1. Биске ончобыска кажы ла кӱн нени эдерге келижет?

 БИС ончобыс кажы ла кӱн јӧптӧр чыгарып јадыс. Олордыҥ кезиги тегин болуп јат, темдектезе эртен тура нени јиир эмезе канча саатта јадып уйуктаар. Кезик јӧптӧрди чыгарардаҥ озо јакшы шӱӱп сананар керек. Не дезе оноҥ бистиҥ су-кадыгыс, ырызыс, билегистиҥ амыры ла Кудайга бажырары камаанду. Чыгарган јӧптӧристеҥ биске де, јуук улузыска да јакшы болзын деп кӱӱнзейдис. Је эҥ ле керектӱзи — Иегованы сӱӱндирери болот (Рим. 12:1, 2).

 2. Јакшы јӧптӧр чыгарарга не болужар?

² Биске јакшы јӧп чыгарарга ӱч алтам болужар: 1) айалганы јакшы билип алары, 2) Иегованыҥ кӧрӱмин билип алары, 3) нени талдаарын јазап шӱӱп сананары. Эмди бу алтамдарды кӧрӱп ийектер, анайда ок јаманды ла јакшыны ылгаштырып, јакшы јӧптӧр чыгарарга не болужарын кӧрӱп ийектер (Укаа 2:11).

АЙАЛГАНЫ ЈАКШЫ БИЛИП АЛЫГАР

 3. Јӧпти чыгарардаҥ озо нениҥ учун айалганы јазап билип алар керек? Тем куучындап беригер.

³ Јӧп чыгарардаҥ озо айалганы јазап билип алар керек. Нениҥ учун? Мындый тем сананып ийектер, кижи тыҥ оорыйла, врачка келген болзын. Врач ол кижини кӧрбӧй, бир де сурак бербей јадып, кандый бир эм-тус бичибес, дезеер? Анайып ла биске эдер керек. Јӧпти чыгарардаҥ озо айалганы јазап билип алар керек. Мыны канайып эдер?

 4. Укаа сӧстӧр 18:13-ле болзо, айалганы билип аларга не болужар? (Јурукты база кӧрӱгер.)

 ⁴ Айалганы билип аларга, кӧп сабада бир канча сурактар бергени болужар. Темдектезе, слерди кандый бир мероприятиеге кычырган болзын. Эмди слер баратан ба, јок по деп сананып јадаар. Туштажуга кычырган кижини эмезе анда не болорын слер билбес болзоор, ол кижиге мындый сурактар берзе јакшы болор: «Туштажу кайда, качан болор? Анда канча кижи болор, кем болор? Туштажу аайлу-башту болзын деп, кем кӧрӧр? Кандый программа болор? Анда аракы-чеген болор бо?» Бу сурактардыҥ каруулары слерге ойгор јӧп чыгарарга болужар. (Укаа сӧстӧр 18:13 кычырыгар.)

 5. Айалганы билип алган кийнинде нени эдер керек?

⁵ Эмди айалганы ӱзе билип алган болзоор, јазап шӱӱп сананып ийеер. Темдектезе, кычырган улустыҥ ортозында Иегованыҥ нормаларыла јӱрбей турган улус бар эмезе айылчыларды ӧйинеҥ ӧткӱре ичпезин деп кӧрӱп турган кижи јок деп билип алдаар. Мындый туштажу аайы-бажы јок јыргалга кӧчӧ бербес пе деп, озодоҥ сананып кӧрӧр керек (1 Пётр 4:3). Је база да бир немени ајаруга алыгар. Слерде бу ӧйдӧ јуунныҥ туштажузы бар болор эмезе слер јарлаар ишке куучындажып алган болороор. Бӱдӱн айалга јакшы јуралып келерде, слерге јакшы јӧп чыгарарга јеҥил болор. Эмди  экинчи алтамды эдерге јараар. Бу туштажуга слер бойоордыҥ кӧрӱмеерди билип алдаар, је бу керегинде Иегова нени сананат? (Укаа 2:6).

ИЕГОВАНЫҤ КӦРӰМИН БИЛИП АЛЫГАР

 6. Иаков 1:5-ле болзо, нениҥ учун Иегованаҥ ойгор сураар керек?

⁶ Слердиҥ айалгагар керегинде Иегова нени сананып турганын билип аларга, оноҥ болуш сурагар. Кудай биске ойгор берер деп сӧзин берген. Ол ойгордыҥ болужыла бистиҥ чыгарган јӧбис Иеговага јараар ба, јок по деп билип аларыс. Андый ойгорды Иегова «акту кӱӱнинеҥ артыктай берип турган». (Иаков 1:5 кычырыгар.)

 7. Иегованыҥ кӧрӱмин канайып билип алар? Тем куучындап беригер.

⁷ Мӱргӱген кийнинде Иеговага каруу беретен арга беригер. Слер таныш эмес калада азып калала, анда јадып турган кижинеҥ јолды сурап турганаар деп сананып ийзеер де. Ол кижи каруузын јетире айткалакта, слер јӱре бербезеер не? Карын оныҥ айтканын лаптап угараар. Анайып ла Иегованаҥ ойгор сураган кийнинде оныҥ каруузын оҥдоорго албаданыгар. Оны оҥдоорго слердиҥ айалгага келижип турган библиялык принциптер ле јасактарды шӱӱп сананыгар. Темдектезе, байагы айдылган туштажуга слерге баратан ба, јок по деп билип аларга не болужар? Кудайдыҥ  Сӧзин шиҥдегер. Анда аайы-бажы јок јыргаары керегинде, Кудайдыҥ нормаларын керексибей турган улус керегинде ле христиан кижиге јӱрӱминде баштапкы јерге нени тургузар керек деп не айдылат? (Матф. 6:33; Рим. 13:13; 1 Кор. 15:33).

 8. Керектӱ јетирӱни кайдаҥ табып алар? (Јурукты база кӧрӱгер.)

⁸ Кезикте керектӱ јетирӱни табып аларга јеҥил эмес. Бу тушта ченемелдӱ акала эмезе эјеле куучындажып ийерге јараар. Је бу суракты бойоор база шиҥдегер. Слер «Иегованыҥ Керечилериниҥ бичиктериниҥ путеводителинеҥ» ле «Библейские стихи в помощь христианину» деп бичиктеҥ кӧп тузалу јӧптӧр табып алараар. Ундыбагар, слердиҥ амаду — ол Иегованы сӱӱндиретен јӧп чыгарары.

 9. Бистиҥ чыгарган јӧбис Иегованы сӱӱндирер деп, канайып бӱдӱмјиленип алар? (Эфестегилерге 5:17).

⁹ Бистиҥ чыгарган јӧбис Иегованы сӱӱндирер деп, канайып бӱдӱмјиленип алар? Озо ло баштап биске Кудайысты јакшы билер керек. Агару Бичикте: «Агару Кудайды билген кижи керсӱ болор» — деп айдылган (Укаа 9:10). Иегова — ол кандый Кудай, оныҥ табы кандый, ол нени сӱӱп турган, нени кӧрӧр кӱӱни јок деп оҥдоп алар керек. Оныҥ учун бойоордоҥ мынайып сурагар: «Иегованыҥ кӧрӱмин билип аларымда, эмди мен оны сӱӱндирерге кандый јӧп чыгарарым?» (Эфестегилерге 5:17 кычырыгар.)

10. Нениҥ учун библиялык принциптерди билениҥ ле культураныҥ чӱм-јаҥдарынаҥ бийик тургузар керек?

¹⁰ Кезикте Иегованы сӱӱндирерге биске јуук улузысты ачындырарга келижер. Темдектезе, ада-энези јаанап калган кызын аргалу-чакту, је кӧгӱс керектерди ајаруга албай турган кижиге барзын деп сӧстӧп јат. Ада-энези балазында ӱзе јакшы болзын деп кӱӱнзеп турган эмей. Је ол кыс бойынаҥ мынайып сураар аргалу: «Мен бу кижиге барып алзам, ол меге Кудайла најылыгымды тыҥыдарга болужар ба?» Иегованыҥ кӧрӱми бу айалгага кандый болот? Каруузын Матфей 6:33-теҥ табып аларыс. Бу ӱлгер христиандарды јӱрӱминде јаантайын баштапкы јерге Каандыкты тургузып турзын деп кӱӱнзедет. Бис ада-энебисти ле јуук улузысты тооп то турган болзоос, је эҥ керектӱзи — Иегованы сӱӱндирери болот.

НЕНИ ТАЛДААРЫН ЈАЗАП ШӰӰП САНАНАРЫ

11. Јакшы јӧп чыгарарга база не болужар? (Укаа сӧстӧр 2:11).

¹¹ Агару Бичиктиҥ принциптерин шиҥдеген кийнинеҥ, слердиҥ чыгарарга турган кажы бир јӧбӧӧр неге экелерин сананып кӧрӧр керек. (Укаа сӧстӧр 2:11 кычырыгар.) Кезикте мыны эдерге јеҥил, је кезикте јеҥил эмес болот. Је оҥдомол слерге кӱч те айалгаларда ойгор јӧп чыгарарга болужар.

12, 13. Иш талдап јаткан тушта оҥдомол биске ойгор јӧп чыгарарга канайып болужар?

¹² Темдектезе, слер билегерди јеткилдеерге иш бедиреп турганаар. Слерге эки иш табылган болзын. Бу иштерде нени эдер керек болорын, графигин, јолго канча кире ӧй барарын ла оноҥ до ӧскӧзин билип алдаар. Христиан кижиниҥ уйадына бу эки иш экилези келижип јат. Бу иштердиҥ бирӱзи слерге анчада ла јарай берген болзын, не дезе оныҥ акчазы да кӧп, иш бойы да јилбилӱ. Је јӧпти чыгарардаҥ озо, база да ӧскӧ немелерди ајаруга алар керек.

¹³ Бу иштердиҥ кажызы слерге јакшы болор деп билип аларга, бойоорго мындый сурактар беригер: «Бу иштеҥ улам  кезикте јуунныҥ туштажуларын божотпозым ба? Билемди эмоциональный ла кӧгӱс јанынаҥ кичеерге меге ӧй артар ба?» Мындый сурактар акчаны эмес, је «эҥ артыгын» — Кудайга бажырарын ла билениҥ керексиништерин талдаарга болужар (Флп. 1:10а). Анайып слер Иегованы сӱӱндиретен јӧп чыгарараар.

14. Оҥдомол ло сӱӱш улустыҥ бӱдӱмјизине буудак болбоско канайып болужар?

¹⁴ Јӧп чыгарып јаткан тушта оҥдомол биске ӧскӧ улустыҥ сезимдерин сананарга болужар. Не дезе бис олордыҥ бӱдӱмјизине буудак болорго кӱӱнзебей јадыс (Флп. 1:10б). Оны кийим ле тыш бӱдӱм јанынаҥ сурактарда ајаруга алар керек. Темдектезе, биске кандый бир кийимниҥ стили эмезе кандый бир причёска јарап турган болзын. Је бу јуунда да, јуунда эмес те улусты бӱдӱрилтип турган болзо, канайдар? Ол тушта оҥдомол биске улустыҥ сезимдерин тооп турарга  болужар. Је сӱӱш дезе тузаны бойыска эмес, «је ӧскӧ кижиге» бедиреерге ле эптӱ кийинерге болужар (1 Кор. 10:23, 24, 32; 1 Тим. 2:9, 10). Ол тушта бис улусты сӱӱп ле тооп турганыс деп кӧргӱзип турган јӧп чыгарарыс.

15. Јаан учурлу јӧп чыгарардаҥ озо нени сананар керек?

¹⁵ Јаан учурлу јӧп чыгарардаҥ озо, кийнинде ол јӧп аайынча јӱрерге нени эдерге келижерин сананар керек. Иисус озолондыра сананып ийзин деп ӱреткен (Лука 14:28). Бого канча кире ӧй, акча-манат ла ийде-кӱч барарын сананып ийер керек. Кезик учуралдарда, билениҥ улузыла јӧптӧжӧр керек болот. Мынайып этсе нениҥ учун јакшы болор? Анайып слер чыгарып јаткан јӧбӧӧрдӧ та нени де тӱзедип ийер керек эмезе чек солып ийер керек деп оҥдоп ийереер. Анайда ок билениҥ улузыла јӧптӧжип, олордыҥ санаа-шӱӱлтезин ајаруга алып турзаар, олор слерге јӧмӧжӧргӧ белен болор (Укаа 15:22).

ЈАКШЫ ЈӦПТӦР ЧЫГАРЫГАР

16. Јакшы јӧп чыгарарга слерге кандый алтамдар болужар? ( «Јакшы јӧп чыгарарга не болужар?» деген рамканы база кӧрӱгер.)

¹⁶ Слер бу јӧрмӧлдиҥ ончо алтамдарын эткен болзоор, јакшы јӧп чыгарарга белен болодоор. Слер айалганы јакшы билип алала, чыгарып јаткан јӧбӧӧр Иегованы сӱӱндирер бе деп бӱдӱмјиленерге, библиялык принциптерди шӱӱп сананганаар. Эмди слердиҥ чыгарган јӧбӧӧр једимдӱ болзын деп, Иегованаҥ болуш сурагар.

17. Недеҥ улам бис јакшы јӧптӧр чыгарадыс?

¹⁷ Ӧткӧн ӧйдӧ бис кӧп јакшы јӧптӧр чыгарган да болзоос, бир немени ундыбас керек. Јакшы јӧптӧрди чыгарарга биске санаабыс ла ченемелис эмес, је Иегованыҥ ойгоры болужат. Чындык ойгор билгирлердеҥ, санаа-укаанаҥ ла оҥдомолдоҥ турат, је оны јӱк ле Иегова берет (Укаа 2:1—5). Иегованыҥ болужыла бис оны сӱӱндиретен јӧптӧр чыгарар аргалу болорыс (Сар. 23:2, 3).