1, 2. Иегованыҥ чындык ишчилеринде кандый кӱчтер болордоҥ айабас?

 КИЖИНИҤ јӱрӱми кандый бир јаман немедеҥ улам бир ле уунда солына берердеҥ айабас. Темдектезе, Луи́с a акада рак табылган, бу ракла ас улус ооруп турган. Врачтыҥ айтканыла болзо, ол тоолу ла айдаҥ божоп калар. А Мо́ника аксагал ӧбӧӧниле кожо кӧп јылдардыҥ туркунына агару ишке эрчимдӱ туружып иштеген. Је кӧрӧр болзо, оныҥ ӧбӧӧни канча јылдардыҥ туркунына эки јӱстенип јӱрген болтыр. А кижиге барбаган Оли́вия сыйынга коркышту јаан јоткон келип јатканынаҥ улам айылынаҥ јӱрерге келишкен. Је кайра јанып келген болзо, оныҥ айылынаҥ не де артпаган эмтир. Бу ака-эјелердиҥ јӱрӱми бир ле уунда коркышту тыҥ солына берген. Слер олордыҥ сезимдерин оҥдоп јадаар ба? Слердиҥ де јӱрӱмеер недеҥ-недеҥ улам кенете солынган ба?

² Бис Иегованыҥ чындык ишчилери де болзоос, тӱҥей ле ӱзе улус ла чылап ооруп та јадыс, кандый ла кӱчтер де ӧдӱп јадыс. Анайда ок Кудайдыҥ албатызын кӧрӧр кӱӱни јок улус бисти истежип те јат, биске удурлажып та јат. Иегова бисти бу кӱчтердеҥ корулабай да турган болзо, биске болужар деп сӧзин берет (Иса. 41:10). Бис оныҥ болужыла сӱӱнчисти јылыйтпас аргалу, ойгор јӧптӧр чыгарар аргалу ла кандый да кӱч болзо, ого чындык артар аргалу. Бу јӧрмӧлдӧ Иегова биске кандый тӧрт эп-аргала болужып турганын кӧрӧрис, анайда ок биске оныҥ болужын аларга нени эдер керек деп шӱӱжерис.

ИЕГОВА СЛЕРДИ КОРУЛААР

3. Бистиҥ јӱрӱмисте кандый бир тӱбек болуп калза, нени эдерге кӱч болордоҥ айабас?

³ Ченелте. Бисте кандый бир тӱбек боло берзе, бистиҥ  санаабыс караҥуйлап, ал-санаага тӱже берердеҥ айабазыс. Нениҥ учун дезе јӱрегис ачу сыска алдыртат, а меегис санааркаштардаҥ улам јазап иштеп болбой јат. Ӧрӧги айдылган эки эјениҥ сезимдерин кӧрӱп ийектер. Оливия айдат: «Тура јок артып каларымда, кӧксим куп-куру болуп калган деп билдирген. Чек кирер-тудар јерим таппай туратам». А ӧбӧӧни эки јӱстенип јӱрген Моника эје куучындаган: «Мениле ондый неме болор деп качан да сананбагам. Ӧбӧӧнимниҥ эткен кылыгынаҥ улам мениҥ бастыра ичи-буурым, кӧксим јара тартылып калгандый билдирген. Мындый ачуны айдарга сӧс тӧ таппазыҥ. Оноҥ ары канайып јӱргейим не деп, коркышту тыҥ кунугып турдым». Мындый кӱч айалгаларда Иегова биске канайып болужат?

4. Филиппыдагыларга 4:6, 7-ле болзо, Иегова биске нени берет?

⁴ Иегова нени эдет? Ол биске Агару Бичикте айдылганыла, «Кудайдыҥ амырын» берер. (Филиппыдагыларга 4:6, 7, ЈТ кычырыгар.) Бу амыр санаабысты ла јӱрегисти токунадат, ондый амыр Иеговала јуук колбуларыстаҥ улам болот. Анайда ок бу амыр «кижиниҥ сагыжынаҥ бийик» деп айдылат. Ӧскӧртӧ айтса, Кудайдыҥ амыры бажыста јуралып турган амырдаҥ канча катапка артык. Слерде андый болгон бо? Иеговага мӱргӱп ийген кийнинеҥ јӱрегерге сӱреен амыр боло берген бе? Бу шак ла Иегованыҥ берип турган амыры.

5. Кудайдыҥ амыры бистиҥ јӱрегисти ле санаагысты канайып корулайт?

⁵ Ол ло ӱлгерде «Кудайдыҥ амыры јӱрегерди ле санаагарды корулаар» деп айдылат. «Корулаар» деп кӧчӱрилген грек сӧс — ол военный термин. Ол сӧс каланы корулап турган јуучылдар керегинде айтса тузаланылат. Јуучылдар корулап турган калада улус недеҥ де коркыбай, амыр уйуктаар аргалу болгон. Анайып ла Кудайдыҥ амыры бистиҥ јӱрегисти ле санаабысты корулап турза, бис недеҥ де коркыбай, токуналу болодыс (Сар. 4:8). Керек дезе бистиҥ кӱч айалга солынбаган да болзо, бис Самуилдиҥ энези Анна чылап амырысты јылыйтпас аргалу (1 Сам. 1:16—18). А јӱрегис амыр болзо, бистиҥ меегис јакшы иштеп јат, ол тушта эткен тӱп-шӱӱлтелерис ойгор болор.

6. Кудайдыҥ амырын аларга нени эдер керек? (Јурукты база кӧрӱгер.)

⁶ Биске нени эдер керек? Тыҥ санааркап турзаас, јӱрегиске амыр келгенче ле Иеговага мӱргӱӱр керек (Лука 11:9; 1 Фес. 5:17). Ӧрӧги айдылган Луи́с ака тоолу ла айдаҥ божоп каларын билип  ийген. Је бу айалгада ол А́нэ ӱйиле кожо нени эткен? Ака куучындаган: «Ол ӧйдӧ биске канайып эмденерин де, ӧскӧ дӧ немени сананарга кӱч болгон. Је ӧйинеҥ ӧткӱре санааркабаска биске мӱргӱӱл болушкан». Луис ле оныҥ ӱйи Иеговага јаантайын мӱргӱп, јӱрегине ле санаазына токунал сураган. Анайда ок ойгор јӧптӧр чыгарарга болушсын деп мӱргӱген. Анайып олор Иегованыҥ болужын бир эмештеҥ кӧрӱп ийген. Слер де коркышту кӱч айалгада болуп калзаар, јаантайын Иеговага мӱргӱп туругар. Ол тушта оныҥ амыры слердиҥ санаагарды ла јӱрегерди корулап турганын сезип ийереер (Рим. 12:12).

ИЕГОВА АМЫРЫСТЫ ЈЫЛЫЙТПАСКА БОЛУЖАР

7. Тӱбек бистиҥ эмоциональный су-кадыгыска кандый каршузын јетирет?

⁷ Ченелте. Бисте кӱч ӧйлӧр болуп турза, бистиҥ санааларыс, сезимдерис ӱзе солына берер болор. Бис бойысты таныбай барардаҥ айабазыс. Ӧрӧги айдылган А́нэ эје ӧбӧӧни божоордо, башка-башка сезимдерге алдырган. Эје куучындайт: «Озо баштап мен тыҥ јаҥысканзырап туратам. Оноҥ бойымды карамдап баштагам, керек дезе Луис божоп калган учун ачынып та туратам». Је чын ла, Анэ эјеге јеҥил эмес болгон. Ого ӧбӧӧниниҥ эткен ижин эдерге келишкенине ол база тыҥ кунуккан. Бу сезимдер эјеге чек ле аҥданып јаткан талайдый болгон. Биске де башка-башка сезимдер амыр бербей турган болзо, Иегова биске канайып болужат?

8. Исайя 33:6-да Иегова биске нени айдат?

⁸ Иегова нени эдет? Иегова кӱч ӧйдӧ биске токуналу артарга болужат. (Исайя 33:6 кычырыгар.) Качан кереп јотконго табартса, ол јайканып баштайт. Је керепке аҥдана бербеске, стабилизатор деген неме болужат. Стабилизаторлор — јотконныҥ ӧйинде керепти эки јанынаҥ тудуп турган немелер. Олор сууныҥ алдында болот. Оныҥ учун керептиҥ ичинде улус недеҥ де коркыбай, токуналу јӱзер аргалу. Је стабилизаторлор, кереп јаҥыс јерде турбай, ичкери барып јатса, јакшы иштейт. Анайып ла кӱчтердиҥ ӧйинде амырысты јылыйтпаска, Иегова биске, сӱрлеп айтса, јаҥыс јерде турбай, ичкери барзаас болужар.

9. Амырысты јылыйтпаска биске кандый кӧгӱс јепселдер болужат? (Јурукты база кӧрӱгер.)

⁹ Биске нени эдер керек? Кандый ла сезимдер амыр бербей турза, слерге не болужар? Кӧгӱс графигердеҥ тудунарга албаданыгар. Је слер алдындагызындый чылап кӧп эдип болбос болорыгар.  Андый да болзо, ундыбагар, Иегова слердеҥ эдип болбос неме сакыбай турган (Лука 21:1—4 тӱҥдештиригер.) Анайда ок Агару Бичикти ӱренип, шӱӱп сананатан ӧй табып туругар. Нениҥ учун дезе Иегова бойыныҥ организациязы ажыра биске амырысты јылыйтпаска болужып турган видеолор ло статьялар берет. Темдектезе, слерге мындый јепселдер болужар (слердиҥ тилге бар болзо): JW Library^® деп приложение, «Индекс публикаций Сторожевой башни», «Путеводитель по публикациям Свидетелей Иеговы» деп бичиктер. Ӧрӧги айдылган Моника эје токунабай турза, Агару Бичикти бу јепселдердиҥ болужыла шиҥдеп туратан. Темдектезе, ол «ачынары» деген сӧсти бедрелте деп јерге бичип ийет. Ол эмезе «чындык болоры» ла «чындык эмези» деп сӧстӧрлӧ шиҥжӱ ӧткӱрет. Оноҥ ол табылган темаларды токунабаганча кычырган. Эје айдат: «Мениҥ шиҥжӱ ӧткӱргеним мынайып башталатан: мен кандый бир сӧсти бедрелте деген јердӧӧн чек туткуланып калган бичип ийетем. Је кычырган эштеген кийнинде Иегова мени јылу этире кучактап ийген деп билдиретен. Мынайып кычырынып турзам, Иегова мениҥ сезимдеримди оҥдоп турган ла меге болужып турган деп кӧрӧргӧ јеҥил болгон». Слердиҥ де аҥданып јаткан сезимдереер токунабаганча, Иегова слерге мынайып ла болужар аргалу (Сар. 119:143, 144).

ИЕГОВА СЛЕРГЕ ИЙДЕ-КӰЧ БЕРЕР

10. Тӱбектеҥ улам бисле не болордоҥ айабас?

¹⁰ Ченелте. Кандый бир тӱбектеҥ улам кезикте бистиҥ эмоциональный ла физический ийде-кӱчис чыгып калат. Бу ӧйдӧ бис травма алган спортчы кижиге тӱҥей болодыс. Алдында ол тӱрген јӱгӱрип туратан, а эмди дезе аксап туруп, јӱк ле арайдаҥ базат. Анайып ла бис алдында кӱӱнзеп, сӱӱнип эткен немени эмди бойысты албадап, кӱчсинип эдип турган болорыс. Бисте судурчы Ильяда ла чылап ӧрӧ турар ийде-кӱч јок болордоҥ айабас, јӱк ле уйуктаар кӱӱнис келип турган болор (1 Каан. 19:5—7). Чыдалыс чыгып калган ӧйдӧ, Иегова биске канайып болужат?

11. Сарын 94:18-ле болзо, Иегова биске канайып болужат?

¹¹ Иегова нени эдет? Ол биске: «Болужарым» — деп айдат. (Сарын 94:18 кычырыгар.) Травма алган спортчыны  ойто сананып ийектер. Ол болуш јогынаҥ базып болбой јат. Анайып ла бис те болуш јогынаҥ Иеговага эрчимдӱ иштеп болбозыс. Андый ӧйдӧ сӱӱштӱ Адабыс биске мындый сӧстӧр айдат: «Мен, сениҥ Кудайыҥ, сени оҥ колыҥнаҥ тудуп алала, айдадым: „Коркыба, мен сеге болужып ийерим“» (Иса. 41:13). Мындый болушты Давид каан алган. Ол ӧштӱлерге истедип турала, Иеговага мындый сӧстӧр айткан: «Сениҥ оҥ колыҥ меге болужат» (Сар. 18:35). Је Иегова канайып болужып јат?

12. Кунугып калган тужыста Иегова биске кем ажыра болужар аргалу?

¹² Иегова биске болужарга, кемди-кемди кӱӱнзедип ийет. Темдектезе, Давид каан кунугып турарда, Иегова ого Ионафан најызын ийген. Ионафан дезе ого јакшы сӧстӧр айдып, кӱӱнин кӧдӱрип салган (1 Сам. 23:16, 17). Андый ла учурал Ильяла болгон. Иегова Ильяга болужарга, Елисейди ийген (1 Каан. 19:16, 21; 2 Каан. 2:2). Бӱгӱнги кӱнде Иегова биске билегис, најыларыс, ол эмезе аксагалдар ажыра болужат. Је јаман сезимдерге алдырган тужыста кемди де кӧрӧр кӱӱнис јок болордоҥ айабас. Јаҥыскан ла отурар кӱӱнис келер болор. Андый сезимдерде јаман неме јок то болзо, је биске тӱҥей ле Иегованыҥ болужы керек. Оны канайып алар?

13. Иегова биске болушсын деп нени эдер керек? (Јурукты база кӧрӱгер.)

¹³ Биске нени эдер керек? Јаҥыскан болотон кӱӱнле тартыжыгар. Нениҥ учун дезе тартышпазаар, јӱк ле бойоорды ла бойоордыҥ кӱчтереерди сананып јӱререер. А мынаҥ улам кижи јастыра тӱп-шӱӱлтелер эдип баштаар (Укаа 18:1). Эйе, кезикте тӱбек болзо, кижи бир эмеш ӧйгӧ јаҥыскан болуп ийзе, јаман јок. Је кижи узак ӧйдиҥ туркунына улустаҥ тууралап јӱрзе, ол Иегованыҥ болужын јектеп тургандый болот. Оныҥ учун кандый да кӱч болзо, билегердиҥ, најылараардыҥ ла аксагалдардыҥ болужын алып туругар. Олорды Иегованыҥ болужы деп кӧрӱгер (Укаа 17:17; Иса. 32:1, 2).

ИЕГОВА СЛЕРДИ ТОКУНАДАР

14. Бис недеҥ улам коркыыр болорыс?

¹⁴ Ченелте. Кезикте бис недеҥ-недеҥ улам тыҥ коркып, санааркап турган болорыс. Агару Бичикте Иегованыҥ кезик ишчилери коркыган учуралдар база бар. Олор ӧштӱлердеҥ эмезе ӧскӧ недеҥ-недеҥ  улам коркышту тыҥ коркып, ал-санаага да тӱжӱп туратан (Сар. 18:4; 55:1, 5). Бӱгӱнги кӱнде бис те школдо, иште, биледе эмезе јаҥдардаҥ тыҥ коркып турган болорыс. Ол эмезе бисте јазылбайтан оору табылган болор. Андый ӧйлӧрдӧ бойысты кӱчи неге де јетпейтен кичинек бала ошкош деп бодоор болорыс. Је Иегова мындый ӧйдӧ канайып болужып турган?

15. Сарын 94:19-ла болзо, Иегова биске нени эдет?

¹⁵ Иегова нени эдет? Ол бисти токунадып јат. (Сарын 94:19 кычырыгар.) Темдектезе, кичинек кызычак тыҥ кӱкӱрттеҥ коркыйла, уйуктап болбой турарда, адазы оны колына алып, балазы токунабаганча ла јайкап јат. Је тышкары оноҥ ло ары кӱкӱрттеп јалкындайт, а бала дезе адазыныҥ јылу койнында јакшынак уйуктап јат. Анайып ла бис те коркышту тыҥ коркып турган тужыста, Иегова бисти колына алып, токунабаганчас ла, јайкап турзын деп кӱӱнзеп јадыс. Је биске Иегованаҥ токунал аларга нени эдер керек?

16. Иегованаҥ токунал аларга биске нени эдер керек? (Јурукты база кӧрӱгер.)

¹⁶ Биске нени эдер керек? Иеговага мӱргӱп, оныҥ Сӧзин кычырып, оныла кожо болугар (Сар. 77:1, 12—14). Мынайып эдерге темигип калзаар, коркып турган тужыгарда капшай ла теҥеридеги Адагарга баштанараар. Иеговага санааркаштараарды ла недеҥ коркып турганаарды куучындагар. Оноҥ, оныҥ сӧстӧрин Агару Бичиктеҥ угугар. Анайып, Иегова слерди токунадар (Сар. 119:28). Слер коркыбаска болужатан ӱлгерлер таап алараар. Темдектезе, кезик ака-эјелерди Иовтыҥ бичиги, Сарындар ла Укаа сӧстӧр, анайда ок Матфейдиҥ 6-чи бажалыгында Иисустыҥ сӧстӧри токунаткан. Айдарда, Иеговага мӱргӱп, оныҥ Сӧзин кычырып турзаар, токунал алараар.

17. Бис неге алаҥзыбас аргалу?

¹⁷ Бистиҥ кӱч ӧйлӧристе Иегова биске болужар деп алаҥзыбас керек. Ол бисти бир де таштабас (Сар. 23:4; 94:14). Ол бисти корулаар, амырысты јылыйтпаска болужар ла токунадар деп сӧзин берет. Исайя 26:3-те Иегова керегинде мындый сӧстӧр айдылат: «Акту јӱрегинеҥ сеге бӱдӱп турган кижини сен корулаарыҥ. Сеге иженип турган кижиге бир де тӱгенбейтен амыр-энчӱ берериҥ». Айдарда, Иеговага иженип туругар. Оныҥ болужын јектебегер. Иеговала кожо кандый ла кӱчтерди ӧдӱп чыгарыс.