Иисус б. э. 29-чы јылында сууга чӧҥӱрилгенинеҥ ала Улу абыс болуп калган. Нениҥ учун анайып айдарга јараар? Сууга чӧҥӱрилгениле Иисус бойыныҥ јӱрӱмин, Кудайдыҥ табын темдектеп турган сӱрлеп айдылган тагылга тайылга этире экелерге белен болгонын кӧргӱскен (Гал. 1:4; Евр. 10:5—10). Бу сӱрлеп айдылган тагыл Иисустыҥ чӧҥӱрилгенинеҥ ала бар. А ӧргӧӧ тагыл јогынаҥ болбой јат. Айдарда, бу ла ӧйдӧҥ ала улу кӧгӱс ӧргӧӧ тӧзӧлгӧн. Улу кӧгӱс ӧргӧӧ — улуска Иисустыҥ толынты тайылгазына тӧзӧлӧнип, Кудайга бажыратан арга берет (Матф. 3:16, 17; Евр. 5:4—6).

Улу кӧгӱс ӧргӧӧдӧ Улу абыс болор керек. Иегова Иисусты Улу абыстыҥ ижин бӱдӱрзин деп, оны «Агару Тынла, кӱчле» майлап салган (Ап. ижи 10:37, 38; Марк 1:9—11). Је Иисус божоорынаҥ ла тирилеринеҥ озо Улу абыс болуп калган деп, бис кайдаҥ билерис? Бу сурактыҥ каруузын билип аларга, Моисейдиҥ јасагы аайынча Ааронныҥ ла оныҥ кийнинеҥ улу абыстар болуп иштеген улустыҥ темдерин кӧрӱп ийектер.

Јасак аайынча агару байканныҥ (соҥында ӧргӧӧ болгон) Агарудаҥ агару јерине јӱк ле улу абыс кирер аргалу болгон. Агарудаҥ агару јер Агару кыптаҥ кӧжӧгӧлӧ бӧлӱлген. Улу абыс бу кӧжӧгӧниҥ ары јанына јӱк ле Кинчектер ташталатан кӱнде киретен (Евр. 9:1—3, 6, 7). Аарон ло оны солыган улус, агару байканныҥ кӧжӧгӧзиниҥ ары јанына јӱк ле улу абыстар болгон кийнинде кирер аргалу болгон. Айдарда, Иисус Иегованыҥ улу кӧгӱс ӧргӧӧзиниҥ Улу абызы болуп, божоордоҥ озо кӧстӧлгӧн. Ӧскӧртӧ айтса, ол «кӧжӧгӧ ажыра — Бойыныҥ эди-каны ажыра» теҥериге барган (Евр. 10:20). Оныҥ учун апостол Павел Христос «Улу абыс болуп», «кижиниҥ колыла тудулбаган» «эҥ јаан ла толо кемдӱ агару чадыр ажыра» «теҥериниҥ бойына кирген» деп бичиген (Евр. 9:11, 24).

Јаҥы јӧптӧжӱниҥ јӧптӧлгӧни ле иштеп баштаганы бир ле ӧйдӧ болгон. Бис нениҥ учун анайып айдадыс? Нениҥ учун дезе Иисус теҥериге барып, јерде јӱрген толо кемдӱ јӱрӱминиҥ баазын Кудайга толынты эдип берип ийерде, јаҥы јӧптӧжӱ јӧптӧлип баштаган. А јӧптӧлип баштаган кийнинеҥ ле бу јӧптӧжӱ иштеп баштаган. Бу јӧптӧжӱ канайып јӧптӧлгӧн?

Баштапкызында, Иисус Иегованыҥ алдына туруп алган; экинчизинде, Иисус Иеговага тайылга эдип берген јӱрӱминиҥ баазын берип ийген; ӱчинчизинде, Иегова бу тайылганы алып алган. Јаҥы јӧптӧжӱ јӱк ле мыныҥ кийнинеҥ иштеп баштаган.

Агару Бичикте Иегова Иисустыҥ тайылгазын качан алганы чокум айдылбай јат. Айдарда, јаҥы јӧптӧжӱ качан јӧптӧлип баштаганын ла качан иштеп баштаганын чике айдып болбозыс. Је Иисус б. э. 33 јылыныҥ Беженинчи кӱнинеҥ 10 кӱн озо теҥериге барган деп билерис (Ап. ижи 1:3). Андый болордо, бу кыска ӧйдиҥ туркунына Иисус Иеговага бойыныҥ јердеги јӱрӱминиҥ баазын берип ийерде, Иегова оныҥ тайылгазын алып алган (Евр. 9:12). Јаҥы јӧптӧжӱниҥ иштеп баштаганы Беженинчи кӱнде болгон учуралдаҥ кӧрӱнет (Ап. ижи 2:1—4, 32, 33). Бу учуралдыҥ кийнинеҥ јаҥы јӧптӧжӱниҥ јӧптӧлгӧнине ле иштеп баштаганына кем де алаҥзыбай јат.

Айдарда, Иисус — бу јӧптӧжӱниҥ Ортокчызы, божогон кийнинде теҥериге барган, анда Иеговага бойыныҥ јердеги јӱрӱминиҥ баазын берип ийген. Мынайып јаҥы јӧптӧжӱ јӧптӧлип, иштеп баштаган (Евр. 7:25; 8:1—3, 6; 9:13—15).