1. Нениҥ учун бӱгӱнги кӱнде кӧп улус Агару Бичикке бӱтпей турган?

 КӦП улус бӱгӱнги кӱнде кемге иженерин билбей јадылар. Олор политиктердиҥ, учёныйлардыҥ, бизнесмендердиҥ улуска болужарына алаҥзып јат. Анайда ок серкпелер де улустыҥ бӱдӱмјизинеҥ чыгып калган. Оныҥ да учун Агару Бичикле башкарынаачы болуп турган кудай јаҥдардыҥ башчыларынаҥ улам, кӧп улустыҥ Агару Бичикке бӱтпей барганында кайкамчылу неме јок.

2. Сарын 119:160-ла болзо, бис неде алаҥзыбас учурлу?

² Бис Иегованыҥ ишчилери, оныҥ учун ол «чындыктыҥ Кудайы» ла биске јӱк ле јакшыны кӱӱнзеп турган деп, бир де алаҥзыбай јадыс (Сар. 31:5; Иса. 48:17). Анайда ок оныҥ айткан сӧстӧри де чын деп бӱдӱп јадыс, нениҥ учун дезе оныҥ «сӧзи — чынныҥ бойы». (Сарын 119:160 кычырыгар.) Бис бир библеисттиҥ айткан сӧстӧриле јӧпсинип јадыс: «Кудайдыҥ сӧзи — чын, оныҥ айткан сӧстӧри јаантайын бӱдӱп калат. Кудайдыҥ ишчилери кажы ла оныҥ айткан сӧстӧрине бӱдӱп јат, нениҥ учун дезе Кудайдыҥ бойына бӱдӱп турган».

3. Бу јӧрмӧлдӧ кандый сурак шӱӱжилер?

³ Бис улуска Агару Бичикке бис ле чилеп бӱдӱп турзын деп, канайып болужар аргалу? Агару Бичикке бӱдерге болужатан ӱч шылтак бар: Агару Бичикте јастыралар јок, оныҥ судурлары бӱдӱп јат, Агару Бичик јӱрӱмди солыыр аргалу.

4. Нениҥ учун кезик улус Агару Бичикке бӱтпей турган?

⁴ Иегова Агару Бичикти бичиирге, 40 кире эр кижини тузаланган. Је эмдиги ӧйдӧ озогы манускрипттердиҥ бирӱзи де јок. Бисте јӱк ле канча катап эдилген копиялары  бар. Оныҥ да учун кезик улуста мындый сурак чыгат: «Агару Бичик канча муҥ јылдардыҥ туркунына кӧчӱре бичилерде, оныҥ тексти солынбаган ба?» Солынбаган деп, кандый керелер бар?

5. Еврей Бичимелдердиҥ копиялары канайып эдилген? (Кадарындагы јурукты кӧрӱгер.)

⁵ Иегова Агару Бичимелди јоголып калбазын деп, бойыныҥ албатызына оны кӧчӱре бичип турзын деп јакылта берген. Темдектезе, Израильдиҥ каандары бойына Моисейдиҥ јасагын кӧчӱре бичип алар учурлу болгон, а левиттер оныла албатыны ӱредер учурлу болгон (Јаҥ. т. 17:18; 31:24—26; Неем. 8:7). Кӧчӱре бичип турган улус Еврей Бичимелдердиҥ копияларын Вавилонныҥ олјозынаҥ чыккан кийнинеҥ эдип баштаган (Езд. 7:6, сноска). Анайып, Агару Бичиктиҥ баштапкы бӧлӱгиниҥ копиялары кӧптӧй берген. Бу улус ижин сӱреен јакшы бӱдӱрерге албаданатан. Олор кажы ла сӧсти, керек дезе бир де таныкты божодып ийбеске албаданган. Је улустыҥ толо кеминде эмезинеҥ улам јаан эмес јастыралар кирип калган. Андый да болзо, кӧп копиялар бар болгонынаҥ улам јастыраларды кӧрӱп ийерге кӱч эмес болгон. Канайып?

6. Библиялык тексттиҥ копияларындагы јастыраларды табып аларга кандый арга болужат?

⁶ Бӱгӱнги кӱнде учёныйларда библиялык тексттерди кӧчӱре бичиген тушта божодылган јастыраларды табып аларга болужатан сӱреен јакшы арга бар. Кандый арга? Темдектезе, слер 100 кижиге кандый бир текстти колло кӧчӱре бичизин деп јакару берип јадаар. Бу улустыҥ бирӱзи билбей калала, копияга јастыра кийдирип салган. Бу јастыраны табып аларга бис нени эдерис? Јастыра бичилген копияны алала, арткан улустыҥ эткен копияларыла тӱҥдештирип ийер керек. Мынайып ла учёныйлар библиялык манускрипттердиҥ копияларын бой-бойыла тӱҥдештирип ийеле, кӧчӱре бичиген улустыҥ јастыраларын табып аладылар.

7. Библиялык текст кӧчӱре бичилип турарда јастыралар кирген бе?

⁷ Библиялык текстти колло бичиген улус ижин коркышту јазап эдерге албаданган. Темдектезе, Еврей Бичимелдердиҥ эҥ ле јебрен бӱдӱн манускрипти — ол Ленинградский кодекс. Оныҥ бичилген ӧйи б. э. 1008 эмезе 1009 јылдар. Је јаан удабай ла бу кодекстеҥ башка 1 000 јыл кире озо бичилген манускрипттер эмезе манускрипттердиҥ ӱзӱктери табылган. Мынаҥ улам кем де, библиялык текст канча јӱс јылдардыҥ туркунына кӧчӱре бичилген болордо, Ленинградский кодекстиҥ тексти јебрен манускрипттердеҥ чек башка болуп калган болор деп сананар. Је бу андый эмес. Учёныйлар Ленинградский кодексти ле јебрен манускрипттерди тӱҥдештирип кӧрӧрдӧ, јӱк ле кезик сӧстӧр башка айдылган, је библиялык тексттиҥ учуры солынбаган болуптыр.

8. Христиан Грек Бичимелдердиҥ копиялары ӧскӧ бичиктердиҥ копияларынаҥ незиле башка?

⁸ Озогы христиандар Еврей Бичимелдерди кӧчӱре бичиген улустар ла чылап, Грек Бичимелдердиҥ 27 бичигин база лаптап кӧчӱре бичиген. Олор бу копияларды бойлорыныҥ туштажуларында ла јарлаар ижинде тузаланган. Бир учёный Грек Бичимелдердиҥ манускрипттерин ол ӧйдӧ болгон ӧскӧ бичиктердиҥ копияларыла тӱҥдештирип, мындый сӧстӧр айткан: «[Христиан Грек Бичимелдердиҥ копиялары]  канча киреге кӧп лӧ бӱткӱл кичеелген». «Анатомия Нового Завета» деп бичикте бичилет: «Бис [Грек Бичимелдердиҥ] јакшы ла јарт кӧчӱрмезин кычырып јаткан болзоос, бисти чике ле оныҥ оригиналын кычырып јаткан деп айдарга јараар» (Anatomy of the New Testament).

9. Агару Бичиктиҥ солынбаганы керегинде нени айдарга јараар? (Исайя 40:8).

⁹ Канча јӱс јылдардыҥ туркунына Агару Бичикти кӧчӱре бичиген улустаҥ улам, бис бӱгӱн учуры бир де солынбаган Агару Бичикти кычырар ла ӱренер аргалу b. Оны шак ла Иегова башкарган эмей. (Исайя 40:8 кычырыгар.) Је кезик улус мынайда айдар болор: «Агару Бичиктиҥ учуры бир де солынбаган ла дейле, оны капшай ла Кудайдыҥ бичиги деп канайып айдатан?» Оныҥ учун Агару Бичик Кудайдыҥ тыныла бичилген деп кӧргӱзип турган ӧскӧ дӧ керелер кӧрӱп ийектер.

10. 2 Пётр 1:21-деги сӧстӧр чын деп, кандый сӧстӧр кӧргӱзет? (Јуруктарды кӧрӱгер.)

¹⁰ Агару Бичикте бӱдӱп калган кӧп судурлар бар. Олордыҥ кезиги бичилген кийнинеҥ јӱк канча јӱс јылдар ӧдӧрдӧ бӱткен. Мыны бис тӱӱкинеҥ кӧрӧдис. Судурлардыҥ бӱдӱп калганы бисти кайкатпай јат, нениҥ учун дезе судурлар — Иегованаҥ. (2 Пётр 1:21 кычырыгар.) Темдектезе, јебрен улу Вавилонныҥ аҥтарылары керегинде судурды кӧрӱп ийектер. Б. э. озо VIII чакта судурчы Исайя Вавилон кала јууладып койор деп бичиген. Керек дезе оны Кир деп каан јуулап аларын ла бу кала канайып јууладарын бичип салган (Иса. 44:27—45:2). Анайда ок Исайя бир канча ӧйдӧҥ Вавилон јайрадылар ла куру турар деп айткан (Иса. 13:19, 20). Бу судур б. э. озо 539 јылда Вавилонды мидяндар ла перстер јуулап аларда бӱткен. Бӱгӱнги кӱнде бу улу каланыҥ јеринде не де јок. Ондо јӱк јемириктер јадат.  («Вавилонды јуулап алар деп айдылган судур» деген видеоны «Јажын-чакка ырысту јӱригер!» деп бичиктиҥ электронный бӱдӱминиҥ 3 урогында 5 пунктын кӧрӱгер.)

11. Даниил 2:41—43-теги судур бӱгӱнги кӱнде канайып бӱдӱп турганын куучындап беригер.

¹¹ Агару Бичиктиҥ судурлары јаҥыс ла ӧткӧн ӧйдӧ бӱткен эмес олордыҥ кезиги шак ла бистиҥ кӧзистиҥ алдында бӱдӱп јат. Темдектезе, судурчы Даниилдиҥ Англо-Американский телекейлик держава керегинде судурын алактар. (Даниил 2:41—43 кычырыгар.) Бу судурла болзо, бу держава бир јанынаҥ темирдий бек болор, бир јанынаҥ той балкаштый бортык болор. Великобритания ла США темирдий бек кӱчин канайып кӧргӱзет? Бу держава јаан ийде-кӱчинеҥ улам телекейлик эки јуу-согушты токтодорында јаан камаанын јетирген. Бӱгӱнги де кӱнде бу державаныҥ черӱзиниҥ кӱчи коркышту јаан болот. Је бу державаныҥ темирдий ийде-кӱчин бойыныҥ ла албатызы уйададып јат. Олор дезе улустыҥ праволоры учын тартыжат ла общественный кандый бир биригӱлер тӧзӧйт. Бир политологтыҥ айтканыла болзо: «Јердиҥ ӱстинде США-дый бийик кеминде демократиялу ороон јок. Андый да болзо, оныҥ демократиязы католический тартыжулардаҥ улам, коркышту тыҥ бӧлӱнип калган». Бу державаныҥ экинчи бӧлӱги — Великобритания керегинде нени айдарга јараар? Калганчы јылдарда Великобританияныҥ албатызы анчада ла Европейский союзла канча кире јуук иштеери јанынаҥ чек эки башка кӧрӱмдӱ болуп калган. Мындый бӧлӱништеҥ улам Англо-Американский держава ижин кӧндӱктирип болбой јат.

12. Агару Бичиктиҥ судурлары бистиҥ бӱдӱмјигисти канайып тыҥыдат?

¹² Агару Бичиктиҥ бӱдӱп калган судурлары келер ӧйдӧ бӱдетен судурларга бӱдӱмјигисти тыҥыдып јат. Бис сарнаачыныҥ айткан сӧзиле јӧпсинип јадыс. Ол Иеговага мынайып айткан: «Сен мени аргадаарыҥ деп, тыҥ сакып јадым. Нениҥ учун дезе мен сениҥ сӧзиҥе иженедим» (Сар. 119:81). Иегова Агару Бичик ажыра биске јалакай баштанып, келер ӧйгӧ ижемји берет (Иер. 29:11). Бис телекейдиҥ улузына эмес, је Иеговага иженип јадыс. Оныҥ учун Агару Бичикке бӱдӱмјигисти тыҥыдарга, судурларды оноҥ ло ары тереҥ шиҥдектер.

13. Сарын 119:66, 138-те айдылганыла, бис нениҥ учун Агару Бичикке бӱдер аргалу?

¹³ Агару Бичикке бӱдӱп турганыстыҥ база бир шылтагы — ондогы јӧптӧрди тузаланып турзаас, сӱреен јаан туза аладыс. (Сарын 119:66, 138 кычырыгар.) Темдектезе, айрылыжарга јаткан эш-нӧкӧрлӧр Агару Бичиктиҥ јӧптӧрин тузаланып, сӱреен јакшы јуртап јат. Андый христиан билелердиҥ балдары ада-энезиниҥ сӱӱжин ле корузын сезип јадылар (Эф. 5:22—29).

14. Библиялык чындык улустыҥ јӱрӱмин канайып солып турганы керегинде куучындап беригер.

¹⁴ Агару Бичиктиҥ јӧптӧри коркышту јаман керектер эдерге јаҥжыгып калган каршучыл улустыҥ јӱрӱмин де солыыр аргалу. Джек c деп кижиниҥ темин кӧрӱп ийектер. Оны коркышту јаман керектери учун ӧлӧр эдип јаргылап салган. Ол тӱрмеде эҥ ле коркымчылу улустыҥ бирӱзи болгон. Бир катап Джек  Агару Бичикле ӱредӱ ӧткӱрилгенин кӧргӧн. Ӱредӱ ӧткӱрип турган акалардыҥ јалакайын кӧрӧлӧ, Джектиҥ база ӱренер кӱӱни келген. Оноҥ ол Агару Бичиктиҥ јӧптӧрин тузаланып, чек ӧскӧ кижи болуп калган. Анайып, Джек чӧҥӱрилбеген јарчы болуп калды. Оноҥ, база эмеш ӧй ӧдӧрдӧ, сууга чӧҥӱрилген. Джек тӱрмеде отурган улуска Каандык керегинде јарлап баштайла, ас ла салза, тӧрт кижиле ӱредӱ баштаган. Је Джекти ӧлтӱретен кӱн једип келерде, оныҥ адвокаттарыныҥ бирӱзи мынайып айткан: «20 јыл кайра мениҥ билер Джек чек ӧскӧ кижи болуп калтыр. Оны Иегованыҥ Керечилериниҥ ӱредӱзи солыган». Джекти јаргы аайынча ӧлтӱрип те салган болзо, оныҥ теми Кудайдыҥ Сӧзине бӱдерге јараар ла Кудайдыҥ Сӧзи улустыҥ јӱрӱмин јакшы јанындӧӧн солыыр аргалу деп керелейт (Иса. 11:6—9).

15. Иегованыҥ ишчилери ӧскӧ улустаҥ незиле аҥыланат? (Јурукты кӧрӱгер.)

¹⁵ Иегованыҥ ишчилери библиялык чындыкла јӱрӱп турганынаҥ улам бирлик јӱрет (Иоанн 13:35; 1 Кор. 1:10). Олордыҥ амыр, блааш-тартыш јок јӱрӱми, анчада ла бу телекейдиҥ политика ла угы-тӧзи јанынаҥ, анайда ок јадын-јӱрӱм јанынаҥ бӧлӱнип калганынаҥ иле кӧрӱнет. Мыны кӧрӧлӧ, Жан деп јиит уул сӱреен кайкаган. Бу кижи Африканыҥ ороондорыныҥ бирӱзинде јаткан. Ондо гражданский јуу-согуш башталарда, ол черӱге барала, оноҥ ойто јанында турган ороондӧӧн кача берген. Ого барала, ол Иегованыҥ Керечилерине туштаган. Жан мынайда куучындайт: «Мен Иегованыҥ ишчилерин политикага киришпей турган ла олордыҥ ортозында блааш-тартыш болбой турган деп билип алгам. Олорды ончозын сӱӱш бириктирет. Алдында мен јерим учун јуулажар керек деп санаалу јӱргем. Је эмди дезе, Агару Бичиктиҥ чындыгын билип алала, Иегова учун јӱрӱп јадым». Бу кижиниҥ јӱрӱми Агару Бичиктиҥ болужыла коркышту тыҥ солынган. Качан да ол  ӧскӧ укту улусты ӧлтӱрерге белен болгон, је эмди дезе кандый ла укту улуска сӱӱнчилӱ јарды јарлап јӱрет. Бу учуралдардаҥ Агару Бичик кандый ла улустыҥ јӱрӱмин солып салар аргалу деп кӧрӱп јадыс. Бу дезе Кудайдыҥ Сӧзине бӱдерге јараарын кӧргӱзип турган јаан кере болот.

16. Нениҥ учун бис Кудайдыҥ Сӧзине бӱдӱмјибисти тыҥыдар учурлу?

¹⁶ Бу телекейлик айалга там ла коомойтып јат. Оныҥ учун биске Кудайдыҥ Сӧзине бӱдерге там ла кӱч болор. Нениҥ учун дезе кезик улус биске алаҥзышту сӧстӧр айдардаҥ айабас. Темдектезе, Агару Бичикте чындык јок ло бӱдӱмјилӱ ле керсӱ кулды Иегова тургуспаган деп айдар болор. Је бис Кудайдыҥ Сӧзи бисти тӧгӱндебей турган деп бӱдӱп турзаас, мындый алаҥзыштарды качан да јууктатпазыс. Бис Кудайдыҥ јасагына учына јетире багынарыс деп бек шӱӱп аларыс (Сар. 119:112). Улуска сӱӱнчилӱ јарды јарлаарга ла олорды Кудайдыҥ јасагыла јӱрзин деп кӱӱнзедерге, биске качан да уйатту болбос (Сар. 119:46). Анайда ок бис кандый ла ченелтелерди ле истежӱлерди чыдажып, сӱӱнчибисти јылыйтпай ӧдӧ берерис (Сар. 119:143, 157; Кол. 1:11).

17. 2023 јылдыҥ ӱлгери биске нени эске алындырар?

¹⁷ Бис Иегова Кудайыска бойыныҥ чындыгын ачканы учун сӱреен быйанду! Кудайдыҥ чындыгы биске токунал берет, јӱрӱмниҥ учурын оҥдоорго болужат, анайда ок, бу јӱрӱм там коомойтып та барадарда, биске сӱреен јакшы башкартулар берет. Бого ло коштой, Кудайдыҥ Каандыгы башкарза, сӱреен јараш јӱрӱм болор деп ижемји сыйлап јат. Оныҥ учун 2023 јылдыҥ ӱлгери — Кудайдыҥ Сӧзи — чындык деп, бӱдӱмјигисти тыҥытсын! (Сар. 119:160).