1—3. Иегованыҥ Керечилери недеҥ улам ыйлап јат?

 СЛЕР калганчы катап качан ыйлаганаар? Кижи кезикте сӱӱнчинеҥ улам ыйлап јат. Је кӧп сабада кӧстиҥ јажы јӱректеги ачу-сыстаҥ улам тӧгӱлет. Темдектезе, бис јуук улусты јылыйтсаас, ыйлап јадыс. США-да јадып турган Лора * эје куучындаган: «Кызым божоордо, меге коркышту ачу болгон. Мени кем де, не де токунадып болбос деп санангам. Мындый ачуны чыдажып, оноҥ ары јӱрӱп болбозым деп бодогом».

² Кезикте бис ӧскӧ немедеҥ улам ыйлап јадыс. Японияда пионер болуп турган Хироми эје мынайып куучындаган: «Јарлап турган јеримде улус чындыкты укпай турганынаҥ меге коркышту јаман болот. Оныҥ учун кезикте Иеговага чындыкты чыннаҥ ла бедиреп турган улусты табып берзин деп, ыйлап туруп мӱргӱйдим».

³ Бу эјелердиҥ айтканын јакшы оҥдоп турган болорыс (1 Пётр 5:9). Бис Иеговага сӱӱнчилӱ иштеерге кӱӱнзейдис (Сар. 100:2). Је кезикте бис мындый айалгада болуп каладыс: јуук улузысты јылыйтадыс, та неге де чӧкӧп јадыс эмезе Кудайга чындыгыс ченелет. Мынаҥ улам кӧзистиҥ јажы тӧгӱлет (Сар. 6:6). Мындый айалгаларда биске не болужар?

4. Бу јӧрмӧлдӧ нени кӧрӧрис?

⁴ Биске Иисустыҥ теми болужар. Ол база кезикте тыҥ санааркап, ыйлап туратан (Лука 19:41; 22:44; Иоанн 11:35; Евр. 5:7). Је эмди андый учуралдарды кӧрӱп, бис Иисустаҥ ла оныҥ адазынаҥ, Иегованаҥ, неге ӱренеристи шӱӱжип ийектер. Анайда ок бис андый учуралдарда нени эдер аргалу деп кӧрӱп ийерис.

5. Иоанн 11:32—36-да бичилген учуралдаҥ бис Иисус керегинде нени билип аладыс?

⁵ Б. э. 32-чи јылында, кышкыда, Иисустыҥ јуук најызы Лазарь тыҥ оорыйла, божоп калган (Иоанн 11:3, 14). Бу оныҥ кожо чыккандарына, Марфа ла Марияга, јаан ачу-корон экелген. Иисус бу ӱчӱге тыҥ карузып јӱрген, Оныҥ учун Лазарьдыҥ божогонын уккан кийнинде, Вифанияга келип јат. Марфа мыны угуп ла ийеле, Иисуска удура барып, мынайып айткан: «Кайракан, Сен мында јӱрген болзоҥ, карындажым ӧлбӧс эди!» (Иоанн 11:21). Иисус Марфаны, Марияны ла олорды токунадарга келген улустыҥ ыйлажып турганын кӧрӱп, база ыйлай берген. (Иоанн 11:32—36 кычырыгар.)

6. Лазарь божоп каларда, Иисус нениҥ учун ыйлаган?

⁶ Иисус нениҥ учун ыйлаган? «Понимание Писания» деген энциклопедияда мынайып јарталат: «Иисус Лазарь најызыныҥ божогонын ла оныҥ кожо чыккан Марфа ла Марияныҥ ачу-коронго тӱшкенин кӧрӱп, јӱрегине ачу болуп, ыйлай берген» *. Ол Лазарьдыҥ божоор алдында тыҥ шыралаганын, ондо кандый сезимдер болгонын сананган болор. Анайда ок Иисуска Лазарьдыҥ ӧлӱминеҥ улам, Марфа ла Марияныҥ ыйлажып турганын кӧрӧргӧ коркышту кӱч болгон. Јуук улузын јылыйткан улус мыны јакшы оҥдоп јат. Бу учуралдаҥ бис нени билип аларысты кӧрӱп ийектер.

7. Иисустыҥ ыйлаганынаҥ Иегова керегинде нени билип јадыс?

⁷ Иегова слердиҥ сезимдереерди оҥдоп јат. Иисус Адазына андый тӱҥей (Евр. 1:3). Ол божогон најызын кӧрӧлӧ ыйлаарда, Иегова, сӱрлеп айтса, база ыйлаган (Иоанн 14:9). Айдарда, јуук  кижизин јылыйткан улус бир де алаҥзыбас аргалу, Иегова мындый айалгада слерге кандый ачу болуп турганын јӱк ле кӧрӱп турган эмес, је ого бойына да андый ла ачу болуп јат деп. Ол слердиҥ јӱрегердеги шырканы јазып саларга тыҥ кӱӱнзеп јат (Сар. 34:18; 147:3).

8. Иисус божогон јуук улусты тиргизер деп, нениҥ учун алаҥзыбай јадыс?

⁸ Иисус божогон јуук улузыгарды тиргизерге кӱӱнзейт. Ол ыйлаар алдында Марфаны: «Карындажыҥ тирилер» — деп токунаткан (Иоанн 11:23—27). Иегованыҥ чындык ишчизи Марфа Иисуска бӱткен, нениҥ учун дезе Елисей ле Илья деп судурчылар канча јылдар кайра божогон улусты тирилткен деп билген (1 Каан. 17:17—24; 2 Каан. 4:32—37). Анайда ок Иисус бойы да тул ӱй кижиниҥ уулын ла синагоганыҥ јааныныҥ кызын тиргискенин база уккан болор (Лука 7:11—15; 8:41, 42, 49—56). Бис те божогон улусты кӧрӧрис деп, бир де алаҥзыбай јадыс. Сананып ийзеер де, Иисус најыларын токунадар тушта ыйлаган. Айдарда, Иисус божогон улусты тиргизерге кӱӱнзеп турган!

9. Бис Иисус чылап, јуук кижизин јылыйткан улуска канайып болужар аргалу? Тем куучындап беригер.

⁹ Слер јуук кижизин јылыйткан улуска болужар аргалу. Иисус Марияла, Марфала кожо јӱк ыйлаган эмес, је олорды лаптап угуп, токунаткан. Австралияда аксагал болуп турган Дэн мынайып куучындаган: «Мениҥ ӱйим божоп каларда, меге болуш керек болгон. Мындый болушты меге кезик эш-нӧкӧрлӧр јетирген. Олор мени тӱни-тӱжи угарга белен болгон. Мен олордыҥ кӧзинче ыйлап, ончо сезимдеримди куучындап туратам. Анайда ок олор мениҥ эдип болбой турган ижимди эдип беретен. Машинаны јунып, магазиннеҥ курсак-тамак экелип, курсак азып беретен. Кӱч ӧйлӧрдӧ олор јаантайын мениҥ јанымда болуп, кожо мӱргӱп туратан. Анайып, бу эш-нӧкӧрлӧр „кыйын-шыраныҥ ӧйине чыккан акадый“ болгылаган» (Укаа 17:17).

10. Лука 19:36—40-дӧ кандый учурал бичилген?

¹⁰ Б. э. 33-чи јылыныҥ 9-чы нисанында Иисус Иерусалимдӧӧн кирерге јат. Улус Иисусты кӧрӱп, оны каан деп тооп турганын кӧргӱзерге, оныҥ алдына кийимдерин јайып тургулады. (Лука 19:36—40 кычырыгар.) Бу кӱн чыннаҥ ла байрамдый болгон. Оныҥ учун оноҥ ары не болгонын кӧрӱп ийеле, ӱренчиктер кайкашкан. Нениҥ учун дезе Иисус калага јууктап келерде, оныҥ кӧзи јаштала берген (Лука 19:41—44). Анайып ол ыйлап, Иерусалимниҥ улузыла не болорын судурлаган.

11. Нениҥ учун Иерусалимниҥ улузын кӧрӱп ийеле, Иисустыҥ кӧзи јаштала берген?

¹¹ Иисуска коркышту ачу болгон, нениҥ учун дезе кӧп саба иудейлер оны јылу уткыган да болзо, Каандык керегинде јарды угарга кӱӱнзебеген. Мынаҥ улам Иерусалим јайрадылар, кӧп саба улузын ӧлтӱргилеер, арткан калганын олјого апарар (Лука 21:20—24). Учы-тӱбинде олор Иисустыҥ бойын да јектегилеп салган. Слердиҥ јерде улус сӱӱнчилӱ јарды канайып угат? Кӧп саба улус укпай турган болзо, Луканыҥ 19-чы бажалыгында бичилген учуралдаҥ неге ӱренип аларысты кӧрӱп ийектер.

12. Иисустыҥ јаажы Иегова керегинде нени кӧргӱзет?

 ¹² Иегова улус учун санааркап јат. Иисустыҥ кӧзинеҥ аккан јааш Иегова бастыра улус учун санааркап турган деп кӧргӱзет. 2 Пётр 3:9-та мынайып айдылат: «[Кудай] кем де ӧлӱп калбазын, карын, ончо улус кинчегин алын[зын]... деп кӱӱнзейт». Бис јууктарыска кандый ла арганы тузаланып, Кандык керегинде сӱӱнчилӱ јарды билип алзын деп болужып турзаас, олор учун Иегова чылап, санааркап турганысты кӧргӱзерис (Матф. 22:39) *.

13, 14. Иисус улусты канайып килеген? Бис оноҥ кандый тем аларыс?

¹³ Иисус јарлаар ишти эҥ учурлу иш деп кӧргӧн. Ол улусты ӱредерге кандый ла эп-арганы тузаланган (Лука 19:47, 48). Нениҥ учун? Нениҥ учун дезе ол улусты сӱӱген ле олорды килеген. Кезикте улус андый кӧп јуулыжатан, мынаҥ улам ого ло оныҥ ӱренчиктерине «курсак та јиир арга» болбойтон (Марк 3:20). Улуска оныла јолыгарга тӱнде эптӱ болзо, ол олорго тӱнде де баратан (Иоанн 3:1, 2). Ол кӧп улуска јарлаган, је олордыҥ јӱк ле кезиги оныҥ ӱренчиктери болуп калган. Андый да болзо, оны уккан ончо улус Кудай керегинде билгирлерди јеткилинче алган. Бис те сӱӱнчилӱ јарды ончо улус уксын деп кӱӱнзейдис (Ап. ижи 10:42). Оныҥ учун улустыҥ айалгаларына келиштире јарлаарга албаданадыс.

¹⁴ Улустыҥ айалгазына келиштире јарлаарга белен болугар. Јарлайтан ӧйисти солыбай турзаас, сӱӱнчилӱ јарды алынатан улусты анайып ла таппас болорыс. Матильда деп пионер эје мынайып куучындаган: «Мен ӧбӧӧнимле кожо башка-башка ӧйдӧ јарлаарга албаданадым. Эртен тура улус иште тушта олордыҥ иштеп турган јерлеринде јарлайдыс. Тал-тӱште, тышкары улус кӧптӧй берзе, стендле иштенедис. А эҥирде улус айылдарында болзо, айылдар сайын јарлайдыс». Слер јарлап турган графигерди бойыгардыҥ  айалгаарга эмес, је улустыҥ айалгазына келиштире солыырга белен бе? Эйе болзо, Иегова мыны кӧрӱп сӱӱнер.

15. Лука 22:39—44-лӧ болзо, Иисус јердеги калганчы тӱнинде нени эткен?

¹⁵ Б. э. 33-чи јылыныҥ 14-чи нисанында Иисус орой эҥирде Гефсиман садка барып јат. Анда ол Иеговага тыҥ јайнап мӱргӱген. (Лука 22:39—44 кычырыгар.) Еврейлерге 5:7-де айдылганыла, «ол тыҥ ӱнденип, кӧстӧри јашталып, јайнап мӱргиген». Иисус јердеги јӱрӱминиҥ калганчы кӱндеринде Адазынаҥ нени сураган? Ого чындык артарга ла оныҥ кӱӱн-табын бӱдӱрерге ийде-кӱч берзин деп сураган. Иегова Уулыныҥ тыҥ санааркап турганын кӧрӱп, оны тыҥытсын деп ангелин ийип јат.

16. Гефсиман садта Иисус нениҥ учун ыйлаган?

¹⁶ Гефсиман садта мӱргӱп тура, Иисус нениҥ учун ыйлаган? Улус оны Кудайды јамандап турган кижи деп айттыртарына тыҥ санааркаган. Иисус Адазыныҥ адын корулаар учурлу болгон. Бӱгӱнги кӱнде кезик ака-эјелердиҥ Кудайга чындыгы јеҥил эмес айалгада ченелет. Олор Иисустаҥ неге ӱренер аргалу деп кӧрӱп ийектер.

17. Иегова Иисустыҥ јайнап мӱргӱгенине каруу бергенинеҥ, бис нени билип аладыс?

¹⁷ Иегова слердиҥ јайнап мӱргӱгенеерди угуп јат. Иегова Иисустыҥ јайнап мӱргӱгенине каруузын берген. Нениҥ учун дезе Иисус Адазына чындык артарга ла оныҥ адын агарулаарга тыҥ кӱӱнзеген. Бис те кӱч айалгада Иеговага чындык артарга ла оныҥ адын агарулаарга мӱргӱп суранзаас, ол биске кыйалта јогынаҥ болужын јетирер (Сар. 145:18, 19).

18. Иисусты нениҥ учун јакшы најы деп айдарга јараар?

¹⁸ Иисус слерди јакшы оҥдоп јат. Качан сениҥ јаныҥда сени јакшы оҥдоп турган ла сенде ле ошкош кӱчтерди ӧткӧн најыҥ болзо, кандый да кӱчтерди ӧдӧргӧ јеҥил болуп јат. Иисус шак ла андый најы. Ого кезикте бойына да болуш керек болуп туратан ла ол  бисте ле ошкош кӱчтерди ӧткӧн. Ол бистиҥ уйан јандарысты билер ле биске ӧйи-ӧйинде болужарга белен (Евр. 4:15, 16). Иисус Гефсиман садта ангелдиҥ болужын алган. Мынаҥ биске кандый ӱредӱ? Биске Иегованыҥ болужын алар керек. Ол мындый болушты бичиктер, видеолор, куучын-эрмектер, аксагалдар ла кӧгӱзи тереҥ најылар ажыра берет.

19. Кудайга чындыгыс ченелип турза, биске не болужар аргалу? Тем куучындап беригер.

¹⁹ Иегова слердиҥ јӱрегерге амыр берер. Иегова мыны канайып эдет? Бис ого мӱргӱп турзаас, ол биске «не ле сагыштаҥ бийик амырды» берет (Флп. 4:6, 7). «Кудайдыҥ амыры» бистиҥ јӱрегиске токунал берип, јаман санаалардаҥ айрыларга болужат. Люсия эјениҥ темин кӧрӱп ийектер. Ол мынайып куучындаган: «Кезикте мен јаҥысканзырап, Иегова мени сӱӱбей турган деп сананатам. Је бу ла ок ӧйдӧ мен Иеговага мӱргӱп, ончо сезимдеримди куучындап беретем. Анайып, мениҥ јӱрегиме амыр келет, јаман санаалар јоголып калат». Бу эјениҥ темин кӧргӧнисте Иегова бистиҥ јӱрегиске амырды мӱргӱӱл ажыра берип јат.

20. Иисустыҥ ыйлаган ӱч учуралынаҥ бис нени билип алдыс?

²⁰ Иисустыҥ ыйлаган тужындагы учуралдардаҥ бис нени билип алдыс? Баштапкы учуралла болзо, биске јуук кижизин јылыйткан улустыҥ јанында болор керек, анайда ок бисте андый ачу-корон болуп калза, Иегова ла Иисус биске болужар деп ундыбас керек. А экинчи учуралдаҥ биске јарлаар иште улусты, Иегова ла Иисус чылап, килеп турар керек деп кӧрдис. Ӱчинчи учуралдаҥ Иегова ла Иисус бисти јакшы оҥдоп турган, бистиҥ уйан јандарысты билер ле кӱч ӧйдӧ биске болужарга кӱӱнзейт деп билип алдыс. Бу алган ӱредӱ бисти сӱреен токунадып, јаан туза берет. Анайда ок Иегова бойыныҥ сӧзин бӱдӱрип, «кӧзистеҥ ончо јашты арчыыр» ӧй келгенче турумкай артарга болужар (Ачыл. 21:4).