1. Иегова керегинде сананып турзаар, слерде кандый санаалар болот?

 ИЕГОВА керегинде сананып турзаар, слерде кандый санаалар болот? Ого мӱргӱп јатсагар, оны кандый деп бодоп јадаар? Бис Кудайды кӧрбӧй дӧ турган болзоос, је Агару Бичиктеҥ ол керегинде кӧп неме билип алар аргалу. Темдектезе, ондо Кудай «кӱн ле куйак», анайда ок «јуда салар от» деп бичилет (Сар. 84:11; Евр. 12:29). Иезекиильдиҥ кӧрӱлтезинде Кудай сапфирдеҥ эдилген ширееде отурган. Оныҥ бойынаҥ дезе, баалу таштардыҥ јаркыны кӧрӱнип турды, а оны айландыра солоҥыдый јаркын јарыдып турды (Иез. 1:26—28). Иегова керегинде мындый сӧстӧр кычырзаас, та кем де јымыража берердеҥ айабас, а та кем де коркый берердеҥ айабас.

2. Кезик улуска Иеговага јууктаарга нениҥ учун кӱч болот?

² Бис Иегованы кӧзисле кӧрбӧй јадыс, оныҥ учун ол бисти сӱӱп турган деп бӱдерге кезикте кӱч болот. Кезик улус Иегова олорды качан да сӱӱбес деп сананат, нениҥ учун дезе олор билезинде ада-энезиниҥ де сӱӱжин кӧрбӧгӧн. Је Иегова, бистиҥ Ада, сезимдеристи оҥдоп јат. Биске ого бӱдерге ле јууктаарга нениҥ учун кӱч болуп турганын ол база оҥдоп јат. Оныҥ да учун Агару Бичик ажыра биске бойыныҥ сӱӱжин ле јалакайын кӧргӱзет.

3. Иегованыҥ сӱӱжи керегинде нениҥ учун тереҥжиде билип алар керек?

³ Сӱӱш — Иегованыҥ кылык-јаҥын эҥ ле јакшы кӧргӱзип турган сӧс (1 Иоанн 4:8). Иегованыҥ ӱзе ле эткен керектеринде сӱӱжи кӧрӱнет. Оныҥ сӱӱжи коркышту јаан, ол оны сӱӱбей де турган улусты сӱӱйт (Матф. 5:44, 45). Бу јӧрмӧлдӧ Иегова керегинде ле оныҥ сӱӱжи керегинде тереҥжиде шӱӱжип кӧрӧрис. Бис оны канча ла кире кӧп билзеес, оны ончо ло кире тыҥ сӱӱрис.

 ИЕГОВА БИСТИ ТЫҤ СӰӰП ТУРГАН

4. Иегованыҥ сӱӱжин сананзаар, нени сезедеер? (Јурукты база кӧрӱгер.)

⁴ Иегова буурзак ла јалакай Кудай (Иак. 5:11). Ол Агару Бичикте бойын јалакай, јымжак энеле тӱҥдештирет (Иса. 66:12, 13). Эне бойыныҥ јаш балазын колына алып, кучактап, оныла арай, јымжак ӱниле куучындажат. Балазы ыйлай ла берзе, ол чӱрче ле јӱгӱрип келет. Анайып ла бис неге-неге санааркап турзаас, Иегованыҥ сӱӱжине иженер аргалу. Бир сарнаачы мындый сӧстӧр бичиген: «Кунукчылду санаалар амыр бербей турарда, сениҥ токунадууҥ мени јылыткан» (Сар. 94:19).

5. Слерге Иегованыҥ чындык сӱӱжи нениҥ учун јарап јат?

⁵ Иегова чындык Кудай (Сар. 103:8). Бис јастырып та турзаас, ол бисти таштабай јат. Израильтяндар Иегованы јаантайын ачындырып туратан. Је олор јаманын алынып, Иеговага кайра келзе, ол: «Мен сени баалап јадым, сӱӱп ле тооп јадым» — деп айдып, олордыҥ јаманын таштап салатан (Иса. 43:4, 5). Иегова бисти база анайып ла сӱӱп јат. Бис јастырып та турзаас, ол бисти јектебей јат. Оныҥ сӱӱжи бир де солынбай јат, бир де сообой јат. Керек дезе бис уур кинчек эдип ийеле, јаманысты алынып, ого кайра келзеес, ол биске «буурзап, кинчектереерди таштаар[ым]» деп сӧзин берет (Иса. 55:7). Агару Бичикте айдылганыла, Кудай бистиҥ кинчегисти таштап салза, «орныктырыларыныҥ ӧйи» башталат (Ап. ижи 3:19, сноска).

6. Бис Захария 2:8-теҥ Иегова керегинде нени билип аладыс?

⁶ Захария 2:8 кычырыгар. Иегова бисти сӱӱп јат. Оныҥ учун ол бистиҥ сезимдериске ајару эдет ле бистиҥ адаанысты аларга белен. Бис: «Мени кӧстиҥ каразын чылап чеберле» — деп мӱргӱӱр аргалу (Сар. 17:8). Бистиҥ мӱргӱӱлис каруу јок артпас. Биске јаман болзо, Иеговага база јаман. Кӧскӧ неме кирзе, коркышту ачу болот. Айдарда, Иегова бисти кӧстиҥ каразына тӱҥдештиргениле, «слерге тийген кижи, меге ачу эдет» деп айдарга сананган.

7. Иегова бисти сӱӱп турган деп нениҥ учун алаҥзыбас керек?

⁷ Иегова бисти оныҥ сӱӱжине алаҥзыбазын деп кӱӱнзеп јат. Је ол бисте алдында ӧйдӧ кандый бир учурал  болгонынаҥ улам оныҥ сӱӱжине алаҥзып турганысты оҥдоп јат. Ол эмезе эм тургуза кандый да ченелте болуп турганынаҥ улам Иегованыҥ сӱӱжине алаҥзый берген болорыс. Је алаҥзыбаска нени эдер керек? Иегова Иисусты, майлаткандарды, анайда ок бистиҥ кажыбысты ла нениҥ учун сӱӱп турганын кӧрӱп ийектер.

ИЕГОВА СӰӰЖИН КАНАЙЫП КӦРГӰЗЕТ?

8. Нениҥ учун Иисус Адазыныҥ сӱӱжине алаҥзыбаган?

⁸ Иегова ла Иисус канча јылдардыҥ туркунына кожо болгон. Бу ӧйгӧ олордыҥ колбулары сӱреен јуук болуп калган. Бого тӱҥей колбулар јердиҥ ӱстинде база кемде де јок. Иегова Иисусты сӱӱп турганын бир де јажырбаган. Бу керегинде Матфей 17:5-теҥ (ЈТ) кычырадыс. Ондо Кудай: «Мен оны јарадып јадым» — деп јӱк ле айткан эмес, је бисти ол Иисусты сӱреен тыҥ сӱӱп турганын билзин деп кӱӱнзеген. Оныҥ да учун: «Бу мениҥ сӱӱген Уулым» — деп айткан. Иегова Иисусла оморкогон, оныҥ учун келер де ӧйдӧ Уулы оныҥ сӧзин бӱдӱрип салар деп, бир де алаҥзыбаган (Эф. 1:7). Иисус та Адазыныҥ сӱӱжине бир де алаҥзыбаган. Ол оныҥ сӱӱжин бастыра јӱрӱмине кӧргӧн. Оныҥ да учун ол керегинде јаантайын куучындап туратан (Иоанн 3:35; 10:17; 17:24).

9. Иегованыҥ майлаткандарды тыҥ сӱӱп турганын кандый сӧстӧр кӧргӱзип јат? Јартап беригер (Римдегилерге 5:5).

⁹ Иегова майлаткандарды база сӱӱп турган. (Римдегилерге 5:5 кычырыгар.) «Бойыныҥ сӱӱжин берген» деген сӧстӧргӧ ајару эдип ийектер. Бир бичикте бу сӧстӧр мынайда јарталат: майлаткандардыҥ јӱректерине «коркышту јаан сӱӱш урулган» деп айдарга јараар. Иегова олорды бойыныҥ балдары чылап не аайлу тыҥ сӱӱп турган дезеер! Майлаткандар Иегованыҥ сӱӱжине бир де алаҥзыбай јат (Иуда 1). Апостол Иоанн бу керегинде мындый сӧстӧр айткан: «Кӧрӱгер, Ада биске Кудайдыҥ балдары деп адаларга кандый сӱӱш бергенин» (1 Иоанн 3:1, ЈК 2003). Је Иегова јӱк ле майлаткандарды сӱӱп турган ба? Јок. Ол бистиҥ бастырагысты сӱӱп турганын кӧргӱзип турган керелерди кӧрӱп ийектер.

10. Иегова слерди сӱӱп турган деп, кандый эҥ јаан кере бар?

¹⁰ Иегова бисти сӱӱп турган деп, эҥ јаан кере кандый? Ол толынты тайылга. Иегова бастыра улус учун јӱрӱмин берзин деп, сӱӱген Уулын берип ийген. Анайып, бистиҥ кинчектерис ташталып калган, бисте оныҥ најылары болотон арга ачылган (1 Иоанн 4:10). Бастыра јердиҥ ӱстинде Иегованаҥ ӧскӧ андый јаан сыйды база кем де этпеген (Иоанн 3:16; Рим. 5:8). Бис Иегова ла Иисустыҥ эткен тайылгазын канча ла кире кӧп сананып турзаас, олор бистиҥ кажыбысты ла тыҥ сӱӱп турган деп, ончо ло кире јакшы оҥдоп јадыс (Гал. 2:20). Иегова толынтыны јӱк ле справедливость учун тӧлӧгӧн эмес, бу чыннаҥ ла сӱӱштеҥ улам эдилген сый болуп јат. Айдарда, Иегова бис учун Иисусты бергениле бисти сӱӱп турганын кӧргӱскен.

11. Иеремия 31:3-теҥ нени билип аладыс?

¹¹ Ӧрӧги абзацтарда кӧргӧнисле, Иегова сезимдерин бойына тутпай, чыгара айдып јат. (Иеремия 31:3 кычырыгар.) Ол бисти сӱӱп турганы учун бойына јууктадып алган. (Јаҥды такыганы 7:7, 8 тӱҥдештиригер.) Оныҥ сӱӱжин бистеҥ кем де, не де айрып болбос (Рим. 8:38, 39). Иегованыҥ улу сӱӱжин сананып турзаар, слерге кандый сезимдер келет? 23-чи Сарынды кычырала, Давид Иегованыҥ сӱӱжин ле болужын кӧрӱп канайтканын ајарып кӧрӱгер. Айдарда,  слер де Иеговала јуук колбуларлу болор аргалу.

ИЕГОВАНЫҤ СӰӰЖИН САНАНЗААР, СЛЕРДЕ КАНДЫЙ СЕЗИМДЕР БОЛОТ?

12. 23-чи Сарында не керегинде айдылган?

¹² Сарын 23:1—6 кычырыгар. 23-чи Сарын — ол кожоҥ. Бу кожоҥныҥ кажы ла сӧзинеҥ Давидтиҥ Иегованыҥ сӱӱжине ле болужына алаҥзыбай турганы кӧрӱнет. Давид Иегованы мениҥ Кӱдӱчим деп айдат. Мынаҥ Давидтиҥ Иеговала јуук колбулары кӧрӱнет. Давид Иеговага бир де алаҥзыбай бӱткен. Оныҥ учун оныҥ јолыла барарга бир де коркыбаган. Иегова Давидти јажын-чакка сӱӱр, оныҥ сӱӱжи бир де ӧтпӧс деп, Давид билген. Нениҥ учун Давид Иегованыҥ сӱӱжине бир де алаҥзыбаган?

13. Давид Иегова ого оноҥ ло ары болужар деп нениҥ учун алаҥзыбаган?

¹³ «Ол мени бастыра јанынаҥ јеткилдеер». Давид, Иегова ого сӱреен кӧп болужып турган деп ле не керектӱзин кажы ла кӱн берип турган деп кӧрӱп турган болгон. Анайда ок ол Иеговала кожо јуук колбуларлу болгонын ла оны сӱӱндирип турганын билер болгон. Мынаҥ улам Давид, не де болотон болзо, Иегова оны бир де артыргыспас, оноҥ ло ары сӱӱр деп алаҥзыбаган. Оныҥ учун ол неге де санааркабай, токуналу јӱретен (Сар. 16:11).

14. Иегованыҥ болужы недеҥ кӧрӱнет?

¹⁴ Иегова биске анчада ла тӱбектиҥ ӧйинде болужат. Бет-Элде 20 јылдаҥ ажыра иштеп салган Клэр a деп эјениҥ јууктарында бир ле уунда кӧп кӱчтер башталган. Мынаҥ улам эје тыҥ санааркап, ал-санаага тӱшкен. Оныҥ адазында инсульт болгон, сыйнызын јууннаҥ чыгарып ийген. Анайда ок олордыҥ  јаан эмес бизнези бӧктӧлгӧн, кийнинде олор тура да јок артып калган. Бу ӧйдӧ Иегова Клэрдиҥ јууктарына канайып болушкан? Эје мынайда куучындаган: «Иегова јууктарымды керектӱ немелерле кажы ла кӱн јеткилдеген. Је јӱк ле эҥ керектӱ немени берген эмес, а артыктай да берип туратан. Иегова тӱбектиҥ ӧйинде биске канайып болушканын јаантайын шӱӱп сананадым. Бу меге јӱрӱмимде јаҥы кӱчтер башталза, ийде-кӱчтӱ болорго ло Иеговага оноҥ ло ары сӱӱнчилӱ иштеерге болужат».

15. Давидтиҥ: «Ол мениҥ тынымды сергид[ет]» — деген сӧстӧри нени темдектейт? (Јурукты база кӧрӱгер.)

¹⁵ «Ол мениҥ тынымды сергид[ет]». Кезикте Давид кӱчтердеҥ улам ийде-кӱчин јылыйткан (Сар. 18:4—6). Је Иегова оныҥ кӱӱнин кӧдӱрип салатан. Ол бойыныҥ чучурап калган најызын «јажыл ӧлӧҥдӱ јалаҥдарга» экелип, сууныҥ јанында амырадып туратан. Мынайып Давидтиҥ кӱӱни кӧдӱрилип, ийде-кӱчи кирип келзе, ол Иеговага оноҥ ло ары иштеер аргалу болгон (Сар. 18:28—32).

16. Иегованыҥ сӱӱжи слерге канайып болушкан?

¹⁶ Кӱч учуралдар бисте де болуп јат. Је Иегова бисти болуш јок артыргыспай турган (Ыйы 3:22; Кол. 1:11). Темдектезе, COVID-19 тушта Ре́йчел деп эјени ӧбӧӧни таштап ийеле, Иегованаҥ јӱре берген. Эјеге Иегова канайып болушты? Ол мынайда куучындаган: «Мен Иегованыҥ сӱӱжин јаантайын ла кӧрӱп турган болгом. Јанымда најыларым болгон. Олор меге курсак азып беретен, Агару Бичиктеҥ меге келижер шӱӱлтелер бичигилеп туратан, анайда ок менле јылу куучындажып, Иегова мени тыҥ сӱӱп турган деп бӱдӱмјилеп тургулайтан. Оныҥ учун мындый нак биле учун Иеговага јаантайын быйаным айдып јадым».

17. «[Мен] коркыбай јадым» — деп, Давид нениҥ учун айткан?

¹⁷ «Коркыбай јадым. Нениҥ учун дезе сен мениҥ јанымда». Давидтиҥ јӱрӱми ӧлӱмниҥ кырында болуп туратан. Ого кӱчтӱ ӧштӱлери амыр бербейтен. Је Иегованыҥ сӱӱжинеҥ улам Давид недеҥ де коркыбаган. Кажы ла айалгада Иегова оныҥ јанында деп сескен. Оныҥ учун ол Иегова керегинде мынайып кожоҥдогон: «Ол меге недеҥ де коркыбаска болушкан» (Сар. 34:4). Давидте коркыйтан шылтактар кӧп тӧ болгон болзо, је Иегованыҥ сӱӱжин сезип турганынаҥ улам ол недеҥ де коркыбайтан.

18. Иегова бисти сӱӱп турган деп билип турганыс коркыбаска канайып болужат? Темдер куучындап беригер.

¹⁸ Кезикте бистиҥ јӱрӱмисте кандый бир тӱбек болордоҥ айабас. Је Иегова бисти сӱӱп турган деп билип турзаас, бис коркыбазыс. Темдектезе, пионер болуп турган Сью́зи деп эјениҥ учуралын кӧрӱп ийектер. Оныҥ уулы бойына колын салынып койгон. Эје айдат: «Бис экӱ  ӧбӧӧнимле кожо уулысты мынайда јылыйтып, мындый кыйын-шыранаҥ качан да айрылбазыс деп бодогоныс. Санааҥда тӱби јок, караҥуй јердӧӧн кӱлӱреп бараткан ошкожыҥ. Сениҥ јӱрӱмиҥде база јакшы не де болбос деп санаалар келип туратан. Је Иегова бисти сӱӱжиле кучактап аларда, бис оныҥ јылу колдорында деп сезилген». А эмди ӧбӧӧни јӱре берген Рейчел эјени эске алып ийектер. Ол айдат: «Бир катап тӱнде меге коркышту јаман болгон. Ачу сыстаҥ улам јӱрегим чек ле кодорылып јаткандый билдирилген. Коркышту тыҥ коркып баштагам. Ол тӱнде ӧксӧп туруп ыйлап, Иеговага мӱргӱген болгом. Оноҥ кенете јӱрегиме амыр боло берген. Энезиниҥ колында уйуктап јаткан јаш бала чылап токунай береле, уйуктап калган эмтирим. Мен мыны качан да ундыбазым». А Та́сос деп аксагалга Иегованыҥ сӱӱжин кӧрӧргӧ не болушкан? Ол черӱге барбаганы учун тӱрмеде тӧрт јыл отурган. Ака эске алынат: «Менде тӱрмеде керектӱ неме ӱзе ле болгон, керек дезе артыгынча болгон деп айдарга јараар. Анайып, Иеговага бӱдӱмјим тыҥыган. Анайда ок Иегова меге агару тын берип туратан, оныҥ учун айландыра айалганаҥ кижиниҥ санаазы караҥуйлаар да болзо, мен сӱӱнчимди јылыйтпагам. Иеговага канча ла кире јуук болзом, мен оныҥ сыйларын ончо ло кире јарт кӧрӱп јадым деп, канча катап бӱдӱмјилендим. Оныҥ учун тӱрмеде отурарымда пионердиҥ ижин баштагам».

ЈАЛАКАЙ КУДАЙЫГАРГА ЈУУКТАГАР

19. а) Кудай бисти сӱӱп турган деп алаҥзыбай турзаас, мӱргӱӱлдерис кандый болор? б) Иегованыҥ кандый сӧстӧри јӱрегерди эҥ ле тыҥ томултат? ( «Иегованыҥ сӱӱжин кӧргӱзип турган сӧстӧр» деген рамканы кӧрӱгер.)

¹⁹ Бис бу јӧрмӧлдӧги учуралдардаҥ Иегова, «сӱӱштиҥ... Кудайы», бисле кожо деп кӧрӱп јадыс (2 Кор. 13:11). Иегова бистиҥ кажыбыска ла ајару эдет. Ончобысты эбире оныҥ чындык сӱӱжи (Сар. 32:10). Иегованыҥ бисти канайып тыҥ сӱӱп турганын сананып турзаас, ол биске ончо ло кире јуук деп билдирер. Кудайыска мӱргӱген тужыста, бис оныҥ сӱӱжи биске сӱреен керектӱ деп айдар аргалу. Анайда ок бис ого санааркаштарысты куучындаар аргалу. Ол бисти оҥдоор ло болужар (Сар. 145:18, 19).

20. Иеговага јууктаарга биске нениҥ учун јарап јат?

²⁰ Канайып соок кӱнде оттыҥ јанына отурала, јылынарга јакшызынып јадыс, анайып ла бисти сӱӱжиле јылыдып турган Иеговага јууктаарга биске сӱреен јарап турган. Иегова бисти сӱреен тыҥ сӱӱп јат. Јайаачы Иегованыҥ бисти бойы сӱӱп турганы не аайлу јакшы дезеер! Оныҥ да учун сарнаачы чылап: «Мен Иегованы тыҥ сӱӱп јадым!» — деп айдып ийектер (Сар. 116:1).