ВАВИЛОНДО казынтылар эдилген тушта, печкеге ӧртӧп, белетеп салган коркышту кӧп кирпичтер табылган. Бу кирпичтерле калалар туткан. Археолог Ро́берт Ко́льдевейдиҥ айтканыла, бу кирпичтерди ӧртӧгӧн печкелер «каланыҥ тыштында болгон, нениҥ учун дезе анда той балкаш та јакшы болгон, от одырарга, коркышту кӧп јыраалар да ӧскӧн».

Вавилонныҥ јебрен документтерин кӧрзӧ, бу печкелерди коркышту јаман да немелер эдерге тузаланган. Торонтодогы университетте ассириологияныҥ профессоры Поль-Але́н Больё мынайып айткан: «Вавилонныҥ бичиктеринеҥ... алдында ӧйдӧ оныҥ каандары тӱймеечилерди эмезе олордыҥ агаруларын байлабай турган улусты печкеге ӧртӧзин деп јакарып туратаны кӧрӱнет». Темдектезе, Навуходоносордыҥ ӧйинде бичилген мындый сӧстӧр табылган: «Олорды јоголып калзын деп, отко таштагар, печкеге ӧртӧгӧр... олордыҥ ыжы ӧрӧ кӧдӱрилип, јайылзын. Оттыҥ јаан јалбыжына бастыра кӱйӱп калзын».

Бу сӧстӧрди уккан улуска Даниил деп бичиктиҥ 3-чи бажалыгындагы учурал сагыжына кирер. Ол ӧйдӧ Навуходоносор каан Вавилонныҥ стенелериниҥ тышты јанындагы, Деир деп јалаҥ јерде, коркышту бийик алтын чалу туткан. Бу чалуга ӱч еврей уул бажырбаста, Навуходоносор коркышту тыҥ атыйланган. Оныҥ учун Шадрах, Мешах ла Аведнегоны јети катапка тыҥ изидип салган печкеге таштазын деп јакарып ийген. Је бу ӧйдӧ олорды Кудайдыҥ ангели аргадап алган (Дан. 3:1—6, 19—28).

Вавилондо табылган кирпичтер де Агару Бичикте јастыралар јок деп база керелеп јат. Бу кирпичтердиҥ кӧп сабазында каанды мактап турган сӧстӧр бичилген. Темдектезе мындый: «Навуходоносор, Вавилонныҥ кааны... Бу байзыҥды, Улу каанныҥ туразын мен туткам... [...] Ондо мениҥ бала-баркам јажын-чакка башкарзын...» Бу сӧстӧр Даниил 4:30-та Навуходоносордыҥ бойын мактап айткан сӧстӧрди эске алындырат: «Улу Вавилон, каандардыҥ тӧс јери! Улус мениҥ магымды кӧрзин деп, мен оны бойымныҥ ийде-кӱчимле туткам!»