1. Кезикте биске нениҥ учун коркымчылу болот?

 БИСКЕ ӱзегиске кезикте коркымчылу болот. Бис Агару Бичиктиҥ болужыла кӧрмӧстӧрдӧҥ, божогон улустаҥ ла келер ӧйдӧ улусла не болорынаҥ коркыбай јадыс. Је бис калганчы кӱндерде јададыс, оныҥ учун айландыра коркымчылу немелер болот — јуу-чак, каршулу керектер, эпидемиялар (Лука 21:11). Анайда ок бистиҥ кезигисти јаҥдар истежер болор деп ле јуук улузыс биске ачуурканар болор деп коркып јадыс. А кезигис эмдиги ле келер ӧйдӧги ченелтелерди чыдажып болбос деп санааркап јат.

2. Гат деп калада Давид кандый айалгада болуп калган?

² Давидке база коркымчылу болгон. Темдектезе, оны Саул каан истежип турарда, ол филистимляндардыҥ Гат деп калазына кача берген. Је соҥында бу каланыҥ Ахиш деп каанына, израильтяндардыҥ кожоҥында чӱмделген канча муҥ филистимляндарды ӧлтӱрген коркышту казыр јуучыл — Давид деп, тил јетиргендер. Давид мыны угала, Ахиш каан оны ӧлтӱрер болор деп сананала, коркышту коркый берген (1 Сам. 21:10—12). Давидке коркыбаска не болушкан?

3. Давидке коркыбаска не болушкан? (Сарын 56:1—3, 11).

³ 56 Сарында, Давид Гат деп калада јӱрерде, кандый сезимдер болгонын бичип салган. Ол сарында оныҥ коркыганыныҥ шылтагы ла ол оны канайып ӧткӧни керегинде бичилген. Давид ол ӧйдӧ Кудайга иженген. (Сарын 56:1—3, 11 кычырыгар.) Оныҥ иженгени калас болбогон. Нениҥ учун дезе Гат деп калада Иегова Давидке јӱӱлгек этире тӧгӱнденерге болушкан! Ахиш каан  мыны кӧрӧлӧ, јӱӱлгек кижини јайлатсын деп јакару берген. Мынаҥ улам Давидте качатан арга болгон (1 Сам. 21:13—22:1).

4. Иеговага ижемјибисти тыҥыдарга нени эдерис? Тем куучындап беригер.

⁴ Бис те тыҥ коркып турзаас, Иеговага иженгени болужар. Иеговага канай иженерин кӧрӱп ийектер. Темдектезе, слер тыҥ ооруп калганаар. Оныҥ учун озо баштап слер тыҥ санааркай бередеер. Је слерди ченемелдӱ врач эмдеер деп угуп ийгенеер. Оноҥ ол андый оорулу улусты кӧп эмдеген эмтир. Анайда ок ол улусты лаптап угат, оныҥ учун слер ого бӱдӱп баштап јадаар. Слер чыннаҥ ла ол кижиниҥ болужарга турганын кӧрӱп, токунай бердеер. Анайып ла бис тыҥ коркып турзаас, бастыра јӱрегистеҥ Иеговага иженер керек. А иженерге, Иегованыҥ алдында нени эткенин, эмди нени эдип турганын ла келер ӧйдӧ нени эдерин сананып туругар. Давид шак ла анайып эткен. Айдарда, 56 Сарындагы сӧстӧрди кӧрӱп, ижемјибисти канайып тыҥыдарын ла коркыбаска нени эдерин шӱӱп кӧрӱп ийектер.

ИЕГОВА НЕНИ ЭТКЕН?

5. Давид коркыбаска нени шӱӱп сананган? (Сарын 56:12, 13).

⁵ Давид јеткерлӱ айалга боло берерде, Иегованыҥ нени эткенин шӱӱп сананган. (Сарын 56:12, 13 кычырыгар.) Ол мынайып шӱӱп сананарга ӱренип калган болгон. Темдектезе, ол Кудайдыҥ јайаандарын шӱӱп кӧрӧтӧн. А бу јайаандардаҥ дезе Иегованыҥ коркышту јаан ийде-кӱчин ле улусты сӱӱп турганын кӧргӧн (Сар. 65:6—9). Анайда ок ол Иегова бойыныҥ ишчилерин ончозын кичееп турган деп шӱӱп сананган (Сар. 31:19; 37:25, 26). Је анчада ла ого бойына Иегова канай болушканын ундыбай туратан. Иегова оны јаштаҥ ала корулаган (Сар. 22:9, 10). Мынайып шӱӱп сананганы Давидтиҥ бӱдӱмјизин тыҥыткан болор.

6. Тыҥ коркып турзаас, Иеговага иженерге не болужар?

⁶ Слерге тыҥ коркымчылу болуп турза, Иегованыҥ нени эткенин сананып туругар. Темдектезе, оныҥ јайаандарын, аҥ куштарды ла чечектерди, ајыктап кӧрӱп туругар. Иегова олорды бойыныҥ  сӱӱр кеберине тӱҥей этире ле ого бажырар этире јайабаган, је андый да болзо, Кудай олорды кичееп турарда, слерди кичеебес пе? (Матф. 6:25—32). Анайда ок озогы ӧйдӧги ле эмдиги ӧйдӧги Кудайга чындык эр ле ӱй улусла јууктада таныжып аларга јараар a. Иегова слердиҥ бойоорго нени эткенин ле канайып ол слерди бойына јууктатканын эске алып туругар (Иоанн 6:44). Анайда ок слердиҥ мӱргӱӱлдереерге канайып каруу берип турганын ундыбагар (1 Иоанн 5:14). Иисус Христостыҥ тайылгазынаҥ улам слердиҥ јӱрӱмеер кажы ла кӱн сӱӱнчилӱ ле калас эмес деп сананып туругар (Эф. 1:7; Евр. 4:14—16).

7. Ванессага Даниилдиҥ учуралы коркыбаска канайып болушкан?

⁷ Гаитиде јадып турган Ванесса b деп сыйын коркышту коркымчылу айалгада болуп калган. Оныҥ јанында јадып турган эр кижи ого кажы ла кӱн телефон согуп, кожо конок деп смстар аткарып туратан. Је бистиҥ сыйын оны токтоп калзын деп айдарда, ол там ары барган ла оны кезедип баштаган. «Меге коркышту коркымчылу болгон» — деп Ванесса айдат. Је ол коркыбаска нени этти? Ол бойын корулаарга, кезик алтамдар эткен. Аксагал дезе ого полицияга баштанарга болушкан. Анайда ок Ванесса сыйын Иегова алдындагы ӧйдӧ бойыныҥ ишчилерине канайып болушканын шӱӱп сананган. «Меге озо ло баштап Даниилдиҥ учуралы санаама кирген. Даниил нени де јаман этпеген де болзо, торолоп калган карагулаларлу ородӧӧн таштаткан. Је Иегова ого болушкан. Оныҥ учун мен бу айалганы Иегованыҥ колына берип, коркыбай баргам» — деп Ванесса куучындаган (Дан. 6:12—22).

ИЕГОВА НЕНИ ЭДЕТ?

8. Давид неге бӱткен? (Сарын 56:8).

⁸ Гат деп калада Давидти ӧлтӱрерге тургулаарда, ол коркып отурып калбады. Оныҥ ордына Давид Иегова ого эмди ле канайып болужып турганын кӧрӧргӧ албаданган. Анайып ол Иегова оныҥ кӱч айалгазын ла сезимдерин оҥдоп турган деп билип алган. (Сарын 56:8 кычырыгар.) Анайда ок Давидке оныҥ најылары, Ионафан ла улу абыс Ахимелех, јаан јӧмӧлтӧ болгон (1 Сам. 20:41, 42; 21:6, 8, 9). Је качан Саул оны ӧлтӱрерге турарда Давид оныҥ колынаҥ кача берген. Мыны ончозын кӧрӱп, Давид Иегова оныҥ кандый айалгада болгонын ла ого кандый кӱч болгонын оҥдоп турган деп бӱткен.

9. Иегова бис керегинде нени билер?

⁹ Бисле де анайып ла болот. Иегова јӱк ле бистиҥ ченелтени эмес, је бистиҥ сезимдеристи де кӧрӱп турган. Темдектезе, Иегова Египетте кулданышта јӱрген Израиль албатыныҥ кыйын-шыразын билер болгон (Чыг. 3:7). Давид Иегова оныҥ кӱч айалгазын ла сезимдерин кӧрӱп турган деп алаҥзыбаган (Сар. 31:7). Качан Израиль албаты бойыныҥ ла јаманынаҥ улам тӱбекке тӱжӱп калза, Иегова да «кыйналган», ол эмезе ого ачу болгон (Иса. 63:9). Оныҥ учун слер коркып турган болзоор, Иегова слерди оҥдоп турган ла слерге болужар.

10. Иегова слерди кичееп турган ла кандый ла ченелтени ӧдӧргӧ болужар деп нениҥ учун алаҥзыбай јадыгар?

¹⁰ Коркышту кӱч ченелтениҥ ӧйинде бис коркып турзаас, Иегованыҥ болужын  кӧрӧргӧ кӱч болордоҥ айабас. Ол ӧйдӧ биске не болужар? Иегованыҥ болужын кӧрӱп турарга, мӱргӱгер (2 Каан. 6:15—17). Темдектезе, кандый бир куучын-эрмек эмезе јуунда кемниҥ-кемниҥ јартамалы кӱӱнеерди кӧдӱрген болор? Эмезе кандый бир јӧрмӧл, видео, бистиҥ сайттагы кожоҥ слердиҥ кӱӱнеерди кӧдӱрген болор? Ол эмезе слерге кем-кем кӱӱн кӧдӱрер кандый бир шӱӱлте эмезе библиялык ӱлгер айткан болор? Кезикте бис телекейлик карындаштыгысты ла кӧгӱс курсакты Иегованыҥ баалу сыйлары деп ундып ийедис (Иса. 65:13; Марк 10:29, 30). Је бу сыйлар Иегова слерди сӱӱп турган деп кӧргӱзет, анайда ок Иеговага кандый ла ӧйдӧ, кандый ла айалгада иженерге јараар деп кӧргӱзет (Иса. 49:14—16).

11. А́йдага коркыбаска не болушкан?

¹¹ Сенегалда јадып турган А́йда деп сыйын кӱч ӧйлӧрдӧ Иегованыҥ болужын кӧрӧргӧ албаданган. Айда билезинде балдардыҥ јааны болгон, оныҥ учун ада-энези Айда олорго акча-манат јанынаҥ болужар деп иженген. Је ол сыйын пионер болорго кӱӱнзеген. Оныҥ учун ижин астадып ийерде, оныҥ иш-јалы да астай берген. Бу неме оныҥ јууктарына чек јарабаган, оныҥ учун олор оны јамандап баштаган. Айда куучындайт: «Мен ада-энемди кичееп болбозом, јууктарыма керек јок болуп калар болбойым деп санааркап баштагам. Керек дезе бу айалгада Иегованы да бурулагам». Је оноҥ сыйын јуунда бир куучын-эрмек уккан. Ол айдат: «Бу куучын-эрмектеҥ, сениҥ јӱрегиҥе кандый да ачу тӱшсе, Иегова оҥдоп турган деп эске алынгам. Анайда ок аксагалдар ла најыларым Иегова мени сӱӱп турган деп айдып туратан. Мынайып, араайынаҥ Иеговага бӱдӱмјим тыҥый берерде, мен ого бир де алаҥзыбай, мӱргӱп баштагам. А мӱргӱӱлдеримниҥ каруузын кӧрӱп турзам, јӱрегим токунай беретен». Кийнинде Айда сыйын јаҥыс та пионер болорго эмес, је ада-энезине акча јанынаҥ болужатан иш табып алган. «Эмди мен Иеговага бир де алаҥзыбай иженерге ӱренип алгам. Ого мӱргӱп ле ийзем, недеҥ де коркыбай барадым» — деп, Айда сыйын айдат.

 ИЕГОВА НЕНИ ЭДЕР?

12. Сарын 56:9-ла болзо, Давид неге алаҥзыбаган?

¹² Сарын 56:9 кычырыгар. Бу ӱлгердеҥ бис Давидке коркыбаска база не болушканын кӧрӱп јадыс. Оныҥ јӱрӱми јеткерлӱ айалгада да болгон болзо, ол Иегова келер ӧйдӧ ого нени эдерин шӱӱп сананган. Иегова оныҥ адаанын алар ла аргадап алар деп билген. Нениҥ учун дезе Иегова оны каан этире кӧстӧп салган болгон (1 Сам. 16:1, 13). Иегова айткан сӧзине турар деп, Давид бир де алаҥзыбаган.

13. Иегова биске келер ӧйдӧ нени эдер?

¹³ Иегова бистиҥ кажыбыска ла удабас нени эдер? Кудай бисти кандый ла кӱчтердеҥ корулаар деп сакыбай јадыс c. Је андый да болзо, ол удабас, јаҥы јӱрӱмде, бӱгӱнги кӱчтерди ончозын јоголтып салар (Иса. 25:7—9). Иегова божогон улусты тиргизер, улусты оору-јоболдоҥ, ол тоодо эмоциональный да оорулардаҥ, јазып койор, анайда ок бастыра ӧштӱлерди јоголтып салар (1 Иоанн 4:4).

14. Бис не керегинде шӱӱп сананар аргалу?

¹⁴ Слер коркып турзагар, Иегова слерге келер ӧйдӧ нени эдерин шӱӱп сананыгар. Сананып ийзеер де, райда јӱрӱм сӱреен јакшы болор, Сатана да, калју улус та јок. Слерди айландыра улус ончозы чындыкты сӱӱп турган болор, а слер кӱннеҥ кӱнге толо кемине јууктаараар. 2014 јылдыҥ регион курултайында болгон инсценировкада, адазы бойыныҥ билезине келер ӧй керегинде шӱӱп сананарга болушканы кӧргӱзилген. Олор 2 Тимофейге 3:1—5 сӧстӧрди райдагы јӱрӱм керегинде айдылганы этире кычыргандар: «Билип јӱр келер ӧйдӧ сӱӱнчилӱ ӧйлӧр келер. Улус бой-бойын сӱӱр, Кудайды сӱӱр, бойыныҥ кемин билер болор, јобош болор, Кудайды мактаар, ада-энезиниҥ сӧзин угар, быйанду болор, бойыныҥ сӧзине турар, јалакай болор, улусты сӱӱп, олорло эптӱ-јӧптӱ јӱрер, улусты јамандабас, бойын тудунып билер болор, јымжак болор, јакшыны сӱӱр, бӱдӱмјилӱ болор, ӧчӧшпӧс, бийиркенбес, Кудайды соот-јыргалдаҥ артык сӱӱр, акту јӱрегинеҥ Кудайга чындык болор. Андый улусла најылаш». А слер билегерле эмезе најылараарла кожо райдагы јӱрӱм керегинде куучындажып турганаар ба?

15. Таняга коркымчылу да болгон болзо, Иеговага чындык артарга ого не болушкан?

¹⁵ Тӱндӱк Македонияда јадып турган Таня деп сыйынныҥ учуралын кӧрӱп ийектер. Качан ол Агару Бичикти ӱренип баштаарда, ада-энези ого коркышту тыҥ удурлашкан. Је сыйын Иегова келер ӧйдӧ ого нени эдерин шӱӱп сананган, оноҥ улам ол коркыбай барган. Сыйын куучындайт: «Мен недеҥ тыҥ коркыгам, оныҥ кезиги бӱдӱп калган. Темдектезе, кажы ла сайын туштажунаҥ јанып келзем, энем мени согуп туратан. Оноҥ мени адам ла энем Иегованыҥ Керечизи болуп калзам, бис сени ӧлтӱрип саларыс деп кезедип баштаган». Учы-учында олор оны айлынаҥ чыгара сӱрӱп ийген. Бу мындый айалгада Таня канайткан? Ол оноҥ ары айдат: «Иеговага чындык артсам, јажын-чакка ырысту јӱрерим деп сананып туратам. Бӱгӱнги кӱнде нени јылыйтканымды келер ӧйдӧ Иегова јандырып берер. Јаман неме ӱзе ундылып калар». Таня Иеговага чындык арткан. Кудайдыҥ болужыла иш те таап алган, анайда ок сӱреен јакшы акага барган. Эмди олор экӱлези Иеговага ӧйин толо берип иштегилейт.

 ИЕГОВАГА ИЖЕМЈИГЕРДИ ТЫҤЫДЫГАР

16. Лука 21:26—28-теги сӧстӧр бӱдӱп баштаза, коркыбаска биске не болужар?

¹⁶ Удабас улу тӱбек башталза, «улус коркыганынаҥ улам санаазын ычкынар». Је ол ӧйдӧ Иегованыҥ ишчилери турумкай ла јалтанбас болор. (Лука 21:26—28, ЈТ кычырыгар.) Нениҥ учун дезе бис Иеговага иженерис. Ӧрӧги айдылган Таняныҥ учуралын кӧрзӧӧс, кандый бир кӱчтерди ӧдӱп койгоныс, јаҥы кӱчтерди ӧдӧргӧ болужар. Таня мынайып куучындаган: «Кандый да кӱч айалга болотон болзо, Иегованыҥ эдип болбозы јок. Кезикте бистиҥ јӱрӱмис улустыҥ колында деп билдирердеҥ айабас, је ол андый эмес. Иегова кандый ла айалганы јакшы јанындӧӧн солып ийер аргалу. Кандый ла ченелте тӱҥей ле токтоп калат».

17. 2024 јылдыҥ ӱлгери биске канайып болужар? (Кадарындагы јурукты кӧрӱгер.)

¹⁷ Бис бӱгӱнги кӱнде кӧп немедеҥ коркыырдаҥ айабазыс. Је Давид чилеп ӧйинеҥ ӧткӱре коркыбаска албаданадыс. 2024 јылдыҥ ӱлгери эдип, Давидтиҥ Иеговага айткан сӧстӧри талдалган: «Мен коркып турзам, сеге иженедим» (Сар. 56:3). Бир бичикте бу ӱлгер мынайда јарталган: «Давид коркып турган немелери керегинде, ӧскӧртӧ айтса кӱчтери керегинде сананбаган, оныҥ ордына ого болужып ийетен Јайымдаачызына иженген». Бу ӱлгерди бӱдӱн јылга ундыбай јӱрӱгер. Недеҥ-недеҥ коркый берзеер, оны эске алыгар. Анайда ок Иегова алдында ӧйдӧ нени эткенин, бӱгӱнги кӱнде нени эдип турганын ла келер ӧйдӧ нени эдерин шӱӱп сананарга, ӧй табып туругар. Ол тушта слер Давид ле чилеп: «Кудайыма иженип, недеҥ де коркыбайдым» — деп айдар аргалу болороор (Сар. 56:4).