1, 2. а) Бис божогон јуук кижибисти анчада ла качан јоктоп јадыс? б) Иисус ӱренчиктерине кандый јакару берген?

 БИСТИҤ јуук кижибис божогон болзо, бис оны јоктоп, узак ӧйлӧргӧ кунугып јадыс. Анчада ла оныҥ божогон кӱнинде кунукчылду болот.

² Кажы ла јыл миллиондор тоолу ака-эјелер бистиҥ кару најыбыстыҥ, Иисус Христостыҥ, ӧлӱмин эске аларга јуулыжат (1 Пётр 1:8). Иисус бисти кинчектеҥ ле ӧлӱмнеҥ айрып, толуп аларга бис учун бойыныҥ јӱрӱмин берген (Матф. 20:28). Ол бисти оныҥ ӧлӱмин эске алып турзын деп кӱӱнзеген. Оныҥ учун божоор алдында тӱнде, апостолдорло јуулыжарда, олорго мындый јакару берген: «Мени эске алынып, анайда эдип јӱригер» (Лука 22:19).

3. Бу јӧрмӧлдӧ кандый сурактар кӧрӧрис?

³ Кайраканныҥ Эҥирине келген улустыҥ кезиги теҥериге баратан ижемјилӱ, је кӧп саба улус јерде ӱргӱлјиге јӱрер ижемјилӱ. Бу јӧрмӧлдӧ бу эки бӧлӱк улус нениҥ учун кажы ла јыл Кайраканныҥ Эҥирине келип турганын ла олор мынаҥ кандый туза алып турганын кӧрӧрис. Је озо баштап майлаткандар керегинде кӧрӱп ийектер.

4. Нениҥ учун майлаткандар Кайраканныҥ Эҥиринде калаштаҥ ла кызыл аракынаҥ амзагылайт?

⁴ Майлаткандар кажы ла јыл Кайраканныҥ Эҥирине келзе, ондо туружаачылар болуп, калаштаҥ ла кызыл  аракынаҥ амзагылап јат. Нениҥ учун? Бу сурактыҥ каруузын билерге, Иисус божогон тӱнде кандый учуралдар болгонын эске алып ийер керек. Ол тӱнде Иисус Пасханы ӧткӱрип ийген кийнинеҥ, 11 апостолына эмди кажы ла јыл Кайраканныҥ Эҥирин ӧткӱрзин деп јакару берген. Анайда ок калашты ла кызыл аракыны берип, јаҥы јӧптӧжӱ ле Каандык керегинде јӧптӧжӱ керегинде айткан * (Лука 22:19, 20, 28—30). Бу эки јӧптӧжӱнеҥ улам апостолдордо ло јӱк кезик христиандарда теҥериде каандар ла абыстар болотон арга ачылып јат (Ачыл. 5:10; 14:1). Оныҥ учун Кайраканныҥ Эҥиринде калаш ла кызыл аракынаҥ бу эки јӧптӧжӱге кирип турган майлаткандардыҥ теҥериге баргалактары амзагылайт.

5. Майлаткандар неге бир де алаҥзыбай јат?

⁵ Майлаткандар Кайраканныҥ Эҥиринде Иегова олорго нени белетеп салганын шӱӱп санангылайт. Олор теҥериге барза, кӧскӧ кӧрӱнбес тындар болор ло качан да ӧлӱм кӧрбӧс. Анайда ок олор Иисусла кожо башкарар, Иегованыҥ бойын да кӧрӧр! (1 Кор. 15:51—53; 1 Иоанн 3:2, ЈТ). Олор теҥериге барарыс деп, бир де алаҥзыбай јат. Карын майлаткандар мындый ижемјидеҥ сӱӱнчи алгылайт (Тит. 2:13). Је олор бу сыйды аларга учына јетире Кудайга чындык артар учурлу (2 Тим. 4:7, 8). Је эмди дезе Кайраканныҥ Эҥирине «ӧскӧ койлор» (ЈТ) нениҥ учун келип турганын кӧрӱп ийектер (Иоанн 10:16).

6. Нениҥ учун Кайраканныҥ Эҥирине «ӧскӧ койлор» келип јат?

⁶ «Ӧскӧ койлор» Кайраканныҥ Эҥирине келзе, ондо турушпай јат. Нениҥ учун дезе олор јӱк ле айылчылар болот. Олор керегинде баштапкы ла катап 1938 јылдыҥ тулаан айыныҥ 1-кы кӱниниҥ «Каруулчы шибеезинде» (англ.) айдылган: «Кайраканныҥ Эҥирине [«ӧскӧ койлорды»] кычырып турар керек... Нениҥ учун дезе анайып олор бу туштажу канайып ӧткӱрилип турганын кӧрӱп-угуп сӱӱнчи алгылайт». «Ӧскӧ койлорды» тойго келген айылчыларга тӱҥейлеерге јараар. Олор јииттердиҥ бириккенин кӧрӱп, олорго јӧмӧжип, сӱӱнчи алгылап јат. Анайып ла «ӧскӧ койлор» Кайраканныҥ Эҥирине келип, ондо турушпай да турган болзо, сӱӱнчи алгылап јат.

7. «Ӧскӧ койлор» Кайраканныҥ Эҥиринде куучын-эрмекти нениҥ учун јакшызынып угат?

⁷ «Ӧскӧ койлор» Кайраканныҥ Эҥиринде майлаткандар ла чылап, Кудай келер ӧйгӧ олорго нени белетеп салганын шӱӱп санангылайт. Анда, куучын-эрмекте, Иисус Христос ло 144 000 майлаткандар бир муҥ јыл башкарган ӧйдӧ нени эдери керегинде айдылат. Бу ӧйдӧ ол 144 муҥ кижи Иисуска башкартып, јердиҥ ӱстин рай эдерге ле улуска толо кемине једерге болужар. Бу Эҥирге айылчылар болуп, кажы ла јыл миллиондор тоолу улус келгилейт. Олорго Агару Бичиктеги судурларды, темдектезе, Исайя 35:5, 6; 65:21—23 ле Ачылта 21:3, 4-тӧги судурларды шӱӱп сананарга јарап  јат. Мынаҥ улам олордыҥ бӱдӱмјизи ле Иеговага иштеер кӱӱни там тыҥып јат (Матф. 24:13; Гал. 6:9).

8. «Ӧскӧ койлор» Кайраканныҥ Эҥирине база нениҥ учун келгилеп јат?

⁸ «Ӧскӧ койлор» Кайраканныҥ Эҥирине база нениҥ учун келип јат? Олор дезе мынайып келгениле майлаткандарды сӱӱп турганын, анайда ок олорго јӧмӧжип турганын кӧргӱзет. Агару Бичикте майлаткандар ла «ӧскӧ койлор» бой-бойыла ӧмӧ-јӧмӧ иштеер деп судурлар бар. Олордыҥ кезигин кӧрӱп ийектер.

9. Захария 8:23-ле болзо, «ӧскӧ койлор» майлаткандарга канайып јӧмӧжӧт?

⁹ Захария 8:23 кычырыгар. Бу судурда «ӧскӧ койлор» майлаткан христиандарга акту кӱӱнинеҥ јӧмӧжӧр деп айдылат. Мында айдылган «иудей кижи» — ол майлаткандар болуп јат (Рим. 2:28, 29). А «башка-башка тилдерге куучындап турган он кижи» — ол «ӧскӧ койлор». Анайда ок «иудейдиҥ эдегинеҥ тудунып алган» деген сӧстӧр «ӧскӧ койлордыҥ» майлаткандарга сӱӱнип јӧмӧжип, олорло кожо Иеговага бажырарга турганын кӧргӱзет. Оныҥ да учун Кайраканныҥ Эҥирине майлаткандар да, «ӧскӧ койлор» до кожо јуулыжып јат.

10. Иезекииль 37:15—19, 24, 25-теги судурды Иегова канайып бӱдӱрип салды?

¹⁰ Иезекииль 37:15—19, 24, 25 кычырыгар. Бу судур канайып бӱткен? Иегованыҥ болужынаҥ улам «ӧскӧ койлор» ло майлаткандар ӧмӧ-јӧмӧ иштеп јат. Бу судурда тайак керегинде айдылганы бар. Баштапкызы — «Иуданыҥ тайагы». Олор теҥеридеҥ башкаратан улус. Нениҥ учун дезе Израиль албатыныҥ каандары бу ӱйенеҥ чыккан. Экинчизи — «Ефремниҥ тайагы» *. Бу тайак јерде јадатан ижемјилӱ улусты темдектейт. Бу судурда айдылганыла, Иегова: «Мен бу эки тайакты бириктирип саларым» — деп айдат. Ӧскӧртӧ айтса, Иегова майлаткандарды ла «ӧскӧ койлорды» јаҥыс ӱӱр эдип бириктирип салар. Олордо бир кӱдӱчи — Иисус Христос болор. Мыныҥ да учун бу эки бӧлӱк улус Кайраканныҥ Эҥирине эки башка эмес, је кожо јуулыжып турган (Иоанн 10:16).

11. Иисустыҥ укаа сӧзиндеги койлор Христостыҥ карындаштарына канайып јӧмӧжӧт? (Матфей 25:31—36, 40).

¹¹ Матфей 25:31—36, 40 кычырыгар. Бу укаа сӧстӧги койлор Кудайга чындык ла јерде јӱретен ижемјилӱ улусты, ӧскӧртӧ айтса «ӧскӧ койлорды», темдектейт. Олор Христостыҥ карындаштарына канайып јӧмӧжӧт? Бу улус сӱӱнчилӱ јарды јарлап, ӱренчиктер белетеер сӱреен јаан учурлу иште туружадылар (Матф. 24:14; 28:19, 20).

12, 13. «Ӧскӧ койлор» Христостыҥ карындаштарына база канайып болужып јат?

¹² Кажы ла јыл Кайраканныҥ Эҥири ӧдӧрдӧҥ озо бастыра јердиҥ ӱстинде канча да неделениҥ туркунына кампания ӧткӱрилип јат. «Ӧскӧ койлор» Христостыҥ карындаштарына болужарга, бу кампанияга акту кӱӱнинеҥ туружып, кӧп-кӧп улусты кычырып јадылар. ( «Слер Кайраканныҥ Эҥирин ӧткӱрерге белетенип баштадаар ба?» деген рамканы кӧрӱгер.) Кӧп саба јуундарда аракынаҥ ла калаштаҥ амзаар  улус јок то болзо, олор Кайраканныҥ Эҥири кажы ла јуунда јакшы ӧткӱрилзин деп, ӱзе немени белетеп салат. Нениҥ учун дезе олор Христостыҥ карындаштарына јӧмӧшкӧни — Иисустыҥ бойына болужып турганы болот деп билип јадылар (Матф. 25:37—40).

¹³ «Ӧскӧ койлор» база недеҥ улам Кайраканныҥ Эҥирине келгилеп јат?

14. Иегова ла Иисус бисти тыҥ сӱӱп турганын канайып кӧргӱскен?

¹⁴ Иегова ла Иисустыҥ сӱӱжи учун быйанду болодыс. Иегова биске сӱӱжин башка-башка аргаларла кӧргӱзет. Је эҥ ле јаан сӱӱжи — бис учун бойыныҥ сӱӱген Уулын бергени (Иоанн 3:16). А Иисустыҥ сӱӱжин бис учун кыйналып божоорго јӧпсингенинеҥ кӧрӱп јадыс (Иоанн 15:13). Бис нени де этсеес, Иегова ла Иисустыҥ сӱӱжи учун тӱҥей ле тӧлӱлӱ артадыс. Је бис быйанысты јӱрген јӱрӱмисле кӧргӱзер аргалу (Кол. 3:15). Анайда ок Кайраканныҥ Эҥирине келгенисле олордыҥ сӱӱжин ундыбаганыс ла олорды сӱӱп турганысты кӧргӱзедис.

15. Нениҥ учун майлаткандар да, «ӧскӧ койлор» до толынты учун быйанду болот?

¹⁵ Бис толынтыны сӱреен јаан сый деп баалап јадыс (Матф. 20:28). Толынтынаҥ улам майлаткан христиандарда сӱреен кайкамчылу ижемји бар. Олор бу ижемјини тыҥ баалап јат. Толынтыга бӱдӱп турганы учун Иегова олорды чындык ишчилерим ле балдарым деп айдып јат (Рим. 5:1; 8:15—17, 23). Толынты учун быйанын «ӧскӧ койлор» база кӧргӱзер аргалу. Олор до Иисустыҥ толынты тайылгазына бӱдет. Оныҥ учун олор Кудайдыҥ најызы болор аргалу, ого иштеер аргалу, анайда ок «улу тӱбектиҥ» (ЈТ) ӧйинде аргадалар деп иженер аргалу (Ачыл. 7:13—15). Бу эки бӧлӱк улус бойыныҥ быйанын кажы ла јыл ӧткӱрилип турган Кайраканныҥ Эҥирине келгениле кӧргӱзип јадылар.

16. Бис база нениҥ учун Кайраканныҥ Эҥирине келип турганыс?

¹⁶ Бис база нениҥ учун Кайраканныҥ Эҥирине келип турганыс? Нениҥ учун дезе бис Иисустыҥ айтканыла јӱрерге турганыс. Иисус божоор алдында, эҥирде, мындый сӧстӧр айткан: «Мени эске алынып, анайда эдип јӱригер» (1 Кор. 11:23, 24). Бис теҥериде де, јерде де јадатан болзоос, бу сӧстӧр меге айдылган деп сананып јадыс.

17. Кайраканныҥ Эҥири Иеговала колбуларысты тыҥыдарга канайып болужат?

¹⁷ Кайраканныҥ Эҥири Иеговага јууктаарга болужат (Иак. 4:8). Кайраканныҥ Эҥири бистиҥ ижемјибисти ле Иегованыҥ сӱӱжин шӱӱп сананатан арга берет (Иер. 29:11; 1 Иоанн 4:8—10). Келер ӧйдӧ ижемјибисти шӱӱп сананзаас, анайда ок Иегованыҥ качан да ӧтпӧс сӱӱжи керегинде сананзаас, бис Иегова Адабысты оноҥ тыҥ сӱӱп баштайдыс ла бистиҥ колбуларыс оноҥ тын болуп калат (Рим. 8:38, 39).

18. Иисустыҥ темин шӱӱп сананганыс бисти неге кӱӱнзедет?

¹⁸ Кайраканныҥ Эҥири Иисустаҥ тем аларга кӱӱнзедет (1 Пётр 2:21). Кайраканныҥ Эҥиринеҥ озо Агару Бичикти кычырып, Иисустыҥ јердеги  јӱрӱминиҥ калганчы кӱндерин, божогонын ла тирилгенин ойто ло катап эске алынып јадыс. Бу Эҥирде айдылып турган куучын-эрмекти уксаас, Иисустыҥ бис учун божогонын оноҥ тын баалаарга кӱӱнзейдис (Эф. 5:2; 1 Иоанн 3:16). Анайып, Иисуска тӱҥей болорго турган кӱӱнис, кажы ла јыл бу Эҥирде байрамдайтан ӧйдӧ там ла тыҥып јат (1 Иоанн 2:6).

19. Иегованыҥ сӱӱжинде артарга биске нени эдер керек?

¹⁹ Кайраканныҥ Эҥири бойысты Кудайдыҥ сӱӱжинде чеберлеер кӱӱнисти тыҥыдат (Иуда 20, 21). Иегова бисти сӱӱзин деп, бастыра ийде-кӱчистеҥ оныҥ јӱрегин сӱӱндирерге, оныҥ адын мактаарга ла ого сӧсуккур болорго албаданар керек (Укаа 27:11; Матф. 6:9; 1 Иоанн 5:3). Мындый кӱӱнисти Кайраканныҥ Эҥиринде болгоныс тыҥыдат. Мынаҥ улам бис Иеговага кажы ла кӱн: «Сениҥ сӱӱжиҥде јажын-чакка јӱрейин» — деп айдарга кӱӱнзейдис.

20. Бис нениҥ учун Кайраканныҥ Эҥиринде болор учурлу?

²⁰ Бу јӧрмӧлдӧҥ майлаткандар да, «ӧскӧ койлор» до кажы ла јыл Кайраканныҥ Эҥирине нениҥ учун барар учурлу деп билип алганыс. Нениҥ учун дезе бу кӱнде кару најыбысты, Иисус Христосты, эске аладыс. Је јуулыжып турганыстыҥ эҥ јаан шылтагы — бис учун сӱӱген Уулын берген, Иегова Адабыска, быйанысты кӧргӱзедис. 2022 јылда Кайраканныҥ Эҥири кандык айдыҥ 15-чи кӱнинде, пятницада, ӧдӧр. Бис Иегова ла Иисусты сӱӱп јадыс, оныҥ учун бойыстыҥ бастыра керектеристи туура јылдырып ийеле, Кайраканныҥ Эҥиринде болорыс.