1 ӰРЕНЕТЕН ЈӦРМӦЛ
«Иегованы бедирегендер алкыш јок артпас»
2022 ЈЫЛДЫҤ ӰЛГЕРИ: «Иегованы бедирегендер алкыш јок артпас» (САР. 34:10).
4 КОЖОҤ «Мениҥ Кӱдӱчим — Иегова»
БУ ЈӦРМӦЛДӦ *
Давид кӱч айалгада да болгон болзо, Иегованыҥ алкыжын кӧргӧн (1—3 абзацтарды кӧрӱгер.) *
1. Давид кандый айалгада болгон?
ДАВИД бойыныҥ јӱрӱмин аргадаарга качып јат. Нениҥ учун дезе оны Израильде эҥ ле јамылу кижи Саул каан истежип, ӧлтӱрерге турган. Давидте јиир курсагы да јок. Ол Нов деген калага барала, абыстаҥ беш те болчок болзо, калаш берзин деп сураган (1 Сам. 21:1, 3). Канча да ӧйдӧҥ Давид бойыныҥ улузыла кожо куй таштарда јажынган (1 Сам. 22:1). Давид недеҥ улам мындый кӱч айалгада болуп калган?
2. Нениҥ учун Саул бойыныҥ јӱрӱмин јеткерлӱ айалгага тургускан деп айдарга јараар? (1 Самуил 23:16, 17).
2 Иегова Давидти Израильдиҥ кааны эдип кӧстӧп койгон. Оны кӧп улус сӱӱген. Анайда ок ол јалтанбас јуучыл болгон. Мынаҥ улам Саул каан ого тыҥ кӱйӱнип, ичи-бууры аҥданып турды. Саул бойыныҥ ла јастыразынаҥ улам Иегованыҥ јарадузын јылыйтканын оҥдоп турган болгон. (1 Самуил 23:16, 17 кычырыгар.) Саулдыҥ черӱзи де јаан, улузы да кӧп. Оныҥ учун Давидке бойыныҥ јӱрӱмин аргадаарга качарга келишкен. Бу айалгада Саул неге иженген? Иегованыҥ тургускан амадузын бузып ийерим деп бодогон бо? (Иса. 55:11). Бу сурактыҥ каруузы Агару Бичикте берилбей јат. Је бис билерис, Саул бойыныҥ јӱрӱмин јеткерлӱ айалгага тургускан деп. Нениҥ учун дезе Кудайга удура барган кижи ого качан да чыдап болбос.
3. Кӱч айалгада Давидтиҥ кӧрӱми кандый болгон?
3 Давид јобош кижи болгон. Ол јамылу болорго качан да јӱткӱбеген. Оны Иегова бойы Израильдиҥ кааны эдип майлап койгон (1 Сам. 16:1, 12, 13). Је Саул Давидти кӧрӧр дӧ кӱӱни јок болгон. Мынаҥ улам Давид куй ташка јажынып јӱрген, аштап-суузап та јӱретен. Кандый да кӱч айалгада болордо, ол Иегованы бир де бурулабаган да, комудабаган да. Карын да ол куй ташта јӱреле, Иегованы мактап, сӱреен јараш кожоҥ чӱмдеген. 2022 јылдыҥ ӱлгериниҥ сӧстӧри бу кожоҥноҥ алынган: «Иегованы бедирегендер алкыш јок артпас» (Сар. 34:10).
4. Бис кандый сурактар шӱӱп кӧрӧрис? Нениҥ учун?
4 Бӱгӱнги кӱнде Иегованыҥ кезик ишчилери коркышту јокту јадат *. Тегин де кӱч айалганы COVID-19 оноҥ уур эдип салган. Агару Бичикте айдылганыла болзо, улу тӱбек јууктаган сайын јӱрӱм там коомой болуп барар (Матф. 24:21). Оныҥ учун мындый сурактар кӧрӱп ийектер: 1) Давид «Иегованы бедирегендер алкыш јок артпас» деп кайдаҥ билген? 2) Нениҥ учун бары-јогысла болорзынар керек? 3) Иегова бисти качан да артыргыспас деп нениҥ учун бӱдер керек? 4) Болотон кӱчтерге белен болорго бӱгӱннеҥ ле ала нени эдер керек?
«ОЛ МЕНИ БАСТЫРА ЈАНЫНАҤ ЈЕТКИЛДЕЕР»
5, 6. «Иегованы бедирегендер алкыш јок артпас» деп 23-чи Сарын канайып кӧргӱзет?
5 Давидтиҥ «Иегованы бедирегендер алкыш јок артпас» деген сӧстӧрин канай оҥдоор? Каруузын 23-чи Сарыннаҥ кӧрӱп ийектер. (Сарын 23:1—6 кычырыгар.) Бу сарын: «Иегова — мениҥ Кӱдӱчим. Ол мени бастыра јанынаҥ јеткилдеер» — деп сӧстӧрлӧ башталат. Мындагы сӧстӧрдиҥ учуры Сарын 34:10-догы сӧстӧргӧ тӱҥей. Давид 23-чи Сарында Иегованы Кӱдӱчизи эдип талдап алган кижиниҥ јӱрӱми бастыра јанынаҥ јеткил болор деп айдат. Иегова оны «чындыктыҥ јолыла апарып јат» деген сӧстӧр оныҥ јӱрӱми јакшы да, кӱч те болзын Иегова јаантайын оныҥ јанында болор деп кӧргӱзет. Је Давид оҥдогон, Иегова оныла кожо до болзо, ол јаантайын «јажыл ӧлӧҥдӱ јалаҥдарда» јӱрбес деп. Кӱчтер тӱҥей ле болордоҥ айабас. Давидтиҥ айтканыла, «ого караҥуй ӧзӧк јерди де ӧдӧргӧ келижер». Ӧскӧртӧ айтса, оныҥ јӱрӱминде санааркаштар да, удурлажулар да болор деп, ол билген. Је андый да болзо, Давид, Иегова оныҥ јанында деп оҥдоп: «Коркыбай јадым» — деп айткан.
6 Айдарда, Давид «Иегованы бедирегендер алкыш јок артпас» деп кайдаҥ билген? Бу сурактыҥ каруузы мындый: Иегова Давидтиҥ кӱч ӧйлӧринде ого корузын да берген, алкыжын да берген. Давид бу ӧйдӧ оныҥ јӱрӱмин акча-јӧӧжӧ корулаар деп сананбаган. Карын оны јӱк ле Иегова корулаар деп иженген. А бу дезе, кӧгӱс кӧрӱмле кӧрзӧ, эҥ керектӱзи болуп јат. Андый кижиге Кудай ӱзе немени берген деп айдарга јараар.
7. Лука 21:20—24-лӧ болзо, баштапкы чактыҥ христиандарына нени эдерге келишкен?
7 Сарын 23:1-деги сӧстӧр бисти акча-јӧӧжӧгӧ тартылбай турганыс па деп, јазап сананып кӧрзин деп айдып јат. Мынаҥ кӧрӱне берер: бис баштапкы јерге кӧгӱс керектерди бе эмезе акча-манатты тургузып турганыс па деп. Мындый айалга баштапкы чакта Иерусалимде јаткан христиандарда болгон. (Лука 21:20—24 кычырыгар.) Иисус Иерусалимди черӱ курчап ийзе, ӱренчиктерин кырдӧӧн качсын деген. «Каруулчы шибееде» мынайып бичилген болгон: «Ол ӧйдӧ христиандарга кыраларын да, тураларын да артыргызарга келишкен. Олор керек дезе айылынаҥ керектӱ немелерин де албагандар. Анайып олор Иеговага иженип, ого бажырарын баштапкы јерге тургузып турганын кӧргӱскен».
8. Баштапкы чактыҥ христиандарыла болгон учуралдаҥ бис неге ӱренедис?
8 Бу учурал бисти тереҥ санандырып јат. Ол ло «Каруулчы шибееде» мындый сӧстӧр база айдылган: «Баштапкы чактыҥ христиандары чылап бистерге качарга келишсе, тирӱ артарга болуп, акча-јӧӧжӧгӧ иженерис пе эмезе Иеговага ба? Ол ӧйдӧ бистиҥ кажыбыска ла та нени де артыргызарга келижер болор. Андый ӧй коркышту кӱч болордоҥ айабас. Оныҥ учун бистерге алдындагы ла христиандар чылап, ӱзе немегисти артыргызала качарга белен болор керек» *.
9. Еврейлерге 13:5, 6-дагы сӧстӧр биске канайып болужат?
9 Ол христиандарга Переяга барала, јаҥы айалгага эптежерге јеҥил эмес болгон болор. Оныҥ учун олорго Иеговага тыҥ иженер керек болгон. Иегова олорды мындый айалгага озодоҥ белетеп салган. Римляндар Иерусалимди курчап алардаҥ беш јыл озо, Иегова олорго Павел ажыра мындый сӧстӧр айткан: «Акчага ӱстӱкпегер, не барыгарла болорзыныгар. Кудай бойы айткан јок беди: „Сени артырбазым, сени таштабазым“. Оныҥ учун тидим айдадыс: „Кайракан — мениҥ болушчым, коркыыр немем јок. Кижи меге нени эдер?“» (Евр. 13:5, 6). Бу сӧстӧр Переядӧӧн качып барган христиандарга јаан болужын јетирген. Олор бар немезиле болорзынып, Иегова олорго керектӱ немени берер деп бир де алаҥзыбаган. Павелдиҥ айткан сӧстӧри биске де јаан јӧмӧлтӧ болуп јат.
«МЫНЫЛА БОЛОРЗЫНЫП ЈӰРЕЛИ»
10. Павел биске нени айткан?
10 Павел бого тӱҥей јӧпти Тимофейге берген. Бу јӧп бистерге де керектӱ. Ол мындый сӧстӧр айткан: «Курсакту ла кийимдӱ болзобыс, мыныла болорзынып јӱрели» (1 Тим. 6:8). Бу сӧстӧрлӧ болзо, биске јараш турага јадарга, јараш кийим кийерге, јакшы курсак јиирге јарабас па? Јок, Павел мында бисти бар немегисле болорзынып јӱрзин деп айдарга санаган. Бу сӧстӧрдиҥ чынын Павел бойыныҥ јӱрӱминеҥ оҥдоп алган (Флп. 4:12, сноска). Оныҥ да учун ол бистерди де мындый кӧрӱмдӱ болзын деп кӱӱнзеп јат. Айдарда, кижи акча-јӧӧжӧзиле эмес, је Кудайыла бай болот (Авв. 3:17, 18).
40 јылдыҥ туркунына израильтяндардыҥ ӱзе немези јеткил болгон. А бис бар немегисле болорзынып јадыс па? (11 абзацты кӧрӱгер.) *
11. Моисейдиҥ израильтяндарга айткан сӧстӧринеҥ бис неге ӱренип јадыс?
11 Кижиниҥ эҥ керектӱ деп сананып турган немезине Иегованыҥ кӧрӱми чек башка болордоҥ айабас. Темдектезе, Моисей 40 јылдыҥ туркунына чӧл јерде јӱрген израильтяндарга айткан: «Бу улу чӧлдӧ бастыра 40 јылдыҥ туркунына Иегова сенле кожо болгон. Ол сени ӱзе немеле јеткилдеген, бастыра ижиҥди алкаган» (Јаҥ. т. 2:7). Иегова олорды кажы ла кӱн маннала азыраган, олордыҥ Египеттеҥ чыккан кийими де эскиребеген (Јаҥ. т. 8:3, 4). Олордыҥ кезиги кийимис уйан, курсагыс јаман деп комудажып турарда, Моисей олорго: «Кудай сени ӱзе немеле јеткилдеген» — деп айткан. Бис мынаҥ неге ӱренип јадыс? Бар немегисле болорзынып, Иегованыҥ кичинек те сыйлары учун быйанду болуп турзаас, теҥеридеги Адабыс коркышту тыҥ сӱӱнер.
ИЕГОВА СЛЕРДИ БИР ДЕ АРТЫРГЫСПАС
12. Давид бойына иженбей Кудайга иженген деп бис кайдаҥ билерис?
12 Давид дезе Иегова бойыныҥ чындык ишчилерин качан да артыргыспай турган деп билетен болгон. Ол 34-чи Сарынды бичип турарда, оныҥ јӱрӱми ӧлӱмниҥ кырында болгон. Бу ӧйдӧ Давидке Кудайдыҥ черӱзи «айландыра туруп алгандый» деп билдирген (Сар. 34:7, сноска). Нениҥ учун дезе Давид кӧп јуу-согуштарда болуп турала, ченемелдӱ јуучыл болуп калган. Ол јуулажарга белен черӱлерди кӧп катап кӧргӧн. Давид кылышла да сӱреен јакшы јуулажып билетен. Анайда ок ол кайыш курла ташты сӱреен чечен таштап туратан. Бого коштой Кудай оны каан болорыҥ деп озодо айдып салган (1 Сам. 16:13; 24:12). Андый да болзо, Давид бир де бойына иженбей, Иеговага иженип, оныҥ «ангели оноҥ коркып турган улусты корулайт ла аргадайт» деп бӱткен. Бӱгӱнги кӱнде Иегова бойыныҥ ишчилерине болужарга кайкал этпей јат. Је бис Кудайдаҥ айап, ого иженип тургандарды ол качан да артыргыспас деп бӱдӱп јадыс. Керек дезе бистиҥ јӱрӱмисти кем-кем ӱзӱп те койзо, Иегова биске келер ӧйдӧ ӱргӱлји јӱрӱм берер.
Улу тӱбектиҥ ӧйинде ле Магог јериниҥ Гогы биске табару этсе јаҥныҥ улузы тураларыстӧӧн албан кӱчле кире конордоҥ айабас. Је бис билерис: Иисус ла оныҥ ангелдери теҥеридеҥ кӧрӱп турган ла Кудайдыҥ ишчилерин корулап алар деп. (13 абзацты кӧрӱгер.)
13. Нениҥ учун ӧштӱлер бисти чӱрче ле јоголтып ийерис деп сананар? Је бис олордоҥ нениҥ учун коркыбазыс? (Кадарындагы јурукты кӧрӱгер.)
13 Удабас бистиҥ Иеговага бӱдӱп турганыс ченелер. Качан биске Магог јериниҥ Гогы — албатылардыҥ коалициязы — табару этсе, бис Иеговага иженбей, ӧштӱлердеҥ коркый берердеҥ айабазыс. Оныҥ учун бу ӧйдӧ, Иегова бойыныҥ албатызын аргадалар деп коркышту тыҥ бӱдер керек болор (Иез. 38:10—12). Нениҥ учун дезе олор бисти чымылды ӧлтӱргендий чилеп, чӱрче ле јоголтып ийер деп санангылар. Олордо кӧгӱс кӧрӱм јок, оныҥ учун олор бисти кору јок, бойлоры учун туруп болбос, анайда ок бисте олорго удура јуулажар мылтык-јепсел де јок деп кӧрӧр. Је бу ӧйдӧ Кудайдыҥ албатызын теҥериде ангелдердеҥ турган јаан черӱ аргадаар деп олордыҥ санаазында да јок болор (Ачыл. 19:11, 14, 15).
БОЛОТОН КӰЧТЕРГЕ БӰГӰННЕҤ ЛЕ АЛА БЕЛЕТЕНИГЕР
14. Биске келер ӧйдиҥ ченелтелерин ӧдӧргӧ бӱгӱннеҥ ле ала нени эдер керек?
14 Болотон ченелтелерге бӱгӱннеҥ ле ала канайып белетенер керек? Баштапкызында, бар јӧӧжӧбиске чын кӧрӱмдӱ болор керек. Нениҥ учун дезе удабас биске оны артыргызарга келижер. Анайда ок биске бар немеле болорзынып јӱрерге ӱренер керек. Је эҥ керектӱзи, Иеговага бӱдӱп турганысты тыҥыдар керек. Анайып, бис Гогтыҥ табарузынаҥ бир де коркыбазыс.
15. Давид Иегова болужар деп нениҥ учун бир де алаҥзыбаган?
15 Биске удабас болотон ченелтелерге белен болорго база нени эдер керек? Давидтиҥ темин кӧрӱп ийектер. Ол айткан: «Амзап кӧрӱгер, ол тушта Иегованыҥ јалакайын билип аларыгар. Ого иженип турган кижи ырысту» (Сар. 34:8). Мындый сӧстӧрди Иегованыҥ болужын јӱк ле бойыныҥ кӧзиле кӧргӧн кижи айдар аргалу. Андый кижи Давид болгон. Ол јиит тужында Филистий јериниҥ Голиаф деп кижиле тартышкан. Је Голиаф дезе коркышту јаан оборлу ла ийде-кӱчтӱ кижи болгон. Андый да болзо, Давид оноҥ бир де коркыбай: «Бӱгӱн Иегова сени мениҥ колымга берип ийер» — деген (1 Сам. 17:46). База бир ӧйдӧ, Давид Саул каанныҥ айылында иштеп турарда, ол оны канча катап ӧлтӱрерге сананган. Је ол ӧйлӧрдӧ «Иегова Давидле кожо болгон» (1 Сам. 18:12). Айдарда, Давид јиит ле тужынаҥ ала Иегованыҥ болужын кӧрӱп туратан. Оноҥ улам Иегова оны качан да артыргыспас деп иженип јӱрген.
16. Бӱдӱмјибис кандый айалгада ченелердеҥ айабас?
16 Бис бӱгӱннеҥ ле ала Иеговага иженип ӱренип алзаас, келер кӱчтерди ӧдӧргӧ јеҥил болор. Кезикте биске курултайга барып келерге эмезе јуунныҥ бир де туштажузын божотпоско эмезе јарлаар ишке кӧптӧдӧ туружарга иштеҥ суранарга келижип јат. Мынаҥ улам кезик ака-эјелер иш јок артып калат. Слер мындый айалгада болуп калзаар, слерди Иегова бир де артыргыспас, карын, јӱрӱмге керектӱ не-немеле јеткилдеер деп бӱдедигер бе? (Евр. 13:5). Андый учуралда слерге ӧйин толо берип иштеп турган кӧп ака-эјелердиҥ темдери болужар. Иегова олорды кӱч ӧйдӧ канай артыргыспаганын сурап угугар. Анайып, Иегова чыннаҥ ла бойыныҥ сӧзине турар Кудай деп, бӱдӱмјигер тыҥыыр!
17. 2022 јылга кандый ӱлгер талдалган ла нениҥ учун?
17 Иегова бисле кожо болордо, келер ӧйдиҥ кӱчтеринеҥ бир де коркыбас керек. Оны баштапкы јерге тургузып турган улусты ол бир де артыргыспас. Оныҥ учун Башкару јӧп бисти бу сӧстӧрди ундыбазын деп, 2022 јылга Сарын 34:10-до: «Иегованы бедирегендер алкыш јок артпас» — деп сӧстӧрди талдап алган.
38 КОЖОҤ Кудай сени ийдезиле кайралдаар
^ 2022 јылдыҥ ӱлгери Сарын 34:10-ноҥ алынган. Ондо мынайып айдылган: «Иегованы бедирегендер алкыш јок артпас». Је Иегованыҥ кезик чындык ишчилери јокту јадып турган. Андый болзо, бу јылдыҥ ӱлгерин канайып оҥдоор? Бу 2022 јылдыҥ ӱлгери келер ӧйдиҥ ченелтелерин ӧдӧргӧ канайып болужарын кӧрӱп ийектер.
