1, 2. Бис нениҥ учун кажы ла јыл Кайраканныҥ Эҥирине келедис?

 ИИСУС 2 000 кире јыл кайра улусты јажын-чакка јӱрзин деп, бойыныҥ јӱрӱмин берген. Ол божоордоҥ бир кӱн озо, эҥирде, бойыныҥ ӱренчиктерине калаш ла кызыл аракы тузаланатан јеҥил чӱм-јаҥ ӧткӱрзин деп айткан. Бу чӱм-јаҥ улуска Иисустыҥ сӱӱжин эске алынарга болужар керек болгон (1 Кор. 11:23—26).

² Бис бу јакылтаны Иисусты тыҥ сӱӱп турганыстаҥ улам бӱдӱрип јадыс (Иоанн 14:15). Кажы ла јыл Кайраканныҥ Эҥириниҥ ӧйинде, Иисустыҥ толынты тайылгазы учун быйанысты кӧргӱзип, оныҥ бу тайылгазы улуска кандый туза экелип турганы керегинде мӱргӱп, шӱӱп сананадыс. Анайда ок бу аҥылу туштажуга кӧп улусты кычырадыс. Оноҥ бойыс та бу туштажуны божотпоско албаданып јадыс.

3. Бу јӧрмӧлдӧҥ нени кӧрӧрис?

³ Бу јӧрмӧлдӧҥ бис, Иисус Христостыҥ ӱренчиктери, оныҥ ӧлӱмин эске аларга нени эдип турганын кӧрӧрис: 1) бу Эҥирди Иисустыҥ јакыганы аайынча эдедис, 2) улусты кычырып јадыс, 3) бу Эҥирге кезикте бойыстыҥ айалгаларыс кӱч те болзо, келип јадыс.

4. Кайраканныҥ Эҥиринде кандый чындыктар јарталат ла биске олорго нениҥ учун јаан ајару эдип турар керек? (Лука 22:19, 20).

⁴ Бис Кайраканныҥ Эҥиринде куучын-эрмек угуп јадыс. Ондо јаан учурлу сурактардыҥ каруулары берилет: улуска нениҥ учун толынты тайылга керек, канайып бир кижиниҥ ӧлӱми кӧп улустыҥ кинчектерин бӧктӧп турган. Анайда ок бу куучын-эрмек кызыл аракыны ла  калашты кемдер амзаар аргалу деп ле бу сӱр-темдектердиҥ учурын эске алындырат. (Лука 22:19, 20 кычырыгар.) Бого коштой бу Эҥирде, јерде јажын-чакка јадатан улуска Иегова кандый сыйлар белетеп салганын шӱӱп јадыс (Иса. 35:5, 6; 65:17, 21—23). Бис бу чындыктарды алдынаҥ ла бери јакшы билер де болзоос, олорды ойто ло катап эске алынып, баалап турактар. Нениҥ учун дезе миллиардтар тоолу улус бу чындыктарды оҥдобой турган ла Иисустыҥ толынты тайылгазы кандый туза берип турганын билбей де јат. База бир неме, олор Кайраканныҥ Эҥирин Иисустыҥ јакыганы аайынча ӧткӱрбейдилер. Мыныҥ шылтагы кандый?

5. Апостолдордыҥ кӧп сабазы божоп каларда, улус Иисустыҥ теминеҥ канайып тудунбай барган?

⁵ Кӧп саба апостолдордыҥ божогоныныҥ кийнинеҥ јуунда тӧгӱн христиандар табылган (Матф. 13:24—27, 37—39). Олор «ӱренчиктерди... бойыныҥ кийнинеҥ апарарга, кӱн-тескери неме айдар» болгон (Ап. ижи 20:29, 30). Темдектезе Агару Бичикте «Христос то кӧп улустыҥ кинчектерин јоголторго, бир катап тайылган» деп айдылган да болзо, олор бу тайылганы катап-катап экелер керек деп ӱреткилеген (Евр. 9:27, 28). Бӱгӱнги кӱнде кӧп улус бу тӧгӱн ӱредӱге бӱдӱп турган. Кезик кудай јаҥдарда улус серкпеге јаантайын, керек дезе кажы ла кӱн, келип, литургия b деген чӱм-јаҥга туружадылар. А кезик кудай јаҥдар Иисустыҥ тайылгазын јӱк каа-јаада эске алат. Бу серкпелердиҥ кӧп сабазы Христостыҥ тайылгазы неге керектӱзин јазап билбес. Олор: «Христостыҥ тайылгазы чын ла мениҥ кинчектеримди таштаар аргалу ба?» — деп сананат. Улуста нениҥ учун мындый сурак чыгат? Нениҥ учун дезе олор алдынаҥ ла бери, Христостыҥ тайылгазы улустыҥ кинчегин таштап болбос деп ӱредилген. Је Христостыҥ чындык ӱренчиктери улуска бу сурактыҥ аайына чыгарга канайып болужып турган?

6. 1872 јылда Агару Бичиктиҥ шиҥдеечилери нени билип алган?

⁶ 1870 јылда Чарлз Тейз Расселл Агару Бичиктиҥ кезик шиҥдеечилериле кожо Агару Бичикти шиҥдеп баштагандар. Олор Иисустыҥ тайылгазы нени темдектеп турганын ла оныҥ ӧлӱмин канайып эске аларын билип аларга кӱӱнзеген. Оноҥ 1872 јылда Иисустыҥ тайылгазы бастыра кижилик улус учун берилген деп оҥдоп ийгендер. Билип алганын олор бир де јажырбай, бастыра улус билзин деп, газеттер, бичиктер, журналдар ажыра таркадып баштаган. Оноҥ бир эмеш ӧйдӧҥ олор баштапкы чактыҥ христиандары чылап, Кайраканныҥ Эҥирин эске аларга, бир јылга бир катап јуулыжып баштаган.

7. Агару Бичиктиҥ озогы шиҥдеечилериниҥ билип алганы биске незиле тузалу?

⁷ Бӱдӱн јарым чак кайра Агару Бичиктиҥ шиҥдеечилериниҥ шиҥдегени биске бӱгӱнги де кӱнде тузалу. Незиле? Иегова олордыҥ болужыла биске Христостыҥ тайылгазыныҥ учурын ла бу тайылга кандый арга ачып турганын билип аларга болушкан (1 Иоанн 2:1, 2). Анайда ок кезик улус теҥериде јӱрер, олор качан да божобос, а миллиондор тоолу ӧскӧ улус јажын-чакка јерде јӱрер деп билип алганыс. Иегова  бисти сӱреен тыҥ сӱӱп турганын ла Христостыҥ тайылгазы биске кандый туза берип турганын шӱӱп сананзаас, Иеговала бистиҥ колбуларыс тыҥыйт (1 Пётр 3:18; 1 Иоанн 4:9). Оныҥ учун Агару Бичиктиҥ баштапкы шиҥдеечилеринеҥ тем алып, бис Христостыҥ темиле ӧткӱрилип турган Кайраканныҥ Эҥирине улусты база кычырадыс.

8. Иегованыҥ ишчилери улусты Кайраканныҥ Эҥирине кычырарга нени эдет? (Јурукты кӧрӱгер.)

⁸ Иегованыҥ Керечилери Кайраканныҥ Эҥирине улусты кычырып турганы канча јылдар болуп калды. 1881 јылда США-да Аллеге́йни (Пенсильвания штат) деп каладагы ака-эјелер Кайраканныҥ Эҥирин бир турага јуулыжып ӧткӱрген. Соҥында бу Эҥир кажы ла јуунда ӧткӱрилип баштаган. 1940 јылда, тулаан айда, чындыкла јилбиркей берген улусты Кайраканныҥ Эҥирине кычырарга јараар деп јар айдылган. А 1960 јылда јуундар Бет-Элдеҥ Эҥирге кычыратан кепке базып салган кычыртулар алып баштаган. Оноҥ ло бери миллиардтар тоолу кычыртулар таркадылды. Бис нениҥ учун Кайраканныҥ Эҥирине кӧп улусты кычырарга албаданып јадыс?

9, 10. Бис Кайраканныҥ Эҥирине кемди кычырарга албаданадыс, нениҥ учун? (Иоанн 3:16).

⁹ Кайраканныҥ Эҥирине баштапкы катап келген улус Иегова ла Иисус бистерге ончобыска нени эткенин билип алзын деп кӱӱнзейдис. (Иоанн 3:16 кычырыгар.) Анайда ок бу туштажунаҥ кӧргӧни ле укканы олорды чындыкты  кӧптӧдӧ билип алала, Иегованыҥ ишчизи болорго кӱӱнзедер деп иженип јадыс. Је бис јӱк ле чындыкты бир де укпаган улусты кычырып турган эмезис.

¹⁰ Бис анайда ок јууннаҥ тууралап калган Иегованыҥ Керечилерин кычырадыс. Олорды Иегова эмдигенче ле сӱӱп турган. Кезик андый Керечилер кычыртуны алып, Кайраканныҥ Эҥирине једип келет. Бис олорды кӧрзӧӧс, сӱреен тыҥ сӱӱнедис. Кайраканныҥ Эҥири олорго Иеговага иштеген сӱӱнчилӱ јылдарын эске алындырар болор. Мониканыҥ c учуралын кӧрӱп ийектер. Ол COVID-19 деп пандемияныҥ ӧйинде јуунла кожо ойто јарлап баштаган. 2021 јылдыҥ Кайраканныҥ Эҥиринде бололо, эје мындый сӧстӧр айткан: «Бу Эҥир меге чыннаҥ ла аҥылу болгон. Нениҥ учун дезе мен 20 јылдыҥ туркунына баштапкы катап јуунла кожо улусты Кайраканныҥ Эҥирине кычыргам. Иегова ла Иисуска быйанымды кӧргӱзерге, акту јӱрегимнеҥ иштенгем» (Сар. 103:1—4). Је улус кычыртуны алза да, албаза да бис тӱҥей ле бастыра улусты кычырадыс. Нениҥ учун дезе Иегова бистиҥ албаданып турганысты баалап јат.

11. Кайраканныҥ Эҥирине улусты кычырып турганысты Иегова канайып алкайт? (Аггей 2:7).

¹¹ Кайраканныҥ Эҥирине улусты кычырганы́с Иегованыҥ алкыжы јок болбой јат. 2021 јылда COVID-19 деп пандемиянаҥ улам токтодулар да болгон болзо, Кайраканныҥ Эҥирине келген улустыҥ тоозы бастыра јердиҥ ӱстинде Иегованыҥ Керечилериниҥ тоозынаҥ эки катапка кӧп болгон — 21 367 603. Је Иеговага озо ло баштап улустыҥ тоозы эмес, је улустыҥ јӱрӱми баалу (Лука 15:7; 1 Тим. 2:3, 4). Оныҥ учун бис Кайраканныҥ Эҥирине ачык јӱректӱ улусты табып аларга оныҥ биске болужып турганына бир де алаҥзыбай јадыс. (Аггей 2:7 кычырыгар.)

12. Недеҥ улам Кайраканныҥ Эҥиринде болорго кӱч болордоҥ айабас? (Јурукты кӧрӱгер.)

¹² Иисустыҥ судурыла болзо, калганчы кӱндерде бистиҥ јӱрӱмис кӱч болор. Андый кӱчтер јууктарыстыҥ удурлажуларынаҥ, истежӱлердеҥ, јуу-согуштардаҥ, эпидемиялардаҥ ла оноҥ до ӧскӧ кӱчтердеҥ улам болордоҥ айабас (Матф. 10:36; Марк 13:9; Лука 21:10, 11). Мындый кӱчтердеҥ улам Кайраканныҥ Эҥиринде болорго кӱч келижер болор. Је бистиҥ ака-эјелер бу кӱчтерди ӧдӧргӧ нени эдип турган? Иегова олорго канайып болужып турган?

13. Иегова Артёмныҥ тӱрмеде Кайраканныҥ Эҥирин јалтанбай ӧткӱргенин кӧрӧлӧ, канайып кайралдады?

¹³ Тӱрмеде. Бӱдӱмјизи учун тӱрмеде отурып турган бистиҥ акалар Иисустыҥ ӧлӱмин эске алатан Эҥирди јазап туруп ӧткӱрерге албадангылайт. Артёмныҥ темин кӧрӱп ийектер. 2020 јылда, јаскыда Кайраканныҥ Эҥирин ӧткӱрип турган ӧйдӧ Артём тӱрмеде болгон. Оныла кожо 17 квадратный метр камерада база тӧрт кижи отурган. Је андый да болзо, Артём Иисустыҥ ӧлӱмин эске алатан Эҥирге сӱр-темдектер ле бойы-бойына куучын-эрмек белетеп алган. Оныла кожо отурган тӧрт кижи јаантайын ла јаман сӧстӧр айдып, таҥкылап туратан. Артём олордоҥ сурады: «Слер бир сааттыҥ туркунына јаман сӧс айтпай, таҥкылабай чыдажып болороор  бо?» Олор јӧпсинерде, Артём кайкаган. Оноҥ Артём олордоҥ сурады: «Слер куучын-эрмекти угараар ба?» Олор дезе: «Јок. Биске ол керек јок» — дешкиледи. Је качан Артём Кайраканныҥ Эҥирин ӧткӱрип баштап ийерде, олор мыны ӱзе кӧрӧлӧ, кайкап, Артёмноҥ кӧп сурактар сурап баштагылады.

14. COVID-19 деп пандемия башталарда Кайраканныҥ Эҥирин ӧткӱрерге кандый иштер эдилген?

¹⁴ COVID-19 деп пандемия. Ковид башталарда Иегованыҥ ишчилери Каандыктыҥ Туразында јуулышпай барган. Је бу айалга Кайраканныҥ Эҥирин ӧткӱрерге буудак этпеди d. Нениҥ учун дезе интернеттӱ јуундар Кайраканныҥ Эҥирин видеоконференция ажыра ӧткӱрген. Је интернет јок миллиондор тоолу улус Кайраканныҥ Эҥирин канайып ӧткӱрген? Олор куучын-эрмекти телевизор ло радио ажыра уккан. Анайда ок филиалдар бу куучын-эрмекти 500-теҥ кӧп тилдерге бичип салган. Акалар дезе оны ыраакта јадып турган ака-эјелерге јетирип берген. Анайып  олор до Кайраканныҥ Эҥирин ӧткӱрген.

15. Сью деп ӱй кижиниҥ теминеҥ слер неге ӱренедеер?

¹⁵ Билегистиҥ улузы буудактайт. Кезик улуска јууктары удурлажат. Сью деген ӱй кижиниҥ учуралын кӧрӱп ийектер. 2021 јылда Кайраканныҥ Эҥиринеҥ бир кӱн озо, ол оныла Агару Бичик ӱренип турган эјеге билезиниҥ удурлажузынаҥ улам Кайраканныҥ Эҥирине келип болбос деп айткан. Је эје дезе Лука 22:44-ти ого кычырала, кӱч ӧйлӧрдӧ Иисустаҥ тем алар керек деп јартап берген. Ӧскӧртӧ айтса, Иеговага мӱргӱп, ого иженер керек. Эртезинде дезе Сью тӱҥей ле сӱр-темдектерди белетеп алала, jw.org сайтта чыккан эртен турагы бажырыштыҥ аҥылу программазын кӧрӱп алды. Ол ло кӱн эҥирде Сью бойыныҥ кыбынаҥ телефон ажыра Кайраканныҥ Эҥирине колбожып алган. Эҥирдиҥ кийнинеҥ ол эјеге мындый сӧстӧр бичиди: «Кече сен мениҥ кӱӱнимди андый тыҥ кӧдӱрип салгаҥ! Мен Кайраканныҥ Эҥиринде болорго, бойымныҥ јанымнаҥ албаданып ийеримде, Иегова ӧскӧ сурактардыҥ аайына ӱзе чыгып салган. Мен андый ырысту кижи! Быйанымды айдарга сӧс тӧ таппай јадым». А слер канайып сананып тураар, бого тӱҥей айалгада Иегова слерге болужар ба?

16. Бис Кайраканныҥ Эҥиринде болзоос, Иегова бисти алкаар деп, нениҥ учун алаҥзыбайдыс? (Римдегилерге 8:31, 32).

¹⁶ Иисустыҥ ӧлӱмин эске алатан Эҥирди јазап туруп, албаданып ӧткӱргенисти Иегова баалап јат. Иегова Кудайдыҥ биске эткен јакшызын бир де ундыбай, быйанду болзоос, ол бисти алкаар деп, бир де алаҥзыбас керек. (Римдегилерге 8:31, 32 кычырыгар.) Быјылгы јылдыҥ Кайраканныҥ Эҥирине болорго ло ол аҥылу ӧйдӧ Иеговага оноҥ кӧп иштеерге албаданактар.