1. Бӱгӱнги кӱнде кӧп улустыҥ санаазы неде?

 БӰГӰНГИ кӱнде улус јӱк ле бойын сананып турган деп, слер јӧпсинер болбойоор. Олор бойын ла бойыныҥ једимдерин макка чыгарарга, кӧп ӧйин ле ийде-кӱчин берет. Је Иегова Кудайды мактап турган улус ас. Бу јӧрмӧлдӧ Иегованы мактаары ол не дегени, оны мактаарга бисти не кӱӱнзедер учурлу, бис оны канайып мактаар аргалу деп кӧрӧрис. Анайда ок Иегова удабас ла бойыныҥ адын канайып макка чыгарарын билип аларыс.

ИЕГОВАНЫ МАКТААРЫ ОЛ НЕ ДЕГЕНИ?

 2. Иегова бойыныҥ магын Синай кырда канайып кӧргӱскен? ( јурукты база кӧрӱгер.)

² Мак дегени ол не? Агару Бичикте «мак» деген сӧс та кемди де улу ла аҥылу эдип кӧргӱзерге тузаланылат. Иегова израильтяндарды Египеттеҥ чыгарар тушта бойыныҥ магын кайкамчылу эдип кӧргӱскен. Сананып ийзеер де, канча миллион улус Кудайла туштажарга, Синай кырдыҥ эдегине јуулышканын. Кырды койу кара булут бӱркеп ийген. Кенетийин јер силкинип, вулкан адылып чыккан болор. Айландыра јалкын јалкындап, кӱкӱрт кӱркӱреп, амыргыныҥ коркышту тыҥ табыжы угулган (Чыг. 19:16—18; 24:17; Сар. 68:8). Сананып ийзеер де, Иегова бойыныҥ магын кайкамчылу ла коркымчылу эдип кӧргӱскенинеҥ улам израильтяндар бастыра бойлоры јимирей берген болор.

 3. Иегованы мактаары нени темдектейт?

³ А бис керегинде нени айдарга јараар? Бис Иегованы мактаар аргалу ба? Эйе. Оны канайып эдер? Темдектезе, оныҥ кайкамчылу керектери ле сӱреен јараш кылык-јаҥдары керегинде куучындап турзаас. Анайда ок бисте бар ончо немени Иегова берген деп оҥдоп турзаас, Иегованы мактайдыс (Иса. 26:12). Бис Давид кааннаҥ тем алар аргалу, нениҥ учун дезе ол јаантайын Иегованы мактап јӱретен.  Бир катап ол кӧп улус алдына мӱргӱп, мындый сӧстӧр айткан: «Иегова, улу-магы, ийде-кӱчи, кеени, јаражы ла јарамыгы Сенде болот. Нениҥ учун дезе теҥеридези де, јердези де Сенийи болот». Мӱргӱӱлдиҥ кийнинде «ончозы Иеговага мак јетирди» (1 Лет. 29:11, 20).

 4. Иисус Иегованы канайып мактаган?

⁴ Иисус јерде јадып турарда, бойыныҥ Адазын мактаган. Канайып? Ол кажы ла эткен кайкалын Кудайдыҥ ийде-кӱчиле эткен деп айдатан (Марк 5:18—20). Анайда ок улуска Иегованы сӱреен јакшы Ада деп кӧргӱзер болгон. Бого коштой Иисус улуска јалакай баштанганыла Адазын мактап туратан. Бир катап Иисус синагогада 18 јыл ооруп турган ӱй кижини кӧрӱп ийген. Ол ӱй кижиге кӧрмӧс кирип калган болгон. Оноҥ улам ол тыҥ корчойып, арка-сыны тӱзебейтен. Кандый јаман оору-јобол, дезеер! Је Иисус бу ӱй кижини килеп, ого: «Ӱй кижи, оору-јоболдоҥ айрылып јадыҥ» — деп айткан. Оноҥ ого колын салып ийерде, байа ӱй кижи ол ло тушта тӱзей береле, «Кудайды алкай берди». Иегова Кудай оны јазып, бойын јабыс кӧрбӧскӧ болужарда, ол ӱй кижи Иеговага јаан быйанду болгон (Лука 13:10—13). Оныҥ учун ол Иегованы мактаган. Бисте де Иегованы мактайтан шылтактар коркышту кӧп.

ИЕГОВАНЫ МАКТААРГА БИСТИ НЕ КӰӰНЗЕДЕТ?

 5. Бис Иегованы нениҥ учун тооп турганыс?

⁵ Бис Иегованы тооп турганыстаҥ улам мактап јадыс. Бисте Иегованы тооп туратан шылтактар коркышту кӧп. Иегова Кӱчтӱдеҥ Кӱчтӱ Кудай (Сар. 96:4—7). Оныҥ ийде-кӱчиниҥ учы кыйузы јок. Иегова сӱреен ойгор. Оныҥ јайаган јайаандарында кайкамчылу ойгоры кӧрӱнет. Иегова биске јӱрӱм сыйлаган ла јӱрӱмге керектӱ ончо немени берет (Ачыл. 4:11). Кудай чындык улузын качан да артыргыспай јат (Ачыл. 15:4). Иегова нени ле этсе ӱзе јакшы ла јараш эдип салат. Анайда ок ол берген сӧзине турат (Иис. Н. 23:14). Оныҥ учун судурчы Иеремия Иегова керегинде мындый сӧстӧр айткан: «Бастыра албатылардыҥ ла каандыктардыҥ эҥ ле ойгор деп айткан кижизи сениҥ ойгорыҥа јетпес» (Иер. 10:6, 7). Кудайды тооп туратан шылтактардыҥ јӱк ле кезигин кӧрдис. Је бис Иегованы јаҥыс ла тооп турган эмезис, је оны тыҥ сӱӱп јадыс.

 6. Бис Иегованы нениҥ учун сӱӱйдис?

⁶ Бис Иегованы тыҥ сӱӱп турганыстаҥ улам мактайдыс. Кудайда сӱреен кӧп јакшы кылык-јаҥдар бар. Ол килеҥкей ле јалакай (Сар. 103:13; Иса. 49:15). Качан биске ачу болзо, ого до ачу болот (Зах. 2:8). Ол биске оныҥ најылары болорго болужат (Сар. 25:14; Ап. ижи 17:27). Анайда ок ол јобош Кудай. «Ол јер ле ле теҥерини кӧрӧргӧ, эҥчейип јат. Јокту-јойуны... тобрактаҥ... кӧдӱрет» (Сар. 113:6, 7). Мындый Кудайды не мактабас! (Сар. 86:12).

 7. Бис улуска нениҥ учун Иегова керегинде куучындаарга кӱӱнзейдис?

⁷ Бис Иегованы улус ол керегинде чынды билип алзын деп кӱӱнзеп турганыстаҥ улам мактайдыс. Кӧп улус Кудай керегинде чынды билбес. Нениҥ учун дезе Сатана ол керегинде коркышту јаман тӧгӱн таркадып, улустыҥ сагыжын сокортып салган (2 Кор. 4:4). Сатана улусты Кудай кижини кажы ла эткен кереги учун кату каруузына тургузат ол эмезе улус Кудайга керек те јок деп тӧгӱндейт. Анайда ок улустыҥ кӧп саба кыйын-шыразында Кудай бурулу деп айдат. Је бис теҥеридеги Адабыс керегинде чынды билерис! Мыны улуска куучындаарга кӱӱнзейдис. Анайып, Адабысты мактап јадыс  (Иса. 43:10). Ончо макты Иегова алар јаҥду. Оныҥ учун 96-чы Сарынды шӱӱжип, бис Иегованы канайып мактаар аргалу деп кӧрӱп ийерис.

БИС ИЕГОВАНЫ КАНАЙЫП МАКТААР АРГАЛУ?

 8. Бис куучынысла Иегованы канайып мактаар аргалу? (Сарын 96:1—3).

⁸ Сарын 96:1—3 кычырыгар. Бис Иегова керегинде улуска куучындаганысла оны мактайдыс. 96-чы Сарынныҥ баштапкы ӱлгерлери бисти «Иеговага кожоҥдогор», «оныҥ адын мактагар», «ол албатызын канайып аргадап турганы керегинде сӱӱнчилӱ јарды... јарлагар», «албатылар ортодо оныҥ магын куучындагар» деп кӱӱнзедет. Бу ончо неме теҥериде Адабысты мактайтан башка-башка аргалар. Чындык израильтяндар ла баштапкы чактыҥ христиандары улуска бойыныҥ сӱреен јакшы Кудайы керегинде ле ол олорго нени эткени керегинде куучындаарга уйалбаган (Дан. 3:16—18; Ап. ижи 4:29). Бис олордоҥ кандый тем аларыс?

9, 10. Анджелинаныҥ учуралынаҥ бис неге ӱренедис? (Јурукты база кӧрӱгер.)

⁹ США-да јадып турган Анджели́наныҥ a учуралын кӧрӱп ийектер. Ол Иегованыҥ адын јалтанбай корулаган. Ол бир компанияга ишке кирерде, ондо ишчилер бой-бойыла таныжып алзын деп, туштажу ӧткӱрилген. Кажы ла кижи бойы керегинде бир кичинек куучындап берер керек болгон. Анджелина Иегованыҥ Керечизи болуп турганынаҥ улам јаан сӱӱнчи алып турганын кӧргӱзерге, фотографияларлу презентация белетеп алган. Је Анджелинанаҥ озо бир эр кижи бойы керегинде куучындаган болгон. Кӧрӧр болзо, ол Иегованыҥ Керечилериниҥ билезинде чыдаган болтыр. Је ол Иегованыҥ улузын јаман айдып, ӧчӧп баштаган. Оноҥ Анджелина мынайып айдат: «Мениҥ јӱрегим тыҥ типилдей берген. Мен мынайып санандым: „Ол Иегова керегинде тӧп-тӧгӱн неме куучындап јат. Мениҥ унчукпай отурар аргам јок. Иегова керегинде чынды ончозы билер учурлу“».

¹⁰ Анджелинаныҥ бойы керегинде куучындаар ӧйи јууктап келерде, ол бойына кыскарта мӱргӱп ийген. Туруп келеле, байагы эр кижиге баштанып, мынайда айткан: «Бис экӱде тӱҥей неме кӧп эмтир. Мен база Иегованыҥ Керечилериниҥ билезинде чыдагам. Эмди мен бойым да Керечи».  Анджелинаныҥ сӧстӧриниҥ кийнинеҥ бастыра улус ыҥ-шыҥ отура берди. Је Анджелина ӧкпӧрбӧй, презентациязын кӧргӱзип баштады. Анайып, ол бойыныҥ бӱдӱмјизин улуска јазаптыра јартап берген (1 Пётр 3:15). Оноҥ ары не болгон? Ол бойы керегинде куучындап божой берерде, байагы эр кижиниҥ кӧрӱм-санаазы эмеш солына берген. Керек дезе ол эр кижи кичинек болуп турарда, Иегованыҥ Керечилериле кожо болгон јакшы учуралдарын куучындаган. Анджелина айдат: «Иегованыҥ адын мактаар керек. Бастыра улус ол керегинде чынды билер учурлу. Бистерге Иегованыҥ адын мактаары јаан кӱндӱ болот». Бис те Иегованыҥ адын улус оны јамандап та турган болзо, мактаар ла алкаар аргалу.

11. Иегованыҥ ишчилери канча јылдардыҥ туркунына Сарын 96:8-теги принципле канайып јӱрет?

¹¹ Сарын 96:8 кычырыгар. Бис Иегованы акту јӱрегистеҥ берген сыйларысла мактайдыс. Јебрен ӧйлӧрдӧҥ бери Кудайдыҥ ишчилери Иегованы баалу немелериле мактаган (Укаа 3:9). Темдектезе, израильтяндар ӧргӧӧни тударга ла јазаарга, сый эдип акча бергилеген (2 Каан. 12:4, 5; 1 Лет. 29:3—9). А Христостыҥ кезик ӱренчиктери Иисуска ла апостолдорго болужарга, «бары-јогыла» ӱлешкен (Лука 8:1—3). Анайда ок баштапкы чактыҥ христиандары болуш керексинип турган ака-эјелерге база јӧмӧшкӧн (Ап. ижи 11:27—29). Бӱгӱнги де кӱнде бис бойыстыҥ кӱӱнисле сый эдип акча бергенисле Иегованы мактайдыс.

12. Бистиҥ сый эдип берген акчабыс Иегованы канайып мактайт? (Јурукты база кӧрӱгер.)

¹² Бистиҥ сый эдип акча бергенис Иегованы мактап турган деп кӧргӱзип турган бир учурал кӧрӱп ийектер. 2020 јылда Зимбабведе коркышту узак кӱйгек кӱндер турган. Оноҥ улам канча миллион улус торолоп ӧлӧрдиҥ бери јанында болгон. Андый улустыҥ тоозында бистиҥ При́ска эје болгон. Андый да болзо, бистиҥ эје кажы ла среда ла пятницада, керек дезе јер де сӱрер кӱндерде, јарлаар ишке чыгар болгон. Айылдаштары ого каткырыжып мынайып айдатан: «Кыра ижине барып иштенер керек, а сен јарлап базып јӱргеҥ. Кӧр лӧ тур, бастыра билеҥ торолоп, ӧлӱп калар». А Приска олорго мындый каруу берер болгон: «Иегова бойыныҥ ишчилерин качан да артыргыспай турган». Оноҥ чын ла бир эмеш ӧйдӧҥ ака-эјелер Прискага курсак-тамак  экелгилеп берген. Мындый болушты бистиҥ организация сый этире берилип турган акчаныҥ болужыла эдет. Присканыҥ айылдаштары мындый болушты кӧрӧлӧ, кайкажып айдышкан: «Сени Кудайыҥ чын ла артыргыспаган эмтир. Бис ол керегинде кӧптӧдӧ билерге турганыс». Кийнинде, Присканыҥ јети айылдажы јуунныҥ туштажуларына јӱрӱп баштаган.

13. Бис Иегованы кылык-јаҥысла канайып мактайдыс? (Сарын 96:9).

¹³ Сарын 96:9 кычырыгар. Бис Иегованы бойыстыҥ кылык-јаҥысла мактайдыс. Ӧргӧӧдӧ иштеген абыстар бойлорыныҥ молјуларын бӱдӱрер алдында јунунар учурлу болгон (Чыг. 40:30—32). Је эт-канды ару тударынаҥ ӧскӧ дӧ неме бар. Бу дезе бистиҥ јакшы кылык-јаҥыс (Сар. 24:3, 4; 1 Пётр 1:15, 16). Биске «озогы кижини» бойыстаҥ уштып, «јаҥы кижини» кийип алар керек. Бу Иеговага јарабай турган кӧрӱм-санаалардаҥ, кылык-јаҥдардаҥ ла јаман керектердеҥ айрылары дегени. Бис Иегованыҥ јакшы кылык-јаҥдарынаҥ ӱренип, санааларыс ла керектерис Иегованыҥ ошкош болзын деп кӱӱнзейдис (Кол. 3:9, 10). Иегованыҥ болужыла, керек дезе балыр јӱрӱм јӱрӱп турган да улус, калју-казыр да улус солынып, јаҥы кижи болор аргалу.

14. Джектиҥ учуралынаҥ слер неге ӱренедеер? (Јурукты база кӧрӱгер.)

¹⁴ Джек коркышту калју-казыр, јаман преступник болгон. Керек дезе оныҥ чоло ады да Демон болгон. Оны коркышту јаман керектери учун тӱрмеге отургызып, ӧлӱмге јаргылап койгон. Је бир катап ол бистиҥ акала таныжып, Агару Бичикти ӱренерге јӧпсинген. Ол ака тӱрме дӧӧн јарлап барып турган болгон. Агару Бичикти ӱренип турала, Джек тыҥ солынып јат. Ол эски кижини уштып, бир эмеш ӧйдӧҥ сууга чӧҥӱрилген. Оныҥ учун Джектиҥ јӱрӱмин кыйатан кӱн једип келерде, оныҥ коркышту тыҥ солынганын кӧргӧн тӱрмениҥ кезик каруулчыктары оны карамдап, кӧзиниҥ јажын тудуп болбой турдылар. Олордыҥ бирӱзи айткан: «Джек бери келерде, мында оноҥ јаман кижи јок болгон, је эмди ол эҥ јакшы улустыҥ бирӱзи». Оныҥ божогонынаҥ бир неделе ӧдӧрдӧ, акалар јаҥжыкканы аайынча тӱрмеде јуунныҥ туштажузын ӧткӱрген. Бу туштажуга бир јаҥы кижи келген. Кӧрӧр болзо, ол Джектиҥ солынганын кайкап, Иегованыҥ ишчизи  болорго нени эдер керек деп билип аларга келген эмтир. Айдарда, бу учуралдаҥ бистиҥ кылык-јаҥыс Иегованы мактап турган деп јарт кӧрӱп јадыс (1 Пётр 2:12).

ИЕГОВА БОЙЫНЫҤ АДЫН УДАБАС КАНАЙЫП МАКТААР?

15. Удабас Иегова бойыныҥ адын канайып макка чыгарар? (Сарын 96:10—13).

¹⁵ Сарын 96:10—13 кычырыгар. 96-чы Сарынныҥ калганчы ӱлгерлеринде Иегова Јаргычы ла Каан деп айдылат. Иегова удабас бойыныҥ адын канайып макка чыгарар? Ол справедливый јаргылар чыгарар. Удабас ол ончо тӧгӱн кудай-јаҥдарды — Улу Вавилонды — оныҥ агару адын уйатка тӱжӱрип турганы учун јоголтып салар (Ачыл. 17:5, 16; 19:1, 2). Кезик улус Улу Вавилонныҥ јоголтылганын кӧрӱп, Кудайга бажырарга, оныҥ албатызына кожулар болор. Оноҥ Армагеддондо Иегова Сатананыҥ телекейин јоголтып салар. Кудайдыҥ адын јамандап турган улустыҥ изи де артпас. Је Кудайды сӱӱп, ого сӧсуккур болуп, оныла оморкоп, оныҥ адын мактап турган улус аргадалар (Марк 8:38; 2 Фес. 1:6—10). Иисустыҥ бир муҥ јыл башкарган ӧйиниҥ учында улус калганчы ченелтени ӧтсӧ, Кудайдыҥ ады јӱс процентке агарулалар (Ачыл. 20:7—10). Ол тушта «канайып суулар талайды толтырып јат, анайып ла јер Иегованыҥ магы керегинде билгирлерле толуп калар» (Авв. 2:14).

16. Слер нени эдерге шӱӱп алдаар? (Јурукты база кӧрӱгер.)

¹⁶ Удабас кажы ла јайаан Иегованыҥ адын мактаар! Бис ол ӧйди энчикпей сакып јадыбыс. Нениҥ учун дезе оныҥ ады макталар учурлу. Је эм тура Иегованы сӧстӧрисле, эткен керектерисле мактайтан кандый ла эп-арганы божотпой турактар. Мыны ундыбазын деп, Башкару јӧп биске 2025 јылдыҥ ӱлгери эдип, Сарын 96:8-ти талдап салган. Анда мынайып айдылат: «Иегованы мактагар, оныҥ ады макталар учурлу».