1. Бис кандый ӧйди эҥ ле тыҥ баалап јадыс?

 БИСТИҤ кажыбыска ла кару тӧрӧӧн-туугандарысла кожо болорго јарап јат. Эш-нӧкӧрлӧргӧ иштиҥ кийнинеҥ јанып келеле, экӱдеҥ экӱ болорго јарап јат. Јиит балдар јуулыжала куучындажарын јакшызынат. А бистерге ончобыска ака-эјелерисле јуулыжарга јарап јат. Је эҥ ле јакшы ӧй Иегова Кудайыска мӱргӱӱри, оныҥ Агару Сӧзин кычырары, анайда ок оныҥ кылык-јаҥын шӱӱп сананары. Андый ӧйдӧ Иегова бистиҥ јаныста деп билдирип јат, а бу эҥ ле артыгы! (Сар. 139:17).

2. Недеҥ улам кӧгӱс керектер экинчи јерге тура берет?

² Биске кӧгӱс керектерди эдерге јарап та турган болзо, кезикте ӧйис чек јетпей калат. Нениҥ учун дезе иш-тожыс бар, билегисти јеткилдеер керек, анайда ок ӧскӧ дӧ немелердеҥ улам кӧгӱс керектер экинчи јерде тура берет.

3. База недеҥ улам кӧгӱс керектерис туура јыла берердеҥ айабас?

³ База недеҥ улам кӧгӱс керектерис туура јыла берет? Кезикте ич-кӧгӱс керектерди эдердиҥ ордына, бис бойыска јарап турган немелерди эдип сала бередис. Је кижиге тӱҥей ле амырап турар керек, анда јаман неме јок. Је амыраш кандый да јакшы болзо, ого ӧйинеҥ ӧткӱре кӧп ӧйисти берип турзаас, Иеговага бажырарына ӧйис јетпей калар. Айдарда, бистиҥ эткен керектерис аайлу-башту болор учурлу (Укаа 25:27; 1 Тим. 4:8).

4. Бу јӧрмӧлдӧ кандый сурактар шӱӱжилер?

⁴ Бу јӧрмӧлдӧ мындый сурактар шӱӱжилер: эҥ артыгын канайып талдаар? Иеговага јууктаарга болужатан ӧйди канайып чын тузаланар? Мынайып этсеес, биске кандый туза болор?

5. Эфестегилерге 5:15—17 јииттерди неге кӱӱнзедет?

⁵ Јӱрӱмниҥ эҥ јакшы јолын талдагар. Ӱренип турган балдар ӱредӱзин божодоло, оноҥ ары кайда ӱренерин, нени эдерин кӧп сабада билгилебей јат. Олордыҥ ӱредӱчилери, Керечи эмес тӧрӧӧн-туугандары бийик ӱредӱге ӱрензин деп кӱӱнзедип јат. Је бу јолды талдап алзаар, кӧп саба ӧйӧӧр Иеговага эмес, је ӱредӱге барар. Мындый кӧрӱмдӱ олордыҥ ада-энелери ле јуундагы јуук најылары Иеговага иштезин деп кӱӱнзедет. Иегованыҥ кӧрӱмиле јӱрерге турган карындаштарыс ла сыйындарыс Эфестегилерге 5:15—17-деги јӧптӧрлӧ башкарынат (кычырыгар). Бу сӧстӧрди кычырган кийнинеҥ јииттер бойына мындый сурактар берер аргалу: «Иегова нени кӱӱнзеп турган? Кажы јолды талдап алзам Иегованы сӱӱндирерим? Талдап алган јолымнаҥ Иеговага берер ӧйимди баалап турганым кӧрӱнер бе?» Бистиҥ кару јииттерис, бу сурактарды јазап сананып кӧрӱгер. Талдаганаар ойгор болзын! Нениҥ учун дезе Сатананыҥ бу калју телекейи удабас ла јоголып калар. Эҥ ле јакшы јол — Иегованыҥ канадыныҥ алдына јӱрери!

6. Мария нени эткен? Оныҥ мынайып эткени нениҥ учун ойгор болгон?

⁶ Эҥ јакшызын талдагар. Эфестегилерге 5:15—17-деги сӧстӧр бисти эҥ јакшызын талдап турарга ӱредет. Темдектезе, Иисустыҥ Марфа ла Марияга айылдап јӱрген ӧйин сананып ийектер. Кӱндӱзек Марфа Иисусты кӱндӱлеерге, кӧп курсак-тамак белетеп, чаксырап турды. А бу ӧйдӧ Мария нени эткен? Мария дезе Иисустыҥ будыныҥ јанына отурала, оныҥ кажы ла айткан сӧзин лаптап угуп турды. Марфаныҥ кӱндӱзек болгонында бир де јаман неме јок болгон. Ол карын јакшы кылык јаҥ. Је Мария «эҥ јакшызын талдап алган» (Лука 10:38—42). Ол кӱнде Марияныҥ санаазында кандый курсак јигени эмес, је Иисустыҥ сӧстӧри арткан. Мынаҥ ол Иисусла кожо болгон ӧйди сӱреен баалаган деп кӧрӱп јадыс. Айдарда, биске де Иеговала колбуларысты тыҥыдатан ӧйисти база баалап турар керек. Мындый ӧйди чын эдип тузаланарга нени эдер керек?

7. Нениҥ учун мӱргӱӱр, Агару Бичикти шиҥдеер, шӱӱп сананар керек?

⁷ Мӱргӱӱри, Агару Бичикти шиҥдеери, шӱӱп сананары Иеговага бажырарына кирет деп ундыбас керек. Бис мӱргӱп турзаас, теҥеридеги Иегова Адабысла куучындажып турган болуп јадыс (Сар. 5:7). Агару Бичикти кычырып турзаас, Иегова Кудайыс керегинде билгирлер аладыс (Укаа 2:1—5). Шӱӱп сананып турзаас дезе Иегованыҥ сӱреен јараш кылык-јаҥдарын билип аладыс, анайда ок Кудай бойыныҥ јайаандарына ла бистерге кажыбыска ла нени эдерге турганын билип аладыс. Бу тоололгон керектерди эдери — ӧйди баалап турганысты кӧргӱзетен эҥ јакшы арга. Је ӧйди кайдаҥ табар?

8. Иисустыҥ чӧл јерде болгонынаҥ бис неге ӱренедис?

⁸ Арга бар болзо табыш јок, амыр јер табып алыгар. Темдектезе, Иисус јердеги ижин баштаардаҥ озо 40 кӱнниҥ туркунына чӧлдӧ јӱрген (Лука 4:1, 2). Анда ол Адазыныҥ берген ижин канайып бӱдӱрерим деп шӱӱп сананып, кӧп мӱргӱген. Бу оны келер ченелтелерге белетеп  салган. Бис мынаҥ неге ӱренедис? Слер јаан биледе јадып турган болзоор амыр, табыш јок јер таап аларга слерге јеҥил эмес болуп турган болор. Андый болзо, слер айлаардаҥ чыгып, кандый бир амыр јер таап алар аргалу. Темдектезе, Францияда Жюли эје ӧбӧӧниле кожо кичинек турада јадат. Олорды айландыра јаантайын тал-табыш болот. Эје айдат: «Оныҥ учун мен кажы ла кӱн парктӧӧн барып јадым. Ондо меге кем де чаптык этпей јат. Анайып амыр отурып, Иеговала јазап куучындажып аладым».

9. Иисус Адазыла колбуларын баалаган деп недеҥ кӧрӱнет?

⁹ Иисустыҥ ижи сӱреен кӧп болгон. Ол кайда ла барза, оны айландыра коркышту кӧп улус јуулыжатан. Олордыҥ кажызына ла Иисустыҥ ајарузы керек болгон. Бир катап бӱдӱн каланыҥ улузы оныҥ токтогон айылына једип келгилеген. Иисуска јаантайын ла бош јок то болгон болзо, је Адазыла колбуларын тыҥыдатан ӧйди ол тӱҥей ле таап туратан. Оныҥ учун Адазыла куучындажарга јер јарыгалакта да турар болгон (Марк 1:32—35).

10, 11. Матфей 26:40, 41-ле болзо, Иисус ӱренчиктерине кандый јӧп берген? Олор бу јӧпти бӱдӱрген бе?

¹⁰ Иисуска јердеги јӱрӱминиҥ калганчы кӱнинде, Адазыла кожо куучындажып аларга амыр јер керек болгон. Оныҥ учун ол караҥуй тӱнде Гефсиман садтӧӧн барган (Матф. 26:36). Ол ӧйдӧ Иисус ӱренчиктерине мӱргӱӱл јанынаҥ сӱреен керектӱ јӧп берген.

¹¹ Бу тӱнде не болгонын эске алып ийектер. Иисус ӱренчиктериле Гефсиман садтӧӧн келерде орой тӱн болгон, он эки частаҥ да ажып калган болор. Ол ӱренчиктерин мӱргӱзин деп айдала, бойы бир эмеш ыраактада барып Адазына мӱргӱген (Матф. 26:37—39). Је кайра једип келерде ӱренчиктери уйуктап јаткан болды. Оныҥ учун Иисус олорго: «Ойгу болугар, јаантайын мӱргӱгер» — деп база катап айдала, бойы ойто мӱргӱп барган. (Матфей 26:40, 41 кычырыгар.) Ӱренчиктеринде јеҥил эмес кӱн болгон, олор тыҥ арыгылап калган деп Иисус билген, оныҥ учун «эт-канда дезе, чине јок» деген. Је бу да тушта, олор мӱргӱӱрдиҥ ордына база ла уйуктагылап јаткан болды (Матф. 26:42—45).

12. Мӱргӱӱрге чыдалыс јетпей турган болзо нени эдер керек?

¹² Мӱргӱӱрге ӧй болуп турзын. Тыҥ арыганыстаҥ улам кезикте мӱргӱӱрге ийде-кӱчис те јетпей јат. Слерде андый болуп турган болзо, слер санааркабагар. Мындый айалгада нени эдерге јараар?  Кезик ака-эјелер чек ле уйуктаар алдында эмес, је тыҥ арыгалакта, эмеш эрте мӱргӱзе јакшы дежет. Анайда ок јадып алала мӱргӱзе эмес, је отурала эмезе тизеленеле мӱргӱзе торт болот. Је кезикте тыҥ арып эмезе санааркап турганаардаҥ улам Иеговага айдар сӧс тӧ таппай турган болороор. Андый болзо, тӱҥей ле Иеговага мӱргӱгер, ол слерди оҥдоп турган деп бир де алаҥзыбагар (Сар. 139:4).

13. Электронный эдимдер Иеговала кожо болотон ӧйиске кандый чаптыгын јетирердеҥ айабас?

¹³ Ӱренерге не де чаптыгын јетирбезин. Иеговала колбуларысты јӱк ле мӱргӱӱл тыҥыдып турган эмес, ӧскӧ дӧ аргалар бар. Темдектезе, Кудайдыҥ Сӧзин ӱренип турзаас эмезе јуунныҥ туштажуларына јӱрӱп турзаас, Иеговала колбуларыс база тыҥып јат. Бу ӧйди тузалу ӧткӱрерге нени эдерге јараар? Бойыгардаҥ сурагар: «Кудайдыҥ Сӧзин ӱренерге эмезе јуунныҥ туштажузыныҥ программазын јазап угарга, меге не-не чаптыгын јетирет пе?» Темдектезе, сообщениелер, имейлдер, телефон звонитап турган болор. Бӱгӱнги кӱнде телефон сӱреен керектӱ болот. Је психологияныҥ бир бичигинде айдылганыла: «Кижиниҥ јанында телефон јаткан болзо, оныҥ табыжын да токтодып койгон, экранын да тӧмӧн салып койгон болзо, ол тӱҥей ле кижиге јазап шӱӱп сананарга чаптык болуп јат *». Оныҥ да учун бистиҥ курултайларда программа башталардаҥ озо, улуска чаптык болбозын деп, телефондорды ӧчӱрип салзын деп айдып јат. Анайып ла бис бойыс Агару Бичикти ӱренип јатсаас, электронный эдимдер биске чаптык болбозын деп токтодып салзаас јакшы болор эди.

14. Филиппыдагыларга 4:6, 7-ле болзо, санааларыс туура барбазын деп, Иегова биске канай болужар аргалу?

¹⁴ Санааларыс туура барбазын деп, Кудайдаҥ болуш сурагар. Јуунныҥ туштажузында эмезе бойыс Агару Бичикти ӱренип јаткан тушта санааларыс туура јӱре берип турган болзо, Кудайдаҥ болуш сурагар. Бис та неге де санааркап турган болзоос, Кудайдыҥ Сӧзин шӱӱп сананарга биске јеҥил эмес болуп јат.  Андый да болзо, санааркаштарды туура эдип саларга албаданар керек. Кудайдыҥ амырын сурагар, ол слердиҥ јӱк ле јӱректеригерди эмес, је сагыжыгарды да кичеер. (Филиппыдагыларга 4:6, 7 кычырыгар.)

15. Иеговала кожо ӧткӱрген ӧй биске кандый туза берет?

¹⁵ Биске Иеговала куучындажарга, оны угарга, ол керегинде шӱӱп сананарга јарап та јат, јаан тузазын да кӧрӱп јадыс. Баштапкызында, анайып бис јазап сананбаган алтамдар этпей јадыс. Агару Бичикте мындый сӧстӧр бичилген: «Ойгор улусла јӱргендер ойгор болор» (Укаа 13:20). Бу јер-телекейдиҥ ӱстинде Иегованаҥ ойгор кем де јок, оныҥ учун Иеговала јуук куучындажып турзаас, ойгор болорыс. Анайып нени этсеес Кудайды сӱӱндирерис, нени этсеес оны ачындырарыс деп јарт оҥдоп турарыс.

16. Иеговала куучындажып турала, нениҥ учун бис јакшы ӱредӱчилер болуп каладыс?

¹⁶ Экинчизинде, бис ченемелдӱ ӱредӱчи болуп каларыс. Бис ӱредип турган улузысты Кудайдыҥ јуук најызы болуп калзын деп кӱӱнзеп јадыс. Иеговала канча ла кире кӧп ӧй ӧткӱрип турзаас, ончо ло кире бистиҥ сӱӱжис тыҥып јат. Бистиҥ јӱрегисте сӱӱш кӱйӱп турза, ӱредип те турган улузыстыҥ Кудайга сӱӱжин кӱйдӱрип ийерис. Иисус биске јаан тем кӧргӱскен. Ол Адазы керегинде јылу, јалакай сӧстӧр айдып турарда, оныҥ чындык ӱренчиктери бу сӧстӧрди угала, Кудайды оноҥ тыҥ сӱӱп баштаган (Иоанн 17:25, 26).

17. Бистиҥ бӱдӱмјисти мӱргӱӱри ле Агару Бичикти ӱренери канайып тыҥыдат?

¹⁷ Ӱчинчизинде, бӱдӱмјибис бек болор. Бис Иегованаҥ башкарту, болуш, амыр сурап турзаас, ол биске јаантайын каруузын берип јат. Анайып бӱдӱмјибис тыҥыйт (1 Иоанн 5:15). Је бӱдӱмјисти тыҥыдарга база нени эдер керек? Агару Бичикти тереҥжиде шиҥдеп ӱренер керек. Нениҥ учун дезе, Агару Бичикте айдылганыла: «Кижи... угуп турганда, бӱдӱп баштайт» (Рим. 10:17). Је бӱдӱмјини јаҥыс ла билгирлер эмес, ӧскӧ дӧ неме тыҥыдат. Ол керегинде оноҥ ары кӧрӱп ийектер.

18. Нениҥ учун шӱӱп сананар керек? Тем куучындап беригер.

¹⁸ Бӱдӱмјибис бек болзын деп, Иегова керегинде билип алганысты шӱӱп сананып турар керек. 77-чи Сарынды бичиген кижиниҥ учуралын кӧрӱп ийектер. Ол Иегованы бойыныҥ албатызын  алкабай барган деп сананып баштаган. Сарнаачы мынаҥ улам амыр уйкузын да јылыйткан (2—8-чи ӱлгерлер). Је ол нени этти? Ол Иеговага айтты: «Сениҥ ончо керектериҥди шӱӱп сананарым, ончо эдип турганыҥды тереҥжиде кӧрӧрим» (12-чи ӱлгер). Иегова алдында албатызына канайып болушканын сарнаачы јакшы билген де болзо, бу учуралда тыҥ санааркап, мынайып айткан: «Иегова бисти ундып салды ба? Ол недеҥ улам чугулданала, бисти килебей барды?» (9-чы ӱлгер). Је ол андый да болзо, Иегова албатызын килеп, ого канайып болушканын эске алып баштаган (11-чи ӱлгер). Мынаҥ кандый туза болгон? Анайып Иегова албатызын алдында да канайып артыргыспаган, эмди де артыргыспас деп сарнаачыныҥ бӱдӱмјизи тыҥыган (15-чи ӱлгер). Бу учурал биске јаан ӱредӱ болуп јат. Иегова бойыныҥ албатызына да, биске бойыска да канайып болушканын шӱӱп сананып турзаас, бистиҥ де бӱдӱмјибис тыҥыыр.

19. Иеговала кожо болуп турган ӧйистиҥ эҥ јаан тузазы кандый?

¹⁹ Тӧртинчизинде, бис Иегованы оноҥ тыҥ сӱӱп јадыс. Иеговага сӧсуккур болорго, бойыстыҥ јӱрӱмисти солыырга, анайда ок ого чындык артарга, јӱк ле сӱӱш эҥ ле тыҥ кӱӱнзедип јат (Матф. 22:37—39; 1 Кор. 13:4, 7; 1 Иоанн 5:3). Иеговала јуук колбуларлу болорынаҥ артык не де јок! (Сар. 63:1—8).

20. Иеговала кожо оноҥ кӧп болорго нени эдерге шӱӱп алдаар?

²⁰ Мӱргӱӱри, Кудайдыҥ Сӧзин ӱренери ле шӱӱп сананары Кудайга бажырарына кирип јат. Иисус чылап Иеговала кожо болуп турарга амыр јер табып алыгар. Чаптык болгодый немелерди туура јылдырып салар. Кычырынып јатсаар, јуунныҥ туштажуларында болзоор, санаагар туура учпазын деп, Иегованаҥ болуш сурагар. Ӧйди баалап, оны чын тузаланып турзаас, келер ӧйдӧ Иегова биске ӱргӱлји јӱрӱм сыйлаар! (Марк 4:24).