1, 2. а) Иисустыҥ јӱрӱмин ле Кудайга иштегенин сананзаас, биске кандый сезимдер келет? б) Бу јӧрмӧлдӧҥ бис нени шӱӱп кӧрӧрис?

 БИСТИҤ јуук кижибис божоп калза, бис ол кижини коркышту тыҥ јоктоп јадыс. Баштап тарый ол кижиниҥ калганчы кӱндерин, анчада ла божоор алдында коркышту тыҥ шыралаганын сананып турзаас, биске андый ачу болот. Је канча да ӧй ӧдӧ берзе, бистиҥ ачубыс араайынаҥ јоголып, ойто ло јӱрӱмге сӱӱнип баштайдыс. Ол кижиниҥ тирӱ јӱрерде бисти неге-неге ӱреткенин, јакшы сӧстӧрин, эткен керектерин, анайда ок бистиҥ кожо каткырышканысты сананып турзаас, андый јакшы боло берет.

² Анайып ла ок Иисустыҥ кыйналып божогоны керегинде кычырзаас, јӱрегиске ачу болот (1 Кор. 11:24, 25). Кайраканныҥ Эҥириниҥ ӧйинде Иисустыҥ толынты тайылгазыныҥ сӱреен јаан тузазын оноҥ кӧп шӱӱп сананарга албаданадыс. Је Иисустыҥ јерде јӱрген тужында айткан сӧстӧрин, эткен керектерин шӱӱп сананзаас, сӱӱнчи аладыс. Анайда ок Иисустыҥ эмди нени эдип турганын ла келер ӧйдӧ нени эдерин сананзаас, бистиҥ кӱӱнис кӧдӱрилет. Бу керегинде ле Иисустыҥ сӱӱжи керегинде шӱӱп сананзаас, быйанысты керектерисле кӧргӱзерге кӱӱнзейдис. Эмди бу керегинде шӱӱжип ийектер.

3. Бисте толынты учун быйанду болотон кандый шылтактар бар?

³ Бис Иисустыҥ јӱрӱмин ле ӧлӱмин сананып турзаас, јӱрегис быйанла толот. Иисус јерде јӱрерде улуска Кудайдыҥ Каандыгы алкыштар экелерин куучындаган. Каандык керегинде чындыкты бис тыҥ баалап јадыс. Нениҥ учун дезе анайып бисте Иегова ла Иисусла најылажатан арга ачылган. Иисуска бӱдӱп турган улуста келер ӧйдӧ ӱргӱлјиге  јӱретен ижемји бар ла божоп калган улузы тирилип келзе, олорды кӧрӧтӧн арга бар (Иоанн 5:28, 29; Рим. 6:23). Бис мындый алкыштарга бир де турбас улус. Иегованыҥ ла Иисустыҥ биске эткен јакшызы учун бис качан да тӧлӧп болбозыс (Рим. 5:8, 20, 21). Је бу мындый баалу сый учун бис быйанысты кӧргӱзер аргалу. Канай?

4. Мария Иисуска быйанын канайып кӧргӱскен? (Јурукты кӧрӱгер.)

⁴ Мария Магдалинаныҥ учуралын кӧрӱп ийектер. Бу јокту ӱй кижини јети кӧрмӧс кыйнаган. Ол оны кем-кем јазып ийер деп чӧкӧп турган болор. Оныҥ учун Иисус оны кӧрмӧстӧрдӧҥ јайымдап ийерде, ол ого не аайлу быйанду болгон. Быйанду болгонынаҥ улам ол Иисустыҥ ӱренчиги болуп алала, бойыныҥ ӧйин, ийде-кӱчин, акча-манадын Иисуска болужарга тузаланган (Лука 8:1—3). Мария Иисуска оныҥ болужы учун сӱреен јаан быйанду болгон. Је келер ӧйдӧ Иисус ого кандый алкыштар берерин оныҥ санаазында да болбогон болор: Иисус дезе «ого бӱткен кажы ла кижи... ӱргӱлји јӱрӱмдӱ болзын деп», бойыныҥ јӱрӱмин берер (Иоанн 3:16). Мария јаан быйанду болгонынаҥ улам Иисуска чындык болгон. Иисусты керӱ агашка кадап саларда ол оныҥ јанында болгон ло Иисусты ла оныҥ јанында болгон улусты токунаткан (Иоанн 19:25). Је Иисус божоп каларда Мария база эки ӱй кижиле кожо Иисустыҥ эди-канын сӱртерге, јараш јытту сӱркӱш экелген (Марк 16:1, 2). Мария чындык артканы учун јаан кайрал алган. Ол дезе тирилип келген Иисусты кӧргӧн, керек дезе оныла куучындашкан да. Мындый арга дезе кӧп саба ӱренчиктерде болбогон (Иоанн 20:11—18).

5. Бис Иегова ла Иисуска быйанысты канайып кӧргӱзерис?

⁵ Је Иегованыҥ ла Иисустыҥ бистерге јакшыны эдип турганы учун канайып быйанысты кӧргӱзерис? Бис Каандыктыҥ ижине бойыстыҥ ӧйисти, ийде-кӱчисти ле акча-манадысты кысканбай јадыс.  Темдектезе, бис чындык бажырышка керектӱ тураларды тударында ла оныҥ ижин јеткилдееринде туружар аргалу.

6. Толынты тайылганы кажы ла кижиге эдилген сый деп нениҥ учун айдарга јараар?

⁶ Иегова ла Иисус бисти сӱреен тыҥ сӱӱп турганын сананзаас, бис олорды база бастыра јӱрегистеҥ сӱӱй бередис (1 Иоанн 4:10, 19). Анчада ла Иисус бистиҥ кажыбыс ла учун јӱрӱмин берген деп оҥдоп ийзеес, бис олорды оноҥ тыҥ сӱӱйдис. Мыны апостол Павел јакшы оҥдогон. Оныҥ быйанду сӧстӧри Галаттарга бичиген самарадаҥ кӧрӱнет: «Кудайдыҥ Уулына бӱткенимле јӱрӱп јадым. Ол мени сӱӱп, мен учун бойыныҥ јӱрӱмин берген» (Гал. 2:20). Иегова толынты тайылгага тайанып, бисле најылажарга, бисти бойына јууктадып алган (Иоанн 6:44). Иегова слердеҥ та нени де јакшы кӧрӧлӧ, слерди бойыныҥ најызы эдип аларга, слер учун сӱреен јаан баа тӧлӧгӧнин сананып ийзеер, ӧзӧк-буураар јымырай бербейт пе? Иегова ла Иисусты оноҥ тыҥ сӱӱй бередеер дезеер? Бойоордоҥ сурагар: «Мындый сӱӱш мени неге кӱӱнзедет?»

7. Јурукты кӧрӱгер. Иегова ла Иисусты сӱӱп турганысты бис канайып кӧргӱзерис? (2 Коринфтегилерге 5:14, 15; 6:1, 2).

⁷ Иегова ла Христосты сӱӱгенис бисти улусты сӱӱрге кӱӱнзедет. (2 Коринфтегилерге 5:14, 15; 6:1, 2, ЈТ кычырыгар.) Је улус бистиҥ сӱӱжисти недеҥ кӧрӱп ийер? Бис јаантайын Каандык керегинде сӱӱнчилӱ јарды јарлап турзаас. Бис улустыҥ угы-тӧзине, байы-јоктузына ла јамылузына ајару этпей јадыс. Бис Кудайдыҥ Сӧзин туштаган ла улуска куучындап јадыс. Анайып бис Иегованыҥ кӱӱн-табын бӱдӱредис. А ол мынайып айткан: «Ончо улус аргадалып, чындыкты билип алзын» (1 Тим. 2:4).

8. Бис ака-эјелериске сӱӱжисти канайып кӧргӱзер аргалу?

 ⁸ Анайда ок Кудайды ла Христосты сӱӱгенис ака-эјелеристи сӱӱрге кӱӱнзедет (1 Иоанн 4:21). Оныҥ учун олордыҥ керек-јарактарын сурап угадыс ла олорго кӱч ӧйлӧрдӧ болужып јадыс (2 Кор. 1:3—7; 1 Фес. 5:11, 14). Анайда ок олордыҥ јуук кижизи божогон болзо, бойы оорып турган болзо, эмезе тыҥ кунугып јӱрген болзо токунадып, кӱӱн-санаазын кӧдӱрерге албаданадыс. Бис олор учун мӱргӱп јадыс, нениҥ учун дезе Агару Бичикте мынайда айдылган: «Акту кижиниҥ јайнап мӱргӱгени кӧп кӱчтӱ болот» (Иак. 5:16, ЈТ).

9. Бис ака-эјелериске сӱӱжисти база канайып кӧргӱзерис?

⁹ Бис ака-эјелерди сӱӱп турганысты, анайда ок олорло амыр-энчӱ јӱрерге албаданганысла кӧргӱзедис. Улустыҥ јаманын таштаарында Иегованаҥ тем алып турганыс. Иегова бистиҥ кинчектеристи бӧктӧӧргӧ бойыныҥ сӱӱген Уулын берген болордо, бис те биске удура кинчек эткен ака-эјелердиҥ јаманын таштаар учурлу эмезис пе? Бис Иисустыҥ укаа сӧзинде айдылган јаман кул болбоско турганыс дезеер? Бу кулдыҥ коркышту јаан тӧлӱзин бийи бӧктӧп койгон до болзо, байагы кул ӧскӧ кулдаҥ бир кичинек тӧлӱзин алымдай берген (Матф. 18:23—35). Оныҥ учун јуунда слер кемле-кемле јаражып болбой турган болзоор, Кайраканныҥ Эҥиринеҥ озо јаражып аларга албаданзаар, јакшы болор эди (Матф. 5:23, 24). Анайып, слер Иегова ла Иисусты тыҥ сӱӱп турганаарды кӧргӱзереер.

10, 11. Аксагалдар Иеговага ла Иисуска сӱӱжин канайып кӧргӱзер аргалу (1 Пётр 5:1, 2).

¹⁰ Аксагалдар Иегованы ла Иисусты сӱӱп турганын канайып кӧргӱзер аргалу? Олордыҥ мындый сӱӱжи Иисустыҥ койлорын кабырганынаҥ кӧрӱнер. (1 Пётр 5:1, 2 кычырыгар.) Бу дезе Иисустыҥ Пётрла куучындашканынаҥ јарт кӧрӱнет. Пётр Иисусты ӱч катап садып ийген. Оныҥ учун бойыныҥ бурузын алынып, Иисусты сӱӱп турганын кӧргӱзерге сананган болор. Иисус тирилген кийнинеҥ: «Иона [«Иоанныҥ», ЈТ] уулы Симон, сен мени сӱӱп јадыҥ ба?» — деп сураган. Апостол Пётр Иисусты тыҥ сӱӱп турганын кӧргӱзерге, нени де болзо эдерге белен болгон. Иисус ого айткан: «Койлорымды кабыр» (Иоанн 21:15—17). Пётр божоордыҥ божогончо ло Кайраканыныҥ койлорын кабырып јӱргениле Иисусты сӱӱгенин кӧргӱскен.

¹¹ Кару аксагалдар, Иисустыҥ Пётрга айткан сӧстӧриниҥ учурын оҥдоп турганаарды, слер Кайраканныҥ Эҥири болотон ӧйдӧ канайып кӧргӱзереер? Слер Иегованы ла Иисусты сӱӱп турганаарды, ака-эјелердиҥ кӱӱнин јаантайын кӧдӱрерге болужып турганаарла, анайда ок јууннаҥ ыраап калган ака-эјелерди Иеговага кайра јандырарга, тегиннеҥ кӧрӧ, кӧптӧдӧ болушканаарла кӧргӱзереер (Иез. 34:11, 12). Сӱӱжигерди кӧргӱзетен база бир арга — ол Агару Бичикти ӱренип турган улуска, анайда ок Кайраканныҥ Эҥирине баштапкы катап келген улуска ајару эдип, болужары. Олорды Иисустыҥ ӱренчиктери болор деп иженип тура, олорго бистиҥ ортобыста јарап турзын деп албаданар керек.

12. Иисустыҥ божоорынаҥ бир кӱн озо, эҥирде, айткан сӧстӧри биске јалтанбас болорго канайып болужат? (Иоанн 16:32, 33).

¹² Божоордоҥ бир кӱн озо, эҥирде, Иисус ӱренчиктерине мынайып айткан:  «Телекейде слерди јӱзӱн-јӱӱр кӱчтер сакыйт, је јалтанбас болугар! Мен телекейди јеҥип алгам». (Иоанн 16:32, 33, ЈТ кычырыгар.) Иисуска ӧштӱлеринеҥ коркыбай, божоордыҥ божогончо Иеговага чындык артарга не болушкан? Ол Иеговага иженген. Је оныҥ ӱренчиктери база андый ла ченелтелерге табартар деп Иисус билген, оныҥ учун Адазын олорды корулазын деп сураган (Иоанн 17:11). Мыны билгенис биске нениҥ учун јалтанбас болорго болужат? Нениҥ учун дезе Иегова бистиҥ ӧштӱлердеҥ канча катапка кӱчтӱ (1 Иоанн 4:4). Оныҥ кӧзиниҥ алдында ӱзе неме ачык. Бис Иеговага иженип турзаас, недеҥ де коркыбазыс та, јалтанбазыс та.

13. Аримафей каладаҥ Иосиф деп кижи јалтанбас болгонын канайып кӧргӱскен?

¹³ Аримафей каладаҥ Иосиф деп кижиниҥ учуралын кӧрӱп ийектер. Ол Синедрионныҥ, иудейлердиҥ Ӱстӱги јаргызыныҥ тоомјылу кижизи болгон. Бу кижини дезе озо баштап јалтанбас болгон деп айдып болбозыҥ. Апостол Иоанн ол керегинде мындый сӧстӧр айткан: «Ол Иисустыҥ ӱренчиги болгон, је иудейлердеҥ коркып, онызын јажытта туткан» (Иоанн 19:38). Иосиф сӱӱнчилӱ јарды угуп, Иисуска бӱдӱп турганын иудейлердеҥ јажырып јӱрген. Нениҥ учун дезе ол кӧрӱмјилӱ иштӱ болгонынаҥ улам улустыҥ алдына тоомјызын јылыйтпаска кӱӱнзеген. Је Иисустыҥ божогоныныҥ кийнинеҥ Агару Бичикте айдылганыла, Иосиф «Пилатка тидинип [јалтанбай] киреле, Иисустыҥ сӧӧгин сурады» (Марк 15:42, 43). Айдарда, Иосиф Иисустыҥ ӱренчиги болгонын база јажырбай јӱрген.

14. Слер улустаҥ коркып турзаар нени эдер аргалу?

¹⁴ Слер Иосиф чилеп улустаҥ коркыганаар ба? Слер школдо эмезе иште бойыгарды Иегованыҥ Керечили деп айдарга јалтанганаар ба? Ол эмезе јарчы болорго ло сууга чӧҥӱрилерге улустаҥ коркып турганаар ба? Андый болзо, мындый санаалар слерди чын јолдоҥ туура апарбазын. Иеговага акту кӱӱнигердеҥ мӱргӱгер. Иегованыҥ табын јалтанбай бӱдӱрип турарга болуш сурагар. Слер Иегованыҥ карууларын кӧрӱп турзаар, јалтанбас ла ийде-кӱчтӱ болороор (Иса. 41:10, 13).

15. Ӱренчиктер Иисусты кӧрӧлӧ сӱӱнгенинеҥ улам нени эдерге кӱӱнзей бердилер? (Лука 24:52, 53).

¹⁵ Иисус божоп каларда оныҥ ӱренчиктери коркышту тыҥ кунуккан. Бойыгарды олордыҥ јерине тургузып ийзеер де:  олор сӱӱген најызын јылыйткан, эмди олордо неге де ижемји јок деп сананган болор (Лука 24:17—21). Је Иисус тирилип, олорго келеле, ол Кудайдыҥ судурларында нени эдер учурлу болгонын јартап берген, анайда ок олорго јаан јакылта берген (Лука 24:26, 27, 45—48). Иисус теҥеридӧӧн јӱре берерде ӱренчиктердиҥ кемизи де кунукпай турды. Нениҥ учун дезе олордыҥ Бийи тирӱ, ол олорго јаҥы јакылтаны бӱдӱрерге болужар деп олор билип алган. Мындый сӱӱнчи олорды Иегованы оноҥ ло ары мактаарга кӱӱнзеткен (Лука 24:52, 53 кычырыгар; Ап. ижи 5:42).

16. Бис Иисустыҥ ӱренчиктеринеҥ неге ӱренедис?

¹⁶ Бис Иисустыҥ ӱренчиктеринеҥ неге ӱренедис? Бистер Иеговага јаҥыс ла Кайраканныҥ Эҥирин ӧткӱрер ӧйдӧ эмес, је бӱдӱн јылдыҥ туркунына сӱӱнчилӱ иштеерге кӱӱнзейдис. Мыныҥ учун бистерге Кудайдыҥ Каандыгын баштапкы јерге тургузар керек. Темдектезе, јарлаар ишке туружарга, јуунныҥ туштажуларына јӱрерге, анайда ок билелик бажырышты ӧткӱрерге бир де буудак этпейтен иштер бедиреп јадыс. Кезик јарчылар бойыныҥ јуунында эмезе јарчылар јетпей турган јерде кӧптӧдӧ јарлаарга, кезик ака-эјелердиҥ керектӱ деп кӧрӱп турган немелерди де албай јадылар. Чыннаҥ ла, Кудайга кӧптӧдӧ иштеерге ле Каандыкты баштапкы јерге тургузарга, турумкай болор керек. Је бистер мынайып эдерге албаданзаас, Иегованаҥ кӧп алкыштар аларыс (Укаа 10:22; Матф. 6:32, 33).

17. Кайраканныҥ Эҥири ӧдӧр ӧйдӧ слер нени эдерге шӱӱп алдаар? (Јурукты кӧрӱгер.)

¹⁷ Кандык айдыҥ 4-чи кӱнинде, вторникте, бис Кайраканныҥ Эҥирине јуулыжарыс. Бу аҥылу туштажуны тыҥ сакып јадыбыс. Је биске Иисустыҥ јӱрӱмин ле ӧлӱмин, анайда ок Иисустыҥ ла Иегованыҥ сӱӱжин јӱк ле бир кӱн сананар керек эмес, је Кайраканныҥ Эҥирин ӧткӱретен ӧйдиҥ туркунына сананар керек. Темдектезе, «Последняя неделя земной жизни Иисуса» («Јаҥы телекей» деп кӧчӱрмеде Приложение Б12-ни кӧрӱгер) деген таблицаны кычырып, шӱӱп сананарга ӧй табыгар. А Иисустыҥ јӱрӱми керегинде кычырып јатсагар, слердиҥ быйаныгарды ла сӱӱжигерди тыҥыдатан ол эмезе сӱӱнчилӱ ле јалтанбас болорго болужатан шӱӱлтелерге ајару эдип туругар. Оноҥ дезе, акту јӱрегердеҥ быйаныгарды кандый керектереерле кӧргӱзереер деп сананыгар. Иисустыҥ ӧлӱмин эске аларга эткен ижигерди Иисус сӱреен тыҥ баалап јат деп бир де ундыбагар! (Ачыл. 2:19).