1. Бис Иегованы канайып сӱӱндирер аргалу?

 СЛЕР јуук најыгарга јараш, тузалу сый сыйлаганаар деп сананып ийзеер де. Је ол, сыйды шкафка сугала, ундып салган. Најыгардыҥ мынайып эткенинеҥ улам слерге јаман болор. Је најыгар слердиҥ сыйлаган сыйыгарды тузаланып турган болзо, слер сӱӱнип јадыгар. Бу тем нени кӧргӱзет? Иегова база биске сый сыйлаган — ол бис учун Уулын берген. Бис оныҥ сыйын ла сӱӱжин баалап турзаас, ол сӱӱнип јат! (Иоанн 3:16; Рим. 5:7, 8).

 2. Бу јӧрмӧлдӧ бис нени шӱӱжерис?

² Бир канча ӧйдӧҥ бис толынтыны баалу сый деп кӧрбӧй барардаҥ айабазыс. Бу Кудайдыҥ баалу сыйын шкафка јажырып салганына тӱҥей: озо баштап бис бу сыйга сӱӱнип јадыс, је оноҥ бу керегинде база сананбай барадыс. Бу сыйды оноҥ ло ары баалап јӱрерге нени эдер керек? Биске Кудай ла Иисус нени эткенин јаантайын ла эске алынып турар керек. Мыны эдерге биске бу јӧрмӧл болужар. Бисте толынтынаҥ улам эмди ле кандый алкыштар бар деп ле келер ӧйдӧ кандый алкыштар болорын шӱӱжерис. Анайда ок Иегованыҥ сӱӱжи учун, анчада ла Кайраканныҥ Эҥириниҥ ӧйинде, быйанысты канайып кӧргӱзеристи база шӱӱжип ийерис.

БИСТЕ ЭМДИ ЛЕ КАНДЫЙ АЛКЫШТАР БАР?

 3. Толынты бӱгӱнги кӱнде кандый туза берет?

³ Толынты бӱгӱнги де кӱнде тузазын јетирет. Темдектезе, толынты тайылганаҥ улам Иегова бистиҥ кинчектеристи таштап јат. Кудай мыны этпес те эди, је ол кинчектеристи таштаарга тыҥ кӱӱнзеп јат. Сарнаачы быйанду болгонын кӧргӱзерге, мынайып кожоҥдогон: «Иегова,  сен јалакай ла јаманды таштаарга белен» (Сар. 86:5; 103:3, 10—13).

 4. Иегова толынтыны кем учун берген? (Лука 5:32; 1 Тимофейге 1:15, ЈТ).

⁴ Кезик улус Иегова олордыҥ кинчегин таштабас деп сананат. Је чынынча болзо, бир де кижиниҥ кинчеги ташталар јаҥы јок. Апостол Павел бойын «апостол деп адаларга турбазым» деп оҥдогон болгон. Андый да болзо, ол айткан: «Је Кудайдыҥ јакшылыгыла мен эмди кем, ол болорым» (1 Кор. 15:9, 10). Качан бис кинчегисти оҥдоп, алынып турзаас, Иегова бистиҥ јаманысты таштап јат. Нениҥ учун? Нениҥ учун дезе Иегова бистиҥ кинчектеристи кандый да јакшы керектерис учун эмес, је бисти сӱӱп турган учун таштайт. Слер бойоорды эш-кереги јок кижи деп сананып турган болзогор, ундыбагар, Иегова толынтыны кинчек јок улус учун эмес, је кинчегин алынып турган улус учун эткен. (Лука 5:32; 1 Тимофейге 1:15, ЈТ кычырыгар.)

 5. Кем-кем Иегова оныҥ јаманын таштаар учурлу деп айдар аргалу ба? Јартап беригер.

⁵ «Мен Иеговага кӧп јылдардыҥ туркунына иштеп јадым, оныҥ учун ол мениҥ јаманымды таштаар учурлу» — деп бистиҥ кемибис те мынайып сананбас керек. Иегова бистиҥ ого эткенисти баалап турган эмей (Евр. 6:10). Је толынты ол бистиҥ эткенис учун тӧлӧгӧн баа эмес, а Кудайдыҥ кысканбай эткен сыйы. Оныҥ учун бис Иеговага кӧп јылдардыҥ туркунына иштейле, оныҥ јалакайын иштеп алганыс деп сананып турган болзоос, толынты биске керек јок ло Христостыҥ ӧлӱми калас болгон деп айдып тургандый болорыс. (Галаттарга 2:21 тӱҥдештиригер.)

 6. Нениҥ учун Павел Иеговага иштеерге кӧп ийде-кӱчин беретен болгон?

⁶ Павел кандый да керектер этсе, оныҥ кинчектери ташталбас деп билген. Айса, нениҥ учун ол јарлаар ишке бастыра ийде-кӱчин беретен болгон? Иегова оныҥ јаманын таштазын деп эмес, је быйанду болгонын кӧргӱзерге иштеген (Эф. 3:7). Анайып ла бис Кудайдаҥ јӱк ле та нени де аларга эмес, је Иегованыҥ јалакайы учун быйанысты кӧргӱзерге, акту јӱрегистеҥ ого иштейдис.

 7. Толынтынаҥ улам бисте эмди ле кандый арга бар? (Римдегилерге 5:1; Иаков 2:23).

⁷ Толынтынаҥ улам, бисте эмди ле Иеговала јуук, јылу колбулар болор аргалу a. Мынаҥ озо кӧргӧн јӧрмӧлдӧ айдылганыла болзо, кинчектеҥ улам бистиҥ кемибис те Кудайдыҥ најызы болуп чыкпай јат. Је толынты биске «Кудайла амыр јӱрӱп», ого јууктайтан арга берет. (Римдегилерге 5:1; Иаков 2:23 кычырыгар.)

 8. Биске нениҥ учун Иеговага мӱргӱйтен арганы баалаар керек?

⁸ Иегованыҥ најыларында бар бир арганы кӧрӱп ийектер. Ол — мӱргӱӱри. Иегова ишчилери кожо јуулыжып та алала мӱргӱгенин угат, темдектезе, јуунныҥ туштажуларында. Анайда ок бистиҥ кажыбыстыҥ ла таҥынаҥ да мӱргӱген мӱргӱӱлдеристи угат. Мӱргӱӱл биске санаабысты ла јӱрегисти токунадарга болужат. Је бис јӱк ле бого болуп мӱргӱп турган эмезис. Бис Иеговага јуук болорго кӱӱнзейдис, оныҥ учун оныла куучындажып јадыс (Сар. 65:2; Иак. 4:8; 1 Иоанн 5:14). Иисус јерде јӱрерде јаантайын ла мӱргӱп туратан. Иегова оныҥ мӱргӱӱлдерин угуп турган ла мӱргӱӱл олордыҥ најылыгын тыҥыдып турган деп  ол билген (Лука 5:16). Христостыҥ тайылгазынаҥ улам бис те Јер-телекейдиҥ Јайаачызыныҥ најызы болуп, оныла куучындажар аргалу болодыс. Бис бу арганы сӱреен тыҥ баалап јадыс!

КЕЛЕР ӦЙДӦ КАНДЫЙ АЛКЫШТАР АЛАРЫС

 9. Иегова келер ӧйдӧ бойыныҥ чындык ишчилерине нени белетеп салган?

⁹ Кудай бойыныҥ чындык ишчилерине келер ӧйдӧ нени белетеп салган? Олор ӱргӱлји јӱрӱм алар. Кӧп саба улус ӱргӱлји јӱрӱм јӱрер арга јок деп сананат, нениҥ учун дезе кижиликтиҥ тӱӱкизинде улус јаантайын божогон. Је Кудайдыҥ амадузыла болзо, улус јажын-чакка јӱрер учурлу болгон. Адам кинчек этпеген болзо, улус ӱргӱлјиге јӱрер эди. Ол тушта андый јӱрӱмге кем де кайкабас эди. Эмдиги ӧйдӧ ӱргӱлји јӱрӱм болор деп бӱдерге кӱч те болзо, Иегова оны эдерге коркышту јаан баа тӧлӧгӧн: ол бойыныҥ сӱӱген Уулын бис учун берген (Рим. 8:32).

10. Майлаткан христиандарды ла ӧскӧ койлорды келер ӧйдӧ не сакыйт?

¹⁰ Ӱргӱлји јӱрӱм келер ӧйдӧ дӧ болотон болзо, Иегова бисти ого бӱгӱннеҥ ле ала белетензин деп кӱӱнзейт. Майлаткан христиандарды теҥериде сӱреен јилбилӱ јӱрӱм сакып јат, олор Христосло кожо башкарар (Ачыл. 20:6). А ӧскӧ койлор кыйын-шыра, оору-јобол јок, сӱреен јакшы, јараш јерде јадар (Ачыл. 21:3, 4). Слер ӧскӧ койлордыҥ тоозына кирип турган болзоор, слердиҥ сыйыгар майлаткандардыҥ сыйына кӧрӧ, уйан деп сананбагар. Иегова кижини јерде јӱрзин деп јайаган! Оныҥ учун јердеги јӱрӱм биске сӱреен кӧп сӱӱнчи экелер.

11, 12. Јаҥы јӱрӱмнеҥ слер нени сакыйдаар? (Јурукты база кӧрӱгер.)

¹¹ Райдагы јӱрӱм кандый болорын сананып ийзеер де! Слер оорыыраар эмезе божоп калараар деп, база бир де коркыбазыгар (Иса. 25:8; 33:24). Иегова слердиҥ ончо кӱӱнигерди бӱдӱрип салар. Слер нени эдерге кӱӱнзейдеер? Кажы ла  тындуны шиҥдеерге бе? Јуранарга ба эмезе кандый бир кӱӱлик ойноткышка ойноорго ӱренип аларга ба? Эмезе физиканы, химияны, математиканы тереҥжиде билип аларга турганаар ба? Райда архитекторлор, тура тудаачылар ла маала-ажын отургызатан улус керек болор. Анайда ок курсак белетеер керек болор, инструменттер эдип, садтар отургызып кичеейтен улус керек болор (Иса. 35:1; 65:21). Ӱргӱлјиге јӱрӱп, слер нени ле эдер, неге ле ӱренип алар аргалу болороор.

¹² Тирилген улусты уткыганы биске сӱреен кӧп сӱӱнчи экелер! (Ап. ижи 24:15). Тоозы јок јайаандарды шиҥдеп, Иегова керегинде оноҥ кӧпти билип алары кандый јакшы болор (Сар. 104:24; Иса. 11:9). Бис ӱзе немени чын эдип турганыс ла кинчегимди ташта деп сураары база керек јок деп билгенинеҥ артык не де јок! Слер бу алкыштарды кинчекле кыска ӧйдиҥ туркунына јакшызынарына толыырыгар ба? (Евр. 11:25). Јок эмей! Райдагы сӱреен јакшы јӱрӱм бу телекейдеҥ эмди ле та нени де аларынаҥ канча катапка јакшы. Анайда ок ундыбагар: бистиҥ келер ӧйгӧ ижемји удабас ла бистиҥ кажы ла кӱн јӱрӱп турган јӱрӱмис болуп калар. Иегова эмес болзо, бу ончо алкыштардыҥ болор аргазы јок. Бис учун Уулын берерге, Кудайды сӱреен јаан сӱӱжи кӱӱнзеткен!

ИЕГОВАНЫҤ СӰӰЖИН БААЛАП ТУРГАНЫСТЫ КАНАЙЫП КӦРГӰЗЕР?

13. Иеговага оныҥ сӱӱжи учун быйанысты канайып кӧргӱзерис? (2 Коринфтегилерге 6:1).

¹³ Толынты учун Иеговага быйанысты канайып кӧргӱзерис? Бистиҥ јӱрӱмисте Иеговага иштеери јаантайын баштапкы јерде болор учурлу (Матф. 6:33). Не дезе Иисус «јӱрген улус бойлорына болуп јӱрбезин, олор учун ӧлӧлӧ тирилгенге болуп јӱрзин деп» божогон (2 Кор. 5:15). Бис Иегованыҥ улу сӱӱжин ле јалакайын качан да ундыбаска кӱӱнзейдис. (2 Коринфтегилерге 6:1 кычырыгар.)

14. Иеговага бӱдӱп турганысты ла ого сӧсуккур болгонысты канайып кӧргӱзерис?

¹⁴ Иеговага бӱдӱп, ого сӧсуккур болзоос, оныҥ сӱӱжин баалап турганыс деп кӧргӱзедис. Мыны канайып эдер? Темдектезе, кандый ӱредӱ алар эмезе кандый ишке иштерин талдап турзаас, Иеговала јӧптӧжип турар керек (1 Кор. 10:31; 2 Кор. 5:7). Кудайдыҥ айтканыла эдип турзаас, бис ого бӱдӱп турганыс деп, керектерисле кӧргӱзип јадыс. Мынаҥ улам Иеговала колбуларыс та, ижемјибис те тыҥыйт (Рим. 5:3—5; Иак. 2:21, 22).

15. Иеговага толынты учун быйанысты Кайраканныҥ Эҥиринеҥ озо, болуп јаткан ӧйинде ле кийнинде канайып кӧргӱзерис?

¹⁵ Толынты учун Иеговага быйанысты база канайып кӧргӱзерис? Кайраканныҥ Эҥиринеҥ озо до, болотон ӧйинде де, кийнинде де эдип турган керектерисле.  Бис бойыс та бу туштажуга барарыс, ӧскӧ дӧ улуска бу керегинде куучындаарыс (1 Тим. 2:4). Кычырып јаткан улузаарга Кайраканныҥ Эҥири канайып ӧдӧрин јартап беригер. Темдектезе, бу туштажу керегинде jw.org сайттаҥ «Иисус нениҥ учун божогон?» ло «Иисус Христостыҥ ӧлӱмин эске алары» деген видеолорды кӧргӱзигер. Аксагалдар јуунныҥ туштажуларына јӱрбей барган ака-эјелерди кычырарга албаданар. Сананып ийзеер де, Иегованыҥ јылыйып калган койлоры кайра јуунга јанып келзе, теҥериде ле јерде кандый јаан сӱӱнчи болорын! (Лука 15:4—7). Кайраканныҥ Эҥирине келзеес, јӱк ле бой-бойыбысты эмес, је баштапкы катап келген эмезе узак болбогон улусты уткып турактар. Бис олордыҥ келгенине сӱӱнип турганысты олор сезип турзын деп кӱӱнзейдис (Рим. 12:13).

16. Кайраканныҥ Эҥириниҥ ӧйинде Иеговага кӧптӧдӧ иштейтен арганы нениҥ учун сананар керек?

¹⁶ Кайраканныҥ Эҥириниҥ ӧйинде слер јарлаар иште кӧптӧдӧ туружып болороор бо? Анайып этсегер, слер Иеговага ла оныҥ Уулына олордыҥ слерге эткени учун быйаныгарды кӧргӱзереер. Јарлаар иште канча ла кире кӧп турушсаар, ончо ло кире Иегованыҥ болужын сезип, ого оноҥ тыҥ иженеригер (1 Кор. 3:9). Анайда ок Кайраканныҥ Эҥириниҥ ӧйинде кычыратан ӱлгерлерди кычырып турыгар. Олорды «Агару Бичиктиҥ бӱгӱнги ӱлгери» деп брошюранаҥ эмезе «Јӱрӱмис ле ижибис» деп иштиҥ тетрадинеҥ табып аларга јараар. Таҥынаҥ ӱренген тушта, слер кандый да ӱлгерлерди тереҥжиде шиҥдеерге кӱӱнзеер болороор.

17. Иегованы не сӱӱндирет? ( «Сен Иегованыҥ сӱӱжи учун быйаныҥды канайып кӧргӱзер аргалу?» деген рамканы база кӧрӱгер.)

¹⁷ Слер айалгалараардаҥ улам бу јӧрмӧлдӧ берилген ончо јӧптӧрди тузаланып болбос болороор. Је ундыбагар, Иегова слердиҥ эдип турган керектереерди, ӧскӧ улустыҥ эдип турганыла тӱҥдештирбей јат. Слер оны сӱӱп турганаар деп ол билер. Анайда ок оныҥ баалу сыйы, толынты учун, быйанду болгоноорды ол кӧрӱп, сӱӱнип јат (1 Сам. 16:7; Марк 12:41—44).

18. Нениҥ учун бис Иегова ла Иисуска быйанду болодыс?

¹⁸ Толынты эдилбеген болзо, бистиҥ кинчектерис ташталбас эди, Иеговала јуук колбулар ла јажын-чакка јӱретен ижемји болбос эди. Оныҥ учун Иеговага бу сӱреен јакшы сыйлары ла сӱӱжи учун быйанду болгоныс јӱрӱмистеҥ кӧрӱнип турзын (1 Иоанн 4:19). Бисти сӱреен тыҥ сӱӱп, бис учун јӱрӱмин берген Иисуска быйанысты керектерисле кӧргӱзип турактар! (Иоанн 15:13).