1. Нениҥ учун Кайраканныҥ Эҥирине кажы ла јыл болуп турар керек?

 ИЕГОВА биске сӱреен баалу сый сыйлаган, ол толынты болот (2 Кор. 9:15). Ол бойыныҥ Уулын бис учун јӱрӱмин берзин деп, јерге ийген. Мынаҥ улам бис Иеговала јуук колбуларлу болор аргалу. Анайда ок толынты ӱргӱлји јӱрӱм јӱретен арга ачкан. Иегова бисти сӱреен тыҥ сӱӱп турганынаҥ улам толынты эткен (Рим. 5:8). Иегова ла Иисус нени эткенин ундыбай јӱрзин деп ле ого быйанду болуп јӱрзин деп, Иисус кажы ла јыл оныҥ ӧлӱмин эске алынзын деп јакарган (Лука 22:19, 20).

 2. Бис бу јӧрмӧлдӧ нени шӱӱжерис?

² 2025 јылда Кайраканныҥ Эҥири кандык айдыҥ 12-чи кӱнинде, субботто болор. Бис ончобыс бу туштажуга барарга амадайдыс. Кайраканныҥ Эҥиринеҥ озо ло кийнинде, тоолу неделениҥ туркунына, Иегова ла оныҥ Уулы биске нени эткенин шӱӱп сананганы a јакшы болор эди. Бу јӧрмӧлдӧ бис толынтынаҥ Иегова ла Иисус керегинде нени билип аларысты шӱӱжерис. Је келер јӧрмӧлдӧ толынтынаҥ улам бисте кандый алкыштар бар ла бис оны баалап турганысты канайып кӧргӱзер аргалу деп билип аларыс.

ТОЛЫНТЫ БИСКЕ ИЕГОВА КЕРЕГИНДЕ НЕНИ БИЛИП АЛАРГА БОЛУЖАТ?

 3. Бир кижиниҥ ӧлӱми канча миллиондор тоолу улусты кинчектеҥ ле ӧлӱмнеҥ канайып јайымдаар аргалу? (Јурукты база кӧрӱгер.)

³ Толынтынаҥ улам Иегова справедливый Кудай деп билип алганыс (Јаҥ. т. 32:4). Адам Кудайдыҥ сӧзин укпаста, ол кинчектӱ бололо, учы-тӱбинде божоп калган. Бис  оныҥ бала-баркалары болорыста, оныҥ кинчегин энчиленип, база божоп јадыбыс (Рим. 5:12). Иегова бисти кинчектеҥ ле ӧлӱмнеҥ јайымдаарга, Иисусты јерге ийип, толынты эткен. Је бир кижиниҥ тайылгазы канча миллиондор тоолу улусты канайып аргадайтан? Апостол Павел јартаган: «Бир кижиниҥ [Адамныҥ] уккур эмези кӧп улусты кинчектӱ эткени чилеп, бир Кижиниҥ [Иисустыҥ] уккур болгоны кӧп улусты акту эдер» (Рим. 5:19; 1 Тим. 2:6). Ӧскӧртӧ айтса, толо кеминде бир кижи Кудайдыҥ сӧзин укпаста, бис кинчектиҥ ле ӧлӱмниҥ олјозында болуп калганыс. Андый болордо, бисти бу олјоноҥ јайымдаарга, база бир толо кеминде кижи Кудайга сӧсуккур артар учурлу болгон.

 4. Адамныҥ сӧсуккур бала-барказы оноҥ ло ары ӱргӱлјиге јӱрзин деп, Иегова нениҥ учун јаратпаган?

⁴ Бисти аргадаарга Иисуска чыннаҥ ла ӧлӧр керек болгон бо? Иегова Адамныҥ сӧсуккур бала-барказына оноҥ ло ары ӱргӱлјиге јӱрерге нениҥ учун јаратпаган? Иегова јараткан болзо, биске, толо кеминде эмес улуска, бу эҥ ле јакшы јӧп деп билдирер эди. Је мындый јӧпти справедливый деп айдып болбозыҥ, не дезе, ол тушта Адам качан да кинчек этпеген, оныҥ бала-барказы толо кеминде деп айдарга келижер эди. Је ол андый эмес не!

 5. Иегова јаантайын справедливый болор деп, бис нениҥ учун алаҥзыбайдыс?

⁵ Иегова толынты этпей, бойыныҥ чындык нормаларын керекке албай, Адамныҥ толо кемдӱ эмес бала-барказына оноҥ ло ары јажын-чакка јӱрер арга берген болзо, не болор эди? Ол тушта улуста Кудай оноҥ ары справедливый болор бо деп алаҥзыйтан шылтак болор эди. Темдектезе, та кем де: «Ол берген сӧзин бӱдӱрер бе?» — деп сананардаҥ айабас. Биске бу керегинде санааркабас керек. Нениҥ учун? Нениҥ учун дезе Иеговага коркышту кӱч јӧп чыгарарга, бойыныҥ сӱӱген Уулын тайылгага берерге келижерде де, ол справедливый болгон. Оныҥ учун бис Иегова јаантайын справедливый болор деп, бир де алаҥзыбай јадыс.

 6. Толынтыны эдерге Иегованы база не кӱӱнзетти? (1 Иоанн 4:9, 10).

⁶ Толынтыныҥ болужыла Иегова справедливый Кудай деп оҥдоп алганыс. Анайда ок Кудайдыҥ сӱӱжиниҥ тереҥин оҥдогоныс (Иоанн 3:16; 1 Иоанн 4:9, 10 кычырыгар). Иегова бисти јӱк ле ӱргӱлјиге јӱрзин деп эмес, је оныҥ билезинде болзын деп кӱӱнзеп јат. Сананып ийзеер де, Адам кинчек эдип ийерде, Иегова оны билезинеҥ сӱрӱп ийген болгон. Оныҥ учун улустыҥ кемизи де Кудайдыҥ билезинде чыкпай јат.  Је толынтынаҥ улам Иегова бистиҥ кинчектеристи таштап јат. Учы-тӱбинде Кудайга бӱдӱп турган, ого сӧсуккур јӱрген ончо улус оныҥ балдары болуп калар. Керек дезе эмди де бисте Иеговала, ака-эјелерисле јуук колбулар болор аргалу. Иегова бисти кандый тыҥ сӱӱп турган, дезеер! (Рим. 5:10, 11).

 7. Толынтыны эдерге Иисус коркышту тыҥ шыралаган. Мынаҥ Иегованыҥ сӱӱжи керегинде нени билип аладыс?

⁷ Иеговага Уулыныҥ шыралаганын кӧрӧргӧ коркышту кӱч болгон. Бу керегинде шӱӱп сананзаас, Кудай бисти кандый тыҥ сӱӱп турганын оноҥ јакшы оҥдоорыс. Сатана кӱчтердиҥ ӧйинде бир де кижи Кудайга чындык артпас деп айдат. Иегова Сатананыҥ сӧстӧрин тӧгӱн деп кӧргӱзерге, Уулы божоор алдында шыралап јадарда, бир де киришпеген (Иов 2:1—5; 1 Пётр 2:21). Иегова кудай јаҥныҥ ӧштӱлериниҥ Иисуска каткырып турганын, јуучылдардыҥ тыҥ камчылаганын, оны тӧҥӧшкӧ кадап салала, шыралап божозын деп артыргызып салганын кӧргӧн (Матф. 27:28—31, 39). Иегова бу ончо немени токтодып ийер аргалу болгон. Темдектезе, улус: «Ого јарамыкту болзо, эмди Кудай Оны аргадазын» — деп айткан тушта, Иегова анайып ла эдип ийер аргалу болгон (Матф. 27:42, 43). Је ол тушта толынты да эдилбес эди, бисте де ижемји јок болор эди. Оныҥ учун Иегова Уулыныҥ шыразын учына јетире токтотпогон.

 8. Иеговага Уулыныҥ шыралап јатканын кӧрӧргӧ коркышту ачу болгон деп, бис кайдаҥ билерис? (Јурукты база кӧрӱгер.)

⁸ Кудай Кӱчтӱдеҥ Кӱчтӱ болордо, ондо сезимдер јок деп сананбас керек. Бис Кудайга кеберлеш эдип јайалганыс ла биске сезимдерди ол берген. Андый болордо, Кудайда сезимдер база бар. Агару Бичикте улус Кудайды «ачындырып», ого «ачу јетирип туратан» деп айдылып калган (Сар. 78:40, 41). Авраам ла Исаактыҥ јӱрӱминде болгон учуралды эске алып ийектер. Кудай Авраамга сок јаҥыс уулын тайылгага экелзин деп јакарган (Баш. 22:9—12; Евр. 11:17—19). Авраам уулын ӧлтӱрерге јадарда, оныҥ јӱреги ачуунаҥ улам коркышту тыҥ сыстаган болор. Сананып ийзеер де, Иеговага Уулыныҥ калју улустыҥ колынаҥ шыралап, ӧлӱп јатканын кӧрӧргӧ канча киреге ачу болгонын! («Подражайте их вере. Авраам (2 бӧлӱги)» деген видеоны jw.org сайта кӧрӱгер.)

 9. Римдегилерге 8:32, 38, 39-таҥ Иегованыҥ биске сӱӱжи керегинде нени билип аладыс?

⁹ Бисти Иегова чылап кем де, јуук улузыс та, јуук најыларыс та сӱӱбей турган деп, толынты кӧргӱзет. (Римдегилерге 8:32, 38, 39 кычырыгар.) Бис бойысты  сӱӱгенистеҥ Иегова бисти канча киреге тыҥ сӱӱп јат. Слер јажын-чакка јӱрерге кӱӱнзейдеер бе? Иегова да кӱӱнзеп јат. Кинчектереер ташталзын деп кӱӱнзейдеер бе? Иегова оноҥ тыҥ кӱӱнзейт! Ол бисти бу сыйды алзын деп сурап јат, ӧскӧртӧ айтса ого бӱдӱп, сӧсуккур болзын деп. Бис учун толынты эдип, Иегова бисти тыҥ сӱӱп турганын кӧргӱскен. Јаҥы јӱрӱмде Иегованыҥ сӱӱжин кӧргӱзип турган оноҥ кӧп керелер кӧрӧрис (Эккл. 3:11).

ТОЛЫНТЫ БИСКЕ ИИСУС КЕРЕГИНДЕ НЕНИ БИЛИП АЛАРГА БОЛУЖАТ?

10. а) Ӧлтӱртер алдында Иисус неге санааркаган? б) Иисус Иегованыҥ јакшы адын канайып корулаган? ( «Иисус јӱрӱмин толынты тайылгага берип, Иегованыҥ јакшы адын корулаган» деген рамканы база кӧрӱгер.)

¹⁰ Иисус Адазыныҥ ады-јолы керегинде сананган (Иоанн 14:31). Ол Кудайды јамандап турган ла тӱймеен кӧдӱрип турган деп буруладып ӧлтӱртер деп билген. Мынаҥ улам ол Адазыныҥ адын уйатка тӱжӱрер деп тыҥ санааркаган, оныҥ учун мынайып мӱргӱген: «Адам! Бу кыйын-шыра Менеҥ јастыккадый болзо, јастыксын» (Матф. 26:39). Иисус Иеговага учына јетире чындык артып, Адазыныҥ јакшы адын корулаган.

11. Иисустыҥ улусты тыҥ сӱӱгени недеҥ кӧрӱнет? (Иоанн 13:1).

¹¹ Анайда ок толынтынаҥ Иисус улусты, анчада ла бойыныҥ ӱренчиктерин кичееп турган деп кӧрӱнет (Укаа 8:31; Иоанн 13:1, ЈТ кычырыгар). Оныҥ јердеги кезик јакылталары коркышту кӱч болор деп, ол билген. Темдектезе, ого шыралап, божоор керек болгон. Је андый да болзо, ол јакылталарды эдер ле керек дейле эткен эмес, је акту кӱӱнинеҥ сӱӱнчилӱ јарды јарлап, ӱренчиктер белетеп, ӧскӧ улуска болушкан. Божоор  до кӱнинде Иисус апостолдорын токунадарга, ӱредерге, олордыҥ кӱӱнин кӧдӱрерге, ӧй тапкан (Иоанн 13:12—15). Керек дезе, тӧҥӧштӧ шыралап јадала, ол јанында божоп јаткан тонокчыга ижемји берген, а Иоаннга Марияны кичеезин деп јакылта берген (Лука 23:42, 43; Иоанн 19:26, 27). Иисустыҥ улуска андый тыҥ сӱӱжи јӱк ле олор учун јӱрӱмин бергенинеҥ эмес, је јерде јӱреле, олорго канайып баштанганынаҥ кӧрӱнет.

12. Иисус биске канайып болужат?

¹² Иисус бир катап ӱргӱлјиге божогон до болзо, ол биске болуп оноҥ ло ары кӧп иштер эдет (Рим. 6:10). Ол нени эдет? Толынтынаҥ улам ачылган аргаларла ончо улус тузаланар аргалу болзын деп, кӧп ӧйин ле ийде-кӱчин берет. Иисус Каан, Улу абыс ла јуунныҥ башчызы болуп иштейт (1 Кор. 15:25; Эф. 5:23; Евр. 2:17). Ол улу тӱбек божоголокто, майлаткандарды ла кара-бајырт улусты јууйтан иш учун каруулу болот (Матф. 25:32; Марк 13:27) b. Анайда ок бу калганчы ӧйлӧрдӧ Кудайдыҥ албатызы кӧгӱс јанынаҥ јакшы ажанып турзын деп, ол кӧрӱп јат (Матф. 24:45). Бир муҥ јыл башкаратан ӧйдӧ ол оноҥ ло ары бисти кичеер. Эйе, Иегова чыннаҥ ла бис учун бойыныҥ Уулын берген!

БИЛГИРЛЕРЕЕРДИ ОНОҤ ЛО АРЫ КӦПТӦДИГЕР

13. Кудайдыҥ ла Христостыҥ сӱӱжи керегинде оноҥ кӧпти билип аларга слерге не болужар?

¹³ Иегова ла Иисус биске нени эткенин сананып турзаас, олордыҥ сӱӱжи керегинде кӧптӧдӧ билип аларыс. Темдектезе, бу јылда Кайраканныҥ Эҥиринеҥ озо эмезе кийнинде, Иисустыҥ јӱрӱми керегинде бичилген бичиктердиҥ кажы бирӱзин кычырып не кӧрбӧс? Бир уунда кӧп материалды кычырарга албаданбагар. Оныҥ ордына бир эмештеҥ кычырып, Иегованы ла Иисусты сӱӱйтен оноҥ кӧп шылтактар табарга амаду тургузыгар. Оноҥ билип алганаарды улуска куучындап туругар!

14. Сарын 119:97-чи ӱлгерди ле сносканы кӧрзӧ, шиҥдегени толынты да керегинде, ӧскӧ дӧ темалар керегинде кӧптӧдӧ билип аларга канайып болужат? (Јурукты база кӧрӱгер.)

¹⁴ Слердиҥ чӧҥӱрилгенеердеҥ бери канча јылдар ӧдӱп калган болзо, Иегованыҥ справедливый болгоны, сӱӱжи, толынты керегинде слер ӱзе билереер ле база јаҥы шӱӱлтелер табылбас деп сананып  турган болороор. Је чынынча болзо, бу да, ӧскӧ дӧ темаларды канча ла кире шиҥдеерге јараар! Слер нени эдер аргалу? Бистиҥ бичиктерди ачып кӧрӱгер. Ондо слер кӧп-кӧп сӱреен баалу јетирӱлер табып алараар. Агару Бичикти кычырып јаткан тушта, јарт эмес ӱлгер туштаган болзо, оны шиҥдегер. Оноҥ билип алганаарды кӱнниҥ туркунына шӱӱп сананып јӱригер. Анайда ок Иегова, Иисус, олордыҥ слерге сӱӱжи керегинде нени билип алганаарды база шӱӱп сананыгар. (Сарын 119:97 ле сносканы кычырыгар.)

15. Нениҥ учун колды бош салбай, оноҥ ло ары Агару Бичиктеги јажырылган эрјинелерди бедиреер керек?

¹⁵ Агару Бичикти кычырып, шиҥдеер тушта слер кандый да јаҥы эмезе јилбилӱ немелер табып албай турган болзоор, кунукпагар. Слерди алтын бедиреп турган кижиге тӱҥдештирерге јараар. Алтынды бедиреерге, канча саат эмезе кӧп кӱндер барардаҥ айабас, је ол анайып ла неме таппас болор. Андый да болзо, ол колын бош салбай, бир де кичинек алтын табып алза, ол сӱреен сӱӱнип јат. Агару Бичиктиҥ чындыктары оноҥ баалу эмей! (Сар. 119:127; Укаа 8:10). Оныҥ учун чыдамкай болуп, оноҥ ло ары Агару Бичикти кычырып, андагы јажырылган эрјинелерди табыгар (Сар. 1:2).

16. Иегованаҥ ла Иисустаҥ кандый тем аларыс?

¹⁶ Агару Бичикти шиҥдеген тушта билип алганаарды јӱрӱмеерде тузаланыгар. Темдектезе, Иегованаҥ тем алып, улусты талдабай, олорго справедливый болугар. Иисустаҥ тем алып, теҥеридеги Адагарды ла улусты сӱӱгер. Анайда ок Иегованыҥ ады учун шыралаарга ла кӱч те болзо, је улуска болужарга белен болугар. Бого коштой улус толынтыга бӱдӱп баштазын деп, Иегова олорго нени эткенин куучындап туругар.

17. Келер јӧрмӧлдӧ бис нени шӱӱжерис?

¹⁷ Бис толынты керегинде кӧптӧдӧ билип, оны баалап турзаас, бистиҥ Иеговага ла оныҥ Уулына сӱӱжис там тыҥыыр. Бис олорды тыҥ сӱӱп турзаас, олор бисти оноҥ тыҥ сӱӱр (Иоанн 14:21; Иак. 4:8). Оныҥ учун Агару Бичикти шиҥдеп, Иегованыҥ организациязыныҥ берип турган ончо материалдарын тузаланып, толынты керегинде билгирлереерди оноҥ ло ары кӧптӧдигер. Келер јӧрмӧлдӧ толынтынаҥ улам бисте кандый алкыштар бар ла Иегованыҥ сӱӱжин баалап турганысты бис канайып кӧргӱзер аргалу деп шӱӱжерис.