтерин ӧдӧргӧ аксагалдар болушкан. Олор оны јазап угуп, билип алганын кемге де куучындабаган. Карлоско бу база јараган.

11. Бӱдӱмјилӱ најы болорго, нени эдер керек?

¹¹ Бӱдӱмјилӱ чындык најы болорго, биске чыдамкай болор керек. Темдектезе, Жаннаны эш-нӧкӧри таштап ийерде, ол сезимдерин јуук најыларына куучындаганынаҥ токунаду алган. Ол эске алынат: «Мен бир ле немени канча катап куучындаган болорым. Је олор мени чыдамкай болуп уккан». Айдарда, улусты угуп билер болзоор, слер де јакшы најы болорыгар.

12. Марк кандый кижи болгон, оныҥ болужарга белен болгоны недеҥ кӧрӱнип туратан?

¹² Марк еврей укту христиан болгон. Ол Иерусалимде јаткан. Оныҥ Варнава деп тӧрӧӧни јарлу миссионер болгон (Кол. 4:10). Марк арга-чакту биледе чыдаган болор, је ол качан да акча-јӧӧжӧгӧ тартылбаган. Карын бастыра јӱрӱмине Марк улуска акту јӱрегинеҥ болужып јӱретен. Темдектезе, ол Павел ле Петр апостолдорло иштеп, олорго курсак-тамак алып, конор јер бедиреп, оноҥ до ӧскӧ сурактардыҥ аайына чыккан болор (Ап. ижи 13:2—5; 1 Петр 5:13). Павел Маркты «Кудайдыҥ Каандыгына болуп иштеп» јӱрген бойыныҥ болушчыларыныҥ тоозына кошкон (Кол. 4:10, 11).

13. 2 Тимофейге 4:11-деҥ Павел Марктыҥ болужын баалаган деп, канайып кӧрӱнет?

¹³ Марк Павелдиҥ јуук најыларыныҥ бирӱзи болгон. Б. э. 65 јылы кирезинде Павел, Римде калганчы каруулда тужында, Тимофейге экинчи самара бичиген. Ол бу самарада Тимофейди Римге келзе, Маркты кожо алганча келзин деп сураган (2 Тим. 4:11). Павел Марктыҥ болужын сӱреен баалаган, оныҥ учун јӱрӱминиҥ калганчы кӱндеринде оны јанында болзын деп кӱӱнзеген. Марк Павелге бичинерге керектӱ немелер ле курсак-тамак экелип туратан болор. Павел јӱрӱминиҥ калганчы кӱндеринде Марктыҥ болужынаҥ улам, Кудайга чындык арткан болор.

14, 15. Ака-эјелерге болужарга, Матфей 7:12-неҥ неге ӱренедис?

¹⁴ Матфей 7:12 кычырыгар. Кандый бир тӱбек болуп калза, биске болужын јетирген ака-эјелерге быйанду болодыс. «Тӱбек тужында кӧп керектерди эдип болбой јадыҥ — деп, јеткердеҥ улам адазы  божоп калган Райан куучындайт.— Оныҥ учун бир кичинек те болуш јаан јӧмӧлтӧ болот».

¹⁵ Бис ајарыҥкай болзоос, ака-эјелерге кандый болуш керек болуп турганын кӧрӱп ийерис. Темдектезе, ӧрӧги айдылган Питер ле Кэтринге бир эјениҥ канайып болушканын кӧрӱп ийектер. Питер де, Кэтрин де машинала маҥтадып болбой барган. Оныҥ учун байагы эје график тургузып, олор экӱни больницага апарарга белен ака-эјелерди бу графикке бичип салган. Мынаҥ болуш болды ба? Кэтрин айдат: «Биске андый јеҥил боло берген». Оныҥ учун бистиҥ кичинек те болзо болушканыс, керектӱ болбос деп сананбагар. Анайып болушканыс, ака-эјелерге јаан јӧмӧлтӧ болот ло олордыҥ кӱӱнин кӧдӱрет.

16. Бис Марктыҥ улуска болушканынаҥ неге ӱренедис?

¹⁶ Марк Кудайдыҥ ижине кӧп турушкан. Ол јуунда теократический јакылталар бӱдӱрип, ол тоодо Марктыҥ адыла адалган Сӱӱнчилӱ Јар бичиген. Андый да болзо, Марк Павелге болужатан ӧйди тӱҥей ле табып туратан. Оныҥ учун Павел, Марк ого болужар деп билер болгон. Темдектезе, Анджела эјениҥ јааназын ӧлтӱргилеп саларда, ого болушкан ака-эјелерге ол јаан быйанду болгон. Ол куучындайт: «Најылар акту јӱрегинеҥ болужарга белен болзо, олордоҥ болуш та сураарга јеҥил. Олор, сурабазаҥ да, болужып јат». Оныҥ учун бойыгардаҥ сурагар: «Мени улус, ака-эјелерге болужарга ла олорды токунадарга белен кижи деп, билер бе?»

17. 2 Коринфтегилерге 1:3, 4-тӧги сӧстӧрлӧ болзо, бис ака-эјелерди канайып токунадар аргалу?

¹⁷ Ака-эјелердиҥ кемизине болуш керек болуп турганын кӧрӱп ийерге бир де кӱч эмес. Олорго болужарга, бистиҥ кӱӱнисти кӧдӱрерге айткан ака-эјелердиҥ сӧстӧрин тузаланарга јараар. Јааназы божогон Нино эјениҥ темин кӧрӱп ийектер. «Иегова ака-эјелерди бис ажыра токунадар аргалу, је ол бисти тузаланзын деп, белен болор  керек». (2 Коринфтегилерге 1:3, 4 кычырыгар.) Ӧрӧги айдылган Франсес эје мынайып айдат: «Мен 2 Коринфтегилерге 1:4-тӧги сӧстӧрлӧ јӧпсинип јадым. Бистер, ака-эјелердиҥ бисти токунадарга айткан сӧстӧриле ӧскӧ ака-эјелерди токунадар аргалу».

18. а) Кезик ака-эјелер улусты токунадарга нениҥ учун коркып јат? б) Кижини токунадарга нени эдер керек? Тем куучындап беригер.

¹⁸ Биске улусты токунадарга коркыбас керек. Темдектезе, тӱбекке тӱшкен кижини токунадарга керектӱ сӧстӧр табылбас болор эмезе бойысты канайып тудунарын билбезис деп коркыырдаҥ айабазыс. Је Пол деген аксагал, оныҥ адазы божоордо, ака-эјелер оны токунадарга нени эткенин эске алынат: «Олорго меге јууктап, керектӱ сӧстӧр айдарга јеҥил эмес болгон болор. Је мен тӱҥей ле олордыҥ меге кӱч ӧйдӧ болужарга белен болгонын баалап јадым». Эмди дезе, тыҥ јерсилкинишке туштаган Таджон аканыҥ айтканын кӧрӱп ийектер: «Меге кажы ла ака-эјениҥ айткан ол эмезе бичиген сӧстӧри санаамга кирбейт. Је олордыҥ менде ӱзе јакшы ба деп билерге кӱӱнзегени санаамга јакшы артып калган». Айдарда, кижини токунадарга, оны баалап турганысты кӧргӱзер керек.

19. Слер ака-эјелерге нениҥ учун болужарга белен?

¹⁹ Калју телекейдиҥ учы јууктаган сайын, телекейдеги айалга ла бистиҥ јӱрӱмис там ла кӱч болуп барар (2 Тим. 3:13). Биске ака-эјелердиҥ болужы оноҥ ло ары керек болор, нениҥ учун дезе бис толо кеминде эмезистеҥ улам јастырып јадыс. Павел нениҥ учун учына јетире Кудайга чындык арткан? Нениҥ учун дезе ого христиан најылары болушкан. Айдарда, Аристарх ошкош — чындык, Тихик ошкош — бӱдӱмјилӱ, анайда ок Марк чылап улуска болужарга белен болуп јӱректер. Анайып, бис ака-эјелериске оноҥ ло ары Иеговага чындык иштеерге болужарыс (1 Фес. 3:2, 3).