1, 2. Сууга чӧҥӱрилген де кийнинеҥ бис нени эдер учурлу? Јартап беригер.

 СЛЕР турагарды канча кӱнниҥ бажынаҥ арутап јадыгар? Байла јаҥы турага кӧчӧрдӧҥ озо слер оны јалтырада арутап салараар. Је оны арутабай барзаас, не болор? Бистиҥ турагыс тӱрген тоозындалып, киртип калар эмей. Оныҥ учун бис айылысты јаантайын арутап јадыс.

² Анайып ла ок биске санаабысты, кылык-јаҥысты ару тудар керек. Сууга чӧҥӱрилердеҥ озо «эт-канды ла тынды быјарсыдып турган ончо немелердеҥ» аруталып калганыс (2 Кор. 7:1). Је апостол Павелдиҥ айтканыла болзо, биске оноҥ ло ары солынар керек (Эф. 4:23). Нениҥ учун дезе бу телекейдиҥ кири-торынаҥ, тоозын-тобырагынаҥ улам бис тӱрген киртип калардаҥ айабазыс. Оныҥ учун киртип калбаска ла Иегованы сӱӱндирерге турган болзоос, биске кӱӱнисти, санаабысты ла кылык-јаҥысты јаантайын кӧрӱп турар керек.

3. Санаабысты јаҥыртары дегени нени темдектейт? (Римдегилерге 12:2).

³ Кӱӱн-санаабысты јаҥыртарга эмезе солыырга нени эдер керек? (Римдегилерге 12:2 кычырыгар.) Бис дезе турабысты ару тударга оны јӱк ле тыштынаҥ арутабай турганыс дезеер? Анайып ла ок бистиҥ ич јаныс кандый болгонын јазап кӧрӱп турар керек ле Иегованыҥ  бийик нормаларыла јӱрерге солынар керек.

4. Бу телекейдиҥ кӧрӱмин алынбаска биске нени эдер керек?

⁴ Бис толо кемдӱ болуп калзаас, кажы ла эткен керегис Иегованы сӱӱндирер. Је бӱгӱнги кӱнде мынайда эдерге биске јеҥил эмес келижет. Римдегилерге 12:2-де айдылганын ајарып кӧрзӧӧс, Павел бисти Кудайдыҥ табын оҥдоорго, санаабысты јаҥыртып турзын деп айдат. Айдарда, бистиҥ амадуларыс ла эдип турган керектерис бу телекейдиҥ кӧрӱмиле эмес, је Кудайдыҥ табы аайынча болзын деп кӧрӱп турар керек.

5. Бис нени сананып турганысты билерге, бойыска кандый сурактар берерис? (Јурукты кӧрӱгер.)

⁵ Темдектезе, Иегова бисти Кудайдыҥ кӱӱнин сакып јӱрзин деп кӱӱнзеп јат (2 Пётр 3:12). Бойоордоҥ сурагар: «Мениҥ јӱрӱмимнеҥ чактыҥ учында јадып турганыс деп бӱдӱп турганым кӧрӱнет пе? Кандый ӱредӱ, кандый иш талдап алганымнаҥ Иегованыҥ ижи баштапкы јерде деп кӧрӱнет пе? Иегова мени ле мениҥ билемди качан да артыргыспас деп бӱдӱп јадым ба? Ол эмезе мен јаантайын акча-манат јанынаҥ санааркайдым ба?» Бис Иегованыҥ табы аайынча јӱрӱп турзаас, ол сӱӱнип јат (Матф. 6:25—27, 33; Флп. 4:12, 13).

6. Биске нени јаантайын эдер керек?

⁶ Биске јаантайын санаабысты шиҥдеер керек, керек болзо, солынар керек. Павел Коринфтеги христиандарга мындый сӧстӧр бичиген: «Бӱдӱп турганыгар ба деп, бойыгарды бойыгар ченегер, бойыгарды бойыгар  шиҥдегер» (2 Кор. 13:5). «Бӱдӱп турганыгар ба» дегени јаҥыс ла христиан туштажуларга јӱрери ле кезикте јарлаар ишке туружары эмес, бого санаабысты, кӱӱнисти ле Иеговага недеҥ улам иштеп турганысты кӧрӧри кирет. Оныҥ учун биске санаабысты јаҥыртып турар керек. Мыны канайып эдер? Агару Бичикти кычырар, Иегованыҥ кӧрӱмин алынар ла оны сӱӱндиретен керектер эдер керек (1 Кор. 2:14—16).

7. Эфестегилерге 4:31, 32-де айдылганыла, биске база нени эдер керек? Оны эдерге нениҥ учун кӱч болордоҥ айабас?

⁷ Эфестегилерге 4:31, 32 кычырыгар. Биске јаҥыс ла кӧрӱм-санаабысты солыыр керек эмес, је «јаҥы кижини» кийип алар керек (Эф. 4:24). Мында бойыстыҥ јаныстаҥ албаданыш керек болор. Темдектезе, биске ачыныштаҥ, чугулданыштаҥ ла атыйланыштаҥ айрыларга јеҥил эмес келижет. Нениҥ учун дезе кезикте бу кылык-јаҥдар бисте тереҥ шиҥип калган болот. Агару Бичикте айдылганыла, улус «јиит туштаҥ ала јаманды ла эдейин деп» јӱрет (Баш. 8:21). Оныҥ учун јӱрегисте тазылданып калган јаман кылык-јаҥысла чӧҥӱрилген де кийнинеҥ оноҥ ло ары тартыжып јадыс. Бир учурал кӧрӱп ийектер.

8, 9. Биске озогы кижиле оноҥ ло ары тартыжар керек деп, Стивен аканыҥ учуралынаҥ канайып кӧрӱнет?

⁸ Стивен акага чугулданбай јӱрерге кӱч болгон. Ол мынайып куучындайт: «Мен сууга чӧҥӱрилип те калган болзом, оноҥ ло ары тӱзединерге албадангам. Бир катап айылдар сайын јарлап јӱреримде бир уурчы мениҥ машинамнаҥ радиомды уурдайла, качып јӱгӱрген. Мен оны јаба једип аларымда, ол радионы мергедеп ийеле, кача берген. Бу учуралды ака-эјелерге куучындаарымда, бир аксагал менеҥ сураган: „Стивен, сен ол кижини јаба једип алган болзоҥ, канайдар эдиҥ?“ Бу сурак мени санаа алындырган. Меге оноҥ ло ары чугулданбаска албаданар керек деп оҥдодым» b.

⁹ Стивен аканыҥ учуралын кӧрзӧӧс, јаман кылык-јаҥдар, тӱзедилип калдыс деп сананзаас та, кенетийин чыгып келердеҥ айабас. Слерде мындый сезимдер болуп турган болзо, санааркап, бойоорды јаман кижи деп сананбагар. Апостол Павел де айткан: «Јакшыны эдейин деген бойымда јаҥыс јаман бар» (Рим. 7:21—23). Бӱгӱнги кӱнде бистиҥ кажыбыска ла бойыстыҥ јаман кылык-јаҥдарысла тартыжарга келижет. Бу мындый кылык-јаҥдар кир-тор ло тоозын-тобырак чылап «айылыска» капшай јуулып калат. Оныҥ учун бойысты јаантайын ару тударга албаданар керек.

10. Бис јаман кылык-јаҥысла канайып тартыжар аргалу? (1 Иоанн 5:14, 15).

¹⁰ Слер бойоордыҥ кандый бир јаман кылык-јаҥыгарла тартыжып турган болзоор, Иегованаҥ болуш сурагар. Ол слердиҥ мӱргӱӱлеерди угар. (1 Иоанн 5:14, 15 кычырыгар.) Иегова слерге јаман кылыгарды таштаарга, кайкал эдип болушпайтан да болзо, слерге ийде-кӱч берер (1 Пётр 5:10). Је слер мӱргӱлеер аайынча солынбай турган болзоор, озогы кижиниҥ  кылык-јаҥы ойто чыгып келердеҥ айабас. Оныҥ учун слердиҥ кылык-јаҥаарда јаман неме јок деп кӧргӱзип турган немени кычырардаҥ, кӧрӧрдӧҥ озо јазап сананып туругар. Анайда ок јастыра кӱӱн-санааларга олјолотпогор (Флп. 4:8; Кол. 3:2).

11. Јаҥы кижини кийип аларга нени эдер керек?

¹¹ Озогы кижини уштып салган болзоор, јаҥы кижини кийип алар керек. Мыны канайып эдер? Иегованыҥ кылык-јаҥыла таныжып турзагар, оноҥ тем аларга албаданыгар (Эф. 5:1, 2). Темдектезе, слер Агару Бичиктеҥ Иегова улустыҥ јаманын акту јӱрегинеҥ таштаганын кычырып турала, бойоордоҥ мынайып сурап јадыгар: «А мен улустыҥ јаманын анайып ла таштап тургам ба?» Ол эмезе слер Иегованыҥ тӱбекке тӱшкен улуска канайып килеп турганын кычырып јатсаар, бойоорго мындый сурак беригер: «А мен тӱбекке тӱшкен ака-эјелерге болужарын сананып тургам ба? Сананып турганым керектеримнеҥ кӧрӱнет пе?» Анайып, санаагарды јаҥыртып, јаҥы кижини кийип алыгар. Анайда ок бойоорго чыдамкай болугар.

12. Стивен Агару Бичиктиҥ кӱчиле канайып солынган?

¹² Ӧрӧ айдылган Стивен јаҥы кижини бир эмештеҥ кийип алган. Ол айдат: «Менде чӧҥӱрилген де кийнинеҥ мени чугулдандырып ийгедий учуралдар кӧп болгон. Андый учуралдарда мен айалганы јымжадып ийерге ле чугулданбаска ӱренип алгам. Мыны кӧрӧлӧ, мени улус та, ӱйим де мактагылап јат. Мен мынайып бойымныҥ кӱчим ле эмес, је Агару Бичиктиҥ ийде-кӱчиле солынгам».

13. Јастыра кӱӱнисле тартыжарга биске не болужар? (Галаттарга 5:16).

¹³ Галаттарга 5:16 кычырыгар. Јастыра кӱӱнисле тартыжарга, Иегова агару тынын артыгынча берип јат. Темдектезе, бис Агару Бичикти ӱренип турзаас, агару тын бисле башкарзын деп арга берип јадыс. Анайда ок бис агару тынды јуунныҥ туштажуларына јӱрзеес аладыс. Христиан туштажуларда ака-эјелерле кожо болодыс. Олор бис ле чилеп чын јӱрерге албаданат, а бу бистиҥ кӱӱнисти кӧдӱрет (Евр. 10:24, 25; 13:7). Бого коштой Иегова биске агару тынды кандый бир уйан јанысла тартыжып, ого јайнап мӱргӱп турзаас берет. Бу ончо керектер бисти бӱткӱлинче кинчектӱ кӱӱнистеҥ јайымдабайтан да болзо, је олор биске јаман кӱӱниске јайылбаска болужар. Нениҥ учун дезе Галаттарга 5:16-да тынла јӱрген улус «кинчектӱ кӱӱнине јайылбас» деп айдылат.

14. Нениҥ учун јаантайын чын јӱрерге албаданар керек?

¹⁴ Агару Бичикти оноҥ ло ары ӱренигер. Туштажуларга јӱригер. Иеговага мӱргӱп туругар. Анайда ок јаантайын чын эдип јӱрерге албаданыгар. Нениҥ учун дезе бисте ӧштӱ бар — ол бистиҥ ичистеги јаман кӱӱнис. Бу кӱӱн бисти јаантайын јаман неме эдерге ийде салат. Оныҥ учун сууга чӧҥӱрилип те калган болзоос, оноҥ ло ары Кудайга јарабас немелерди: порнографияны, аракы-чегенди, азартный ойындарды кӱӱнзеер болорыс (Эф. 5:3, 4). Бир јиит ака мынайып куучындаган: «Мениҥ эҥ ле тыҥ ченелтем  ол — гомосексуальный кӱӱнле тартыжары. Мен санангам андый кӱӱним ӧдӱп калган деп, је кӧрӧр болзо, ол эмдигенче ле бар эмтир». Слер де кандый бир јаман кӱӱнле тартыжып турган болзоор, слерге не болужар?

15. Јастыра кӱӱниле ончо улус тартыжып турган деген шӱӱлте бистиҥ кӱӱнисти канайып кӧдӱрет? (Јурукты кӧрӱгер.)

¹⁵ Мындый айалгада слер јаҥыскан эмезигер деп ундыбагар. Агару Бичикте мынайда айдылган: «Слерде ончо улуста болуп турган ченелтелер болот» (1 Кор. 10:13а). Апостол Павел бу сӧстӧрди Коринфтеги христиандарга бичиген. Нениҥ учун дезе олордыҥ кезиги чындыктаҥ озо эш-нӧкӧринеҥ ӧскӧ кижиле конгон, аракызактар ла гомосексуалисттер болгон (1 Кор. 6:9—11). Слер сананзаар, олордо сууга чӧҥӱрилген кийнинде јастыра кӱӱн болбогон бо? Олор андый јастыра кӱӱниле оноҥ ло ары тартышкан болор. Не дезе бу христиандар майлаткандар да болгон болзо, тӱҥей ле кинчектӱ улус болгон. Бу бистиҥ кӱӱнисти кӧдӱрип јат. Ол до христиандар кинчектӱ кӱӱнин јеҥип аларда, бис те јеҥип ийер аргалу. Мындый тартыжуда бӱдӱмјигер уйадабас аргалу, нениҥ учун дезе «бу телекейде андый ок шырага слердиҥ карындаштарыгар да алдырып турганын билеригер» (1 Пётр 5:9).

16. Канайып сананары јастыра болор, нениҥ учун?

¹⁶ Слердиҥ неле тартыжып турганаарды кем де оҥдобос деп сананары јастыра. Мынайып сананып турзаас, бис бойыстаҥ чӧкӧп, јаман кӱӱнле тартышпай барарыс. Је Агару Бичик бисти бӱдӱмјилеп јат: «Кудай чындык, ол кӱчигер јетпес ченелтелерди болдыртпас. Карын ченелте тужында оны ӧдӱп чыгатан арга берер» (1 Кор. 10:13б).  Айдарда, јастыра кӱӱнис кандый да тыҥ болзо, бис оны ӧдӱп чыгар аргалу. Иегованыҥ болужыла бис јастыра кӱӱниске јайылбас аргалу.

17. Јастыра кӱӱн чыгып келген де болзо, бис нени эдер аргалу?

¹⁷ Сурап турубыс, качан да ундыбагар, слер толо кемдӱ эмезигер. Оныҥ учун бистиҥ јаман кӱӱнис кезикте чыгып келердеҥ маат јок. Андый кӱӱн чыгып келзе, Иосиф Потифардыҥ ӱйинеҥ тӱрген ле качканы чылап, оны бойоордоҥ капшай ла туураладаар (Баш. 39:12). Кинчектӱ кӱӱнниҥ олјозына алдыртпагар!

18, 19. Санаабысты оноҥ ло ары јаҥыртарга, бойыска кандый сурактар берер керек?

¹⁸ Санаабысты јаҥыртарга, бистиҥ санааларыс ла керектерис Иегованыҥ табына келижип турзын деп албаданар керек. Оныҥ учун бойысты јаантайын шиҥдеп турзаас јакшы. Бойоордоҥ мынайда сураарга јараар: «Бис кандый ӧйдӧ јадып турганысты оҥдоп турганым керектеримнеҥ кӧрӱнет пе? Меге јаҥы кижи болуп солынарга келижет пе? Кинчектӱ кӱӱнимле тартыжарга, Иегованыҥ агару тыны болушсын деп арга бередим бе?»

¹⁹ Бу сурактарга каруу берип тура, бойоордоҥ ӧткӱре кӧпти сакыбагар, карын неге јединип алганаарды кӧрӱгер. Слерге оноҥ ло ары солынар керек деп кӧрӱп ийген болзоор, санааркабагар. Оныҥ ордына Филиппыдагыларга 3:16-дагы јӧплӧ јӱригер: «Бис неге једип алганыс, анайда ла... јӱрер учурлу». Иегова слерди санаагарды јаҥыртарга албаданып турганаар учун кайралдаар деп бир де алаҥзыбагар.