1. 3 Иоанн 3, 4-лӧ болзо, Иегованыҥ ишчилери неге сӱӱнип јат?

АПОСТОЛ Иоанн улуска чындыкты билип аларга болушкан. Ол болушкан улузыныҥ Иеговага чындык иштеп јӱргенин кӧрӱп, сӱрекей тыҥ сӱӱнгенин сананып ийзеер. Иоанн бу чындык христиандарды бойыныҥ кӧгӱс балдары деп кӧргӧн. Олордо кӧп кӱчтер болгон, оныҥ учун Иоанн олордыҥ бӱткенин тыҥыдарга, кӧп болужын јетирген. Бис бойыстыҥ балдарыстыҥ эмезе кӧгӱс балдарыстыҥ Иеговага учурланып, ого иштеп јӱргенин кӧрӱп, база тыҥ сӱӱнип јадыс. (3 Иоанн 3, 4 кычырыгар.)

2. Иоанн бойыныҥ ӱч самаразын неге керектӱ бичиген?

² Иоанн Патмос деп ортолыкта ссылкада болгон кийнинде, Эфесте эмезе оныҥ јанындагы јерлерде јаткан болор. Бу ӧйдӧ, б. э. 98 јылы кирезинде, Иегованыҥ агару тыны оны ӱч самара бичиирге кӱӱнзеткен. Бу самаралар чындык христиандарга Иисуска бӱдерин тыҥытсын деп ле чындыкта јӱрзин деп болужарга бичилген.

3. Бис бу јӧрмӧлдӧҥ кандый сурактардыҥ карууларын билип аларыс?

³ Иоанн калганчы божогон апостол. Ол јуундарга тӧгӱн ӱредӱчилер јаман салтарын јетирип турганы учун санааркаган (1 Иоанн 2:18, 19, 26) *. Бу улус Кудайды билерис деп айдыжатан, је чынынча болзо, олор Кудайдыҥ јасактарыла јӱрбеген. Ол ӧйдӧ агару тынга башкарткан Иоанн христиандарга кандый јӧптӧр бергенин шӱӱжип ийектер ле мындый ӱч сурактыҥ карууларын билип алактар. Чындыкта јӱрери дегени нени темдектейт? Чындыктыҥ јолында кандый  буудактар болордоҥ айабас? Чындыкта јӱрерге бой-бойыска канайып болужар керек?

4. 1 Иоанн 2:3—6 ла 2 Иоанн 4, 6 чындыкта јӱрерге, биске нени эдер керек деп айдат?

⁴ Чындыкта јӱрерге, биске Кудайдыҥ Сӧзиндеги, Агару Бичиктеги чындыкты билер керек. Анайда ок Иегованыҥ јакылталарын бӱдӱрер керек. (1 Иоанн 2:3—6; 2 Иоанн 4, 6 кычырыгар.) Бу јанынаҥ эҥ јакшы темди Иисус кӧргӱскен. Оныҥ учун Иегованыҥ сӧзин угарга турган болзоос, биске Иисустыҥ темиле чике јӱрер керек (Иоанн 8:29; 1 Петр 2:21).

5. Биске неде бӱдӱмјилӱ болор керек?

⁵ Чындыкта јӱрерге, биске Иегова — чындыктыҥ Кудайы ла Агару Бичикте бичилген оныҥ ончо сӧстӧри чын деп, бир де алаҥзыбас керек. Анайда ок Иисус судурлалган Мессия деп, бӱдӱмјилӱ болор керек. Бӱгӱнги кӱнде кӧп улус Иисусты Кудайдыҥ Каандыгыныҥ майлаткан Кааны деп бӱтпей јат. Иоанн бойыныҥ самаразында: «Кӧп астыраачылар телекейге кирген» — деп бичиген. Олор Иегова ла Иисус керегинде чындыкты јазап билбес улусты тӧгӱндеп салардаҥ айабас деп айткан (2 Иоанн 7—11). Иоанн мынайып бичиген: «Кем тӧгӱнчи? Иисус ол Христос болгонын јаратпай турганы» (1 Иоанн 2:22). Биске мындый тӧгӱннеҥ коруланатан сок јаҥыс арга — Кудайдыҥ сӧзин шиҥдеери болот. Јӱк ле анайып бис Иегованы ла Иисусты чыннаҥ ла билип аларыс (Иоанн 17:3). Анайда ок јӱк ле анайып чындыкты билерис деп бӱдӱмјиленип аларыс.

6. Јиит христиандарда кандый буудактар болот?

⁶ Ончо христиандарга бу телекейдиҥ кӧрӱмин алынбаска ајарыҥкай болор керек (1 Иоанн 2:26). Бу јанынаҥ анчада ла јииттерге ајарыҥкай болор керек. Францияда јадып турган 25 јашту Алексья * деп сыйын мынайып айдат: «Школдо биске эволюцияныҥ теориязын ла улустыҥ философиязын ӱредип туратан. Бу ӱредӱлер меге кезикте чын деп билдирип туратан. Оныҥ учун кажызы чын деп оҥдобой баргам. Је андый да болзо, јӱк ле ӱредӱчилерди угуп, Иегова нени айдып турганын укпаза, јастыра болор деп санангам». Оныҥ учун Алексья «Жизнь — как она возникла? Путем  эволюции или путем сотворения?» деген бичикти јазап кычырып алган. Тоолу неделенеҥ Алексьяныҥ алаҥзый бергени јоголып калган. Ол айдат: «Чындык Агару Бичикте. Агару Бичиктиҥ нормаларыла јӱрзем, мен ырысту болорым ла јӱрегимде амыр болор деп бӱдӱмјиленип алгам».

7. Биске кандый болбос керек, нениҥ учун?

⁷ Бистерге кемигиске де — јииттерге де, јажы јаанагандарга да экијӱстенбес керек. Апостол Иоанныҥ айтканыла, бис Кудайдыҥ јасактарын бузуп турган болзоос, чындыкта јӱрӱп болбозыс (1 Иоанн 1:6). Бис Иегованы сӱӱндирерге турган болзоос, ол бистиҥ керектеристи ӱзе кӧрӱп турган деп, качан да ундыбай јӱрерис. Нениҥ учун дезе кезик кинчектерди улус кӧрбӧй дӧ турган болзо, је Иегова олордыҥ ончозын кӧрӱп јат (Евр. 4:13).

8. Биске кандый кӧрӱмди алынбас керек?

⁸ Бис бу телекейдиҥ кинчекке кӧрӱмин алынбас учурлу. Апостол Иоанн мынайып бичиген: «Бисте кинчек јок деп турган болзобыс, бойысты бойыс астырып јадыбыс» (1 Иоанн 1:8). Иоанныҥ ӧйиндеги Кудайдаҥ јана баскан улус кинчектер де эдип тура, Кудайла јуук колбуларлу болорго јараар деп айдыжатан. Бӱгӱнги кӱнде кӧп улус база анайып ла сананат. Олор Кудайга бӱдедис деп айдыжат, је Иегованыҥ кинчекке кӧрӱмиле, анчада ла секске кӧрӱмиле јӧпсинбейдилер. Иегованыҥ кӧзинде кинчек болуп турган керектерди олор кажы ла кижи бойы кӧрӧтӧн сурактар деп сананат эмезе нетрадиционный јӱрӱм деп адайт.

9. Јиит христиандарга Агару Бичиктиҥ принциптериле јӱргени кандый туза экелет?

⁹ Јиит христиандарга анчада ла кожо ӱренип турган балдардыҥ эмезе кожо иштеп турган улустыҥ секс јанынаҥ кӧрӱмин алынбаска кӱч болордоҥ айабас. Александр деп ака куучындайт: «Школдо ӱренип турарымда, кезик кыстар менле кожо конып ийерге албаданып туратан. Олор мынайып  айдыжатан: „Сенде кыс јок болзо, сен гей болбойыҥ“». Слерде де бого тӱҥей учуралдар болуп турган болзо, мындый шӱӱлтелерди ундыбагар. Агару Бичиктиҥ нормаларыла јӱрзегер, слер бойоорды тооп турараар, су-кадык болороор, эмоциональный јанынаҥ шыралабазаар ла Иеговала колбулараарды кичееп алараар. Ченелтеге кирбей албаданып ийзеер, оноҥ ары чын јӱрерге јеҥил болор. Је секс јанынаҥ јескинчилӱ кӧрӱмди Сатана ӱредип турган деп ундыбагар. Оныҥ учун Кудайдыҥ принциптериле јӱрзеер, слер «јаманды» јеҥедигер (1 Иоанн 2:14).

10. 1 Иоанн 1:9-тагы сӧстӧр биске Иеговага ару уйатту иштеерге канайып болужат?

¹⁰ Бис кинчекке Иегованыҥ кӧрӱмиле јӱрерге кӱӱнзейдис. Оныҥ учун кинчек этпеске, бастыра ийде-кӱчистеҥ албаданадыс. Је јастырып ийзеес, Иеговага мӱргӱӱлде кинчегисти ачыгынча куучындап јадыс. (1 Иоанн 1:9 кычырыгар.) Је уур кинчек эткен болзоос, Иегованыҥ бистерди кичеерге тургускан аксагалдарына баштанадыс (Иак. 5:14—16). Аксагалдарла куучындашкан кийнинде бис эткен кинчегис учун бойысты јинбес учурлу. Нениҥ учун дезе Иегова, сӱӱштӱ Адабыс, бистиҥ кинчектеристи таштаарга, бойыныҥ Уулын толынты эдип берген. Иегова кинчегин алынып турган кижиниҥ јаманын таштап салар деп, куру јерге айтпай јат. Айдарда, Иеговага ару уйатту иштеерге, биске не де чаптыгын јетирип болбос (1 Иоанн 2:1, 2, 12; 3:19, 20).

11. Кудайга бӱдеристи уйададатан ӱредӱлердеҥ коруланарга нени эдер керек?

¹¹ Бистерге Кудайдаҥ јана баскан улустыҥ ӱредӱлерин јууктатпас керек. Христиан јуун тӧзӧлгӧнинеҥ ала, Сатана Кудайдыҥ чындык ишчилерине алаҥзуга экелетен санаалар кийдирерге албаданат. Оныҥ учун биске чынды тӧгӱннеҥ ылгаштырып турар керек *.  Бистиҥ ӧштӱлер интернет эмезе социальный медиа ажыра Иеговага бӱткенисти ле ака-эјелерге сӱӱжисти уйададарга тӧгӱн неме таркадат. Је андый тӧгӱнди кем јайып турганын ундыбагар ла ого тӧгӱндетпегер! (1 Иоанн 4:1, 6; Ачыл. 12:9).

12. Билип алган чындыктарга бӱдеристи нениҥ учун тыҥыдар керек?

¹² Сатана бистиҥ бӱдӱмјибисти буспазын деп турган болзоос, биске Иисуска бӱдӱп турганысты тыҥыдар керек ле ол Иегованыҥ амадузында кандый иш эдип турганын јакшы оҥдоп турар керек. Анайда ок керсӱ ле бӱдӱмјилӱ кулга бӱдер керек ле Иегова бойыныҥ организациязын шак ла бу кул ажыра башкарып турган деп алаҥзыбас керек (Матф. 24:45—47). Кудайдыҥ Сӧзин улам сайын ӱренип турзаас, андый бӱдӱмјибис тыҥыыр. Ол тушта бистиҥ бӱдӱмјибис тереҥ тазылданып калган агашка тӱҥей болор. Бого тӱҥей шӱӱлтени Павел Колоссыдагыларга бичиген самаразында айткан: «Христос Иисус Кайраканды канайып алынганыгар, анайып Оныҥ Бойында јӱригер. Слерди ӱреткениле, Оныҥ Бойында тазылданып, јӱрӱмигерди тӧзӧгӧр, бӱдеринде тыҥыдыныгар» (Кол. 2:6, 7). Бис бойыстыҥ бӱдӱмјибисти тыҥыдып турзаас, Сатана ла оныҥ ишчилери бистиҥ бӱдӱмјибисти уйададып болбос (2 Иоанн 8, 9).

13. Биске нени кайкабас керек, нениҥ учун?

¹³ Телекейдиҥ бисти кӧрӧр кӱӱни јок болгонына кайкабас керек (1 Иоанн 3:13). Иоанн: «Телекей дезе бӱткӱлинче јаманныҥ табында» — деп бичиген (1 Иоанн 5:19). Бу телекейдиҥ учы јууктаган сайын Сатананыҥ чугулы там ла тыҥып јат (Ачыл. 12:12). Ол дезе биске јӱк ле билдирбес јанынаҥ табарулар эдип турган эмес, темдектезе кинчектӱ кӱӱнисти кӱйбӱредет эмезе Кудайдаҥ јана баскан улустыҥ тӧгӱнине кийдирерге албаданат. Је ол анайда ок Иегованыҥ ишчилерине ачыгынча табарулар эдет. Сатана јарлаар ишти токтодотон ло бистиҥ бӱдӱмјибисти бузатан ӧй чек ас артып калган деп билип јат. Оныҥ учун кезик ороондордо бистиҥ ижиске кандый бир токтодулар тургузылганына эмезе чек токтодылып калганына кайкабай јадыс. Је андый да ороондордо јадып турган ака-эјелер Иеговага оноҥ ло ары турумкай иштеп јадылар. Олордыҥ теминеҥ, Сатана канайып та албаданза, бис оны јеҥип алар аргалу деп кӧрӱнет.

14. Ака-эјелерге чындыкта артарга канайып болужар?

¹⁴ Ака-эјелерге чындыкта артсын деп болужарга, биске олорды килеер керек (1 Иоанн 3:10, 11, 16—18). Бой-бойыска сӱӱжисти јӱк ле јакшы ӧйдӧ эмес, је кӱч те ӧйдӧ кӧргӱзип турзаас јакшы болор. Јуунда кем-кем бойыныҥ јуук кижизин јылыйткан болзо, слер оны токунадып эмезе ого база канай-канай болужып болороор бо? Эмезе ака-эјелер ар-бӱткенниҥ тӱбегине туштаган болзо, слер олордыҥ тураларын ла Каандыктыҥ Туразын ойтодоҥ тударында болужып болороор бо? Ака-эјелеристи сӱӱп ле килеп турганысты јӱк ле сӧстӧрисле эмес, је эткен керектерисле кӧргӱзедис.

15. 1 Иоанн 4:7, 8-ле болзо, биске нени эдер керек?

¹⁵ Ака-эјелерди сӱӱп турганыстаҥ теҥеридеги Адабыстаҥ тем алып турганыс кӧрӱнет. (1 Иоанн 4:7, 8 кычырыгар.) А сӱӱрге, бой-бойыстыҥ јаманысты таштаар керек. Бисти кем-кем ачындырып ийген болзо, биске оныҥ јаманын таштаар керек ле јастыразын эске алынбас керек, анайып бис оны сӱӱп турганысты кӧргӱзедис (Кол. 3:13). Альдо деп акала мындый учурал болгон. Бир катап ол бир аканыҥ сӧстӧрине ачынган. А Альдо дезе, ол аканы тооп турган болгон. Ол ака  Альдоныҥ угы-тӧзи керегинде ачынчылу сӧстӧр айткан. «Ол ака керегинде јаман сананбаска, јаантайын Иеговага мӱргӱгем» — деп, Альдо айдат. Анайда ок Альдо бу аканы јарлаар ишке кычырган. Бу ӧйдӧ Альдо ол акага неге ачынганын куучындап берген. Ол мынайып эске алат: «Ака мениҥ ачынганымды билип ийеле, јаманын таштазын деп сураган. Оныҥ айткан сӧстӧринеҥ акту јӱрегинеҥ јастыразын алынып турганы кӧрӱнген. Анайып мениҥ ачынганым ӧдӧ берерде, бис ойто јакшы најылажа бергенис».

16, 17. Бисте кандый кӱӱн-санаа болор учурлу?

¹⁶ Бис апостол Иоанныҥ агару тынла бичиген самараларын кычырып, ака-эјелерди тыҥ сӱӱгенин ле олордыҥ бӱдӱмјизи бек болзын деп кӱӱнзегенин кӧрӧдис. Христосло кожо Иоанндый ишчилер башкарар деп сӱӱнип јадыс (1 Иоанн 2:27).

¹⁷ Айдарда, бу јӧрмӧлдӧ кӧргӧнисле, Иеговага сӧсуккур болуп, оноҥ ло ары чындыкта јӱректер. Кудайдыҥ сӧзин ӱренигер ле анда бичилгенине бӱдӱп туругар. Иисуска бӱдӱмјигерди тыҥыдыгар. Бу телекейдиҥ философиязынаҥ ла Кудайдаҥ јана баскан улустыҥ ӱредӱлеринеҥ коруланып туругар. Ундыбагар: Иеговага экијӱстенип, иштенип болбозыгар. Оныҥ учун кинчекке тартып турган улусты бир де укпагар. Карын Иегованыҥ бийик нормаларыла јӱригер. Анайда ок слерди ачындырган улустыҥ јаманын таштагар ла кандый бир кӱчтерге туштаган улуска болужыгар. Анайып слер олорго эмоциональный да, ич-кӧгӱс те ийде-кӱч беререер. Ол тушта кандый да кӱчтер болзо, бис оноҥ ло ары чындыкта јӱрерис.