АГАРУ БИЧИКТЕ «бистий ле [сезимдерлӱ]» чындык улус керегинде јетирӱлер бар (Иак. 5:17). Темдектезе, Римдегилерге 7:21—24-тӧ бичилген элчи Павелдиҥ ачыгынча айткан сезимдерин јакшы оҥдоп јадыс. Ол мынайып айткан: «Јакшыны эдейин деген бойымда јаҥыс јаман бар... Бараксанды мени!» Павелдиҥ бу сӧстӧри, бойыстыҥ толо кемдӱ эмезисле тартыжып турзаас, биске токунал берет.

Је Павелде ӧскӧ дӧ сезимдер болгон. Галаттарга 2:20-де ол Иисустыҥ сӱӱжине алаҥзу јогынаҥ бӱдӱп, мындый сӧстӧр айткан: «Ол меге буурзап јат, мен учун Бойын берген». Слерде мындый сезимдер болот по? Кезикте болбой турган болор.

Бис алдындагы эткен кинчектеристеҥ улам, кезикте бойысты јинип турган болорыс. Андый ӧйлӧрдӧ биске Иегованыҥ сӱӱжине ле јаманысты таштап салганына бӱдерге кӱч болуп турган болор. Андый болзо, биске Иисустыҥ толынты тайылгазы кажы ла кижи учун берилген сый деп бӱдерге, оноҥ кӱч болуп турган болор. Иисус бисти оныҥ тайылгазына чын ла мындый кӧрӱмдӱ болзын деп, кӱӱнзеп турган ба? Андый болзо, мындый кӧрӱмдӱ болорго, биске не болужар? Бу эки суракты кӧрӱп ийектер.

Иисус толынты тайылганы кажы ла кижи учун берилген сый деп кӧрӧт. Бу тайылга кажы ла кижи учун берилген деп, бис нениҥ учун алаҥзыбай јадыс? Лука 23:39—43-те бичилгенин сананып ийзеер: Иисустыҥ јанына тонокчы кижини керип койгон. Ол кижи эткен кинчектерин алынып јат. Оны байла јаан кинчек эткенинеҥ улам, столмого керип, ӧлтӱрип јаткан болор. Оныҥ учун ол бойыныҥ айалгазын оҥдоп, Иисусты јайнап сурайт: «Каандыгыҥа келзеҥ, мени эске ал».

Иисус ого кандый каруу берди? Иисуска бажын да кыймыктадарга оору болзо, ол байагы эр кижиге кӱлӱмзиренип кӧрӧлӧ, јылу сӧстӧр айтты: «Мен сеге бӱгӱн айдадым: сен мениле кожо Райда болорыҥ» (Лука 23:42, ЈТ). Иисус бу эр кижиге јӱк ле мынайып айдар аргалу болгон: «Кижи Уулы... кӧп улус учун Бойыныҥ јӱрӱмин берейин деп келген» (Матф. 20:28). Је оныҥ ордына Иисус тайылга шак ла бу тонокчы кижи учун берилип јаткан деп айткан. «Сеге», «сен», «мениле кожо» деп сӧстӧрдӧҥ Иисустыҥ јылу сезимдери кӧрӱнет. Анайып, «сен» деген солуманы тузаланганыла, шак ла бу эр кижи келер ӧйдӧ јердеги райда јадарын айткан.

Иисус тонокчы кижини бу тайылга шак ла ол учун берилип јатканын оҥдозын деп кӱӱнзеген. Сананып ийзеер де: Иисус оныҥ ӱренчиги эмес те кижиге мыны оҥдоп алзын деп кӱӱнзеген болордо, ол, сууга чӧҥӱрилип Кудайга иштеп турган христиан кижи бого бӱтсин деп, кӱӱнзебей турган эмеш пе? Биске, алдында кинчектер эткен де болзоос, Иисус кажы ла кижи учун божогон деп бӱдерге, не болужар?

Павел, Иисус ол учун божогон деп, нениҥ учун бӱдӱмјилӱ болгон? Нениҥ учун дезе Иисус ого агару иш бӱдӱретен јакару берген. Павел мынайып бичиген: «Меге кӱч берген Христос Иисус Кайраканыска алкыш-быйаным. Ол мени чындык кижи деп, ишке тургускан. Башкыда Оны јамандагам, истегем ле тарындыргам» (1 Тим. 1:12—14). Павел Иисустыҥ јакару бергенинеҥ, оныҥ ого бӱдӱп турганын, анайда ок сӱӱжин ле килемјизин кӧргӧн. Андый јарлайтан јакару бистиҥ кажыбыска ла берилген (Матф. 28:19, 20). Бу шӱӱлтени оҥдоп турганыстаҥ улам, Иисустыҥ тайылгазына бис кандый кӧрӱмдӱ болор аргалу?

Јууннаҥ чыгарылганы 34 јыл болгон Альберт ака мынайып айдат: «Мен эткен кинчектеримди качан да ундып болбойдым. Је јарлап турзам, элчи Павел чилеп, Иисустыҥ меге берген јакылтаны бӱдӱрип турганымды сезип јадым. Мынаҥ улам бойымга, јӱрӱмимге, келер ӧйгӧ чын кӧрӱмдӱ болотон, ийде-кӱч аладым» (Сар. 51:3).

Ӧткӧн ӧйдӧ улусты базынып, кӧп уур кинчектер эдип јӱрген Аллан ака айдат: «Улуска коркышту кӧп јаман неме эткенимди эмдигенче ле сананып јӱредим. Мынаҥ улам кезикте бойымды неге де турбас кижи деп сананадым. Је Иегова меге, андый кинчектӱ кижиге, улуска сӱӱнчилӱ јарды јетирерге јаратканына јаан быйанду болодым! Улустыҥ бу јарды алынып турганын кӧрӱп, Иегованыҥ сӱӱжин ле јалакайын кӧрӧдим. Анайда ок мен ажыра Иегова мендий ок јӱрӱмдӱ улуска болужып турганын сезедим».

Бис јарлаар ишке турушсаас, ийде-кӱчисти чын тузаланадыс ла чын кӧрӱм-санаалу артадыс. Айдарда, Иисус биске мындый јакару бергениле, биске бӱдӱп турганын, сӱӱжин ле килемјизин кӧргӱзет.

Сатананыҥ калју телекейи јоголголокто, бис бойысты алдындагы эткен кинчектерис учун улам сайын јинер болорыс. Андый сезимдерле тартыжарга нени эдер керек?

Јиит ӧйинде экијӱстенип јӱргени учун бойын јинип турган Джин эје мынайып айдат: «Иегова бистиҥ „јӱрегистеҥ јаан“ болгоны кандый јакшы!» (1 Иоан. 3:19, 20). Иегованыҥ ла Иисустыҥ бисти де, кинчектӱ улусты, бойыстаҥ јакшы оҥдоп турганы токунадар аргалу. Ундыбагар: толынты тайылга толо кемдӱ улус учун эмес, је кинчектӱ де болзо, кинчегин алынып турган улус учун тӧлӧлгӧн (1 Тим. 1:15).

Мынайып бойыстыҥ јӱрегисти бӱдӱмјилеп аларга, биске мӱргӱп, Иисус толо кеминде эмес улуска канайып баштанганын шӱӱп сананар керек, анайда ок биске берилген јарлаар ишти акту кӱӱнистеҥ бӱдӱрер керек. Ол тушта бис, Павел чилеп: «[Иисус] меге буурзап јат, мен учун Бойын берген» — деп, айдар аргалу болорыс.