Кезик ороондордо ӱй улусты экинчи сорт улус деп сананат. Темдектезе, Боливияда аймак кӧрӧӧчи болуп турган Ханс аканыҥ айтканыла, уулчактарды јаштаҥ ала кату ла улуркак болзын деп, анайда ок ӱй улусты тообос керек деп ӱредет. А Тайваньда аксагал болуп турган Шэн Сянь ака мынайда куучындаган: «Бистиҥ культурада ӱй улус унчукпай јӱрер учурлу, олорго эр кижиниҥ керектерине кирижерге јарабас. Кем-кем ӱй кижиниҥ сӧзин укса, најылары оны уйан кӧрӱп баштайт». А кезик јерлерде эр улус ӱй улусты јабыс кӧрӱп, шооткылайт.

Слердиҥ культурада ӱй улусты тообой турган болзо, слер анай ла јӱрер учурлу эмезеер (Эф. 4:22—24). Кижи Иегованаҥ тем алып, бойыныҥ кӧрӱмин солыыр аргалу. Оныҥ учун бу јӧрмӧлдӧ мындый сурактар кӧрӧрис: Иегова ӱй улуска кандый кӧрӱмдӱ? Ӱй улуска Иегова ла чылап баштанарга акаларга не болужар? Ӱй улуска баштанары јанынаҥ аксагалдар кандый тем кӧргӱзер аргалу?

ИЕГОВА ӰЙ УЛУСКА КАНАЙЫП БАШТАНАТ?

Ӱй улуска канайып баштанары јанынаҥ эҥ јакшы темди — Иегова кӧргӱскен. Иегова сӱреен јалакай Ада. Ол бойыныҥ кажы ла балазын сӱӱп јат (Иоанн 3:16). Бистиҥ эје-сыйындарыс оныҥ сӱӱген кыстары болот. Оныҥ учун Иегова ӱй улусты канайып тооп турганын кӧрӱп ийектер.

Иегова ӱй улусты уйан кӧрбӧй јат. Ол эр де, ӱй де улусты бойына тӱҥей эдип јайаган (Баш. 1:27). Иегова эр кижини ӱй кижинеҥ  сагышту эмезе јайалталу эдип јайабаган ла эр кижини ӱй кижиге кӧрӧ артык деп сананбай јат (2 Лет. 19:7). Оныҥ да учун олор до, булар да Агару Бичиктиҥ чындыктарын тӱҥей оҥдоп јадылар. Анайда ок Иегованыҥ јакшы кылык-јаҥдарын ӱй де, эр де улус кӧргӱзер аргалу. Бого ло коштой Иегова эр де, ӱй де улусты бӱдӱмјизи учун кайралдаар. Кудай олордыҥ кажызына ла јерде ӱргӱлјиге јӱретен ол эмезе теҥериде абыстар ла каандар болотон ижемји сыйлаган (2 Пётр 1:1). Айдарда, Иегова ӱй улусты уйан кӧрбӧй јат!

Иегова ӱй улусты лаптап угуп јат. Кудай ӱй улустыҥ сезимдерин ле санааркаштарын ајаруга алып турган. Ол Рахиль ле Аннаныҥ мӱргӱӱлдерин угуп, олордыҥ сурагын бӱдӱрген (Баш. 30:22; 1 Сам. 1:10, 11, 19, 20). Керек дезе Иегова Агару Бичикте ӱй улустыҥ сӧзин уккан эр улустыҥ темдерин де бичидип салган. Темдектезе, Авраам Иегованыҥ јакыганыла, бойыныҥ ӱйиле, Саррала, јӧптӧшкӧн (Баш. 21:12—14). А Давид каан Авигеяныҥ сӧзин уккан, керек дезе ол Авигеяны Кудай ийген деп айткан (1 Сам. 25:32—35). Анайда ок Иисус Адазынаҥ тем алып, энезиниҥ, Марияныҥ, сӧстӧрин лаптап уккан (Иоанн 2:3—10). Айдарда, Иегова ӱй улусты тооп турганын, олорды угуп турганыла кӧргӱзет.

Иегова ӱй улуска бӱдӱп јат. Темдектезе, Иегова Адам ла Евага јерди кичеезин деп јакару берген (Баш. 1:28). Еваны дезе Адамга болушчы болзын деп јайаганыла, Адамды ла чылап баалап турганын кӧргӱскен. Иегова Хулданы ла Девораны судурчылар этире кӧстӧгӧн, олорло каан да, јаргычы да келип јӧптӧжип туратан (Јарг. 4:4—9; 2 Каан. 22:14—20). Иегова бӱгӱнги де кӱнде ӱй улуска јакылталар берет. Бистиҥ эје-сыйындарыс пионерлер, миссионерлер болуп иштеп јадылар. Олордыҥ кезиги Бет-Элдиҥ комплекстериниҥ ле Каандыктыҥ Тураларыныҥ проекттерин эдет, олорды тудат ла јазайт. Кезиги Бет-Элде эмезе УПО-до иштегилейт. Анайып, эје-сыйындар јаан черӱ чилеп, Иегованыҥ јакылталарын теҥ-тай бӱдӱредилер (Сар. 68:11). Айдарда, Иегова олорды уйан ла неме эдип болбос деп кӧрбӧй јат.

ӰЙ УЛУСКА ИЕГОВА ЧЫЛАП БАШТАНАРГА АКА-КАРЫНДАШТАРГА НЕ БОЛУЖАР?

Ака-карындаштар, бис ӱй улуска чын ла канайып баштанып турганысты билип аларга нени эдерис? Биске бойысты тӧгӱндебей, санааларысты ла керектеристи јазап шиҥдеп кӧрӧр керек. Нениҥ учун дезе бистиҥ ичисте ӱй улуска јастыра кӧрӱм тереҥ шиҥип калганын бойыс билбей де турган болорыс. Оныҥ учун мыны эдерге биске болуш керек. Канайып рентген јӱректиҥ ооруларын кӧрӱп ийерге болужып јат, анайып ла јакшы најы ла Кудайдыҥ Сӧзи ӱй улуска јастыра кӧрӱмисти кӧрӱп ийерге болужар. Је мындый болушты аларга нени эдер керек?

Најыгардаҥ јӧп сурагар (Укаа 18:17). Слерде јалакай ла ойгор најыгар бар болзо, оноҥ мынайда сурагар: «Мен эје-сыйындарга канай баштанадым? Эје-сыйындар мениҥ олорды тооп турганымды кӧрӧт пӧ? Айса меге та нени де солыыр керек пе?» Најыгар слерге та нени де солыыр керек деп айткан болзо, актанбай, карын солынарга албаданыгар.

Кудайдыҥ Сӧзин шиҥдегер. Агару Бичик — ӱй улуска кандый кӧрӱмдӱ болгонысты билерге болужатан эҥ јакшы јепсел (Евр. 4:12). Ондо башка-башка эр улус керегинде бичилип калган. Олордыҥ кезиги ӱй улуска јакшы баштанган, кезиги јаман баштанган. Агару Бичикти шиҥдеп тура, олордыҥ керектерин, бойоордыҥ керектереерле шиҥдеерге јараар. Анайда ок бӱдӱн Агару Бичикте не айдылып турганын ајаруга алар керек. Оныҥ учун бис ӱлгерлердиҥ контекстин база кӧрӱп турарыс. Ол тушта бисте ӱй улус керегинде јастыра кӧрӱм болбос. Темдектезе, 1 Пётр 3:7-де ӱй кижи «бортык айак» b деп айдылып калган. Бу сӧстӧр ӱй кижи эр кижиге кӧрӧ сагышту эмес, уйан деп кӧргӱзет пе? Јок эмей! Пётрдагы сӧстӧрди Галаттарга  3:26—29-та айдылганыла тӱҥдештирип кӧрӱгер. Ондо Иегова Иисусла кожо башкарзын деп, эр де, ӱй де улусты талдап јат деп айдылат. Айдарда, бис јакшы најыбыстаҥ јӧп сурап, Агару Бичикти шиҥдеп турзаас, ӱй улусты тооп турарга ӱренип аларыс.

АКСАГАЛДАР ЭЈЕ-СЫЙЫНДАРГА ТООМЈЫЗЫН КАНАЙЫП КӦРГӰЗЕТ?

Јуунда акалар сӱӱштӱ аксагалдардыҥ канайып эје-сыйындарга баштанып турганын кӧрӱп, олордоҥ ӱренип јат. Аксагалдар эје-сыйындарды тооп турганын канайып кӧргӱзет? Је эмди кезик эп-аргалар кӧрӱп ийектер.

Олор эје-сыйындарды мактап јат. Бу јанынаҥ аксагалдарга јакшы темди апостол Павел кӧргӱскен. Ол Римдегилерге бичиген самаразында кезик эје-сыйындарды мактап јат (Рим. 16:12). Јуунныҥ алдында бу самара кычырыларда, ол эјелер сӱреен тыҥ сӱӱнген болор! Анайып ла бӱгӱнги кӱнде аксагалдар эје-сыйындарды јаантайын мактап јат. Олор эје-сыйындардыҥ јакшы кылык-јаҥдарын кӧрӱп, Иеговага иштеп турганы учун мактайт. Анайып эје-сыйындар аксагалдардыҥ олорды тооп ло баалап турганын сезет. Кезикте эје-сыйындарга Иеговага оноҥ ло ары иштеерге, аксагалдардыҥ јылу сӧстӧри керектӱ болот (Укаа 15:23).

Аксагалдар эје-сыйындарды акту кӱӱнинеҥ мактап турза, олорды кандый бир немени эткени учун мактаарга албаданадылар. Нениҥ учун? Дже́ссика эје мынайда куучындайт: «Качан сени ака: „Молодец!“ — деп мактап ийзе, сеге сӱреен јарап јат. Је олор кижини кандый бир немени эткени учун мактаган болзо, оноҥ јакшы болор эди. Темдектезе, эјени јуунда балдарын табыш јок отурзын деп ӱредип турганы учун, ол эмезе Агару Бичикти ӱренип турган кижини машиназыла јуунга экелгени учун». Айдарда, акалар  эје-сыйындарды нени-нени эткени учун мактап турза, олор бойлорын јуунда керектӱ ле олорды баалап турган деп сезер.

Олор эје-сыйындарды угуп јат. Јобош аксагалдар јӱк ле бойыныҥ кӧрӱм-санаазын эмес, је эје-сыйындарды да кӧрӱм-санаазын айдып турзын деп кӱӱнзедет. Оноҥ олорды лаптап угат. Анайып аксагалдар эје-сыйындардыҥ кӱӱнин кӧдӱрет ле бойлоры да та неге де ӱренип алат. Бет-Элде иштеп турган Гера́рдо деп аксагал мындый немени ајаруга алган: «Мен эје-сыйындарла јӧптӧжип турзам, јакылталарымды јакшы бӱдӱредим. Кезикте олордыҥ ченемели акаларга кӧрӧ јаан болот». Кӧп эје-сыйындар пионерлер болуп иштейт. Анайып олор јербойыныҥ улузын јакшы билип јат. Бра́йан деп аксагал мындый неме айткан: «Бистиҥ эје-сыйындарыста Иегованыҥ организациязына керектӱ јакшы кылык-јаҥдар бар, анайда ок олор кӧп немени эдип билер. Оныҥ учун эје-сыйындарды угуп туругар!»

Ойгор аксагалдар эје-сыйындардыҥ кӧрӱм-шӱӱлтезин ајаруга алат. Нениҥ учун? Аксагал болуп турган Э́двард деп ака мынайда айдат: «Эјениҥ кӧрӱм-шӱӱлтези акага айалганы ӱзе јанынаҥ кӧрӧргӧ лӧ улустыҥ сезимдерин ајаруга аларга болужат» (Укаа 1:5). Је ака эјениҥ айтканын тузаланбаза да, оны кӧрӱм-шӱӱлтезин айтканы учун мактап салар.

Олор эје-сыйындарды ӱредет. Ойгор аксагалдар эје-сыйындарды ӱредип салат. Темдектезе, олор јарлаар иштиҥ туштажузын канайып ӧткӱретенин эје-сыйындарга јартап бередилер. Ол тушта андый туштажуда ака јок болзо, ӱредилген эје-сыйындар нени эдерин билер болот. Ол эмезе бистиҥ организацияныҥ тураларын тударга ла јазаарга керектӱ не немени ле техниканы тузаланарга ӱредип салат. А Бет-Элде аксагалдар эје-сыйындарды оноҥ до ӧскӧ ишке ӱредет: техобслуживаниеге, снабжениеге, бухгалтерияга, программированиеге. Акалар эје-сыйындарды мынайып ӱреткениле олорды эш кереги јок улус эмес, је иштеҥкей ле бӱдӱмјилӱ улус деп кӧргӱзедилер.

Кӧп эје-сыйындар ӱренип алганын улуска болужарга тузаланып јат. Темдектезе, ар-бӱткенниҥ тӱбеги болгон кийнинеҥ тураларды јазаарга ӱренип алган. Ол эмезе кезик эје-сыйындар кӧп улусту јерлерде јарлаарга ӱредӱ алган. Эмди олор ака-эјелерге база анайда ла јарлаарга болужадылар. Бу эје-сыйындар олорго болушкан акалар керегинде нени айдат? Дже́ннифер деп эје мынайда айткан: «Каандыктыҥ Туразын тудуп турарыста мени бир ака ӱреткен. Ол ӧйин бир де кысканбайтан, эткен ижимди ајаруга алып, јаантайын мактап туратан. Меге оныла кожо иштеерге јеҥил болгон. Анайып бойымды керектӱ кижи деп ле акалар меге бӱдӱп турган деп сезип туратам».

ӰЙ УЛУСКА НЕНИҤ УЧУН ИЕГОВА ЧЫЛАП БАШТАНАР КЕРЕК?

Бис эје-сыйындарысты акту јӱрегистеҥ сӱӱп јадыс. Бис олорго Иегова чылап баштанарга кӱӱнзейдис (1 Тим. 5:1, 2). Биске кару эје-сыйындарысла Иеговага кожо иштеерге сӱреен тыҥ јарап јат. Бис олорло бир биле болодыс. А качан олор бистиҥ сӱӱжисти ле болужысты кӧрӱп, сӱӱнип турза, бис те сӱӱнип јадыс. Ване́сса эје айдат: «Мен Иеговага, оныҥ организациязына кирер арга бергенине, сӱреен быйанду болодым! Оныҥ албатызында сеге јакшы сӧстӧр айдып беретен акалар коркышту кӧп». А Тайваньда јадып турган эје айдат: «Иегованыҥ ла оныҥ организациязыныҥ ӱй улуска тоомјылу баштанып турганы ла олордыҥ сезимдерин ајаруга алып турганы меге јарап јат. Мынайып мениҥ бӱдӱмјим тыҥыйт ла Кудайдыҥ албатызыныҥ ортозында болгонымла оморкоп јадым».

Ака-карындаштар, слер ӱй улуска Иегова ла чылап баштанарга албаданадаар. Иегова мыны кӧрӱп, слерле тыҥ оморкоп јат (Укаа 27:11). Шотландияда јадып турган Бе́нджамин деп аксагал мынайда айткан: «Бӱгӱнги кӱнде кӧп эр улус ӱй улусты тообой јат. Је бис Каандыктыҥ Туразына келген ӱй улус бистиҥ тоомјыбысты кӧрзин деп кӱӱнзейдис». Оныҥ учун эје-сыйындарысты Иегова ла чылап сӱӱп ле тооп јӱректер (Рим. 12:10).